ਪੂਰਬੀ ਲਦਾਖ਼ ਵਿਚ ਤਣਾਅ ਘਟਾਉਣ ਅਤੇ ਫ਼ੌਜੀਆਂ ਦੇ ਪਿੱਛੇ ਹਟਣ ਲਈ ਤੌਰ-ਤਰੀਕੇ ਤੈਅ ਕਰਨ ਲਈ ਭਾਰਤੀ ਅਤੇ ਚੀਨੀ ਫ਼ੌਜੀਆਂ
ਨਵੀਂ ਦਿੱਲੀ, 13 ਜੁਲਾਈ : ਪੂਰਬੀ ਲਦਾਖ਼ ਵਿਚ ਤਣਾਅ ਘਟਾਉਣ ਅਤੇ ਫ਼ੌਜੀਆਂ ਦੇ ਪਿੱਛੇ ਹਟਣ ਲਈ ਤੌਰ-ਤਰੀਕੇ ਤੈਅ ਕਰਨ ਲਈ ਭਾਰਤੀ ਅਤੇ ਚੀਨੀ ਫ਼ੌਜੀਆਂ ਵਿਚਾਲੇ ਲੈਫ਼ਟੀਨੈਂਟ ਜਨਰਲ ਪਧਰੀ ਚੌਥੇ ਦੌਰ ਦੀ ਗੱਲਬਾਤ ਮੰਗਲਵਾਰ ਨੂੰ ਹੋਵੇਗੀ। ਸਰਕਾਰੀ ਸੂਤਰਾਂ ਨੇ ਦਸਿਆ ਕਿ ਪੂਰਬੀ ਲਦਾਖ਼ ਵਿਚ ਅਸਲ ਕੰਟਰੋਲ ਰੇਖਾ ਦੇ ਭਾਰਤੀ ਹਿੱਸੇ ਵਿਚ ਚੁਸ਼ੁਲ ਵਿਚ ਇਹ ਬੈਠਕ ਹੋਵੇਗੀ। ਦੋਹਾਂ ਧਿਰਾਂ ਦੁਆਰਾ ਉੱਚੇ ਇਲਾਕਿਆਂ ਵਿਚ ਅਮਨ ਚੈਨ ਬਹਾਲ ਕਰਨ ਦੇ ਖਾਕੇ ਨੂੰ ਵੀ ਆਖ਼ਰੀ ਰੂਪ ਦੇਣ ਦੀ ਸੰਭਾਵਨਾ ਹੈ।
ਚੀਨ ਦੀ ਪੀਪਲਜ਼ ਲਿਬਰੇਸ਼ਨ ਆਰਮੀ ਝਗੜੇ ਵਾਲੇ ਇਲਾਕਿਆਂ ਤੋਂ ਫ਼ੌਜ ਨੂੰ ਹਟਾਉਣ ਦੀ ਕਵਾਇਦ ਪੂਰੀ ਕਰ ਚੁਕੀ ਹੈ ਅਤੇ ਪਿਛਲੇ ਇਕ ਹਫ਼ਤੇ ਵਿਚ ਉਸ ਨੇ ਪੈਂਗੋਗ ਸੋ ਇਲਾਕੇ ਵਿਚ ਪੈਂਦੇ ਫ਼ਿੰਗਰ ਫ਼ੋਰ ਲਾਗੇ ਫ਼ੌਜੀਆਂ ਦੀ ਗਿਣਤੀ ਘਟਾਈ ਹੈ। ਭਾਰਤ ਜ਼ੋਰ ਦੇ ਰਿਹਾ ਹੈ ਕਿ ਚੀਨ ਫ਼ਿੰਗਰ ਫ਼ੋਰ ਅਤੇ ਫ਼ਿੰਗਰ ਐਟ ਵਿਚਲੇ ਇਲਾਕਿਆਂ ਤੋਂ ਸੁਰੱਖਿਆ ਬਲਾਂ ਨੂੰ ਹਟਾਏ। (ਏਜੰਸੀ)