Transgender story : ਹੁਣ ਆਮ ਪੁਰਸ਼ਾ ਨੂੰ ਆਟੋ ਕਿਰਾਏ ’ਤੇ ਦੇ ਕੇ ਟਰਾਂਸਜੈਂਡਰਾਂ ਨੂੰ ਦਿਤਾ ਆਤਮ ਨਿਰਭਰ ਹੋਣ ਦਾ ਸੰਦੇਸ਼
Mangaluru Transgender story : ਅੱਜ ਵੀ ਸਮਾਜ ਵਿੱਚ ਟਰਾਂਸਜੈਂਡਰ ਲੋਕਾਂ ਵਿਰੁੱਧ ਪੱਖਪਾਤ ਦੇ ਵਿਚਕਾਰ, ਜਦੋਂ ਸ਼ਹਿਰ ਦੇ ਆਟੋਰਿਕਸ਼ਾ ਚਾਲਕਾਂ ਨੇ ਇਸ ਭਾਈਚਾਰੇ ਦੇ ਇੱਕ ਵਿਅਕਤੀ ਨੂੰ ਆਪਣੇ ਆਟੋ ਵਿੱਚ ਬਿਠਾਉਣ ਤੋਂ ਇਨਕਾਰ ਕਰ ਦਿੱਤਾ, ਤਾਂ ਉਸਨੇ ਖ਼ੁਦ ਦੇ ਚਾਰ ਆਟੋਰਿਕਸ਼ਾ ਖ਼ਰੀਦੇ ਲਏ ਅਤੇ ਉਨ੍ਹਾਂ ਨੂੰ ਕਿਰਾਏ ’ਤੇ ਦੇ ਦਿਤਾ। ਇਹ ਸਾਬਤ ਕਰ ਦਿੱਤਾ ਕਿ ਟਰਾਂਸਜੈਂਡਰ ਲੋਕ ਕਿਸੇ ਵੀ ਤਰ੍ਹਾਂ ਦੂਜੇ ਮਰਦਾਂ ਅਤੇ ਔਰਤਾਂ ਨਾਲੋਂ ਘੱਟ ਨਹੀਂ ਹਨ।
ਟਰਾਂਸਜੈਂਡਰ ਐਨੀ ਮੂਲ ਰੂਪ ਵਿੱਚ ਰਾਏਚੁਰ ਦੀ ਰਹਿਣ ਵਾਲੀ ਹੈ ਅਤੇ ਆਪਣੀ ਪੜ੍ਹਾਈ ਲਈ ਮੰਗਲੁਰੂ ਆਈ ਸੀ ਅਤੇ ਇੱਥੇ ਹੀ ਸੈਟਲ ਹੋ ਗਈ। ਉਹ ਕਹਿੰਦੀ ਹੈ ਕਿ ਬੀ.ਏ. ਪੂਰੀ ਕਰਨ ਤੋਂ ਬਾਅਦ, ਉਸਨੇ ਬੀ.ਐੱਡ. ਦੇ ਦੋ ਸਮੈਸਟਰ ਵੀ ਪੜ੍ਹੇ ਪਰ ਜਦੋਂ ਉਸਨੂੰ ਅਹਿਸਾਸ ਹੋਇਆ ਕਿ ਟਰਾਂਸਜੈਂਡਰ ਲੋਕਾਂ ਲਈ ਸਿੱਖਿਆ ਦੇ ਖੇਤਰ ਵਿੱਚ ਨੌਕਰੀ ਪ੍ਰਾਪਤ ਕਰਨਾ ਮੁਸ਼ਕਲ ਹੈ, ਤਾਂ ਉਸਨੇ ਆਪਣੀ ਪੜ੍ਹਾਈ ਅੱਧ ਵਿਚਕਾਰ ਹੀ ਛੱਡ ਦਿੱਤੀ। ਐਨੀ ਕਹਿੰਦੀ ਹੈ ਕਿ ਉਸਨੂੰ ਆਪਣੀ ਜ਼ਿੰਦਗੀ ਵਿੱਚ ਕਈ ਵਾਰ ਅਪਮਾਨ ਦਾ ਸਾਹਮਣਾ ਕਰਨਾ ਪਿਆ ਹੈ, ਪਰ ਅਪਮਾਨ ਦੀ ਇੱਕ ਅਜਿਹੀ ਘਟਨਾ ਨੇ ਉਸਦੀ ਜ਼ਿੰਦਗੀ ਬਦਲ ਦਿੱਤੀ।
