ਹੁਣ ਖੇਤੀ ਬਿਲਾਂ ਦਾ ਨਹੀਂ, ਮੋਦੀ ਦਾ ਹੋ ਰਿਹੈ ਵਿਰੋਧ : ਜਿਆਣੀ
ਬਠਿੰਡਾ : ਤਿੰਨ ਖੇਤੀ ਕਾਨੂੰਨਾਂ ਨੂੰ ਲਾਗੂ ਕਰਨ ਨੂੰ ਲੈ ਕੇ ਸੂਬੇ ਭਰ ’ਚ ਵਿਰੋਧ ਝੱਲ ਰਹੀ ਭਾਜਪਾ ਦੇ ਸਾਬਕਾ ਮੰਤਰੀ ਸੁਰਜੀਤ ਕੁਮਾਰ ਜਿਆਣੀ ਨੂੰ ਕਿਸਾਨਾਂ ਨੇ ਬਠਿੰਡਾ ’ਚ ਅੱਗੇ ਅੱਗੇ ਲਗਾਈ ਰੱਖਿਆ। ਬੇਸ਼ੱਕ ਸਥਾਨਕ ਆਗੂਆਂ ਪਾਰਟੀ ਦੇ ਸੂਬਾਈ ਪ੍ਰਧਾਨ ਦੀ ਤਰ੍ਹਾਂ ਕਿਸਾਨਾਂ ਨਾਲ ਲੁੱਕਣਮੀਚੀ ਖੇਡਣ ਦੀ ਕੋਸ਼ਿਸ਼ ਕੀਤੀ ਪ੍ਰੰਤੂ ਕਿਸਾਨ ਭਾਜਪਾਈਆਂ ਤੋਂ ਵੀ ਤੇਜ਼ ਨਿਕਲੇ। ਉਨ੍ਹਾਂ ਸਰਕਟ ਹਾਊਸ ਛੱਡ ਕੇ ਮਾਨਸਾ ਰੋਡ ’ਤੇ ਇਕ ਪੰਜ ਤਾਰਾ ਹੋਟਲ ’ਚ ਪੁੱਜੇ ਭਾਜਪਾ ਆਗੂ ਨੂੰ ਘੇਰ ਲਿਆ।
ਪਿਛਲੇ ਸਮਿਆਂ ਦੌਰਾਨ ਅਮਰੀਕ ਸਿੰਘ ਰੋਡ ’ਤੇ ਵਾਪਰੀ ਘਟਨਾ ਦੇ ਮੱਦੇਨਜ਼ਰ ਪੁਲਿਸ ਵੀ ਸਥਿਤੀ ਨੂੰ ਸ਼ਾਂਤਮਈ ਰੱਖਣ ਲਈ ਇਕ ਲੱਤ ਦੇ ਭਾਰ ਖੜੀ ਰਹੀ। ਅਖ਼ੀਰ ਸਾਬਕਾ ਮੰਤਰੀ ਪੱਤਰਕਾਰਾਂ ਨਾਲ ਗੱਲਬਾਤ ਕਰਨ ਤੋਂ ਬਾਅਦ ਚੁੱਪ ਚਪੀਤੇ ਨਿਕਲ ਗਏ। ਸੂਚਨਾ ਮੁਤਾਬਕ ਅੱਜ ਸਾਬਕਾ ਮੰਤਰੀ ਤੇ ਸੂਬੇ ’ਚ ਭਾਜਪਾ ