ਮਹਿਬੂਬਾ ਮੁਫ਼ਤੀ ਨੇ 75 ਸਾਲ ਦੇ ਫਰਕ 'ਤੇ ਕੱਸਿਆ ਤੰਜ਼
ਸ੍ਰੀਨਗਰ - ਜੰਮੂ-ਕਸ਼ਮੀਰ ਦੀ ਸਾਬਕਾ ਮੁੱਖ ਮੰਤਰੀ ਮਹਿਬੂਬਾ ਮੁਫ਼ਤੀ ਨੇ ਸੁਤੰਤਰਤਾ ਦਿਵਸ ਤੋਂ ਪਹਿਲਾਂ ਦੋ ਤਸਵੀਰਾਂ ਸ਼ੇਅਰ ਕਰਕੇ ਕਸ਼ਮੀਰ ਦੇ ਹਾਲਾਤ 'ਤੇ ਵਿਅੰਗ ਕੱਸਿਆ ਹੈ। ਮਹਿਬੂਬਾ ਮੁਫਤੀ ਨੇ ਆਪਣੇ ਟਵਿੱਟਰ ਅਕਾਊਂਟ 'ਤੇ ਦੋ ਤਸਵੀਰਾਂ ਸ਼ੇਅਰ ਕੀਤੀਆਂ ਹਨ, ਜਿਨ੍ਹਾਂ 'ਚੋਂ ਇਕ ਦੇਸ਼ ਦੇ ਪਹਿਲੇ ਪ੍ਰਧਾਨ ਮੰਤਰੀ ਜਵਾਹਰ ਲਾਲ ਨਹਿਰੂ ਦੀ ਹੈ, ਜਦਕਿ ਦੂਜੀ ਤਸਵੀਰ ਐਤਵਾਰ ਅੱਜ (13 ਅਗਸਤ) ਦੀ ਮਨੋਜ ਸਿਨਹਾ ਦੀ ਹੈ।
ਜੰਮੂ ਅਤੇ ਕਸ਼ਮੀਰ (ਯੂਟੀ) ਦੇ ਉਪ ਰਾਜਪਾਲ ਮਨੋਜ ਸਿਨਹਾ ਨੇ ਐਤਵਾਰ ਨੂੰ ਸ਼ੇਰ-ਏ-ਕਸ਼ਮੀਰ ਇੰਟਰਨੈਸ਼ਨਲ ਕਾਨਫਰੰਸ ਸੈਂਟਰ ਤੋਂ ਸ਼੍ਰੀਨਗਰ ਦੇ ਬੋਟੈਨੀਕਲ ਗਾਰਡਨ ਤੱਕ 'ਹਰ ਘਰ ਤਿਰੰਗਾ ਯਾਤਰਾ' ਨੂੰ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕੀਤਾ। ਇਸ ਦੌਰਾਨ ਐੱਲ.ਜੀ. ਮਨੋਜ ਸਿਨਹਾ ਹੱਥਾਂ 'ਚ ਤਿਰੰਗਾ ਲੈ ਕੇ ਰੈਲੀ ਦੀ ਅਗਵਾਈ ਕਰ ਰਹੇ ਸਨ, ਜਦਕਿ ਹੋਰ ਲੋਕ ਭਾਰਤ ਮਾਤਾ ਦੀ ਜੈ ਦੇ ਨਾਅਰੇ ਲਾਉਂਦੇ ਹੋਏ ਉਨ੍ਹਾਂ ਦੇ ਨਾਲ ਚੱਲ ਰਹੇ ਸਨ।
