ਕੈਂਟਰ ’ਚ ਕਣਕ ਲੱਦ ਕੇ ਲਿਜਾ ਰਹੇ ਲੋਕਾਂ ਨਾਲ ਵਾਪਰਿਆ ਹਾਦਸਾ
ਕਾਂਗੜਾ : ਹਿਮਾਚਲ ਪ੍ਰਦੇਸ਼ ਦੇ ਕਾਂਗੜਾ ਜ਼ਿਲ੍ਹੇ ਵਿਚ ਇਕ ਦਰਦਨਾਕ ਹਾਦਸਾ ਵਾਪਰਿਆ ਹੈ। ਧਰਮਸ਼ਾਲਾ ਅਧੀਨ ਯੋਲ ਦੇ ਨਾਲ ਲੱਗਦੇ ਉਥਾਗਰਾਨ 'ਚ ਇਕ ਕੈਂਟਰ ਬੇਕਾਬੂ ਹੋ ਕੇ ਸੜਕ ਤੋਂ ਕਰੀਬ 100 ਮੀਟਰ ਹੇਠਾਂ ਟੋਏ 'ਚ ਜਾ ਡਿੱਗਿਆ।
ਇਸ ਹਾਦਸੇ 'ਚ ਪਤੀ-ਪਤਨੀ ਅਤੇ ਧੀ ਸਮੇਤ ਪੰਜ ਲੋਕਾਂ ਦੀ ਮੌਤ ਹੋ ਗਈ। ਚਾਰ ਵਿਅਕਤੀਆਂ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ, ਜਦੋਂ ਕਿ ਇੱਕ ਗੰਭੀਰ ਜ਼ਖ਼ਮੀ ਨੇ ਟਾਂਡਾ ਦੇ ਹਸਪਤਾਲ ਵਿਚ ਦਮ ਤੋੜ ਦਿਤਾ। ਹਾਦਸੇ 'ਚ ਪੰਜ ਲੋਕ ਜ਼ਖ਼ਮੀ ਹੋ ਗਏ ਹਨ। ਏਐਸਪੀ ਹਿਤੇਸ਼ ਲਖਨਪਾਲ ਨੇ ਦਸਿਆ ਕਿ ਪੁਲਿਸ ਨੇ ਕੇਸ ਦਰਜ ਕਰਕੇ ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਸ਼ੁਰੂ ਕਰ ਦਿਤੀ ਹੈ।
ਪੁਲਿਸ ਅਨੁਸਾਰ ਕੈਂਟਰ 'ਚ ਸਵਾਰ ਲੋਕ ਸ਼ਾਮ ਸਾਢੇ 4 ਵਜੇ ਦੇ ਕਰੀਬ ਖੇਤਾਂ 'ਚੋਂ ਕਣਕ ਦੀ ਕਟਾਈ ਕਰ ਕੇ ਫ਼ਸਲ ਨੂੰ ਘਰ ਲੈ ਕੇ ਆ ਰਹੇ ਸਨ, ਜਦੋਂ ਫ਼ਸਲ ਨਾਲ ਭਰਿਆ ਕੈਂਟਰ ਬੇਕਾਬੂ ਹੋ ਕੇ ਪਲਟ ਗਿਆ | ਕੈਂਟਰ ਵਿਚ ਡਰਾਈਵਰ ਅਤੇ ਬੱਚਿਆਂ ਸਮੇਤ 10 ਲੋਕ ਸਵਾਰ ਸਨ। ਮ੍ਰਿਤਕਾਂ ਵਿਚ ਸੀਤਾ ਦੇਵੀ (39) ਪਤਨੀ ਸੁਨੀਲ ਕਾਂਤ, ਸੁਨੀਲ ਕਾਂਤ (43) ਪੁੱਤਰ ਬਲਦੇਵ, ਕ੍ਰਿਸ਼ਨਾ (7) ਪੁੱਤਰੀ ਸੁਨੀਲ ਕਾਂਤ ਮਿਲਾਪ ਚੰਦ (ਡਰਾਈਵਰ) ਪੁੱਤਰ ਅਸ਼ੋਕ ਕੁਮਾਰ ਅਤੇ ਆਰਤੀ ਦੇਵੀ (45) ਪਤਨੀ ਕੁਸ਼ਲ ਕੁਮਾਰ ਸ਼ਾਮਲ ਹਨ।
ਪ੍ਰਿਆ (7) ਪੁੱਤਰੀ ਲਕਸ਼ਮਣ, ਅੰਸ਼ੂ (7) ਪੁੱਤਰ ਸੁਨੀਲ ਕਾਂਤ, ਅਭਿਨਵ (17) ਪੁੱਤਰ ਸੁਨੀਲ, ਸਾਕਸ਼ੀ (17) ਪੁੱਤਰੀ ਗੁਲਸ਼ਨ ਅਤੇ ਅਨਿਲ ਕਾਂਤ (40) ਪੁੱਤਰ ਬਲਦੇਵ ਸਿੰਘ ਹਾਦਸੇ 'ਚ ਜ਼ਖ਼ਮੀ ਹੋ ਗਏ। ਸਾਰੇ ਮ੍ਰਿਤਕ ਉਥੜਾਗ੍ਰਾਂ ਦੇ ਰਹਿਣ ਵਾਲੇ ਹਨ। ਜ਼ਖ਼ਮੀਆਂ ਦਾ ਟਾਂਡਾ ਹਸਪਤਾਲ ਵਿਚ ਇਲਾਜ ਚੱਲ ਰਿਹਾ ਹੈ।
ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਪੁਲਿਸ ਅਤੇ SDRF ਦੀਆਂ ਟੀਮਾਂ ਵੀ ਮੌਕੇ ’ਤੇ ਪਹੁੰਚ ਗਈਆਂ। ਨਾਲ ਹੀ ਸਥਾਨਕ ਲੋਕਾਂ ਦੀ ਮਦਦ ਨਾਲ ਬਚਾਅ ਕਾਰਜ ਵੀ ਕੀਤਾ ਗਿਆ। ਪ੍ਰਸ਼ਾਸਨ ਨੇ ਤੁਰੰਤ ਰਾਹਤ ਵਜੋਂ ਮ੍ਰਿਤਕਾਂ ਦੇ ਪਰਿਵਾਰਾਂ ਨੂੰ 25-25 ਹਜ਼ਾਰ ਰੁਪਏ ਦਿਤੇ ਹਨ।
