ਇਕ ਮੀਟਰ ਦੂਰ ਵੀ ਦਿਖਾਈ ਨਹੀਂ ਦਿੰਦੇ ਵਾਹਨ
ਨਵੀਂ ਦਿੱਲੀ : ਦਿੱਲੀ ਦੀ ਹਵਾ ਲਾਹੌਰ-ਕਰਾਚੀ ਅਤੇ ਬੀਜਿੰਗ ਨਾਲੋਂ ਵੀ ਜ਼ਿਆਦਾ ਖਰਾਬ ਹੈ। ਅੱਜ ਲਾਹੌਰ ਦਾ AQI 145 ਸੀ, ਬੀਜਿੰਗ ਦਾ 106 ਜਦਕਿ ਦਿੱਲੀ ਦਾ AQI ਲਗਭਗ 152 ਦਰਜ ਕੀਤਾ ਗਿਆ ਹੈ। ਇਸ ਕਾਰਨ ਰਾਜਧਾਨੀ ਧੁੰਦ ਦੀ ਸੰਘਣੀ ਚਾਦਰ ਵਿੱਚ ਲਪੇਟੀ ਹੋਈ ਦਿਖਾਈ ਦਿੱਤੀ। ਹਾਲਾਤ ਇਹ ਸਨ ਕਿ ਸੜਕ 'ਤੇ ਇਕ ਮੀਟਰ ਦੂਰ ਵੀ ਵਾਹਨ ਨਜ਼ਰ ਨਹੀਂ ਆ ਰਹੇ ਸਨ। ਵਿਜ਼ੀਬਿਲਟੀ ਘੱਟ ਹੋਣ ਕਾਰਨ ਲੋਕਾਂ ਨੂੰ ਕਾਫੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪਿਆ। ਬਿਮਾਰਾਂ ਅਤੇ ਬਜ਼ੁਰਗਾਂ ਨੂੰ ਸਾਹ ਲੈਣ ਵਿੱਚ ਵੀ ਤਕਲੀਫ਼ ਦਾ ਸਾਹਮਣਾ ਕਰਨਾ ਪਿਆ।
ਨੋਇਡਾ ਵਿੱਚ ਵੀ ਧੁੰਦ ਦਾ ਅਸਰ ਦੇਖਣ ਨੂੰ ਮਿਲਿਆ। ਦਿਨ ਵੇਲੇ ਵਾਹਨਾਂ ਦੀਆਂ ਲਾਈਟਾਂ ਬਲਦੀਆਂ ਦੇਖੀਆਂ ਗਈਆਂ। ਹਰ ਰੋਜ਼ ਗਲੀ ਦੀ ਸਫਾਈ ਅਤੇ ਪਾਣੀ ਦੇ ਛਿੜਕਾਅ ਦੇ ਨਿਰਦੇਸ਼ ਦਿੱਤੇ ਗਏ ਹਨ। ਅੱਜ ਸਵੇਰੇ ਦੁਨੀਆ ਦੇ ਚੋਟੀ ਦੇ 10 ਸਭ ਤੋਂ ਖਰਾਬ ਹਵਾ ਵਾਲੇ ਸ਼ਹਿਰਾਂ ਵਿੱਚ ਭਾਰਤ ਤੋਂ ਦਿੱਲੀ ਅਤੇ ਕੋਲਕਾਤਾ, ਪਾਕਿਸਤਾਨ ਵਿੱਚ ਕਰਾਚੀ ਅਤੇ ਲਾਹੌਰ, ਚੀਨ ਵਿੱਚ ਬੀਜਿੰਗ ਅਤੇ ਚੇਂਗਦੂ ਸ਼ਾਮਲ ਹਨ।
ਸੋਮਵਾਰ ਨੂੰ ਦਿੱਲੀ ਸਰਕਾਰ ਨੇ ਕੁਝ ਢਿੱਲ ਦਿੱਤੀ ਹੈ ਪਰ ਹਵਾ ਦੀ ਹਾਲਤ ਖਰਾਬ ਹੋਣ ਕਾਰਨ ਕਈ ਪਾਬੰਦੀਆਂ ਅਜੇ ਵੀ ਲਾਗੂ ਹਨ। ਦਿੱਲੀ 'ਚ 13 ਨਵੰਬਰ ਤੱਕ BS-3 ਪੈਟਰੋਲ ਅਤੇ BS-4 ਡੀਜ਼ਲ ਵਾਹਨਾਂ ਦੀ ਆਵਾਜਾਈ 'ਤੇ ਪਾਬੰਦੀ ਰਹੇਗੀ। ਇੱਟਾਂ ਦੇ ਭੱਠੇ, ਹਾਟ ਮਿਕਸ ਪਲਾਂਟ ਅਤੇ ਸਟੋਨ ਕਰੱਸ਼ਰ ਨੂੰ ਚਲਾਉਣ ਦੀ ਇਜਾਜ਼ਤ ਨਹੀਂ ਹੈ। ਹਾਲਾਂਕਿ, ਦੁੱਧ-ਡੇਅਰੀ ਯੂਨਿਟਾਂ ਅਤੇ ਦਵਾਈਆਂ ਬਣਾਉਣ ਵਾਲੀਆਂ ਸਨਅਤਾਂ-ਫੈਕਟਰੀਆਂ ਨੂੰ ਛੋਟ ਦਿੱਤੀ ਗਈ ਹੈ।
