ਭਰਤਪੁਰ ’ਚ ਸਭ ਤੋਂ ਵੱਧ ਸਾਈਬਰ ਅਪਰਾਧ
ਨੋਇਡਾ (ਉੱਤਰ ਪ੍ਰਦੇਸ਼): ਦੇਸ਼ ਵਿਚ ਸਾਈਬਰ ਅਪਰਾਧ ਦੇ ਕੇਂਦਰ ਵਜੋਂ ਬਦਨਾਮ ਝਾਰਖੰਡ ਦੇ ਜਾਮਤਾਰਾ ਅਤੇ ਹਰਿਆਣਾ ਦੇ ਨੂਹ ਦੀ ਥਾਂ ਹੁਣ ਰਾਜਸਥਾਨ ਦੇ ਭਰਤਪੁਰ ਅਤੇ ਉੱਤਰ ਪ੍ਰਦੇਸ਼ ਦੇ ਮਥੁਰਾ ਜ਼ਿਲ੍ਹੇ ਨੇ ਲੈ ਲਈ ਹੈ। ਇਹ ਦਾਅਵਾ ਇੰਡੀਅਨ ਇੰਸਟੀਚਿਊਟ ਆਫ਼ ਟੈਕਨਾਲੋਜੀ (IIT) ਕਾਨਪੁਰ ’ਚ ਸ਼ੁਰੂ ਹੋਏ ਇਕ ਸਟਾਰਟਅੱਪ ਨੇ ਅਪਣੇ ਅਧਿਐਨ ’ਚ ਕੀਤਾ ਹੈ। ਅਧਿਐਨ ਮੁਤਾਬਕ ਦੇਸ਼ ’ਚ 80 ਫੀ ਸਦੀ ਸਾਈਬਰ ਅਪਰਾਧ ਚੋਟੀ ਦੇ 10 ਜ਼ਿਲ੍ਹਿਆਂ ’ਚੋਂ ਹੁੰਦੇ ਹਨ।
ਫਿਊਚਰ ਕ੍ਰਾਈਮ ਰਿਸਰਚ ਫਾਊਂਡੇਸ਼ਨ (FCRF), ਆਈ.ਆਈ.ਟੀ.-ਕਾਨਪੁਰ ਸਥਿਤ ਇਕ ਗੈਰ-ਮੁਨਾਫ਼ਾ ਸਟਾਰਟਅੱਪ, ਨੇ ਅਪਣੇ ਤਾਜ਼ਾ ਅਧਿਐਨ ਪੇਪਰ ‘ਏ ਡੀਪ ਡਾਈਵ ਇਨ ਸਾਈਬਰ ਕ੍ਰਾਈਮ ਟ੍ਰੈਂਡਸ ਇਮਪੈਕਟਿੰਗ ਇੰਡੀਆ’ ’ਚ ਇਨ੍ਹਾਂ ਖੋਜਾਂ ਦਾ ਜ਼ਿਕਰ ਕੀਤਾ ਹੈ।
FCRF ਨੇ ਦਾਅਵਾ ਕੀਤਾ ਕਿ ਭਰਤਪੁਰ (18 ਫੀਸਦੀ), ਮਥੁਰਾ (12 ਫੀਸਦੀ), ਨੂਹ (11 ਫੀਸਦੀ), ਦੇਵਘਰ (10 ਫੀਸਦੀ), ਜਾਮਤਾਰਾ (9.6 ਫੀਸਦੀ), ਗੁਰੂਗ੍ਰਾਮ (8.1 ਫੀਸਦੀ), ਅਲਵਰ (5.1 ਫੀਸਦੀ), ਬੋਕਾਰੋ (2.4 ਫੀਸਦੀ)। , ਕਰਮਾ ਟੈਂਡ (2.4 ਫ਼ੀਸਦੀ) ਅਤੇ ਗਿਰੀਡੀਹ (2.3 ਫ਼ੀਸਦੀ) ਭਾਰਤ ’ਚ ਸਾਈਬਰ ਅਪਰਾਧਾਂ ਦੀ ਸੂਚੀ ’ਚ ਸਿਖਰ ’ਤੇ ਹਨ, ਜੋ ਸਮੂਹਿਕ ਤੌਰ ’ਤੇ ਸਾਈਬਰ ਅਪਰਾਧਾਂ ਦੇ 80 ਫ਼ੀ ਸਦੀ ਲਈ ਜ਼ਿੰਮੇਵਾਰ ਹਨ।
FCRF ਦੇ ਸਹਿ-ਸੰਸਥਾਪਕ ਹਰਸ਼ਵਰਧਨ ਸਿੰਘ ਨੇ ਕਿਹਾ, ‘‘ਸਾਡਾ ਵਿਸ਼ਲੇਸ਼ਣ ਭਾਰਤ ਦੇ 10 ਜ਼ਿਲ੍ਹਿਆਂ ’ਤੇ ਕੇਂਦਰਤ ਹੈ ਜਿੱਥੋਂ ਸਭ ਤੋਂ ਵੱਧ ਸਾਈਬਰ ਅਪਰਾਧ ਕੀਤੇ ਜਾਂਦੇ ਹਨ। ਜਿਵੇਂ ਕਿ ਵ੍ਹਾਈਟ ਪੇਪਰ ’ਚ ਪਛਾਣਿਆ ਗਿਆ ਹੈ, ਇਨ੍ਹਾਂ ਜ਼ਿਲ੍ਹਿਆਂ ’ਚ ਸਾਈਬਰ ਅਪਰਾਧ ਦੇ ਮੁੱਖ ਕਾਰਕਾਂ ਨੂੰ ਸਮਝਣਾ ਪ੍ਰਭਾਵਸ਼ਾਲੀ ਰੋਕਥਾਮ ਅਤੇ ਖਾਤਮੇ ਦੀਆਂ ਰਣਨੀਤੀਆਂ ਤਿਆਰ ਕਰਨ ਲਈ ਜ਼ਰੂਰੀ ਹੈ।’’
