ਦੋਹਾਂ ਧਿਰਾਂ ਵਿਚਾਲੇ 15 ਘੰਟਿਆਂ ਤਕ ਚੱਲੀ ਗੱਲਬਾਤ
ਨਵੀਂ ਦਿੱਲੀ, 15 ਜੁਲਾਈ : ਭਾਰਤੀ ਫ਼ੌਜ ਨੇ ਲਗਭਗ 15 ਘੰਟਿਆਂ ਤਕ ਚੱਲੀ ਗੱਲਬਾਤ ਵਿਚ ਚੀਨੀ ਫ਼ੌਜ ਨੂੰ ਇਹ ਸਪੱਸ਼ਟ ਸੁਨੇਹਾ ਦਿਤਾ ਹੈ ਕਿ ਪੂਰਬੀ ਲਦਾਖ਼ ਵਿਚ ਜ਼ਰੂਰੀ ਤੌਰ 'ਤੇ ਪਹਿਲਾਂ ਵਾਲੀ ਹਾਲਤ ਬਾਲ ਕੀਤੀ ਜਾਵੇ ਅਤੇ ਅਸਲ ਕੰਟਰੋਲ ਰੇਖਾ 'ਤੇ ਉਸ ਨੂੰ ਸ਼ਾਂਤੀ ਅਤੇ ਸਥਿਰਤਾ ਵਾਪਸ ਲਿਆਉਣ ਲਈ ਸਰਹੱਦੀ ਪ੍ਰਬੰਧ ਵਾਸਤੇ ਸਹਿਮਤੀ ਵਾਲੇ ਸਮੁੱਚੇ ਪ੍ਰੋਟੋਕਾਲ ਦੀ ਪਾਲਣਾ ਕਰਨੀ ਪਵੇਗੀ।
ਸਰਕਾਰੀ ਸੂਤਰਾਂ ਨੇ ਦਸਿਆ ਕਿ ਦੋਹਾਂ ਦੇਸ਼ਾ ਦੀਆਂ ਥਲ ਫ਼ੌਜਾਂ ਦੇ ਸੀਨੀਅਰ ਕਮਾਂਡਰਾਂ ਵਿਚਾਲੇ ਡੂੰਘੀ ਅਤੇ ਗੁੰਝਲਦਾਰ ਗੱਲਬਾਤ ਬੁਧਵਾਰ ਤੜਕੇ ਦੋ ਵਜੇ ਤਕ ਚੱਲੀ ਜਿਸ ਵਿਚ ਭਾਰਤੀ ਵਫ਼ਦ ਨੇ ਚੀਨੀ ਪੀਪਲਜ਼ ਲਿਬਰੇਸ਼ਨ ਆਰਮੀ ਨੂੰ 'ਲਕਸ਼ਮਣ ਰੇਖਾ' ਤੋਂ ਜਾਣੂੰ ਕਰਾਇਆ ਅਤੇ ਕਿਹਾ ਕਿ ਖੇਤਰ ਵਿਚ ਪੁਰਾਣੀ ਸਥਿਤੀ ਬਹਾਲ ਕਰਨ ਦੀ ਵਿਆਪਕ ਰੂਪ ਵਿਚ ਜ਼ਿੰਮੇਵਾਰੀ ਚੀਨ 'ਤੇ ਹੈ।
File Photo
ਉਨ੍ਹਾਂ ਦਸਿਆ ਕਿ ਦੋਵੇਂ ਧਿਰਾਂ ਆਪੋ ਅਪਣੇ ਫ਼ੌਜੀਆਂ ਨੂੰ ਪਿੱਛੇ ਹਟਣ ਦੇ ਅਗਲੇ ਦੌਰ ਦੇ ਤੌਰ-ਤਰੀਕਿਆਂ ਬਾਰੇ ਸਹਿਮਤ ਹੋਈਆਂ ਅਤੇ ਸਹਿਮਤੀ ਵਾਲੇ ਬਿੰਦੂਆਂ 'ਤੇ ਦੋਹਾਂ ਧਿਰਾਂ ਦੇ ਉੱਚ ਅਧਿਕਾਰੀਆਂ ਵਿਚਾਲੇ ਚਰਚਾ ਮਗਰੋਂ ਇਕ ਦੂਜੇ ਦੇ ਸੰਪਰਕ ਵਿਚ ਰਹਿਣ ਦੀ ਉਮੀਦ ਹੈ। ਸੂਤਰਾਂ ਨੇ ਦਸਿਆ ਕਿ ਲੈਫ਼ਟੀਨੈਂਟ ਜਨਰਲ ਪੱਧਰ ਦੇ ਚੌਥੇ ਗੇੜ ਦੀ ਗੱਲਬਾਤ ਐਲਏਸੀ ਦੇ ਭਾਰਤੀ ਸਰਹੱਦ ਅੰਦਰ ਚੁਸ਼ੁਲ ਵਿਚ ਤੈਅ ਬੈਠਕ ਸਥਾਨ 'ਤੇ ਮੰਗਲਵਾਰ 11 ਵਜੇ ਸ਼ੁਰੂ ਹੋਈ ਸੀ ਹਾਲਾਂਕਿ ਗੱਲਬਾਤ ਦੇ ਨਤੀਜਿਆਂ ਬਾਰੇ ਅਧਿਕਾਰਤ ਬਿਆਨ ਨਹੀਂ ਆਇਆ।
ਭਾਰਤੀ ਵਫ਼ਦ ਦੀ ਅਗਵਾਈ ਲੈਫ਼ਟੀਨੈਂਟ ਜਨਰਲ ਹਰਿੰਦਰ ਸਿੰਘ ਨੇ ਕੀਤੀ ਜੋ ਲੇਹ ਵਿਚ 14ਵੀਂ ਕੋਰ ਦੇ ਕਮਾਂਡਰ ਹਨ ਜਦਕਿ ਚੀਨੀ ਧਿਰ ਦੀ ਅਗਵਾਈ
ਮੇਜਰ ਜਨਰਲ ਲਿਉ ਲਿਨ ਨੇ ਕੀਤੀ ਜੋ ਦਖਣੀ ਸ਼ਿੰਜਿਯਾਂਗ ਫ਼ੌਜੀ ਖੇਤਰ ਦੇ ਕਮਾਂਡਰ ਹਨ। ਥਲ ਸੈਨਾ ਮੁਖੀ ਜਨਰਲ ਐਮ ਐਮ ਨਰਵਣੇ ਨੂੰ ਗੱਲਬਾਤ ਦੇ ਵੇਰਵੇ ਤੋਂ ਜਾਣੂੰ ਕਰਾਇਆ ਗਿਆ
ਜਿਸ ਤੋਂ ਬਾਅਦ ਉਨ੍ਹਾਂ ਸੀਨੀਅਰ ਫ਼ੌਜੀ ਅਧਿਕਾਰੀਆਂ ਨਾਲ ਚਰਚਾ ਕੀਤੀ। ਪੰਜ ਮਈ ਨੂੰ ਚੱਲੇ ਤਣਾਅਪੂਰਨ ਰੇੜਕੇ ਮਗਰੋਂ ਦੋਹਾਂ ਫ਼ੌਜਾਂ ਵਿਚਾਲੇ ਮੰਗਲਵਾਰ ਨੂੰ ਚਰਚਾ ਸੱਭ ਤੋਂ ਲੰਮੀ ਗੱਲਬਾਤ ਸੀ। ਅਧਿਕਾਰੀਆਂ ਮੁਤਾਬਕ ਭਾਰਤ ਨੇ ਪੂਰਬੀ ਲਦਾਖ਼ ਦੇ ਸਾਰੇ ਇਲਾਕਿਆਂ ਵਿਚ ਪੰਜ ਮਈ ਤੋਂ ਪਹਿਲਾਂ ਵਾਲੀ ਹਾਲਤ ਬਹਾਲ ਕਰਨ 'ਤੇ ਵੀ ਜ਼ੋਰ ਦਿਤਾ ਹੈ। (ਏਜੰਸੀ)