ਐਨੀ ਅਕਸਰ ਆਟੋਰਿਕਸ਼ਾ ਰਾਹੀਂ ਘਰ ਵਾਪਸ ਆਉਂਦੀ ਸੀ ਅਤੇ ਕਈ ਵਾਰ ਉਸਨੂੰ ਸੰਘਰਸ਼ ਕਰਨਾ ਪੈਂਦਾ ਸੀ ਕਿਉਂਕਿ ਜ਼ਿਆਦਾਤਰ ਆਟੋ ਚਾਲਕ ਉਸਦੇ ਲਈ ਨਹੀਂ ਰੁਕਦੇ ਸਨ ਅਤੇ ਉਸਨੂੰ ਆਪਣੇ ਵਾਹਨ ਵਿੱਚ ਨਹੀਂ ਲਿਜਾਣਾ ਚਾਹੁੰਦੇ ਸਨ। ਐਨੀ ਦੇ ਅਨੁਸਾਰ ਹਾਲ ਹੀ ਵਿੱਚ ਵਾਪਰੀ ਇੱਕ ਅਜਿਹੀ ਹੀ ਘਟਨਾ ਵਿੱਚ, ਰਾਤ ਹੋਣ ਤੱਕ ਇੰਤਜ਼ਾਰ ਕਰਨ ਦੇ ਬਾਵਜੂਦ, ਕੋਈ ਵੀ ਰਿਕਸ਼ਾ ਚਾਲਕ ਉਸਨੂੰ ਆਪਣੇ ਆਟੋ ਵਿੱਚ ਬਿਠਾਉਣ ਲਈ ਤਿਆਰ ਨਹੀਂ ਸੀ ਅਤੇ ਉਸਨੂੰ ਪੈਦਲ ਘਰ ਜਾਣਾ ਪਿਆ। ਉਸੇ ਰਾਤ, ਐਨੀ ਨੇ ਸਹੁੰ ਖਾਧੀ ਕਿ ਉਹ ਆਪਣਾ ਖ਼ੁਦ ਦਾ ਆਟੋਰਿਕਸ਼ਾ ਖ਼ਰੀਦੇਗੀ ਅਤੇ ਇਸਨੂੰ ਆਮ ਪੁਰਸ਼ ਡਰਾਈਵਰਾਂ ਨੂੰ ਕਿਰਾਏ ’ਤੇ ਦੇਵੇਗੀ ਜਿਸ ਨਾਲ ਉਸ ਵਰਗੇ ਟਰਾਂਸਜੈਂਡਰ ਭਾਈਚਾਰੇ ਦੇ ਲੋਕਾਂ ਲਈ ਆਤਮ ਨਿਰਭਰ ਹੋਣ ਦਾ ਸੰਦੇਸ਼ ਸਮਾਜ ਵਿਚ ਜਾਵੇਗਾ।
ਅੱਜ, ਐਨੀ ਕੋਲ ਚਾਰ ਆਟੋਰਿਕਸ਼ਾ ਹਨ ਅਤੇ ਉਹ ਉਨ੍ਹਾਂ ਨੂੰ ਕਿਰਾਏ ’ਤੇ ਚਲਵਾਉਂਦੀ ਹੈ। ਆਪਣੀਆਂ ਜ਼ਰੂਰਤਾਂ ਲਈ ਵੀ ਉਹ ਆਪਣਾ ਹੀ ਆਟੋਰਿਕਸ਼ਾ ਵਰਤਦੀ ਹੈ ਅਤੇ ਉਸਨੂੰ ਕਿਸੇ ’ਤੇ ਨਿਰਭਰ ਨਹੀਂ ਰਹਿਣਾ ਪੈਂਦਾ।
(For more news apart from Mangaluru Latest News, stay tuned to Rozana Spokesman)
