15 ਜੂਨ ਤੋਂ ਸ਼ੁਰੂ ਹੋਵੇਗੀ 'ਅੰਤਮ ਯਾਤਰਾ ਅੰਤਮ ਸਫ਼ਰ' ਯੋਜਨਾ
ਤੇਲੰਗਾਨਾ : ਗ਼ਰੀਬਾਂ ਲਈ ਸਨਮਾਨਪੂਰਨ ਅੰਤਮ ਸਸਕਾਰ ਦੀ ਸਹੂਲਤ ਯਕੀਨੀ ਬਣਾਉਣ ਲਈ ਤੇਲੰਗਾਨਾ ਦੇ ਕਰੀਮਨਗਰ ਸ਼ਹਿਰ ਦਾ ਨਗਰ ਨਿਗਮ ਅਗਲੇ ਮਹੀਨੇ ਇਕ ਯੋਜਨਾ ਸ਼ੁਰੂ ਕਰੇਗਾ, ਜਿਸ ਤਹਿਤ ਕੋਈ ਵੀ ਗ਼ਰੀਬ ਸਿਰਫ਼ 1 ਰੁਪਏ 'ਚ ਅੰਤਮ ਸਸਕਾਰ ਦੀ ਸੁਵਿਧਾ ਹਾਸਲ ਕਰ ਸਕੇਗਾ। ਕਰੀਮਨਗਰ ਦੇ ਮੇਅਰ ਰਵਿੰਦਰ ਸਿੰਘ ਮੁਤਾਬਕ 'ਅੰਤਮ ਯਾਤਰਾ ਅੰਤਮ ਸਫ਼ਰ' ਯੋਜਨਾ 15 ਜੂਨ ਤੋਂ ਸ਼ੁਰੂ ਕੀਤੀ ਜਾਵੇਗੀ ਅਤੇ ਇਸ ਯੋਜਨਾ ਲਈ ਪਹਿਲਾਂ ਹੀ 1.10 ਕਰੋੜ ਰੁਪਏ ਦਾ ਪ੍ਰਬੰਧ ਕੀਤਾ ਜਾ ਚੁੱਕਾ ਹੈ। ਯੋਜਨਾ 'ਚ ਇਸ ਗੱਲ ਦਾ ਵਿਸ਼ੇਸ਼ ਧਿਆਨ ਰੱਖਿਆ ਜਾਵੇਗਾ ਕਿ ਮ੍ਰਿਤਕ ਦਾ ਅੰਤਮ ਸਸਕਾਰ ਧਾਰਮਕ ਰਵਾਇਤਾਂ ਮੁਤਾਬਕ ਹੋਵੇ।
Funeral
ਰਵਿੰਦਰ ਸਿੰਘ ਨੇ ਦੱਸਿਆ ਕਿ ਮੱਧਮ ਅਤੇ ਹੇਠਲੇ ਵਰਗ ਦੇ ਲੋਕ ਅੰਤਮ ਸਸਕਾਰ ਲਈ ਸਿਰਫ਼ 1 ਰੁਪਏ ਦਾ ਭੁਗਤਾਨ ਕਰ ਕੇ ਇਸ ਸਹੂਲਤ ਦਾ ਲਾਭ ਲੈ ਸਕਦੇ ਹਨ। ਇਹ ਯੋਜਨਾ ਕਿਸੇ ਵੀ ਜਾਤ ਜਾਂ ਧਰਮ ਦੇ ਲੋਕਾਂ ਲਈ ਹੋਵੇਗੀ। ਯੋਜਨਾ ਦੇ ਤਹਿਤ ਨਗਰ ਨਿਗਮ ਮ੍ਰਿਤਕ ਦੇ ਅੰਤਮ ਸਸਕਾਰ ਲਈ ਉਸ ਦੇ ਪਰਵਾਰ ਨੂੰ ਲੱਕੜ, ਚੰਦਨ ਦੀ ਲੱਕੜ ਅਤੇ ਕੈਰੋਸੀਨ ਉਪਲੱਬਧ ਕਰਵਾਏਗਾ। ਲੱਕੜਾਂ ਦੀ ਖ਼ਰੀਦ ਲਈ 50 ਲੱਖ ਦਾ ਰਿਜ਼ਰਵ ਫ਼ੰਡ ਮੁਹਈਆ ਕਰਵਾਇਆ ਜਾ ਰਿਹਾ ਹੈ। ਰਵਾਇਤੀ ਰਸਮ ਦੇ ਦਿਨ ਲਗਭਗ 50 ਲੋਕਾਂ ਨੂੰ 5 ਰੁਪਏ ਦੇ ਹਿਸਾਬ ਨਾਲ ਖਾਣਾ ਵੀ ਉਪਲੱਬਧ ਕਰਵਾਇਆ ਜਾਵੇਗਾ। ਜੋ ਲੋਕ ਲਾਸ਼ਾਂ ਨੂੰ ਦਫ਼ਨਾਉਣਾ ਚਾਹੁੰਦੇ ਹਨ ਉਨ੍ਹਾਂ ਲਈ ਵੀ ਜ਼ਰੂਰੀ ਵਿਵਸਥਾ ਕੀਤੀ ਜਾਵੇਗੀ।
