ਪੰਜ ਸੂਬਿਆਂ ਦੀਆਂ ਚੋਣਾਂ ਦੇ ਨਤੀਜੇ ਕਾਂਗਰਸ ਦੀ ਸੱਤਾ ਵਲ ਵਾਪਸੀ ਤਾਂ ਸਿੱਧ ਕਰ ਗਏ ਪਰ ਕੀ ਇਹ ਮੰਨ ਲਿਆ ਜਾਣਾ ਸਹੀ ਹੈ ਕਿ ਜਨਤਾ ਵਲੋਂ ਭਾਜਪਾ....
ਚੰਡੀਗੜ੍ਹ (ਭਾਸ਼ਾ) : ਪੰਜ ਸੂਬਿਆਂ ਦੀਆਂ ਚੋਣਾਂ ਦੇ ਨਤੀਜੇ ਕਾਂਗਰਸ ਦੀ ਸੱਤਾ ਵਲ ਵਾਪਸੀ ਤਾਂ ਸਿੱਧ ਕਰ ਗਏ ਪਰ ਕੀ ਇਹ ਮੰਨ ਲਿਆ ਜਾਣਾ ਸਹੀ ਹੈ ਕਿ ਜਨਤਾ ਵਲੋਂ ਭਾਜਪਾ ਨੂੰ ਪੂਰੀ ਤਰ੍ਹਾਂ ਨਾਕਾਰ ਦਿਤਾ ਗਿਆ ਹੈ? 15 ਸਾਲ ਦੇ ਰਾਜ ਤੋਂ ਬਾਅਦ ਮੱਧ ਪ੍ਰਦੇਸ਼ ਵਿਚ ਸ਼ਿਵਰਾਜ ਚੌਹਾਨ ਦੀ ਸਰਕਾਰ ਸਿਰਫ਼ 7 ਸੀਟਾਂ ਦੇ ਫ਼ਰਕ ਨਾਲ ਹੋਂਦ ਵਿਚ ਆਉਣੋਂ ਰਹਿ ਗਈ। ਇਸ ਨੂੰ ਰੱਦ ਕਰਨਾ ਤਾਂ ਨਹੀਂ ਕਿਹਾ ਜਾ ਸਕਦਾ। ਲੋਕਾਂ ਵਿਚ ਭਾਜਪਾ ਦੀ ਮਕਬੂਲੀਅਤ ਤਾਂ ਘਟੀ ਹੈ ਪਰ ਓਨੀ ਨਹੀਂ ਕਿ ਇਹ ਆਖਿਆ ਜਾ ਸਕੇ ਕਿ 'ਭਾਜਪਾ-ਮੁਕਤ ਭਾਰਤ' ਬਣ ਰਿਹਾ ਹੈ ਜਾਂ ਰਾਹੁਲ ਗਾਂਧੀ ਨੂੰ ਲੋਕਾਂ ਦੀ ਪੂਰੀ ਹਮਾਇਤ ਮਿਲ ਗਈ ਹੈ।
Job
ਭਾਜਪਾ ਸਰਕਾਰ ਨੇ ਆਰਥਿਕ ਖੇਤਰ ਵਿਚ ਵੱਡੀ ਤਬਾਹੀ ਮਚਾਈ ਹੈ। ਜੇਕਰ ਬੈਂਕਾਂ ਵਿਚ ਮਰੇ ਹੋਏ ਕਰਜ਼ਿਆਂ ਦੀ ਹਾਲਤ ਨੂੰ ਅੱਖੋਂ ਪਰੋਖੇ ਕਰ ਕੇ ਸਿਰਫ਼ ਆਮ ਇਨਸਾਨ ਦੀ ਹਾਲਤ ਵੱਲ ਹੀ ਗ਼ੌਰ ਕੀਤਾ ਜਾਵੇ ਤਾਂ ਹਾਲਤ ਬਹੁਤ ਮਾੜੀ ਹੈ। ਨੌਜਵਾਨਾਂ ਨੂੰ ਨੌਕਰੀਆਂ ਮਿਲ ਹੀ ਨਹੀਂ ਰਹੀਆਂ। ਕਾਰੋਬਾਰੀ, ਦੁਕਾਨਦਾਰ ਸਮੇਤ ਸਾਰੇ ਵਰਗ ਪਰੇਸ਼ਾਨੀ ਦੇ ਆਲਮ ਵਿਚ ਹਨ। ਜਿਸ ਹਿਸਾਬ ਨਾਲ ਭਾਰਤੀ ਅਰਥਚਾਰਾ ਡਾਂਵਾਂਡੋਲ ਹੋਇਆ ਪਿਐ। ਉਸ ਹਿਸਾਬ ਨਾਲ ਭਾਜਪਾ ਵਿਰੁਧ ਨਾਰਾਜ਼ਗੀ ਜ਼ਿਆਦਾ ਨਜ਼ਰ ਆਉਣੀ ਚਾਹੀਦੀ ਸੀ।
