ਭਾਰਤੀ ਰਿਜ਼ਰਵ ਬੈਂਕ ਨੇ ਖ਼ਾਤੇ ਖੋਲ੍ਹਣ ਤੇ ਸੰਚਾਲਨ ਸਬੰਧੀ ਹਦਾਇਤਾਂ ਕੀਤੀਆਂ ਜਾਰੀ
New Delhi: ਭਾਰਤੀ ਰਿਜ਼ਰਵ ਬੈਂਕ (ਆਰ. ਬੀ. ਆਈ.) ਨੇ ਕਿਹਾ ਕਿ ਹੁਣ ਕਿਸੇ ਵੀ ਉਮਰ ਦੇ ਨਾਬਾਲਿਗ ਆਪਣੇ ਸਰਪ੍ਰਸਤਾਂ ਦੇ ਮਾਧਿਅਮ ਨਾਲ ਬੈਂਕ ’ਚ ਬੱਚਤ ਅਤੇ ਐੱਫ. ਡੀ. ਖਾਤਾ ਖੋਲ੍ਹ ਸਕਦੇ ਹਨ। ਆਰ. ਬੀ. ਆਈ. ਨੇ ਸਾਰੇ ਕਮਰਸ਼ੀਅਲ ਅਤੇ ਸਹਿਕਾਰੀ ਬੈਂਕਾਂ ਨੂੰ ਜਾਰੀ ਨੋਟੀਫਿਕੇਸ਼ਨ ’ਚ ਨਾਬਾਲਿਗਾਂ ਲਈ ਜਮ੍ਹਾ ਖਾਤਾ ਖੋਲ੍ਹਣ ਅਤੇ ਸੰਚਾਲਨ ਨਾਲ ਸਬੰਧਤ ਨਵੇਂ ਦਿਸ਼ਾ-ਨਿਰਦੇਸ਼ ਜਾਰੀ ਕੀਤੇ ਹਨ।
ਆਰਬੀਆਈ ਨੇ ਬੈਂਕਾਂ ਨੂੰ 1 ਜੁਲਾਈ, 2025 ਤਕ ਸੋਧੀਆਂ ਹਦਾਇਤਾਂ ਦੇ ਅਨੁਸਾਰ ਮੌਜੂਦਾ ਨੀਤੀਆਂ ਬਣਾਉਣ ਜਾਂ ਸੋਧਣ ਲਈ ਕਿਹਾ ਹੈ।
ਆਰ. ਬੀ. ਆਈ. ਨੇ ਮੌਜੂਦਾ ਨਿਯਮਾਂ ਦੀ ਸਮੀਖਿਆ ਕਰ ਕੇ ਇਨ੍ਹਾਂ ਨੂੰ ਜ਼ਿਆਦਾ ਵਿਹਾਰਕ ਅਤੇ ਸੁਚਾਰੂ ਬਣਾਉਣ ਦੇ ਮਕਸਦ ਨਾਲ ਇਹ ਕਦਮ ਚੁੱਕਿਆ ਹੈ। ਨਵੇਂ ਦਿਸ਼ਾ-ਨਿਰਦੇਸ਼ਾਂ ਤਹਿਤ ਹੁਣ ਕਿਸੇ ਵੀ ਉਮਰ ਦੇ ਨਾਬਾਲਿਗ ਆਪਣੇ ਸਰਪ੍ਰਸਤਾਂ ਦੇ ਮਾਧਿਅਮ ਨਾਲ ਬੱਚਤ ਅਤੇ ਐੱਫ. ਡੀ. ਖਾਤਾ ਖੋਲ੍ਹ ਸਕਦੇ ਹਨ। ਨਾਲ ਹੀ 10 ਸਾਲ ਜਾਂ ਉਸ ਤੋਂ ਜ਼ਿਆਦਾ ਉਮਰ ਦੇ ਨਾਬਾਲਿਗ ਜੇਕਰ ਸਮਰੱਥ ਹੋਣ ਤਾਂ ਬੈਂਕ ਦੀ ਜੋਖ਼ਮ ਪ੍ਰਬੰਧਨ ਨੀਤੀ ਤਹਿਤ ਸੁਤੰਤਰ ਤੌਰ ’ਤੇ ਖਾਤਾ ਖੋਲ੍ਹਣ ਅਤੇ ਸੰਚਾਲਿਤ ਕਰਨ ਦੇ ਯੋਗ ਹੋਣਗੇ।
ਆਰ. ਬੀ. ਆਈ. ਨੇ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਬਾਲਿਗ਼ ਹੋਣ ’ਤੇ ਖਾਤਾਧਾਰਕ ਦੇ ਨਵੇਂ ਸੰਚਾਲਨ ਨਿਰਦੇਸ਼ ਅਤੇ ਹਸਤਾਖ਼ਰ ਨਮੂਨੇ ਪ੍ਰਾਪਤ ਕੀਤੇ ਜਾਣਗੇ ਅਤੇ ਜੇਕਰ ਖਾਤਾ ਸਰਪ੍ਰਸਤਾਂ ਵੱਲੋਂ ਸੰਚਾਲਿਤ ਕੀਤਾ ਗਿਆ ਹੋਵੇ ਤਾਂ ਬਕਾਇਆ ਰਾਸ਼ੀ ਦੀ ਪੁਸ਼ਟੀ ਕੀਤੀ ਜਾਵੇਗੀ। ਇਸ ਤੋਂ ਇਲਾਵਾ ਬੈਂਕ ਆਪਣੀਆਂ ਅੰਦਰੂਨੀ ਨੀਤੀਆਂ ਅਨੁਸਾਰ ਨਾਬਾਲਿਗ਼ ਖਾਤਾਧਾਰਰਾਂ ਨੂੰ ਏ. ਟੀ. ਐੱਮ., ਡੈਬਿਟ ਕਾਰਡ, ਚੈੱਕਬੁੱਕ ਅਤੇ ਇੰਟਰਨੈੱਟ ਬੈਂਕਿੰਗ ਵਰਗੀਆਂ ਸਹੂਲਤਾਂ ਦੇਣ ਲਈ ਸੁਤੰਤਰ ਹੋਣਗੇ।
