ਯੂਏਈ ਤੇ ਅਮਰੀਕਾ ਕਰੋੜਪਤੀਆਂ ਦੇ ਮਨਪਸੰਦ ਦੇਸ਼
Report: ਇਸ ਵਰ੍ਹੇ ਦੌਰਾਨ 4,300 ਕਰੋੜਪਤੀਆਂ ਦੇ ਭਾਰਤ ਛੱਡ ਕੇ ਹੋਰਨਾਂ ਦੇਸ਼ਾਂ ’ਚ ਜਾ ਕੇ ਵਸ ਜਾਣ ਦੀ ਸੰਭਾਵਨਾ ਹੈ। ਇਹ ਗਿਣਤੀ ਪਿਛਲੇ ਸਾਲ 2023 ਦੇ 5,100 ਦੇ ਅੰਕੜੇ ਨਾਲੋਂ ਥੋੜ੍ਹੀ ਘਟ ਹੈ। ਇਹ ਅੰਕੜੇ ਕੌਮਾਂਤਰੀ ਪਧਰ ਦੀ ਹੈਨਲੇ ਐਂਡ ਪਾਰਟਨਰਜ਼ ਨਾਮ ਦੀ ਇਮੀਗ੍ਰੇਸ਼ਨ ਕੰਪਨੀ ਨੇ ਜਾਰੀ ਕੀਤੇ ਹਨ।
ਭਾਰਤ ਦੁਨੀਆ ਦਾ ਤੀਜਾ ਅਜਿਹਾ ਦੇਸ਼ ਹੈ, ਜਿਥੋਂ ਸੱਭ ਤੋਂ ਵਧ ਕਰੋੜਪਤੀ ਕਿਸੇ ਹੋਰ ਦੇਸ਼ ’ਚ ਜਾ ਕੇ ਵਸ ਰਹੇ ਹਨ। ਚੀਨ ’ਚੋਂ ਇਸ ਵਰ੍ਹੇ 15,200 ਅਤੇ ਇੰਗਲੈਂਡ ’ਚੋਂ 9,500 ਕਰੋੜਪਤੀ ਸਦਾ ਲਈ ਜਾ ਰਹੇ ਹਨ। ਇਸ ਵਰ੍ਹੇ 2024 ਦੌਰਾਨ ਪੂਰੀ ਦੁਨੀਆ ’ਚ 1.28 ਲੱਖ ਕਰੋੜਪਤੀ ਆਪੋ-ਅਪਣੇ ਦੇਸ਼ਾਂ ਨੂੰ ਛਡਣਗੇ। ਇਹ ਗਿਣਤੀ ਪਿਛਲੇ ਵਰ੍ਹੇ ਦੇ 1.20 ਲੱਖ ਦੇ ਮੁਕਾਬਲੇ ਜ਼ਿਆਦਾ ਹੈ। ਸਾਲ 2019 ਦੌਰਾਨ ਇਹ ਗਿਣਤੀ 1.10 ਲੱਖ ਸੀ।
ਜ਼ਿਆਦਾਤਰ ਕਰੋੜਪਤੀ ਸੰਯੁਕਤ ਅਰਬ ਅਮੀਰਾਤ (ਯੂਏਈ) ਅਤੇ ਅਮਰੀਕਾ ’ਚ ਜਾ ਕੇ ਸੈਟਲ ਹੋਣਾ ਪਸੰਦ ਕਰਦੇ ਹਨ। ਯੂਏਈ ’ਚ ਇਸ ਵਰ੍ਹੇ 6,700 ਨਵੇਂ ਕਰੋੜਪਤੀਆਂ ਨੇ ਜਾ ਕੇ ਵਸਣਾ ਹੈ। ਉਂਝ ਕੈਨੇਡਾ, ਸਿੰਗਾਪੁਰ ਤੇ ਆਸਟ੍ਰੇਲੀਆ ਵੀ ਦੁਨੀਆ ਭਰ ਦੇ ਕਰੋੜਪਤੀਆਂ ਦੇ ਮਨਪਸੰਦ ਦੇਸ਼ ਹਨ। ਦੁਨੀਆਂ ’ਚ ਕਰੋੜਪਤੀ ਅਜਿਹੇ ਵਿਅਕਤੀ ਨੂੰ ਮੰਨਿਆ ਜਾਂਦਾ ਹੈ, ਜਿਸ ਕੋਲ ਘਟੋ-ਘਟ 10 ਲੱਖ ਅਮਰੀਕੀ ਡਾਲਰ (ਅੱਠ ਕਰੋੜ 30 ਲੱਖ ਭਾਰਤੀ ਰੁਪਏ) ਦੀ ਦੌਲਤ ਹੁੰਦੀ ਹੈ।
(For more Punjabi news apart from 4,300 millionaires may leave India this year, stay tuned to Rozana Spokesman)
