ਬ੍ਰਿਟਿਸ਼ ਪੁਲਿਸ ਨੇ ਦਖਣੀ ਇੰਗਲੈਂਡ 'ਚ ਗੋਲੀ ਚਲਣ ਦੀ ਆਵਾਜ਼ ਸੁਣੇ ਜਾਣ ਦੀ ਸ਼ਿਕਾਇਤ ਤੋਂ ਬਾਅਦ ਇਕ 47 ਸਾਲਾ ਸਿੱਖ ਅਤੇ ਉਸ ਦੇ ਮੁੰਡੇ ਨੂੰ ਹੱਥਕੜੀਆਂ ਲਾ ਦਿਤੀਆਂ..

ਲੰਡਨ, 27 ਅਗੱਸਤ : ਬ੍ਰਿਟਿਸ਼ ਪੁਲਿਸ ਨੇ ਦਖਣੀ ਇੰਗਲੈਂਡ 'ਚ ਗੋਲੀ ਚਲਣ ਦੀ ਆਵਾਜ਼ ਸੁਣੇ ਜਾਣ ਦੀ ਸ਼ਿਕਾਇਤ ਤੋਂ ਬਾਅਦ ਇਕ 47 ਸਾਲਾ ਸਿੱਖ ਅਤੇ ਉਸ ਦੇ ਮੁੰਡੇ ਨੂੰ ਹੱਥਕੜੀਆਂ ਲਾ ਦਿਤੀਆਂ ਹਾਲਾਂਕਿ ਬਾਅਦ ਵਿਚ ਪਤਾ ਲਗਾ ਹੈ ਕਿ ਇਹ ਅਸਲ ਵਿਚ ਗੱਡੀ ਦੇ ਟਾਇਰ ਦੇ ਫਟਣ ਦੀ ਆਵਾਜ਼ ਸੀ।
ਸੁੱਖੀ ਰਿਆਤ ਨਾਂ ਦੇ ਸਿੱਖ ਨੇ ਹਾਟਰਫ਼ੋਰਡਸ਼ਾਇਰ ਦੇ ਹਿਚਿਨ ਵਿਚ ਅਪਣੇ ਘਰ ਦੇ ਵਿਹੜੇ ਵਿਚ ਗੱਡੀ ਪਾਰਕ ਕੀਤੀ ਸੀ। ਇਸ ਦੇ ਕੁੱਝ ਦੇਰ ਬਾਅਦ ਹੀ 10-12 ਹਥਿਆਰਬੰਦ ਪੁਲਿਸ ਕਰਮਚਾਰੀ ਕੁੱਤਿਆਂ ਸਮੇਤ ਉਨ੍ਹਾਂ ਦੇ ਬਗ਼ੀਚੇ ਵਿਚ ਦਾਖ਼ਲ ਹੋ ਗਏ ਅਤੇ ਉਨ੍ਹਾਂ ਨੂੰ ਹੱਥਕੜੀਆਂ ਲਗਾ ਦਿਤੀਆਂ।
1979 ਤੋਂ ਉਥੇ ਰਹਿ ਰਹੇ ਰਿਆਤ ਨੇ ਦਸਿਆ ਕਿ ਇਹ ਸੱਭ ਦੇਖ ਕੇ ਅਸੀਂ ਘਬਰਾ ਗਏ ਅਤੇ ਮੈਨੂੰ ਹੱਥ ਉਪਰ ਕਰਨ ਲਈ ਕਿਹਾ ਗਿਆ। ਉਹ ਮੈਨੂੰ ਮੁੱਖ ਸੜਕ 'ਤੇ ਲੈ ਗਏ ਅਤੇ ਮੇਰੀ ਤਲਾਸ਼ੀ ਲਈ ਅਤੇ ਬਾਅਦ ਵਿਚ ਘਰ ਦੀ ਤਲਾਸ਼ੀ ਵੀ ਲਈ ਗਈ। ਰਿਆਤ ਨੇ ਇਸ ਮਾਮਲੇ ਦੇ ਸਬੰਧ ਵਿਚ ਪੂਰੀ ਗੱਲ ਪੁਲਿਸ ਨੂੰ ਦੱਸੀ।
ਰਿਆਤ ਦੀ 20 ਸਾਲਾ ਬੇਟੀ ਮਨਮੀਤ ਕੌਰ ਨੇ ਪੁਲਿਸ ਵਾਲਿਆਂ ਨੂੰ ਬੇਨਤੀ ਕੀਤੀ ਕਿ ਉਹ ਉਸ ਕਮਰੇ ਵਿਚ ਬੂਟ ਉਤਾਰ ਕੇ ਜਾਣ ਜਿਥੇ ਸਿੱਖ ਧਰਮ ਦੇ ਪਵਿੱਤਰ ਗ੍ਰੰਥ ਰੱਖੇ ਸਨ ਪਰ ਉਨ੍ਹਾਂ ਨੇ ਉਸ ਦੀ ਗੱਲ ਨੂੰ ਅਣਦੇਖਾ ਕਰ ਦਿਤਾ। ਮਨਮੀਤ ਨੇ ਪੁਲਿਸ ਦੇ ਇਸ ਰਵਈਏ ਦੀ ਬਹੁਤ ਆਲੋਚਨਾ ਕੀਤੀ। ਉਹ ਦਸਦੀ ਹੈ ਕਿ ਇਹ ਸੱਭ ਕੁੱਝ ਬਹੁਤ ਡਰਾਉਣ ਵਾਲਾ ਸੀ। ਪੁਲਿਸ ਦਾ ਕਹਿਣਾ ਹੈ ਕਿ ਕਿਸੇ ਨੇ ਰਿਆਤ ਦੀ ਗੱਡੀ ਤੋਂ ਗੋਲੀ ਚੱਲਣ ਦੀ ਆਵਾਜ਼ ਸੁਣ ਕੇ ਸ਼ਿਕਾਇਤ ਕੀਤੀ ਜਿਸ ਤੋਂ ਬਾਅਦ ਇਹ ਛਾਪਾ ਮਾਰਿਆ ਗਿਆ। ਉਧਰ ਹਾਟਰਫ਼ੋਰਡਸ਼ਾਇਰ ਦੀ ਮਹਿਲਾ ਪੁਲਿਸ ਬੁਲਾਰਾ ਨੇ ਕਿਹਾ ਕਿ ਅਧਿਕਾਰੀਆਂ ਦਾ ਫ਼ਰਜ਼ ਹੈ ਕਿ ਉਹ ਪ੍ਰਾਪਤ ਸੂਚਨਾ ਦੇ ਆਧਾਰ 'ਤੇ ਕਾਰਵਾਈ ਕਰਨ। ਉਨ੍ਹਾਂ ਨੇ ਤਲਾਸ਼ੀ ਦੌਰਾਨ ਕੀਤੀ ਗਈ ਬਦਸਲੂਕੀ ਲਈ ਮੁਆਫ਼ੀ ਮੰਗੀ ਹੈ। (ਪੀ.ਟੀ.ਆਈ)