ਪੜਾਈ ਅੱਧਵਿਚਾਲੇ ਛੱਡ ਅਤਿਵਾਦੀ ਬਣਨ ਵਾਲੇ ਜ਼ਾਕਿਰ ਮੂਸਾ ’ਤੇ 15 ਲੱਖ ਰੁਪਏ ਦਾ ਇਨਾਮ ਸੀ...
ਸ਼੍ਰੀਨਗਰ- ਅਲਕਾਇਦਾ ਦੀ ਕਸ਼ਮੀਰ ਇਕਾਈ ਅੰਸਾਰ ਦੇ ਗਜਵਤ ਉਲ ਹਿੰਦ ਦਾ ਕਹਿੰਦਾ ਕੁਹਾਉਂਦਾ ਮੁਖੀ ਜ਼ਾਕਿਰ ਮੂਸਾ ਦੱਖਣੀ ਕਸ਼ਮੀਰ ਦੇ ਤ੍ਰਾਲ ਚ ਸੁਰੱਖਿਆ ਬਲਾਂ ਦੇ ਨਾਲ ਮੁਕਾਬਲੇ ਚ ਮਾਰਿਆ ਗਿਆ ਹੈ। ਮੂਸਾ ਨੂੰ ਪੁਲਵਾਮਾ ਦੇ ਉਸੇ ਇਲਾਕੇ ਚ ਮਾਰ ਸੁਟਿਆ ਗਿਆ, ਜਿੱਥੇ ਸਾਲ 2016 ਚ ਫ਼ੌਜ ਨੇ ਹਿਜਬੁਲ ਕਮਾਂਡਰ ਬੁਰਹਾਨ ਵਾਨੀ ਨੂੰ ਢੇਰ ਕੀਤਾ ਸੀ। ਅਫ਼ਸਰਾਂ ਨੇ ਦਸਿਆ ਕਿ ਕਸ਼ਮੀਰ ਘਾਟੀ ਚ ਫ਼ੌਜ ਨੂੰ ਦੁਪਹਿਰ ਪੁਲਵਾਮਾ ਦੇ ਤ੍ਰਾਲ ਚ ਜ਼ਾਕਿਰ ਮੂਸਾ ਦੇ ਮੌਜੂਦ ਹੋਣ ਦੀ ਜਾਣਕਾਰੀ ਮਿਲੀ ਸੀ। ਇਸ ਲਈ ਸੁਰੱਖਿਆ ਬਲਾਂ ਨੇ ਦੱਖਣੀ ਕਸ਼ਮੀਰ ਚ ਘੇਰਾਬੰਦੀ ਕਰਕੇ ਤਲਾਸ਼ੀ ਮੁਹਿੰਮ ਸ਼ੁਰੂ ਕੀਤੀ।
Zakir Musa
ਇਸ ਦੌਰਾਨ ਜ਼ਾਕਿਰ ਮੂਸਾ ਦੇ ਟਿਕਾਣੇ ਦੀ ਘੇਰਾਬੰਦੀ ਕਰਕੇ ਫ਼ੌਜ ਦੇ ਅਫ਼ਸਰਾਂ ਨੇ ਉਸ ਨੂੰ ਸਰੰਡਰ ਕਰਨ ਲਈ ਕਿਹਾ ਜਿਸ ਤੇ ਮੂਸਾ ਨੇ ਫ਼ੌਜ ਦੇ ਅਫ਼ਸਰਾਂ ਤੇ ਗ੍ਰੇਨੇਡ ਹਮਲਾ ਕਰਕੇ ਭੱਜਣ ਦੀ ਕੋਸ਼ਿਸ਼ ਕੀਤੀ। ਇਸ ਤੋਂ ਬਾਅਦ ਫ਼ੌਜ ਨੇ ਜਵਾਬੀ ਕਾਰਵਾਈ ਕਰਦਿਆਂ ਇਲਾਕੇ ਚ ਸਖ਼ਤ ਘੇਰਾਬੰਦੀ ਕੀਤੀ ਅਤੇ ਮੁੜ ਤੋਂ ਗੋਲਾਬਾਰੀ ਕਰਦਿਆਂ ਹੋਇਆਂ ਮੂਸਾ ਨੂੰ ਉਸੇ ਮਕਾਨ ਚ ਮਾਰ ਸੁੱਟਿਆ, ਜਿੱਥੇ ਉਸ ਨੇ ਪਨਾਹ ਲਈ ਸੀ।
Zakir Musa
ਮੂਸਾ ਦੇ ਮਾਰੇ ਜਾਣ ਦੀ ਖ਼ਬਰ ਫੈਲਦਿਆਂ ਹੀ ਪੂਰੇ ਇਲਾਕੇ ਚ ਤਣਾਅ ਬਣ ਗਿਆ। ਲੋਕ ਨਾਅਰੇਬਾਜ਼ੀ ਕਰਦਿਆਂ ਹੋਇਆ ਸੜਕਾਂ ’ਤੇ ਉਤਰ ਆਏ ਅਤੇ ਥਾਂ-ਥਾਂ ਪੁਲਿਸ ਅਤੇ ਅਤਿਵਾਦੀ ਹਮਾਇਤੀਆਂ ਵਿਚਾਲੇ ਟਕਰਾਅ ਹਿੰਸਕ ਝੜਪਾਂ ਸ਼ੁਰੂ ਹੋ ਗਈਆਂ। ਹਲਾਤ ਨੂੰ ਦੇਖਦਿਆਂ ਹੋਇਆਂ ਪ੍ਰਸ਼ਾਸਨ ਨੇ ਤ੍ਰਾਲ ਅਤੇ ਉਸਦੇ ਨਾਲ ਲੱਗਦੇ ਇਲਾਕਿਆਂ ਚ ਕਰਫ਼ਿਊ ਲਾਗੂ ਕਰਦਿਆਂ ਚੇਤਾਵਨੀ ਜਾਰੀ ਕਰ ਦਿੱਤੀ ਦੱਸਣਯੋਗ ਹੈ ਕਿ ਚੰਡੀਗੜ੍ਹ ਸਥਿਤ ਇਕ ਇੰਜੀਨਿਅਰਿੰਗ ਕਾਲਜ ਚ ਆਪਣੀ ਪੜਾਈ ਅੱਧਵਿਚਾਲੇ ਛੱਡ ਅਤਿਵਾਦੀ ਬਣਨ ਵਾਲੇ ਮੂਸਾ ’ਤੇ 15 ਲੱਖ ਰੁਪਏ ਦਾ ਇਨਾਮ ਸੀ
