ਜਾਰਡਨ ਦੀਆਂ ਕੰਪਨੀਆਂ ਨੂੰ ਭਾਰਤ ’ਚ ਨਿਵੇਸ਼ ਕਰਨ ਅਤੇ ਚੰਗਾ ਰਿਟਰਨ ਕਮਾਉਣ ਦਾ ਸੱਦਾ ਵੀ ਦਿਤਾ
ਅਮਾਨ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਮੰਗਲਵਾਰ ਨੂੰ ਅਗਲੇ ਪੰਜ ਸਾਲਾਂ ’ਚ ਭਾਰਤ-ਜਾਰਡਨ ਦੁਵਲੇ ਵਪਾਰ ਨੂੰ ਦੁੱਗਣਾ ਕਰ ਕੇ 5 ਅਰਬ ਡਾਲਰ ਕਰਨ ਦਾ ਸੱਦਾ ਦਿਤਾ। ਉਨ੍ਹਾਂ ਨੇ ਜਾਰਡਨ ਦੀਆਂ ਕੰਪਨੀਆਂ ਨੂੰ ਭਾਰਤ ’ਚ ਨਿਵੇਸ਼ ਕਰਨ ਅਤੇ ਦੇ ਦੇਸ਼ ਦੀ ਉੱਚੀ ਵਿਕਾਸ ਦਰ ਦਾ ਲਾਭ ਲੈ ਕੇ ਚੰਗਾ ਰਿਟਰਨ ਕਮਾਉਣ ਲਈ ਵੀ ਕਿਹਾ।
ਮੋਦੀ ਰਾਜਾ ਅਬਦੁੱਲਾ-ਦੂਜੇ ਦੇ ਸੱਦੇ ਉਤੇ ਦੋ ਦਿਨਾਂ ਦੌਰੇ ਉਤੇ ਸੋਮਵਾਰ ਨੂੰ ਜਾਰਡਨ ਦੀ ਰਾਜਧਾਨੀ ਅਮਾਨ ਪਹੁੰਚੇ। ਜਾਰਡਨ ਪ੍ਰਧਾਨ ਮੰਤਰੀ ਦੇ ਚਾਰ ਦਿਨਾ ਅਤੇ ਤਿੰਨ ਦੇਸ਼ਾਂ ਦੇ ਦੌਰੇ ਦਾ ਪਹਿਲਾ ਪੜਾਅ ਹੈ। ਜਾਰਡਨ ਦੀ ਯਾਤਰਾ ਮੁਕੰਮਲ ਕਰ ਕੇ ਮੋਦੀ ਇਥੋਪੀਆ ਪਹੁੰਚ ਗਏ।
ਮੰਗਲਵਾਰ ਨੂੰ ਪ੍ਰਧਾਨ ਮੰਤਰੀ ਮੋਦੀ ਅਤੇ ਕਿੰਗ ਅਬਦੁੱਲਾ-ਦੂਜੇ ਨੇ ਭਾਰਤ-ਜਾਰਡਨ ਵਪਾਰ ਮੰਚ ਨੂੰ ਸੰਬੋਧਨ ਕੀਤਾ। ਇਸ ਵਿਚ ਕ੍ਰਾਊਨ ਪ੍ਰਿੰਸ ਹੁਸੈਨ ਅਤੇ ਜੌਰਡਨ ਦੇ ਵਪਾਰ ਅਤੇ ਉਦਯੋਗ ਮੰਤਰੀ ਅਤੇ ਨਿਵੇਸ਼ ਮੰਤਰੀ ਨੇ ਵੀ ਹਿੱਸਾ ਲਿਆ।
ਦੋਹਾਂ ਨੇਤਾਵਾਂ ਨੇ ਦੋਹਾਂ ਦੇਸ਼ਾਂ ਦਰਮਿਆਨ ਵਪਾਰ-ਤੋਂ-ਕਾਰੋਬਾਰ ਸਬੰਧਾਂ ਨੂੰ ਵਧਾਉਣ ਦੇ ਮਹੱਤਵ ਨੂੰ ਮਨਜ਼ੂਰ ਕੀਤਾ ਅਤੇ ਦੋਹਾਂ ਪਾਸਿਆਂ ਦੇ ਉਦਯੋਗ ਪ੍ਰਮੁੱਖਾਂ ਨੂੰ ਸਮਰੱਥਾ ਅਤੇ ਮੌਕਿਆਂ ਨੂੰ ਵਿਕਾਸ ਅਤੇ ਖੁਸ਼ਹਾਲੀ ਵਿਚ ਬਦਲਣ ਦਾ ਸੱਦਾ ਦਿਤਾ।
