ਪੱਛਮੀ ਬੰਗਾਲ ਵਿਚ ਭਾਜਪਾ ਇੰਚਾਰਜ ਕੈਲਾਸ਼ ਵਿਜੈਵਰਗੀਆ ਦੇ ਸਹਿਯੋਗੀ ਹਨ ਰਾਕੇਸ਼ ਸਿੰਘ
ਕੋਲਕਾਤਾ: ਹਾਲ ਹੀ ਵਿਚ ਕੋਲਕਾਤਾ ਪੁਲਿਸ ਨੇ ਪੱਛਮੀ ਬੰਗਾਲ ਦੇ ਭਾਜਪਾ ਯੁਵਾ ਮੋਰਚਾ ਦੀ ਨੇਤਾ ਪਾਮੇਲਾ ਗੋਸਵਾਮੀ ਅਤੇ ਉਸ ਦੇ ਕਰੀਬੀ ਦੋਸਤ ਨੂੰ ਦੱਖਣੀ ਕੋਲਕਾਤਾ ਦੇ ਨਿਊ ਅਲੀਪੁਰ ਤੋਂ ਕੋਕੀਨ ਸਮੇਤ ਗ੍ਰਿਫ਼ਤਾਰ ਕੀਤਾ ਹੈ। ਕੋਲਕਾਤਾ ਪੁਲਿਸ ਮੁਤਾਬਕ ਉਹਨਾਂ ਪਾਸੋਂ ਲੱਖਾਂ ਰੁਪਏ ਦੀ ਕੋਕੀਨ ਬਰਾਮਦ ਕੀਤੀ ਗਈ ਹੈ।ਇਸ ਮਾਮਲੇ ਵਿਚ ਪਾਮੇਲਾ ਗੋਸਵਾਮੀ ਨੇ ਹੁਣ ਭਾਜਪਾ ਜਨਰਲ ਸਕੱਤਰ ਕੈਲਾਸ਼ ਵਿਜੈਵਰਗੀਆ ਦੇ ਇਕ ਸਹਿਯੋਗੀ ਦਾ ਨਾਂਅ ਲਿਆ ਹੈ।
ਸ਼ਨੀਵਾਰ ਸ਼ਾਮ ਨੂੰ ਜਦੋਂ ਪੁਲਿਸ ਪਾਮੇਲਾ ਗੋਸਵਾਮੀ ਨੂੰ ਸਥਾਨਕ ਅਦਾਲਤ ਵਿਚ ਪੇਸ਼ ਕਰਨ ਲਈ ਕੋਰਟ ਲੈ ਕੇ ਪਹੁੰਚੀ ਤਾਂ ਪਾਮੇਲਾ ਨੇ ਪੱਤਰਕਾਰਾਂ ‘ਤੇ ਚਿਲਾਉਂਦੇ ਹੋਏ ਕਿਹਾ ਕਿ ਰਾਸ਼ਟਰੀ ਜਨਰਲ ਸਕੱਤਰ ਕੈਲਾਸ਼ ਵਿਜੈਵਰਗੀਆ ਦੇ ਸਹਿਯੋਗੀ ਰਾਕੇਸ਼ ਸਿੰਘ ਵੀ ਡਰੱਗ ਮਾਮਲੇ ਵਿਚ ਉਹਨਾਂ ਦੇ ਨਾਲ ਸਨ।
ਪਾਮੇਲਾ ਗੋਸਵਾਮੀ ਨੇ ਕੀਤੀ ਸੀਆਈਡੀ ਜਾਂਚ ਦੀ ਮੰਗ
ਪਾਮੇਲਾ ਨੇ ਦੋਸ਼ ਲਗਾਇਆ ਕਿ ਰਾਕੇਸ਼ ਸਿੰਘ ਨੇ ਹੀ ਉਹਨਾਂ ਖ਼ਿਲਾਫ ਸਾਜ਼ਿਸ਼ ਰਚੀ ਹੈ। ਇਸ ਦੇ ਨਾਲ ਹੀ ਪਾਮੇਲਾ ਨੇ ਮਾਮਲੇ ਵਿਚ ਸੀਆਈਡੀ ਜਾਂਚ ਦੀ ਮੰਗ ਵੀ ਕੀਤੀ ਹੈ। ਇਸ ਦੌਰਾਨ ਪਾਮੇਲਾ ਨੇ ਕਿਹਾ, ‘ਮੈਂ ਸੀਆਈਡੀ ਜਾਂਚ ਚਾਹੁੰਦੀ ਹਾਂ। ਕੈਲਾਸ਼ ਵਿਜੈਵਰਗੀਆ ਦੇ ਸਹਿਯੋਗੀ ਭਾਜਪਾ ਦੇ ਰਾਕੇਸ਼ ਸਿੰਘ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਜਾਣਾ ਚਾਹੀਦਾ ਹੈ। ਇਹ ਉਹਨਾਂ ਦੀ ਸਾਜ਼ਿਸ਼ ਸੀ’।
ਪੱਛਮੀ ਬੰਗਾਲ ਵਿਚ ਭਾਜਪਾ ਇੰਚਾਰਜ ਹਨ ਕੈਲਾਸ਼ ਵਿਜੈਵਰਗੀਆ
ਕੈਲਾਸ਼ ਵਿਜੈਵਰਗੀਆ ਪੱਛਮੀ ਬੰਗਾਲ ਵਿਚ ਭਾਜਪਾ ਇੰਚਾਰਜ ਹਨ। ਪੱਛਮੀ ਬੰਗਾਲ ਵਿਚ ਜਲਦ ਹੀ ਵਿਧਾਨ ਸਭਾ ਚੋਣਾਂ ਹੋਣ ਜਾ ਰਹੀਆਂ ਹਨ। ਦੱਸ ਦਈਏ ਕਿ ਪੁਲਿਸ ਨੇ ਸ਼ੁੱਕਰਵਾਰ ਨੂੰ ਪਾਮੇਲਾ ਗੋਸਵਾਮੀ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਪੁਲਿਸ ਮੁਤਾਬਕ ਭਾਜਪਾ ਨੇਤਾ ਪਾਮੇਲਾ ਅਤੇ ਉਸ ਦਾ ਦੋਸਤ ਇਕ ਕਾਰ ਵਿਚ ਸਵਾਰ ਸਨ। ਪੁਲਿਸ ਨੇ ਗੁਪਤ ਸੂਚਨਾ ਦੇ ਆਧਾਰ ’ਤੇ ਜਦੋਂ ਕਾਰ ਦੀ ਤਲਾਸ਼ੀ ਲਈ ਤਾਂ ਪਾਮੇਲਾ ਗੋਸਵਾਮੀ ਦੇ ਬੈਗ ਅਤੇ ਕਾਰ ਦੇ ਹੋਰ ਹਿੱਸਿਆਂ ਤੋਂ ਕਰੀਬ 100 ਗ੍ਰਾਮ ਕੋਕੀਨ ਬਰਾਮਦ ਹੋਈ, ਜਿਸ ਮਗਰੋਂ ਉਹਨਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ।