ਕੀਨੀਆ ਦੇ ਇਕ ਸੰਸਦ ਮੈਂਬਰ 22 ਸਾਲ ਪਹਿਲਾਂ ਲਏ 200 ਰੁਪਏ ਦਾ ਕਰਜ਼ਾ ਚੁਕਾਉਣ ਲਈ ਵਾਪਸ ਪਰਤੇ ਹਨ।
ਮੁੰਬਈ: ਮਹਾਰਾਸ਼ਟਰ ਦੇ ਔਰੰਗਾਬਾਦ ਵਿਚ ਇਕ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਕੀਨੀਆ ਦੇ ਇਕ ਸੰਸਦ ਮੈਂਬਰ 22 ਸਾਲ ਪਹਿਲਾਂ ਲਏ 200 ਰੁਪਏ ਦਾ ਕਰਜ਼ਾ ਚੁਕਾਉਣ ਲਈ ਵਾਪਸ ਪਰਤੇ ਹਨ। ਦਰਅਸਲ ਕੀਨੀਆ ਦੇ ਨਿਆਰੀਬਾਰੀ ਤੋਂ ਸੰਸਦ ਮੈਂਬਰ ਰਿਚਰਡ ਨਿਆਗਾਕਾ ਟੋਂਗੀ ਔਰੰਗਾਬਾਦ ਦੇ ਇਕ ਲੋਕਲ ਮੈਨੇਜਮੈਂਟ ਕਾਲਜ ਵਿਚ ਪੜ੍ਹਦੇ ਸਨ। ਇਸ ਦੌਰਾਨ ਉਹਨਾਂ ‘ਤੇ 200 ਰੁਪਏ ਦਾ ਕਰਜ਼ਾ ਹੋ ਗਿਆ ਸੀ।
ਇਸ ਕਰਜ਼ੇ ਨੂੰ ਚੁਕਾਉਣ ਲਈ ਉਹ 22 ਸਾਲਾਂ ਬਾਅਦ ਔਰੰਗਾਬਾਦ ਪਰਤੇ ਹਨ। ਰਿਚਰਡ ਨਿਆਗਕਾ ਟੋਂਗੀ ਨੇ ਦੱਸਿਆ ਕਿ ਉਹਨਾਂ ਨੇ 22 ਸਾਲ ਪਹਿਲਾਂ 200 ਰੁਪਏ ਦਾ ਕਰਜ਼ਾ ਲਿਆ ਸੀ, ਜਿਸ ਨੂੰ ਉਹ ਚੁਕਾ ਨਹੀਂ ਸਕੇ। ਰਿਚਰਡ ਨੇ ਦੱਸਿਆ ਕਿ ਉਹਨਾਂ ਲੋਕਾਂ ਨੇ ਉਸ ਨੂੰ ਵਧੀਆ ਖਾਣਾ ਦਿੱਤਾ ਸੀ ਪਰ ਉਸ ਕੋਲੋਂ ਉਹਨਾਂ ਦੇ ਪੈਸੇ ਨਹੀਂ ਵਾਪਸ ਕੀਤੇ ਗਏ। ਉਹਨਾਂ ਕਿਹਾ ਜਦੋਂ ਉਹਨਾਂ ਦਾ ਵਿਆਹ ਹੋਇਆ ਸੀ ਤਾਂ ਉਹਨਾਂ ਨੇ ਕਸਮ ਖਾਧੀ ਸੀ ਕਿ ਉਹ ਉਸ ਵਿਅਕਤੀ ਦੇ ਪੈਸੇ ਦੇਣ ਵਾਪਸ ਭਾਰਤ ਆਉਣਗੇ। ਉਹਨਾਂ ਕਿਹਾ ਕਿ ਪੈਸੇ ਵਾਪਸ ਕਰ ਕੇ ਉਹਨਾਂ ਦੇ ਮਨ ਨੂੰ ਸ਼ਾਂਤੀ ਹੈ।
ਰਿਚਰਡ ਨੇ ਕਿਹਾ ਕਿ 22 ਸਾਲ ਪਹਿਲਾਂ ਉਸ ਦੀ ਸਥਿਤੀ ਠੀਕ ਨਹੀਂ ਸੀ ਤਾਂ ਇਸ ਪਰਵਾਰ ਨੇ ਉਹਨਾਂ ਦੀ ਮਦਦ ਕੀਤੀ ਸੀ। ਇਹ ਕਰਜ਼ਾ ਉਹਨਾਂ ਨੇ ਕਾਸ਼ੀਨਾਥ ਗਵਲੀ ਤੋਂ ਲਿਆ ਸੀ। 22 ਸਾਲਾਂ ਬਾਅਦ ਹੁਣ ਕਾਸ਼ੀਨਾਥ ਦੀ ਉਮਰ 70 ਸਾਲ ਹੋ ਗਈ ਹੈ। ਜਦੋਂ ਉਹ ਰਿਚਰਡ ਨੂੰ ਮਿਲੇ ਤਾਂ ਉਹ ਭਾਵੁਕ ਹੋ ਗਏ। ਇਸ ਦੌਰਾਨ ਰਿਚਰਡ ਨੇ ਕਾਸ਼ੀਨਾਥ ਦੇ ਪਰਵਾਰ ਦਾ ਧੰਨਵਾਦ ਵੀ ਕੀਤਾ।