‘ਤੁਹਾਨੂੰ ਇਸਾਈ ਧਰਮ ਬਾਰੇ ਕੁੱਝ ਨਹੀਂ ਪਤਾ’
ਨਵੀਂ ਦਿੱਲੀ, 11 ਅਪ੍ਰੈਲ: ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਟਵਿੱਟਰ ’ਤੇ ਗ਼ਲਤੀ ਨਾਲ ‘ਈਸਟਰ’ ਦੀ ਬਜਾਏ ‘ਗੁਡ ਫ਼ਰਾਈਡੇ’ ਦੀਆਂ ਸ਼ੁਭਕਾਮਨਾਵਾਂ ਦੇ ਦਿਤੀਆਂ, ਜਿਸ ਕਰ ਕੇ ਸੋਸ਼ਲ ਮੀਡੀਆ ’ਤੇ ਉਹ ਲੋਕਾਂ ਦੇ ਨਿਸ਼ਾਨੇ ’ਤੇ ਆ ਗਏ।
ਟਰੰਪ ਨੇ ਸ਼ੁਕਰਵਾਰ ਨੂੰ ਟਵਿੱਟਰ ’ਤੇ ਅਪਣੇ ਸੰਦੇਸ਼ ’ਚ ਲਿਖਿਆ ਸੀ, ‘‘ਸਾਰਿਆਂ ਨੂੰ ਗੁਰ ਫ਼ਰਾਈਡੇ ਦੀਆਂ ਸ਼ੁਭਕਾਮਨਾਵਾਂ।’’ ਇਸ ਨੂੰ ਲੈ ਕੇ ਲੋਕਾਂ ਨੇ ਉਨ੍ਹਾਂ ਦੀ ਆਲੋਚਨਾ ਕੀਤੀ।
ਇਸਾਈ ਧਰਮ ਦੇ ਮੁਤਾਬਕ, ਗੁਡ ਫ਼ਰਾਈਡੇ ਉਸ ਦਿਨ ਮਨਾਇਆ ਜਾਂਦਾ ਹੈ ਜਿਸ ਦਿਨ ਈਸਾ ਮਸੀਹ ਨੂੰ ਸੂਲੀ ’ਤੇ ਟੰਗਿਆ ਗਿਆ ਸੀ। ਇਸ ਦਿਨ ਨੂੰ ਪੂਰੀ ਦੁਨੀਆਂ ’ਚ ਇਸਾਈਆਂ ਲਈ ਦੁਖ ਦਾ ਦਿਨ ਮੰਨਿਆ ਜਾਂਦਾ ਹੈ। ਜਦਕਿ ਐਤਵਾਰ ਨੂੰ ਮਨਾਇਆ ਜਾਣ ਵਾਲਾ ਈਸਟਰ ਈਸਾ ਮਸੀਹ ਦੇ ਮੁੜ ਜਿਊਂਦਾ ਹੋਣ ਦੀ ਖ਼ੁਸ਼ੀ ’ਚ ਮਨਾਇਆ ਜਾਂਦਾ ਹੈ।
ਅਜਿਹੇ ’ਚ ਲੋਕਾਂ ਨੇ ਟਰੰਪ ਦੀ ਬੁਨਿਆਦੀ ਗਿਆਨ ਨਾ ਹੋਣ ਨੂੰ ਲੈ ਕੇ ਆਲੋਚਨਾ ਕੀਤੀ। ਟਰੰਪ ਦੇ ਇਕ ਫ਼ਾਲੋਅਰ ਨੇ ਲਿਖਿਆ, ‘‘ਇਹ ਇਕ ਹੋਰ ਸੱਚ ਹੈ ਕਿ ਤੁਸੀਂ ਈਸਾਈ ਧਰਮ ਬਾਰੇ ਕੁੱਝ ਨਹੀਂ ਜਾਣਦੇ।’’ ਟਵਿੱਟਰ ਦੇ ਇਕ ਹੋਰ ਪ੍ਰਯੋਗਕਰਤਾ ਨੇ ਲਿਖਿਆ ਕਿ ਇਹ ਇਸਾਈਆਂ ਲਈ ਮਹੱਤਵਪੂਰਨ ਦਿਨ ਹੈ। ਇਸ ਨੂੰ ਖ਼ੁਸ਼ੀ ਦਾ ਸ਼ੁਕਰਵਾਰ ਨਹੀਂ ਕਿਹਾ ਜਾਂਦਾ। ਰਾਸ਼ਟਰਪਤੀ ਨਹੀਂ ਜਾਣਦੇ ਕਿ ਗੁਡ ਫ਼ਰਾਈਡੇ ਵਾਲੇ ਦਿਨ ਕੀ ਹੋਇਆ ਸੀ।
ਹਾਲਾਂਕਿ ਵਾਇਟ ਹਾਊਸ ’ਚ ਕੋਰੋਨਾ ਵਾਇਰਸ ਸੰਕਟ ’ਤੇ ਅਪਣੀ ਰੋਜ਼ਾਨਾ ਪ੍ਰੈੱਸ ਕਾਨਫ਼ਰੰਸ ’ਚ ਟਰੰਪ ਨੇ ਕਿਹਾ, ‘‘ਸਾਰਿਆਂ ਦਾ ਬਹੁਤ ਧਨਵਾਦ ਅਤੇ ਨਮਸਕਾਰ। ਅੱਜ ਗੁਡ ਫ਼ਰਾਈਡੇ ਹੈ ਅਤੇ ਇਸ ਐਤਵਾਰ ਨੂੰ ਈਸਾਈ ਲੋਕ ਈਸਟਰ ਦੀ ਖ਼ੁਸ਼ੀ ਮਨਾਉਣਗੇ।’’ (ਪੀਟੀਆਈ)