Compliments to Municipal Corporation of Karimnagar, #Telangana for proposing to launch ‘Antima Yatra’ (last journey) from June 15th to conduct last rites of dead on a token payment of ONE rupee. Glad that meals will also be provided to 50 members of bereaved family. #Humanity pic.twitter.com/rJNMy21ZTJ
— VicePresidentOfIndia (@VPSecretariat) 21 May 2019
ਕਰੀਮਨਗਰ ਨਗਰ ਨਿਗਮ ਦੇ ਇਸ ਕਦਮ ਦੀ ਉਪ ਰਾਸ਼ਟਰਪਤੀ ਵੈਂਕਈਆ ਨਾਇਡੂ ਨੇ ਸ਼ਲਾਘਾ ਕੀਤੀ ਹੈ। ਉਨ੍ਹਾਂ ਨੇ ਟਵੀਟ ਕੀਤਾ, "ਸਿਰਫ਼ 1 ਰੁਪਏ ਦਾ ਭੁਗਤਾਨ ਕਰ ਕੇ ਅੰਤਮ ਸਸਕਾਰ ਕਰਨ ਦੀ ਯੋਜਨਾ ਨੂੰ 15 ਜੂਨ ਤੋਂ ਸ਼ੁਰੂ ਕਰਨ ਲਈ ਤੇਲੰਗਾਨਾ ਦੇ ਕਰੀਮਨਗਰ ਨਗਰ ਨਿਗਮ ਨੂੰ ਵਧਾਈ। ਖ਼ੁਸ਼ੀ ਹੈ ਕਿ ਪੀੜਤ ਪਰਵਾਰ ਦੇ 50 ਮੈਂਬਰਾਂ ਨੂੰ ਭੋਜਨ ਵੀ ਉਪਲੱਬਧ ਕਰਵਾਇਆ ਜਾਵੇਗਾ। ਇਹੀ ਅਸਲ ਮਨੁੱਖਤਾ ਹੈ।"
Ravinder Singh
ਕੌਣ ਹਨ ਰਵਿੰਦਰ ਸਿੰਘ :
ਰਵਿੰਦਰ ਸਿੰਘ ਦਾ ਜਨਮ ਅਤੇ ਪਾਲਨ-ਪੋਸ਼ਣ ਆਂਧਰਾ ਪ੍ਰਦੇਸ਼ 'ਚ ਹੋਇਆ। ਆਪਣੀ ਕਾਬਲੀਅਤ ਨਾਲ ਰਵਿੰਦਰ ਸਿੰਘ ਤੇਲੰਗਾਨਾ 'ਚ ਕਰੀਮਨਗਰ ਦੇ ਮੇਅਰ ਅਹੁਦੇ ਤਕ ਪਹੁੰਚੇ। ਇਕ ਸੱਚੇ ਸਿੱਖ ਵਜੋਂ ਜ਼ਿੰਦਗੀ ਬਤੀਤ ਕਰਨ ਵਾਲੇ ਰਵਿੰਦਰ ਸਿੰਘ ਨੇ ਤੇਲੰਗਾਨਾ ਰਾਸ਼ਟਰ ਸਮਿਤੀ (ਟੀਆਰਐਸ) ਨੂੰ ਚੁਣਿਆ। ਸਫ਼ੈਦ ਸੁਪਾਰੀ ਸੂਟ, ਗਲੇ 'ਚ ਪਾਏ ਟੀਆਰਐਸ ਦੇ ਗੁਲਾਬੀ ਸਾਫ਼ੇ ਅਤੇ ਲਾਲ ਪੱਗ ਵਾਲੇ ਰਵਿੰਦਰ ਸਿੰਘ ਦਾ ਚਿਹਰਾ ਤੇਲੰਗਾਨਾ 'ਚ ਕਾਫ਼ੀ ਮਸ਼ਹੂਰ ਹੈ। ਟੀਆਰਐਸ ਦੀਆਂ ਰੈਲੀਆਂ 'ਚ ਆਮ ਤੌਰ 'ਤੇ ਉਹ ਇਸੇ ਪਹਿਰਾਵੇ 'ਚ ਵਿਖਾਈ ਦਿੰਦੇ ਹਨ। ਰਵਿੰਦਰ ਸਿੰਘ ਦੇ ਮੂੰਹ ਤੋਂ ਸ਼ੁੱਧ ਤੇਲਗੂ ਭਾਸ਼ਾ ਸੁਣ ਕੇ ਹਰ ਕੋਈ ਹੈਰਾਨ ਰਹਿ ਜਾਂਦਾ ਹੈ। ਉਹ ਪਿਛਲੇ 10 ਸਾਲ ਤੋਂ ਲੋਕਾਂ ਦੇ ਅੰਤਮ ਸਸਕਾਰ ਲਈ ਆਪਣੀ ਜੇਬ 'ਚੋਂ ਪੈਸਾ ਦੇ ਰਹੇ ਹਨ। ਇਸ ਤੋਂ ਇਲਾਵਾ ਉਹ ਗ਼ਰੀਬ ਪਰਿਵਾਰਾਂ ਦੀਆਂ ਲੜਕੀਆਂ ਦੇ ਵਿਆਹ ਵੀ ਕਰਵਾਉਂਦੇ ਹਨ।