ਸਿਨਹਾ ਨੇ ਇਸ ਸਮਾਗਮ ਵਿਚ ਕਿਹਾ, "ਜਿਹੜੇ ਲੋਕ ਕਹਿੰਦੇ ਸਨ ਕਿ ਜੰਮੂ-ਕਸ਼ਮੀਰ ਵਿਚ ਤਿਰੰਗਾ ਲਹਿਰਾਉਣ ਲਈ ਕੋਈ ਨਹੀਂ ਬਚੇਗਾ, ਉਹ ਸਮਝ ਗਏ ਹੋਣਗੇ ਕਿ ਜੰਮੂ-ਕਸ਼ਮੀਰ ਦਾ ਹਰ ਨੌਜਵਾਨ ਰਾਸ਼ਟਰੀ ਝੰਡੇ ਨੂੰ ਓਨਾ ਹੀ ਪਿਆਰ ਕਰਦਾ ਹੈ ਜਿੰਨਾ ਦੇਸ਼ ਦੇ ਕਿਸੇ ਹੋਰ ਹਿੱਸੇ ਦੇ ਲੋਕ ਕਰਦੇ ਹਨ।
ਪੀਡੀਪੀ ਮੁਖੀ ਨੇ ਇਸ ਪ੍ਰੋਗਰਾਮ ਦੀ ਤਸਵੀਰ ਦੀ ਤੁਲਨਾ ਪੰਡਿਤ ਨਹਿਰੂ ਦੀ ਤਸਵੀਰ ਨਾਲ ਕੀਤੀ ਹੈ। ਮੁਫ਼ਤੀ ਨੇ ਲਿਖਿਆ ਕਿ ਪ੍ਰਧਾਨ ਮੰਤਰੀ ਜਵਾਹਰ ਲਾਲ ਨਹਿਰੂ 1949 ਦੇ ਆਸਪਾਸ ਸ਼੍ਰੀਨਗਰ ਦੇ ਲਾਲ ਚੌਕ 'ਤੇ ਉਤਸ਼ਾਹੀ ਕਸ਼ਮੀਰੀਆਂ ਦੇ ਵਿਚਕਾਰ ਤਿਰੰਗੇ ਦੇ ਨਾਲ ਖੜ੍ਹੇ ਸਨ। 2023 ਵਿਚ, LG ਪ੍ਰਸ਼ਾਸਨ ਉਸੇ ਰਾਸ਼ਟਰੀ ਝੰਡੇ ਨੂੰ ਲੈ ਕੇ ਜਾ ਰਿਹਾ ਹੈ ਜੋ ਸੁਰੱਖਿਆ ਕਰਮਚਾਰੀਆਂ ਦੁਆਰਾ ਘਿਰਿਆ ਹੋਇਆ ਹੈ।
ਮਹਿਬੂਬਾ ਮੁਫ਼ਤੀ ਦੁਆਰਾ ਸਾਂਝੀ ਕੀਤੀ ਪੰਡਿਤ ਨਹਿਰੂ ਦੀ ਤਸਵੀਰ 'ਤੇ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਇਹ ਨਵੰਬਰ 1949 ਦੀ ਹੈ, ਜਦੋਂ ਪ੍ਰਧਾਨ ਮੰਤਰੀ ਨਹਿਰੂ ਨੇ ਕਸ਼ਮੀਰ ਦੇ ਲਾਲ ਚੌਕ 'ਤੇ ਆਪਣਾ ਪਹਿਲਾ ਸੰਬੋਧਨ ਕੀਤਾ ਸੀ। ਆਪਣੇ ਭਾਸ਼ਣ ਦੌਰਾਨ ਦੇਸ਼ ਦੇ ਪਹਿਲੇ ਪ੍ਰਧਾਨ ਮੰਤਰੀ ਨੇ ਕਿਹਾ ਸੀ, ਭਾਰਤ ਕਸ਼ਮੀਰ ਨੂੰ ਕਦੇ ਵੀ ਝੁਕਣ ਨਹੀਂ ਦੇਵੇਗਾ ਅਤੇ ਭਾਰਤੀ ਫੌਜ ਕਸ਼ਮੀਰ ਵਿਚੋਂ ਆਖਰੀ ਹਮਲਾਵਰ ਨੂੰ ਬਾਹਰ ਕੱਢਣ ਤੱਕ ਲੜੇਗੀ।
