ਤਨਖਾਹ ਵਿੱਚ ਨਹੀਂ ਹੋਵੇਗੀ ਕੋਈ ਕਟੌਤੀ
Menstrual Leave In Odisha : 78ਵੇਂ ਸੁਤੰਤਰਤਾ ਦਿਵਸ ਦੇ ਮੌਕੇ 'ਤੇ ਓਡੀਸ਼ਾ ਸਰਕਾਰ ਨੇ ਸਰਕਾਰੀ ਅਤੇ ਨਿੱਜੀ ਖੇਤਰ ਦੋਵਾਂ ਵਿੱਚ ਕੰਮ ਕਰਨ ਵਾਲੀਆਂ ਮਹਿਲਾ ਕਰਮਚਾਰੀਆਂ ਲਈ ਇੱਕ ਦਿਨ ਦੀ ਮਾਹਵਾਰੀ ਛੁੱਟੀ ਦਾ ਐਲਾਨ ਕੀਤਾ ਹੈ। ਇਸ ਦੌਰਾਨ ਉਨ੍ਹਾਂ ਦੀ ਤਨਖਾਹ ਵਿੱਚ ਕੋਈ ਕਟੌਤੀ ਨਹੀਂ ਕੀਤੀ ਜਾਵੇਗੀ।
ਓਡੀਸ਼ਾ ਦੀ ਉਪ ਮੁੱਖ ਮੰਤਰੀ ਪ੍ਰਵਤੀ ਪਰਿਦਾ ਨੇ ਕਟਕ ਵਿੱਚ ਸੁਤੰਤਰਤਾ ਦਿਵਸ ਸਮਾਰੋਹ ਦੌਰਾਨ ਇਹ ਐਲਾਨ ਕੀਤਾ। ਉਨ੍ਹਾਂ ਕਿਹਾ ਕਿ ਇਹ ਨੀਤੀ ਤੁਰੰਤ ਪ੍ਰਭਾਵ ਨਾਲ ਲਾਗੂ ਹੋਵੇਗੀ ਅਤੇ ਮਹਿਲਾ ਕਰਮਚਾਰੀਆਂ ਨੂੰ ਮਾਹਵਾਰੀ ਚੱਕਰ ਦੇ ਪਹਿਲੇ ਜਾਂ ਦੂਜੇ ਦਿਨ ਛੁੱਟੀ ਲੈਣ ਦੀ ਆਗਿਆ ਦੇਵੇਗੀ। ਇਸ ਦਾ ਉਦੇਸ਼ ਔਰਤਾਂ ਦੀ ਸਿਹਤ ਅਤੇ ਤੰਦਰੁਸਤੀ ਨੂੰ ਬਿਹਤਰ ਬਣਾਉਣਾ ਹੈ।
ਦੱਸ ਦੇਈਏ ਕਿ ਸੁਪਰੀਮ ਕੋਰਟ ਨੇ ਹਾਲ ਹੀ ਵਿੱਚ ਕੇਂਦਰ ਸਰਕਾਰ ਨੂੰ ਮਹਿਲਾ ਕਰਮਚਾਰੀਆਂ ਲਈ ਮਾਹਵਾਰੀ ਛੁੱਟੀ 'ਤੇ ਮਾਡਲ ਨੀਤੀ ਬਣਾਉਣ ਦੀ ਅਪੀਲ ਕੀਤੀ ਸੀ। ਇਸ 'ਚ ਇਸ ਗੱਲ 'ਤੇ ਨੇ ਪ੍ਰਕਾਸ਼ ਪਾਇਆ ਗਿਆ ਕਿ ਇਹ ਮੁੱਦਾ ਨਿਆਂਇਕ ਦਖਲ ਦੀ ਬਜਾਏ ਨੀਤੀ-ਨਿਰਮਾਣ ਦੇ ਦਾਇਰੇ ਵਿੱਚ ਆਉਂਦਾ ਹੈ। ਮਾਹਵਾਰੀ ਛੁੱਟੀ ਦਾ ਔਰਤਾਂ ਦਾ ਅਧਿਕਾਰ ਅਤੇ ਮਾਹਵਾਰੀ ਸਿਹਤ ਉਤਪਾਦਾਂ ਲਈ ਮੁਫਤ ਪਹੁੰਚ ਬਿੱਲ, 2022, ਮਾਹਵਾਰੀ ਦੌਰਾਨ ਔਰਤਾਂ ਅਤੇ ਟਰਾਂਸਵੋਮੈਨ ਲਈ ਤਿੰਨ ਦਿਨਾਂ ਦੀ ਅਦਾਇਗੀ ਛੁੱਟੀ (ਤਨਖਾਹ ਕਟੌਤੀ ਤੋਂ ਬਿਨਾਂ ਛੁੱਟੀ) ਦਾ ਪ੍ਰਸਤਾਵ ਕਰਦਾ ਹੈ। ਪਰ ਇਹ ਬਿੱਲ ਅਜੇ ਤੱਕ ਲਾਗੂ ਨਹੀਂ ਹੋਇਆ ਹੈ।
ਵਰਤਮਾਨ ਵਿੱਚ ਬਿਹਾਰ ਅਤੇ ਕੇਰਲ ਇੱਕੋ ਇੱਕ ਭਾਰਤੀ ਰਾਜ ਹਨ, ਜਿਨ੍ਹਾਂ ਨੇ ਮਾਹਵਾਰੀ ਛੁੱਟੀ ਨੀਤੀ ਲਾਗੂ ਕੀਤੀ ਹੈ। ਬਿਹਾਰ ਨੇ ਆਪਣੀ ਨੀਤੀ 1992 ਵਿੱਚ ਸ਼ੁਰੂ ਕੀਤੀ ਸੀ, ਜਿਸ ਤਹਿਤ ਔਰਤਾਂ ਨੂੰ ਹਰ ਮਹੀਨੇ ਦੋ ਦਿਨ ਦੀ ਮਾਹਵਾਰੀ ਛੁੱਟੀ ਦਿੱਤੀ ਜਾਂਦੀ ਹੈ। ਕੇਰਲ ਨੇ 2023 ਵਿੱਚ ਸਾਰੀਆਂ ਯੂਨੀਵਰਸਿਟੀਆਂ ਅਤੇ ਸੰਸਥਾਵਾਂ ਵਿੱਚ ਔਰਤਾਂ ਅਤੇ ਵਿਦਿਆਰਥਣਾਂ ਨੂੰ ਮਾਹਵਾਰੀ ਛੁੱਟੀ ਦੇਣ ਦਾ ਫੈਸਲਾ ਕੀਤਾ ਸੀ। ਇਸ ਦੇ ਨਾਲ ਹੀ 18 ਸਾਲ ਤੋਂ ਵੱਧ ਉਮਰ ਦੀਆਂ ਵਿਦਿਆਰਥਣਾਂ ਨੂੰ 60 ਦਿਨਾਂ ਤੱਕ ਦੀ ਜਣੇਪਾ ਛੁੱਟੀ ਦੇਣ ਦਾ ਵੀ ਐਲਾਨ ਕੀਤਾ ਗਿਆ। ਇਸ ਦੇ ਨਾਲ ਹੀ ਭਾਰਤ ਦੀਆਂ ਕੁਝ ਨਿੱਜੀ ਕੰਪਨੀਆਂ ਜਿਵੇਂ Zomato ਨੇ ਵੀ ਮਾਹਵਾਰੀ ਛੁੱਟੀ ਨੀਤੀ ਅਪਣਾਈ ਹੈ। Zomato 2020 ਤੋਂ ਆਪਣੀਆਂ ਮਹਿਲਾ ਕਰਮਚਾਰੀਆਂ ਨੂੰ ਸਾਲਾਨਾ 10 ਦਿਨਾਂ ਦੀ ਮਾਹਵਾਰੀ ਛੁੱਟੀ ਦੇ ਰਿਹਾ ਹੈ।
