ਕਿਹਾ, ਸਦਾਬਹਾਰ ਮਿੱਤਰਾਂ ਨਾਲ ਸਬੰਧ ਮਜਬੂਤ ਹੋਣਗੇ
ਨਵੀਂ ਦਿੱਲੀ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਫ਼ਰਾਂਸ, ਸੰਯੁਕਤ ਅਰਬ ਅਮੀਰਾਤ ਅਤੇ ਬਹਿਰੀਨ ਲਈ ਵੀਰਵਾਰ ਨੂੰ ਰਵਾਨਾ ਹੋਣ ਤੋਂ ਪਹਿਲਾਂ ਕਿਹਾ ਕਿ ਉਨ੍ਹਾਂ ਦੀ ਇਸ ਯਾਤਰਾ ਨਾਲ ਭਾਰਤ ਦੇ ਸਦਾਬਹਾਰ ਮਿੱਤਰਾਂ ਨਾਲ ਸਬੰਧ ਹੋਰ ਮਜਬੂਤ ਹੋਣਗੇ ਅਤੇ ਸਹਿਯੋਗ ਦੇ ਨਵੇਂ ਰਾਹ ਤਲਾਸ਼ੇ ਜਾਣਗੇ। ਮੋਦੀ 22 ਅਗੱਸਤ ਤੋਂ 26 ਅਗੱਸਤ ਤਕ ਤਿੰਨ ਦੇਸ਼ਾਂ ਦੀ ਯਾਤਰਾ 'ਤੇ ਹੋਣਗੇ।
ਮੋਦੀ ਨੇ ਜਾਣ ਤੋਂ ਪਹਿਲਾਂ ਦਿਤੇ ਅਪਣੇ ਬਿਆਨ ਵਿਚ ਕਿਹਾ ਕਿ ਫ਼ਰਾਂਸ ਭਾਰਤ ਦਾ ਮਜਬੂਤ ਸਿਆਸੀ ਭਾਈਵਾਲ ਹੈ ਅਤੇ ਦੋਵੇਂ ਹੀ ਦੇਸ਼ ਇਸ ਦੀ ਅਹਿਮੀਅਤ ਸਮਝਦੇ ਹਨ। ਪ੍ਰਧਾਨ ਮੰਤਰੀ 22-23 ਨੂੰ ਫ਼ਰਾਂਸ 'ਚ ਦੁਵੱਲੇ ਮੁੱਦਿਆਂ 'ਤੇ ਚਰਚਾ ਕਰਣਗੇ। ਇਸ ਦੌਰਾਨ ਉਹ ਫ਼ਰਾਂਸ ਦੇ ਰਾਸ਼ਟਰਪਤੀ ਇਮੈਨੁਇਲ ਮੈਕਰੋਂ ਨਾਲ ਗੱਲਬਾਤ ਕਰਣਗੇ ਅਤੇ ਪ੍ਰਧਾਨ ਮੰਤਰੀ ਐਡਵਰਡ ਫ਼ਿਲਿਪ ਨਾਲ ਮੁਲਾਕਾਤ ਕਰਣਗੇ।
ਮੋਦੀ ਅਪਣੀ ਇਸ ਯਾਤਰਾ ਦੌਰਾਨ ਇਥੇ ਭਾਰਤੀ ਭਾਈਚਾਰੇ ਨਾਲ ਵੀ ਗੱਲਬਾਤ ਕਰਣਗੇ ਅਤੇ ਫ਼ਰਾਂਸ 'ਚ 1950 ਅਤੇ 1960 ਦੇ ਦਹਾਕਿਆਂ 'ਚ ਮਾਰੇ ਗਏ ਪੀੜਤਾਂ ਦੀ ਯਾਦ ਵਿਚ ਬਣਾਏ ਗਏ ਇਕ ਸਮਾਰਕ ਦਾ ਉਦਘਾਟਨ ਕਰਣਗੇ। ਇਸ ਤੋਂ ਬਾਅਦ 25-26 ਅਗੱਸਤ ਨੂੰ ਮੋਦੀ ਰਾਸ਼ਟਰਪਤੀ ਮੈਕਰੋਂ ਦੇ ਸੱਦੇ 'ਤੇ ਜੀ7 ਸ਼ਿਖ਼ਰ ਸੰਮੇਲਨ 'ਚ ਵੀ ਭਾਈਵਾਲ ਦੇਸ਼ ਦੇ ਰੂਪ 'ਚ ਹਿੱਸਾ ਲੈਣਗੇ। ਮੋਦੀ ਇਥੇ ਵਾਤਾਵਰਣ, ਜਲਵਾਯੂ, ਸਮੁੰਦਰ ਅਤੇ ਡਿਜੀਟਲ ਟ੍ਰਾਂਸਫ਼ਾਰਮੇਸ਼ਨ ਇਜਲਾਸ 'ਚ ਹਿੱਸਾ ਲੈਣਗੇ।
ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਭਾਰਤ ਅਤੇ ਫ਼ਰਾਂਸ ਵਿਚਕਾਰ ਦੁਵੱਲੇ ਸਹਿਯੋਗ ਹੈ ਅਤੇ ਅੱਗੇ ਵੀ ਦੋਹਾਂ ਦੇਸ਼ਾਂ ਅਤੇ ਦੁਨੀਆਂ 'ਚ ਸ਼ਾਂਤੀ ਅਤੇ ਤਰੱਕੀ ਨੂੰ ਵਧਾਵਾ ਦੇਣ ਦੇ ਸਾਂਝੇ ਮਕਸਦ ਨਾਲ ਇਸ ਸਬੰਧ ਨੂੰ ਮਜਬੂਤੀ ਮਿਲਦੀ ਹੈ। ਉਨ੍ਹਾਂ ਵਿਸ਼ਵਾਸ ਦਵਾਇਆ ਕਿ ਉਨ੍ਹਾਂ ਦੀ ਇਸ ਯਾਤਰਾ ਨਾਲ ਦੋਹਾਂ ਦੇਸ਼ਾਂ ਵਿਚਕਾਰ ਮਿੱਤਰਤਾ, ਤਰੱਕੀ ਅਤੇ ਸ਼ਾਂਤੀ ਨੂੰ ਮਜਬੂਤੀ ਮਿਲੇਗੀ।
ਉਨ੍ਹਾਂ ਕਿਹਾ ਕਿ ਉਹ ਅਬੂ ਧਾਬੀ ਦੇ ਸ਼ਹਿਜਾਜੇ ਸ਼ੇਖ ਮੁਹੰਮਦ ਬਿਨ ਜਾਇਦ ਅਲ ਨਾਹਯਾਨ ਨਾਲ ਮਿਲਣ ਅਤੇ ਆਪਸੀ ਹਿੱਤ ਵਾਲੇ ਸਥਾਨਕ ਅਤੇ ਆਲਮੀ ਮਾਮਲਿਆਂ 'ਤੇ ਦੁਵੱਲੇ ਵਿਚਾਰ ਕਰਣ ਲਈ ਉਤਸ਼ਾਹਤ ਹਨ। ਉਨ੍ਹਾਂ ਕਿਹਾ, ਮਹਾਤਮਾ ਗਾਂਧੀ ਦੀ 150ਵੀਂ ਜੈਯੰਤੀ ਮਨਾਉਣ ਲਈ ਸ਼ਹਿਜਾਦੇ ਨਾਲ ਸੰਯੁਕਤ ਰੂਪ 'ਚ ਟਿਕਟ ਜਾਰੀ ਕਰਨ ਲਈ ਵੀ ਉਹ ਉਤਸੁਕ ਹਨ।'' ਇਸ ਬਿਆਨ ਵਿਚ ਉਨ੍ਹਾਂ ਕਿਹਾ ਕਿ ਇਸ ਯਾਤਰਾ ਦੌਰਾਨ ਸੰਯੁਕਤ ਅਰਬ ਅਮੀਰਾਤ ਸਰਕਾਰ ਵਲੋਂ ਦਿਤੇ ਜਾਣ ਵਾਲੇ ਚੋਟੀ ਦੇ ਨਾਗਰਿਕਤਾ ਸਨਮਾਨ ਲੈਣਾ ਉਨ੍ਹਾਂ ਲਈ ਮਾਣ ਵਾਲੀ ਗੱਲ ਹੋਵੇਗੀ।
ਜ਼ਿਕਰਯੋਗ ਹੈ ਕਿ ਸੰਯੁਕਤ ਅਰਬ ਅਮੀਰਾਤ ਭਾਰਤ ਲਈ ਤੀਜਾ ਵੱਡਾ ਕਾਰੋਬਾਰ ਸਹਿਯੋਗੀ ਅਤੇ ਚੌਥਾ ਵੱਡਾ ਕੱਚਾ ਤੇਲ ਨਿਰਯਾਤਕ ਹੈ। ਇਸ ਤੋਂ ਬਾਅਦ 24-25 ਅਗੱਸਤ ਨੂੰ ਮੋਦੀ ਬਹਿਰੀਨ ਹੋਣਗੇ। ਭਾਰਤ ਦੇ ਕਿਸੇ ਵੀ ਪ੍ਰਧਾਨ ਮੰਤਰੀ ਦੀ ਇਹ ਪਹਿਲੀ ਬਹਿਰੀਨ ਯਾਤਰਾ ਹੋਵੇਗੀ। ਉਥੋਂ ਦੇ ਹਮ ਰੁਤਬਾ ਪ੍ਰਿੰਸ ਸ਼ੇਖ਼ ਖ਼ਲੀਫ਼ਾ ਬਿਨ ਸਲਮਾਨ ਅਲ ਖ਼ਲੀਫ਼ਾ ਅਤੇ ਹੋਰ ਨੇਤਾਵਾਂ ਨਾਲ ਮੁਲਾਕਾਤ ਕਰਣਗੇ। ਉਨ੍ਹਾਂ ਕਿਹਾ, ''ਇਸ ਦੌਰਾਨ ਮੈਂ ਭਾਰਤੀ ਮੂਲ ਦੇ ਲੋਕਾਂ ਨਾਲ ਗੱਲਬਾਤ ਕਰਾਂਗਾ। ਜਨਮਅਸ਼ਟਮੀ ਸੰਬਧੀ, ਖਾੜੀ ਇਲਾਕੇ 'ਚ ਸਭ ਤੋਂ ਪੁਰਾਣੇ ਸ਼੍ਰੀਨਾਥਜੀ ਮੰਦਰ ਦੇ ਮੁੜ ਨਿਰਮਾਣ ਦੀ ਰਸਮੀ ਸ਼ੁਰੂਆਤ ਦੌਰਾਨ ਮੌਜੂਦ ਰਹਿਣ ਦਾ ਮੌਕਾ ਮਿਲੇਗਾ। ਮੈਨੂੰ ਵਿਸ਼ਵਾਸ ਹੈ ਕਿ ਇਹ ਯਾਤਰਾ ਵੱਖ ਵੱਖ ਖੇਤਰਾਂ 'ਚ ਸਾਡੇ ਸੰਬਧੀ ਹੋਰ ਮਜਬੂਤ ਬਣਾਵੇਗੀ।''