ਲੋਕ ਸਭਾ ਚੋਣਾਂ ਦੇ ਨਤੀਜਿਆਂ ’ਤੇ ਆਰ.ਐਸ.ਐਸ. ਮੁਖੀ ਮੋਹਨ ਭਾਗਵਤ ਦੀ ਆਲੋਚਨਾਤਮਕ ਟਿਪਣੀ ਸੱਤਾਧਾਰੀ ਪਾਰਟੀ ਨੂੰ ਨਿਸ਼ਾਨਾ ਬਣਾ ਕੇ ਨਹੀਂ ਕੀਤੀ ਗਈ : ਸੂਤਰ

ਨਵੀਂ ਦਿੱਲੀ: ਰਾਸ਼ਟਰੀ ਸਵੈਸੇਵਕ ਸੰਘ (ਆਰ.ਐੱਸ.ਐੱਸ.) ਨੇ ਸ਼ੁਕਰਵਾਰ ਨੂੰ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਨਾਲ ਮਤਭੇਦਾਂ ਦੀਆਂ ਖਬਰਾਂ ਨੂੰ ਖਾਰਜ ਕਰ ਦਿਤਾ ਅਤੇ ਇਸ ਨੂੰ ‘ਭੰਬਲਭੂਸਾ’ ਪੈਦਾ ਕਰਨ ਦੀ ਕੋਸ਼ਿਸ਼ ਕਰਾਰ ਦਿਤਾ। ਆਰ.ਐਸ.ਐਸ. ਦੇ ਸੂਤਰਾਂ ਨੇ ਇਹ ਵੀ ਮੰਨਣ ਤੋਂ ਇਨਕਾਰ ਕਰ ਦਿਤਾ ਕਿ ਲੋਕ ਸਭਾ ਚੋਣਾਂ ਦੇ ਨਤੀਜਿਆਂ ’ਤੇ ਆਰ.ਐਸ.ਐਸ. ਮੁਖੀ ਮੋਹਨ ਭਾਗਵਤ ਦੀ ਆਲੋਚਨਾਤਮਕ ਟਿਪਣੀ ਸੱਤਾਧਾਰੀ ਪਾਰਟੀ ਨੂੰ ਨਿਸ਼ਾਨਾ ਬਣਾ ਕੇ ਕੀਤੀ ਗਈ ਸੀ। 

ਸੂਤਰਾਂ ਨੇ ਇਹ ਵੀ ਦਸਿਆ ਕਿ ਆਰ.ਐਸ.ਐਸ. ਅਤੇ ਭਾਜਪਾ ਸਮੇਤ ਇਸ ਨਾਲ ਜੁੜੇ ਸੰਗਠਨਾਂ ਦੀ ਤਿੰਨ ਦਿਨਾਂ ਸਾਲਾਨਾ ਤਾਲਮੇਲ ਬੈਠਕ 31 ਅਗੱਸਤ ਤੋਂ ਕੇਰਲ ਦੇ ਪਲੱਕੜ ਜ਼ਿਲ੍ਹੇ ’ਚ ਸ਼ੁਰੂ ਹੋਵੇਗੀ। ਪਾਰਟੀ ਪ੍ਰਧਾਨ ਸਮੇਤ ਭਾਜਪਾ ਦੇ ਸੀਨੀਅਰ ਨੇਤਾਵਾਂ ਦੇ ਬੈਠਕ ’ਚ ਸ਼ਾਮਲ ਹੋਣ ਦੀ ਉਮੀਦ ਹੈ। 

ਉਨ੍ਹਾਂ ਕਿਹਾ, ‘‘ਆਰ.ਐਸ.ਐਸ. ਅਤੇ ਭਾਜਪਾ ਵਿਚਾਲੇ ਕੋਈ ਮਤਭੇਦ ਨਹੀਂ ਹੈ।’’ ਸੰਘ ਦਾ ਇਹ ਬਿਆਨ ਇਸ ਲਈ ਮਹੱਤਵਪੂਰਨ ਹੈ ਕਿਉਂਕਿ ਵਿਰੋਧੀ ਧਿਰ ਦੇ ਨੇਤਾਵਾਂ ਸਮੇਤ ਲੋਕਾਂ ਦੇ ਇਕ ਵਰਗ ਦਾ ਦਾਅਵਾ ਹੈ ਕਿ ਭਾਗਵਤ ਦੀ ਟਿਪਣੀ ਭਾਜਪਾ ਦੇ ਚੋਟੀ ਦੇ ਨੇਤਾਵਾਂ ਲਈ ਇਕ ਸੰਦੇਸ਼ ਸੀ, ਜਿਸ ’ਚ ਉਨ੍ਹਾਂ ਕਿਹਾ ਸੀ ਕਿ ‘ਸੱਚਾ ਸੇਵਕ ਕਦੇ ਹੰਕਾਰ ਨਹੀਂ ਹੁੰਦਾ।’