Shivraj
ਭਾਜਪਾ ਸਰਕਾਰ ਦੀ ਹਰ ਮੁਹਾਜ਼ 'ਤੇ ਨਾਕਾਮੀ ਦੇ ਬਾਵਜੂਦ, ਉਸ ਦੀ ਵੋਟ ਉਸ ਅਨੁਪਾਤ ਵਿਚ ਨਹੀਂ ਘਟੀ। ਜਿਸ ਅਨੁਪਾਤ ਵਿਚ ਘਟਣੀ ਚਾਹੀਦੀ ਸੀ। ਕਾਰਨ ਇਹ ਹੈ ਕਿ 'ਹਿੰਦੂਤਵ' ਦਾ ਅਸਰ ਕਬੂਲਣ ਵਾਲੇ ਛੇਤੀ ਭਾਜਪਾ ਤੋਂ ਦੂਰ ਹੋਣ ਵਾਲੇ ਨਹੀਂ, ਜਿਵੇਂ ਪੰਜਾਬ 'ਚ ਅਕਾਲੀਆਂ ਦੀ ਹਰ ਗ਼ਲਤੀ ਉਨ੍ਹਾਂ ਦੇ 'ਪੰਥਕ' ਚੋਲੇ ਕਾਰਨ ਛੁਪੀ ਰਹਿ ਜਾਂਦੀ ਸੀ ਤੇ ਪੰਥ ਦੇ ਨਾਂ ਤੇ ਲੋਕ, ਸੱਭ ਕੁੱਝ ਜਾਣਦੇ ਹੋਏ ਵੀ ਵੋਟ ਉਨ੍ਹਾਂ ਨੂੰ ਦੇ ਦਿੰਦੇ ਸਨ, ਪਰ ਅਜਿਹੇ 'ਕੱਟੜਪੁਣੇ' ਦਾ ਜਾਦੂ ਸਦਾ ਨਹੀਂ ਚਲਦਾ ਤੇ ਜਦੋਂ ਇਸ ਦਾ ਅਸਰ ਖ਼ਤਮ ਹੁੰਦਾ ਹੈ ਤਾਂ ਸੱਭ ਕੁੱਝ ਹੀ ਖ਼ਤਮ ਹੋ ਜਾਂਦਾ ਹੈ।
Yogi Aditaynath
ਭਾਜਪਾ ਸਰਕਾਰ ਨੇ ਨਾ ਤਾਂ ਦੋ ਕਰੋੜ ਨੌਕਰੀਆਂ ਦਿਤੀਆਂ ਅਤੇ ਨਾ ਹੀ ਲੋਕਾਂ ਦੇ ਖ਼ਾਤਿਆਂ 'ਚ 15-15 ਲੱਖ ਰੁਪਏ ਪਾਏ, ਬਲਕਿ ਇਸ ਦੀ ਬਜਾਏ ਉਨ੍ਹਾਂ ਉੱਤਰ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਯੋਗੀ ਨੂੰ ਮੰਚਾਂ 'ਤੇ ਲਿਆ ਕੇ ਕੱਟੜ ਹਿੰਦੂਤਵ ਦਾ ਪ੍ਰਚਾਰ ਸ਼ੁਰੂ ਕਰ ਦਿਤਾ। ਅੱਜ ਭਾਵੇਂ ਕਿੰਨੇ ਵੀ ਲੋਕ ਇਸ ਗੱਲ ਦੀ ਖਿੱਲੀ ਉਡਾਉਣ ਕਿ ਯੋਗੀ ਸਿਰਫ਼ ਸ਼ਹਿਰਾਂ ਦੇ ਨਾਮ ਬਦਲਣੇ ਹੀ ਜਾਣਦੇ ਹਨ ਪਰ ਅਜਿਹੇ ਲੋਕ ਵੀ ਬਹੁਤ ਹਨ ਜੋ ਇਸ ਹਿੰਦੂ-ਨਾਮਕਰਣ ਤੋਂ ਖ਼ੁਸ਼ ਹੋ ਕੇ ਜ਼ਿੰਦਗੀ ਦੇ ਅਸਲ ਮਸਲਿਆਂ ਤੋਂ ਓਝਲ ਹੋ ਜਾਂਦੇ ਹਨ।
Modi with Yogi
ਜੇ ਯੋਗੀ ਅਦਿਤਿਆਨਾਥ ਹਨੂੰਮਾਨ ਦੀ ਜਾਤ ਦਲਿਤ ਦਸਦੇ ਹਨ ਤਾਂ ਬਹੁਤ ਲੋਕ ਅਜਿਹੇ ਐਲਾਨ ਤੋਂ ਵੀ ਖ਼ੁਸ਼ ਹੋ ਜਾਂਦੇ ਹਨ। ਅਨੇਕਾਂ ਆਰਥਿਕ ਕਮੀਆਂ ਦੇ ਬਾਵਜੂਦ, ਭਾਜਪਾ ਨਾਲ ਇਸ 'ਮੰਦੀ' ਦੇ ਦੌਰ ਵਿਚ ਵੀ ਜਨਤਾ ਜੁੜੀ ਰਹੀ ਕਿਉਂਕਿ ਉਹ ਭਾਜਪਾ ਦੇ ਹਿੰਦੂਤਵ ਵਿਚ ਵਿਸ਼ਵਾਸ ਕਰਦੀ ਹੈ। ਲੋਕ ਹੁਣ ਦਿੱਲੀ ਦੀ ਜਾਮਾ ਮਸਜਿਦ ਨੂੰ ਤੋੜਨ ਦੀ ਗੱਲ ਵੀ ਖੁਲ੍ਹੇਆਮ ਕਰਨ ਦੀ ਹਿੰਮਤ ਰੱਖਦੇ ਹਨ। ਗੱਲ ਸਿਰਫ਼ ਰਾਮ ਮੰਦਰ ਦੀ ਹੀ ਨਹੀਂ ਰਹਿ ਗਈ, ਬਲਕਿ ਇਕ ਤਬਕੇ ਅੰਦਰ ਨਫ਼ਰਤ ਦੀ ਹਨੇਰੀ ਬੜੀ ਤੇਜ਼ੀ ਵਗਣ ਲੱਗ ਪਈ ਹੈ।
Yog With Yogi
ਬੁਲੰਦਸ਼ਹਿਰ ਵਿਚ ਗਊ ਮਾਸ ਦੇ ਨਾਂਅ 'ਤੇ ਭੀੜ ਨੂੰ ਭੜਕਾ ਕੇ ਇਕ ਫ਼ੌਜੀ ਨੇ ਪੁਲਿਸ ਅਫ਼ਸਰ ਨੂੰ ਗੋਲੀ ਮਾਰ ਦਿਤੀ ਜੋ ਨਫ਼ਰਤ ਦੀ ਹਨ੍ਹੇਰੀ ਦਾ ਹੀ ਨਤੀਜਾ ਹੈ। ਇਸ ਤਰ੍ਹਾਂ ਧਰਮ ਦੇ ਨਾਂਅ 'ਤੇ ਲੋਕਾਂ ਨੂੰ ਭੜਕਾ ਕੇ ਨਫ਼ਰਤ ਦੀ ਹਨੇਰੀ ਰਾਹੀਂ ਲੋਕਾਂ ਦੀ ਸੂਝਬੂਝ ਨੂੰ ਖ਼ਤਮ ਕੀਤਾ ਜਾ ਰਿਹਾ ਹੈ। ਭਾਜਪਾ ਵਿਕਾਸ ਦੇ ਨਾਂਅ 'ਤੇ ਚੋਣਾਂ ਲੜਨ ਦੇ ਭਾਵੇਂ ਕਿੰਨੇ ਹੀ ਦਾਅਵੇ ਕਰੀ ਜਾਵੇ ਪਰ 'ਹਿੰਦੂਤਵ' ਦੇ ਹਥਿਆਰ ਨੂੰ ਉਹ ਕਦੇ ਨਹੀਂ ਛੱਡ ਸਕਦੀ...ਜਿਸ ਦੇ ਜਾਲ 'ਚ ਉਹ ਲੋਕਾਂ ਨੂੰ ਆਸਾਨੀ ਨਾਲ ਫਸਾ ਲੈਂਦੀ ਹੈ।
