ਕਿਹਾ- ਇੱਕ ਮਾਸਟਰ ਪਲਾਨ ਬਣਾਓ, ਕਲੱਬ ਦੀ ਬਿਹਤਰੀ ਲਈ ਕੰਮ ਕਰਾਂਗਾ
ਚੰਡੀਗੜ੍ਹ : ਲੈਫ਼ਟੀਨੈਂਟ ਕਰਨਲ ਐਚ.ਐਸ. ਬੌਬੀ ਚਾਹਲ ਨੂੰ ਚੰਡੀਗੜ੍ਹ ਗੌਲਫ਼ ਕਲੱਬ (ਸੀਜੀਸੀ) ਦਾ ਮੁਖੀ ਚੁਣਿਆ ਗਿਆ ਹੈ। ਉਨ੍ਹਾਂ ਨੂੰ ਸਭ ਤੋਂ ਵੱਧ 505 ਵੋਟਾਂ ਮਿਲੀਆਂ ਅਤੇ 89 ਵੋਟਾਂ ਦੇ ਫ਼ਰਕ ਨਾਲ ਚਾਹਲ ਨੇ ਜਿੱਤ ਦਰਜ ਕੀਤੀ ਹੈ। ਦੂਜੇ ਪਾਸੇ ਇਸ ਅਹੁਦੇ ਲਈ ਮੇਜਰ ਰਜਿੰਦਰ ਸਿੰਘ ਵਿਰਕ ਨੂੰ 406 ਅਤੇ ਐਸਪੀਐਸ ਘਈ ਨੂੰ 260 ਵੋਟਾਂ ਮਿਲੀਆਂ। ਹੁਣ 11 ਕਾਰਜਕਾਰਨੀ ਮੈਂਬਰਾਂ ਲਈ ਵੋਟਾਂ ਦੀ ਗਿਣਤੀ ਚੱਲ ਰਹੀ ਹੈ। ਇਨ੍ਹਾਂ ਅਹੁਦਿਆਂ ਲਈ 31 ਨਾਮਜ਼ਦਗੀਆਂ ਹੋਈਆਂ ਸਨ। ਪ੍ਰਧਾਨ ਦੇ ਅਹੁਦੇ ਲਈ ਇਸ ਵਾਰ ਕੁੱਲ 1,154 ਵੋਟਾਂ ਪਈਆਂ। ਕਲੱਬ ਦੇ ਕਰੀਬ 1800 ਸਥਾਈ ਮੈਂਬਰ ਹਨ ਜੋ ਵੋਟ ਪਾਉਣ ਦੇ ਹੱਕਦਾਰ ਸਨ।
ਚਾਹਲ ਨੇ ਦੱਸਿਆ ਕਿ ਉਹ ਕਲੱਬ ਦੀ ਬਿਹਤਰੀ ਲਈ ਕੰਮ ਕਰਨਗੇ। ਇਸ ਦੇ ਲਈ ਇੱਕ ਮਾਸਟਰ ਪਲਾਨ ਤਿਆਰ ਕੀਤਾ ਜਾਵੇਗਾ। ਦੱਸ ਦੇਈਏ ਕਿ ਲੈਫਟੀਨੈਂਟ ਕਰਨਲ ਐਚਐਸ ਚਾਹਲ ਤਿੰਨ ਵਾਰ ਕਾਰਜਕਾਰਨੀ ਕਮੇਟੀ ਦੇ ਮੈਂਬਰ ਰਹਿ ਚੁੱਕੇ ਹਨ। ਹਾਲਾਂਕਿ ਉਹ ਪਹਿਲੀ ਵਾਰ ਪ੍ਰੈਜ਼ੀਡੈਂਟ ਦੇ ਅਹੁਦੇ ਲਈ ਖੜ੍ਹੇ ਹੋਏ ਸਨ। 2018 ਵਿੱਚ ਉਹ ਕਲੱਬ ਦੇ ਸਕੱਤਰ ਵੀ ਰਹਿ ਚੁੱਕੇ ਹਨ।
Lieutenant Colonel Chahal becomes the new President of Chandigarh Golf Club
ਉਨ੍ਹਾਂ ਕਲੱਬ ਦੇ ਕੰਮਕਾਜ ਵਿੱਚ ਪਾਰਦਰਸ਼ਤਾ ਲਿਆਉਣ ਦੀ ਗੱਲ ਕਹੀ। ਉਨ੍ਹਾਂ ਦਾ ਵਿਚਾਰ ਹਰ ਕਿਸਮ ਦੀ ਖਰੀਦ ਨੂੰ ਟੈਂਡਰ ਪ੍ਰਕਿਰਿਆ ਦੇ ਰੂਪ ਵਿੱਚ ਬਣਾਉਣਾ ਹੈ ਅਤੇ ਗੌਲਫ਼ ਕੋਰਸ ਦੇ ਵਿਕਾਸ ਲਈ ਇੱਕ ਮਾਸਟਰ ਪਲਾਨ ਤਿਆਰ ਕਰਨਾ ਹੈ। ਇਸ ਦੇ ਨਾਲ ਹੀ ਉਹ ਬਾਰ ਅਤੇ ਕੇਟਰਿੰਗ ਚਾਰਜਿਜ਼ ਨੂੰ ਘਟਾਉਣ 'ਤੇ ਵੀ ਧਿਆਨ ਦੇਣਗੇ।