ਕਿੰਗ ਅਬਦੁੱਲਾ-ਦੂਜੇ ਨੇ ਨੋਟ ਕੀਤਾ ਕਿ ਜਾਰਡਨ ਦੇ ਮੁਕਤ ਵਪਾਰ ਸਮਝੌਤੇ ਅਤੇ ਭਾਰਤ ਦੀ ਆਰਥਕ ਸ਼ਕਤੀ ਨੂੰ ਜੋੜ ਕੇ ਦਖਣੀ ਏਸ਼ੀਆ ਅਤੇ ਪਛਮੀ ਏਸ਼ੀਆ ਅਤੇ ਇਸ ਤੋਂ ਬਾਹਰ ਦੇ ਵਿਚਕਾਰ ਇਕ ਆਰਥਕ ਗਲਿਆਰਾ ਬਣਾਇਆ ਜਾ ਸਕਦਾ ਹੈ।
ਇਕੱਠ ਨੂੰ ਸੰਬੋਧਨ ਕਰਦਿਆਂ ਮੋਦੀ ਨੇ ਕਿਹਾ ਕਿ ਦੁਨੀਆਂ ਦੀ ਤੀਜੀ ਸੱਭ ਤੋਂ ਵੱਡੀ ਅਰਥਵਿਵਸਥਾ ਬਣਨ ਜਾ ਰਹੀ ਸੱਭ ਤੋਂ ਤੇਜ਼ੀ ਨਾਲ ਵਧ ਰਹੀ ਵੱਡੀ ਅਰਥਵਿਵਸਥਾ ਦੇ ਰੂਪ ’ਚ ਭਾਰਤ ਦੀ ਸਫਲਤਾ ਜਾਰਡਨ ਅਤੇ ਦੁਨੀਆਂ ਭਰ ’ਚ ਅਪਣੇ ਭਾਈਵਾਲਾਂ ਲਈ ਵਪਾਰਕ ਮੌਕੇ ਪ੍ਰਦਾਨ ਕਰਦੀ ਹੈ। ਉਨ੍ਹਾਂ ਕਿਹਾ, ‘‘ਭਾਰਤ ਅਤੇ ਜਾਰਡਨ ਦਰਮਿਆਨ ਸਬੰਧ ਅਜਿਹੇ ਹਨ ਜਿੱਥੇ ਇਤਿਹਾਸਕ ਵਿਸ਼ਵਾਸ ਅਤੇ ਭਵਿੱਖ ਦੇ ਆਰਥਕ ਮੌਕੇ ਇਕੱਠੇ ਹੁੰਦੇ ਹਨ।’’
ਮੋਦੀ ਨੇ ਜਾਰਡਨ ਦੀਆਂ ਕੰਪਨੀਆਂ ਨੂੰ ਭਾਰਤ ਨਾਲ ਭਾਈਵਾਲੀ ਕਰਨ ਅਤੇ ਇਸ ਦੇ 1.4 ਬਿਲੀਅਨ ਖਪਤਕਾਰ ਬਾਜ਼ਾਰ, ਮਜ਼ਬੂਤ ਨਿਰਮਾਣ ਅਧਾਰ ਅਤੇ ਸਥਿਰ, ਪਾਰਦਰਸ਼ੀ ਅਤੇ ਅਨੁਮਾਨਿਤ ਨੀਤੀਗਤ ਮਾਹੌਲ ਦਾ ਲਾਭ ਲੈਣ ਦਾ ਸੱਦਾ ਦਿਤਾ।
ਭਾਰਤੀ ਅਰਥਵਿਵਸਥਾ ਦੇ 8 ਫ਼ੀ ਸਦੀ ਤੋਂ ਵੱਧ ਵਿਕਾਸ ਦਾ ਜ਼ਿਕਰ ਕਰਦੇ ਹੋਏ ਉਨ੍ਹਾਂ ਕਿਹਾ ਕਿ ਭਾਰਤ ਦੇ ਉੱਚ ਜੀ.ਡੀ.ਪੀ. ਅੰਕੜੇ ਉਤਪਾਦਕਤਾ-ਸੰਚਾਲਿਤ ਸ਼ਾਸਨ ਅਤੇ ਇਨੋਵੇਸ਼ਨ ਦੀ ਅਗਵਾਈ ਵਾਲੀਆਂ ਵਿਕਾਸ ਨੀਤੀਆਂ ਕਾਰਨ ਹਨ।
ਭਾਰਤ ਨੂੰ ਜੌਰਡਨ ਦਾ ਤੀਸਰਾ ਸੱਭ ਤੋਂ ਵੱਡਾ ਵਪਾਰਕ ਭਾਈਵਾਲ ਦਸਦੇ ਹੋਏ, ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਵਪਾਰ ਵਿਚ ਗਿਣਤੀ ਅਰਥ ਰਖਦੀ ਹੈ। ਪ੍ਰਧਾਨ ਮੰਤਰੀ ਨੇ ਅੱਗੇ ਕਿਹਾ ਕਿ ਉਹ ਇੱਥੇ ਸਿਰਫ਼ ਗਿਣਤੀ ਉਤੇ ਭਰੋਸਾ ਕਰਨ ਲਈ ਨਹੀਂ ਆਏ ਹਨ, ਬਲਕਿ ਲੰਮੇ ਸਮੇਂ ਦੀ, ਭਰੋਸੇਮੰਦ ਭਾਈਵਾਲੀ ਬਣਾਉਣ ਲਈ ਆਏ ਹਨ ਜੋ ਅੰਕੜਿਆਂ ਤੋਂ ਪਰੇ ਹੈ।
ਮੋਦੀ ਨੇ ਕਿਹਾ ਕਿ ਜਾਰਡਨ ਅਤੇ ਭਾਰਤ ਦਰਮਿਆਨ ਸਮਕਾਲੀ ਸਾਂਝੇਦਾਰੀ ਹੈ, ਜੋ ਉਨ੍ਹਾਂ ਦੇ ਨੇੜਲੇ ਸੱਭਿਅਤਾ ਸਬੰਧਾਂ ਦੀ ਮਜ਼ਬੂਤ ਇਮਾਰਤ ਉਤੇ ਬਣੀ ਹੈ। ਉਨ੍ਹਾਂ ਨੇ ਅਗਲੇ ਪੰਜ ਸਾਲਾਂ ਵਿਚ ਜਾਰਡਨ ਨਾਲ ਦੁਵਲੇ ਵਪਾਰ ਨੂੰ ਦੁੱਗਣਾ ਕਰ ਕੇ 5 ਅਰਬ ਡਾਲਰ ਕਰਨ ਦਾ ਪ੍ਰਸਤਾਵ ਵੀ ਦਿਤਾ।
ਮੋਦੀ ਨੇ ਡਿਜੀਟਲ ਜਨਤਕ ਮੁਢਲਾ ਢਾਂਚਾ, ਆਈ.ਟੀ., ਫਿਨਟੈੱਕ, ਹੈਲਥ-ਟੈੱਕ ਅਤੇ ਐਗਰੀ-ਟੈਕ ਦੇ ਖੇਤਰਾਂ ਵਿਚ ਭਾਰਤ-ਜਾਰਡਨ ਵਪਾਰਕ ਸਹਿਯੋਗ ਦੇ ਮੌਕਿਆਂ ਉਤੇ ਚਾਨਣਾ ਪਾਇਆ ਅਤੇ ਦੋਹਾਂ ਦੇਸ਼ਾਂ ਦੇ ਸਟਾਰਟ-ਅਪਸ ਨੂੰ ਇਨ੍ਹਾਂ ਖੇਤਰਾਂ ਵਿਚ ਹੱਥ ਮਿਲਾਉਣ ਲਈ ਸੱਦਾ ਦਿਤਾ।
ਫਾਰਮਾ ਅਤੇ ਮੈਡੀਕਲ ਉਪਕਰਣਾਂ ਦੇ ਖੇਤਰਾਂ ਵਿਚ ਭਾਰਤ ਦੀ ਤਾਕਤ ਅਤੇ ਜੌਰਡਨ ਦੇ ਭੂਗੋਲਿਕ ਲਾਭ ਬਾਰੇ ਗੱਲ ਕਰਦੇ ਹੋਏ, ਉਨ੍ਹਾਂ ਕਿਹਾ ਕਿ ਦੋਵੇਂ ਦੇਸ਼ ਇਕ ਦੂਜੇ ਦੇ ਪੂਰਕ ਹੋ ਸਕਦੇ ਹਨ ਅਤੇ ਇਨ੍ਹਾਂ ਖੇਤਰਾਂ ਵਿਚ ਜੌਰਡਨ ਨੂੰ ਪਛਮੀ ਏਸ਼ੀਆ ਅਤੇ ਅਫਰੀਕਾ ਲਈ ਇਕ ਭਰੋਸੇਮੰਦ ਕੇਂਦਰ ਬਣਾ ਸਕਦੇ ਹਨ।
ਉਨ੍ਹਾਂ ਖੇਤੀਬਾੜੀ, ਕੋਲਡ ਚੇਨ, ਫੂਡ ਪਾਰਕ, ਖਾਦਾਂ, ਬੁਨਿਆਦੀ ਢਾਂਚਾ, ਆਟੋਮੋਬਾਈਲ, ਗ੍ਰੀਨ ਮੋਬਿਲਿਟੀ ਅਤੇ ਵਿਰਾਸਤ ਅਤੇ ਸਭਿਆਚਾਰਕ ਸੈਰ-ਸਪਾਟੇ ਦੇ ਖੇਤਰਾਂ ਵਿਚ ਦੋਹਾਂ ਧਿਰਾਂ ਲਈ ਵਪਾਰਕ ਮੌਕਿਆਂ ਨੂੰ ਵੀ ਰੇਖਾਂਕਿਤ ਕੀਤਾ।
ਭਾਰਤ ਦੀਆਂ ਪ੍ਰਦੂਸ਼ਣ–ਮੁਕਤ ਪਹਿਲਾਂ ਬਾਰੇ ਬੋਲਦਿਆਂ ਪ੍ਰਧਾਨ ਮੰਤਰੀ ਨੇ ਅਖੁੱਟ ਊਰਜਾ, ਗ੍ਰੀਨ ਫ਼ਾਈਨਾਂਸਿੰਗ, ਡੀਸੈਲੀਨੇਸ਼ਨ ਤੇ ਵਾਟਰ ਰੀਸਾਈਕਲਿੰਗ ਦੇ ਖੇਤਰਾਂ ਵਿਚ ਭਾਰਤ–ਜੌਰਡਨ ਵਪਾਰਕ ਤਾਲਮੇਲ ਵਧਾਉਣ ਦਾ ਸੁਝਾਅ ਦਿਤਾ।
ਬੁਨਿਆਦੀ ਢਾਂਚੇ, ਸਿਹਤ, ਫਾਰਮਾ, ਖਾਦ, ਖੇਤੀਬਾੜੀ, ਅਖੁੱਟ ਊਰਜਾ, ਟੈਕਸਟਾਈਲ, ਲੌਜਿਸਟਿਕਸ, ਆਟੋਮੋਬਾਈਲ, ਊਰਜਾ, ਰੱਖਿਆ ਅਤੇ ਨਿਰਮਾਣ ਦੇ ਖੇਤਰਾਂ ਵਿਚ ਦੋਹਾਂ ਦੇਸ਼ਾਂ ਦੇ ਕਾਰੋਬਾਰੀ ਲੀਡਰਾਂ ਨੇ ਫੋਰਮ ਵਿਚ ਹਿੱਸਾ ਲਿਆ।
ਵਫ਼ਦ ਵਿਚ ਫਿੱਕੀ ਅਤੇ ਜੌਰਡਨ ਚੈਂਬਰ ਆਫ਼ ਕਮਰਸ ਦੇ ਨੁਮਾਇੰਦੇ ਵੀ ਸ਼ਾਮਲ ਸਨ, ਜਿਨ੍ਹਾਂ ਦਾ ਦੋਹਾਂ ਦੇਸ਼ਾਂ ਦਰਮਿਆਨ ਵਪਾਰ ਅਤੇ ਆਰਥਕ ਸਹਿਯੋਗ ਨੂੰ ਉਤਸ਼ਾਹਿਤ ਕਰਨ ਲਈ ਮੌਜੂਦਾ ਸਹਿਮਤੀ ਪੱਤਰ ਹੈ।