ਸੂਤਰਾਂ ਨੇ ਕਿਹਾ, ‘‘2014 ਅਤੇ 2019 ਦੀਆਂ ਲੋਕ ਸਭਾ ਚੋਣਾਂ ਤੋਂ ਬਾਅਦ ਭਾਗਵਤ ਵਲੋਂ ਦਿਤੇ ਗਏ ਭਾਸ਼ਣਾਂ ਅਤੇ ਇਸ ਵਾਰ ਦਿਤੇ ਗਏ ਭਾਸ਼ਣਾਂ ਵਿਚ ਜ਼ਿਆਦਾ ਫਰਕ ਨਹੀਂ ਹੈ। ਕਿਸੇ ਵੀ ਭਾਸ਼ਣ ’ਚ ਕੌਮੀ ਚੋਣਾਂ ਵਰਗੀ ਮਹੱਤਵਪੂਰਨ ਘਟਨਾ ਦਾ ਹਵਾਲਾ ਹੋਣਾ ਲਾਜ਼ਮੀ ਹੈ।’’ ਪਰ ਇਸ ਨੂੰ ਗਲਤ ਤਰੀਕੇ ਨਾਲ ਸਮਝਿਆ ਗਿਆ ਅਤੇ ਭੰਬਲਭੂਸਾ ਪੈਦਾ ਕਰਨ ਲਈ ਸੰਦਰਭ ਤੋਂ ਬਾਹਰ ਲਿਆ ਗਿਆ। ਉਨ੍ਹਾਂ ਕਿਹਾ ਕਿ ‘ਹੰਕਾਰੀ’ ਵਾਲੀ ਟਿਪਣੀ ਕਦੇ ਵੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਜਾਂ ਕਿਸੇ ਭਾਜਪਾ ਨੇਤਾ ’ਤੇ ਨਹੀਂ ਕੀਤੀ ਗਈ।

ਭਾਗਵਤ ਨੇ ਸੋਮਵਾਰ ਨੂੰ ਅਪਣੇ ਭਾਸ਼ਣ ’ਚ ਮਨੀਪੁਰ ’ਚ ਇਕ ਸਾਲ ਬਾਅਦ ਵੀ ਸ਼ਾਂਤੀ ਬਹਾਲ ਹੋਣ ’ਤੇ ਚਿੰਤਾ ਜ਼ਾਹਰ ਕੀਤੀ ਸੀ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਚੋਣਾਂ ਦੌਰਾਨ ਹੋਏ ਵਿਚਾਰ-ਵਟਾਂਦਰੇ ਦੀ ਆਲੋਚਨਾ ਕੀਤੀ ਸੀ ਅਤੇ ਚੋਣਾਂ ਖਤਮ ਹੋਣ ਤੇ ਨਤੀਜੇ ਆਉਣ ਤੋਂ ਬਾਅਦ ਕੀ ਅਤੇ ਕਿਵੇਂ ਹੋਵੇਗਾ, ਇਸ ਬਾਰੇ ਬੇਲੋੜੀ ਗੱਲਬਾਤ ਦੀ ਬਜਾਏ ਅੱਗੇ ਵਧਣ ਦਾ ਸੱਦਾ ਦਿਤਾ ਸੀ। 

ਵਿਰੋਧੀ ਨੇਤਾਵਾਂ ਨੇ ਭਾਜਪਾ ਅਤੇ ਮੋਦੀ ਨੂੰ ਨਿਸ਼ਾਨਾ ਬਣਾਉਣ ਲਈ ਉਨ੍ਹਾਂ ਦੀਆਂ ਟਿਪਣੀਆਂ ਨੂੰ ਹਥਿਆਰ ਵਜੋਂ ਵਰਤਿਆ। ਕਾਂਗਰਸ ਦੇ ਜਨਰਲ ਸਕੱਤਰ ਜੈਰਾਮ ਰਮੇਸ਼ ਨੇ ਕਿਹਾ ਸੀ ਕਿ ਭਾਵੇਂ ਪ੍ਰਧਾਨ ਮੰਤਰੀ ਦੀ ਜ਼ਮੀਰ ਜਾਂ ਮਨੀਪੁਰ ਦੇ ਲੋਕਾਂ ਦੀਆਂ ਵਾਰ-ਵਾਰ ਕੀਤੀਆਂ ਜਾ ਰਹੀਆਂ ਅਪੀਲਾਂ ਉਨ੍ਹਾਂ ਨੂੰ ਪਿਘਲਾ ਨਹੀਂ ਸਕਦੀਆਂ ਪਰ ਸ਼ਾਇਦ ਭਾਗਵਤ ਆਰ.ਐਸ.ਐਸ. ਦੇ ਸਾਬਕਾ ਅਹੁਦੇਦਾਰ ਨੂੰ ਮਨੀਪੁਰ ਜਾਣ ਲਈ ਰਾਜ਼ੀ ਕਰ ਸਕਦੇ ਹਨ। 