ਸੇਵਾਮੁਕਤ ਮੇਜਰ ਆਰਐਸ ਵਿਰਕ, ਐਸਪੀਐਸ ਘਈ ਅਤੇ ਲੈਫ਼ਟੀਨੈਂਟ ਕਰਨਲ ਐਚਐਸ ਬੌਬੀ ਚਾਹਲ ਪ੍ਰਧਾਨ ਦੇ ਅਹੁਦੇ ਲਈ ਉਮੀਦਵਾਰ ਸਨ। ਇਸ ਵਾਰ ਤਿਕੋਣਾ ਮੁਕਾਬਲਾ ਸੀ, ਜਿਸ ਨੂੰ ਬੌਬੀ ਚਾਹਲ ਨੇ ਜਿੱਤ ਲਿਆ ਹੈ। ਚੰਡੀਗੜ੍ਹ ਗੋਲਫ ਕਲੱਬ ਦੇ 1800 ਮੈਂਬਰਾਂ ਵਿੱਚੋਂ 1154 ਨੇ ਆਪਣੀ ਵੋਟ ਪਾਈ। ਕਈ ਵੱਡੀਆਂ ਸ਼ਖਸੀਅਤਾਂ ਵੋਟ ਪਾਉਣ ਆਈਆਂ।
Lieutenant Colonel Chahal becomes the new President of Chandigarh Golf Club
ਇਨ੍ਹਾਂ ਵਿੱਚ ਅਰਜੁਨ ਐਵਾਰਡੀ ਹਰਮੀਤ ਸਿੰਘ ਕਾਹਲੋ, ਕੈਪਟਨ ਅਮਰਿੰਦਰ ਸਿੰਘ ਦੇ ਭਰਾ ਮਾਲਵਿੰਦਰ ਸਿੰਘ, ਪੰਜਾਬ ਦੇ ਸਾਬਕਾ ਖੇਡ ਮੰਤਰੀ ਰਾਣਾ ਗੁਰਮੀਤ ਸਿੰਘ ਸੋਢੀ, ਕਾਂਗਰਸ ਦੇ ਕੌਮੀ ਬੁਲਾਰੇ ਰਣਦੀਪ ਸਿੰਘ ਸੁਰਜੇਵਾਲਾ, ਸੀਨੀਅਰ ਕਾਂਗਰਸੀ ਆਗੂ ਤੇ ਕੰਢਿਆਇਆ ਦੇ ਵਿਧਾਇਕ ਪ੍ਰਤਾਪ ਸਿੰਘ ਬਾਜਵਾ, ਫਤਿਹ ਸਿੰਘ ਬਾਜਵਾ, ਪਰਮਿੰਦਰ ਸਿੰਘ ਢੀਂਡਸਾ, ਸ. ਬਲਬੀਰ ਸਿੰਘ ਸਿੱਧੂ ਨੇ ਆਪਣੀ ਵੋਟ ਪਾਈ।
Lieutenant Colonel Chahal becomes the new President of Chandigarh Golf Club
ਕੋਵਿਡ-19 ਕਾਰਨ ਤਿੰਨ ਸਾਲਾਂ ਬਾਅਦ ਗੋਲਫ ਕਲੱਬ ਦੀ ਚੋਣ ਕੀਤੀ ਗਈ ਹੈ। ਇਸ ਤੋਂ ਇਲਾਵਾ ਇਸ ਵਾਰ ਮੈਚ ਤਿਕੋਣਾ ਰਿਹਾ। ਜਿਸ ਕਾਰਨ ਪਿਛਲੇ ਸਾਲਾਂ ਦੇ ਮੁਕਾਬਲੇ ਇਸ ਸਾਲ ਵੱਧ ਵੋਟਿੰਗ ਹੋਈ ਹੈ। ਇਸ ਸਾਲ ਕਰੀਬ 65 ਫ਼ੀਸਦੀ ਵੋਟਿੰਗ ਹੋਈ ਹੈ। ਸਾਲ 2018 ਵਿੱਚ 50 ਫ਼ੀਸਦੀ, ਸਾਲ 2017 ਵਿੱਚ 62 ਫ਼ੀਸਦੀ ਅਤੇ ਸਾਲ 2016 ਵਿੱਚ 68 ਫ਼ੀਸਦੀ ਵੋਟਿੰਗ ਹੋਈ ਸੀ। ਅਜਿਹੇ 'ਚ ਵਧੀ ਵੋਟ ਫ਼ੀਸਦੀ ਨੂੰ ਦੇਖ ਕੇ ਉਮੀਦਵਾਰ ਕਾਫੀ ਉਤਸ਼ਾਹਿਤ ਨਜ਼ਰ ਆਏ।
