ਮਹਾਰਾਸ਼ਟਰ ਸਰਕਾਰ ਦੇ ਆਵਾਸ ਮੰਤਰੀ ਜਿਤੇਂਦਰ ਅਵਹਾੜ ਦੇ 14 ਨਿੱਜੀ ਸਟਾਫ ਕੋਰੋਨਾ ਸਕਾਰਾਤਮਕ ਪਾਏ ਗਏ ਹਨ।
ਮੁੰਬਈ: ਮਹਾਰਾਸ਼ਟਰ ਸਰਕਾਰ ਦੇ ਹਾਊਸਿੰਗ ਮੰਤਰੀ ਜਿਤੇਂਦਰ ਅਵਹਾੜ ਦੇ 14 ਨਿੱਜੀ ਸਟਾਫ ਕੋਰੋਨਾ ਸਕਾਰਾਤਮਕ ਪਾਏ ਗਏ ਹਨ। ਇਹਨਾਂ 14 ਸਟਾਫ ਮੈਬਰਾਂ ਵਿਚੋਂ 5 ਪੁਲਿਸ ਕਾਂਸਟੇਬਲ ਹਨ ਜੋ ਉਹਨਾਂ ਦੀ ਸੁਰੱਖਿਆ ਵਿਚ ਤਾਇਨਾਤ ਹਨ, ਜਦਕਿ ਬਾਕੀ 9 ਵਿਅਕਤੀਆਂ ਵਿਚ ਉਹਨਾਂ ਦਾ ਨਿੱਜੀ ਸਟਾਫ, ਘਰ ਵਿਚ ਕੰਮ ਕਰਨ ਵਾਲੇ ਅਤੇ ਪਾਰਟੀ ਵਰਕਰ ਸ਼ਾਮਲ ਹਨ।
Photo
ਇਹਨਾਂ ਦਾ ਕੋਰੋਨਾ ਟੈਸਟ ਦਾ ਨਤੀਜਾ ਕੁਝ ਦੇਰ ਪਹਿਲਾਂ ਆਇਆ ਸੀ। ਮੰਤਰੀ ਜਿਤੇਂਦਰ ਅਵਹਾੜ ਵੀ ਕੁਆਰੰਟੀਨ ਹੋ ਗਏ ਹਨ। ਐਨਸੀਪੀ ਨੇਤਾ ਜਿਤੇਂਦਰ ਅਵਹਾੜ ਨੇ ਸੋਮਵਾਰ ਨੂੰ ਦੱਸਿਆ ਸੀ ਕਿ ਉਹ ਇਕ ਅਜਿਹੇ ਵਿਅਕਤੀ ਦੇ ਸੰਪਰਕ ਵਿਚ ਆਏ ਸਨ, ਜੋ ਬਾਅਦ ਵਿਚ ਕੋਰੋਨਾ ਸਕਾਰਾਤਮਕ ਪਾਇਆ ਗਿਆ। ਇਸ ਤੋਂ ਬਾਅਦ ਉਹਨਾਂ ਨੇ ਕੁਆਰੰਟੀਨ ਜਾਣ ਦਾ ਐਲਾਨ ਕੀਤਾ ਸੀ।
Photo
ਇਸ ਦੌਰਾਨ ਉਹਨਾਂ ਦੇ ਨਿੱਜੀ ਸਟਾਫ ਦੇ ਵੀ ਕੋਰੋਨਾ ਟੈਸਟ ਸਕਾਰਾਤਮਕ ਆਏ ਹਨ। ਉਹਨਾਂ ਵਿਚੋਂ ਬਹੁਤ ਸਾਰੇ ਉਹਨਾਂ ਦੇ ਬੰਗਲੇ ਵਿਚ ਕੰਮ ਕਰਦੇ ਹਨ। ਜਿਤੇਂਦਰ ਅਵਹਾੜ ਥਾਣੇ ਜ਼ਿਲੇ ਦੀ ਕਲਵਾ-ਮੁੰਬੜਾ ਵਿਧਾਨ ਸਭਾ ਦੀ ਨੁਮਾਇੰਦਗੀ ਕਰਦੇ ਹਨ, ਪਿਛਲੇ ਕੁਝ ਹਫਤਿਆਂ ਵਿਚ ਇਸ ਖੇਤਰ ਦੇ ਬਹੁਤ ਸਾਰੇ ਲੋਕ ਕੋਰੋਨਾ ਸਕਾਰਾਤਮਕ ਪਾਏ ਗਏ ਹਨ।
File Photo
ਨਿਊਜ਼ ਏਜੰਸੀ ਪੀਟੀਆਈ ਨੇ ਸੂਤਰਾਂ ਦੇ ਹਵਾਲੇ ਨਾਲ ਕਿਹਾ ਕਿ ਜਿਤੇਂਦਰ ਅਵਹਾੜ ਹਾਲ ਹੀ ਵਿਚ ਇਕ ਪੁਲਿਸ ਅਧਿਕਾਰੀ ਦੇ ਸੰਪਰਕ ਵਿਚ ਆਏ ਸੀ, ਬਾਅਦ ਵਿਚ ਉਹ ਅਫਸਰ ਕੋਰੋਨਾ ਸਕਾਰਾਤਮਕ ਪਾਇਆ ਗਿਆ। ਇਸ ਤੋਂ ਬਾਅਦ ਹਾਊਸਿੰਗ ਮੰਤਰੀ ਅਵਹਾੜ ਨੇ ਕੁਝ ਦਿਨਾਂ ਲਈ ਆਪਣੇ ਆਪ ਨੂੰ ਕੁਆਰੰਟੀਨ ਕਰਨ ਦਾ ਐਲਾਨ ਕੀਤਾ ਸੀ।
File photo
ਕੋਰੋਨਾ ਕਾਰਨ ਕੁਆਰੰਟੀਨ ਜਾਣ ਵਾਲੇ ਉਹ ਰਾਜ ਦੇ ਪਹਿਲੇ ਮੰਤਰੀ ਹਨ। ਉਹਨਾਂ ਨੇ ਅਪਣੇ ਹਲਕੇ ਦੇ ਲੋਕਾਂ ਨੂੰ ਵੀ ਅਪੀਲ ਕੀਤੀ ਹੈ ਕਿ ਉਹ ਅਪਣੇ ਘਰਾਂ ਵਿਚ ਰਹਿਣ ਅਤੇ ਲੌਕਡਾਊਨ ਦਾ ਪਾਲਣ ਕਰਨ।