ਆਰ.ਐਸ.ਐਸ. ਸੂਤਰਾਂ ਨੇ ਕਿਹਾ ਕਿ ਵਿਰੋਧੀ ਨੇਤਾਵਾਂ ਦੇ ਅਜਿਹੇ ਦਾਅਵੇ ਗੁਮਰਾਹ ਕੁੰਨ ਰਾਜਨੀਤੀ ਤੋਂ ਇਲਾਵਾ ਕੁੱਝ ਨਹੀਂ ਹਨ। ਭਾਜਪਾ ਦੇ ਵਿਚਾਰਧਾਰਕ ਸਲਾਹਕਾਰ ਮੰਨੇ ਜਾਣ ਵਾਲੇ ਆਰ.ਐਸ.ਐਸ. ਦੀ ਕੌਮੀ ਕਾਰਜਕਾਰਨੀ ਦੇ ਮੈਂਬਰ ਇੰਦਰੇਸ਼ ਕੁਮਾਰ ਦੇ ਉਸ ਬਿਆਨ ਤੋਂ ਵੀ ਦੂਰੀ ਬਣਾ ਲਈ, ਜਿਸ ਵਿਚ ਉਨ੍ਹਾਂ ਨੇ ਭਾਜਪਾ ਦੇ ਚੋਣ ਪ੍ਰਦਰਸ਼ਨ ਨੂੰ ਲੈ ਕੇ ਨਿਸ਼ਾਨਾ ਸਾਧਿਆ ਅਤੇ ਕਿਹਾ ਕਿ ‘ਭਗਵਾਨ ਰਾਮ ਨੇ ਉਨ੍ਹਾਂ ਲੋਕਾਂ ਨੂੰ ਰੋਕਿਆ ਜੋ 241 ’ਤੇ ਹੰਕਾਰੀ ਹੋ ਗਏ ਸਨ।’

ਉਨ੍ਹਾਂ ਕਿਹਾ ਸੀ, ‘‘ਜਿਹੜੀ ਪਾਰਟੀ ਭਗਵਾਨ ਰਾਮ ਦੀ ਪੂਜਾ ਕਰਦੀ ਸੀ ਪਰ ਹੰਕਾਰੀ ਹੋ ਗਈ ਸੀ, ਉਸ ਨੂੰ 241 ’ਤੇ ਰੋਕ ਦਿਤਾ ਗਿਆ। ਹਾਲਾਂਕਿ, ਇਹ ਸੱਭ ਤੋਂ ਵੱਡੀ ਪਾਰਟੀ ਬਣ ਗਈ।’’ ਉਨ੍ਹਾਂ ਕਿਹਾ, ‘‘ਅਤੇ ਜਿਨ੍ਹਾਂ ਨੂੰ ਰਾਮ ’ਚ ਵਿਸ਼ਵਾਸ ਨਹੀਂ ਸੀ, ਉਨ੍ਹਾਂ ਨੂੰ ਇਕੋ ਸਮੇਂ 234 ’ਤੇ ਰੋਕ ਦਿਤਾ।’’

ਉਨ੍ਹਾਂ ਦਾ ਇਸ਼ਾਰਾ ‘ਇੰਡੀਆ’ ਗਠਜੋੜ ਦਾ ਜ਼ਿਕਰ ਕਰ ਰਹੇ ਸਨ ਜਿਸ ਨੂੰ ਇਸ ਚੋਣਾਂ ’ਚ 234 ਸੀਟਾਂ ਮਿਲੀਆਂ ਸਨ। ਆਰ.ਐਸ.ਐਸ. ਦੇ ਇਕ ਅਹੁਦੇਦਾਰ ਨੇ ਕਿਹਾ ਕਿ ਇਹ ਕੁਮਾਰ ਦੀ ਨਿੱਜੀ ਰਾਏ ਹੈ ਅਤੇ ਸੰਗਠਨ ਦੇ ਨਜ਼ਰੀਏ ਨੂੰ ਨਹੀਂ ਦਰਸਾਉਂਦੀ। ਸੂਤਰਾਂ ਨੇ ਇਸ ਸੁਝਾਅ ਨੂੰ ਵੀ ਖਾਰਜ ਕਰ ਦਿਤਾ ਕਿ ਆਰ.ਐਸ.ਐਸ. ਇਸ ਵਾਰ ਭਾਜਪਾ ਦੇ ਸਮਰਥਨ ’ਚ ਚੋਣ ਪ੍ਰਕਿਰਿਆ ’ਚ ਸ਼ਾਮਲ ਨਹੀਂ ਸੀ, ਜਿਵੇਂ ਕਿ ਪਹਿਲਾਂ ਹੁੰਦਾ ਰਿਹਾ ਹੈ। 

ਉਨ੍ਹਾਂ ਕਿਹਾ, ‘‘ਆਰ.ਐਸ.ਐਸ. ਪ੍ਰਚਾਰ ਨਹੀਂ ਕਰਦਾ ਬਲਕਿ ਲੋਕਾਂ ’ਚ ਜਾਗਰੂਕਤਾ ਪੈਦਾ ਕਰਦਾ ਹੈ ਅਤੇ ਇਸ ਨੇ ਚੋਣਾਂ ਦੌਰਾਨ ਅਪਣਾ ਕੰਮ ਕੀਤਾ। ਅਸੀਂ ਪੂਰੇ ਦੇਸ਼ ’ਚ ਲੱਖਾਂ ਮੀਟਿੰਗਾਂ ਕੀਤੀਆਂ ਹਨ। ਇਕੱਲੇ ਦਿੱਲੀ ’ਚ, ਅਸੀਂ ਇਕ ਲੱਖ ਤੋਂ ਵੱਧ ਛੋਟੀਆਂ ਸਮੂਹ ਮੀਟਿੰਗਾਂ ਕੀਤੀਆਂ ਹਨ।’’

ਕੈਬਨਿਟ ਮੰਤਰੀ ਜੇ.ਪੀ. ਨੱਢਾ ਦੀ ਥਾਂ ਭਾਜਪਾ ਦੇ ਨਵੇਂ ਪ੍ਰਧਾਨ ਦੀ ਨਿਯੁਕਤੀ ਦੀ ਸੰਭਾਵਨਾ ਬਾਰੇ ਪੁੱਛੇ ਜਾਣ ’ਤੇ ਆਰ.ਐਸ.ਐਸ. ਸੂਤਰਾਂ ਨੇ ਕਿਹਾ ਕਿ ਉਨ੍ਹਾਂ ਦਾ ਸੰਗਠਨ ਅਜਿਹੇ ਮਹੱਤਵਪੂਰਨ ਫੈਸਲੇ ਲਈ ਸਲਾਹ-ਮਸ਼ਵਰੇ ਦੀ ਪ੍ਰਕਿਰਿਆ ਦਾ ਹਮੇਸ਼ਾ ਹਿੱਸਾ ਰਿਹਾ ਹੈ। ਇਕ ਸੂਤਰ ਨੇ ਕਿਹਾ, ‘‘ਇਸ ਵਾਰ ਵੀ ਕੁੱਝ ਵੱਖਰਾ ਨਹੀਂ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਭਾਜਪਾ ਦਾ ਆਰ.ਐਸ.ਐਸ. ਪਿਛੋਕੜ ਵਾਲੇ ਨੇਤਾਵਾਂ ਦਾ ਇਤਿਹਾਸ ਰਿਹਾ ਹੈ।’’

ਨੱਢਾ ਦੀ ਕਥਿਤ ਟਿਪਣੀ ਬਾਰੇ ਪੁੱਛੇ ਜਾਣ ’ਤੇ ਕਿ ਭਾਜਪਾ ਨੂੰ ਪਹਿਲਾਂ ਆਰ.ਐਸ.ਐਸ. ਦੀ ਜ਼ਰੂਰਤ ਨਹੀਂ ਸੀ ਕਿਉਂਕਿ ਪਾਰਟੀ ਦਾ ਅਪਣਾ ਸੰਗਠਨ ਮਜ਼ਬੂਤ ਹੋ ਗਿਆ ਹੈ, ਸੂਤਰ ਨੇ ਕਿਹਾ ਕਿ ਆਰ.ਐਸ.ਐਸ. ਵਲੰਟੀਅਰਾਂ ਨੇ ਇਸ ’ਤੇ ਚਰਚਾ ਕੀਤੀ ਅਤੇ ਫਿਰ ਅਪਣਾ ਕੰਮ ਜਾਰੀ ਰੱਖਿਆ।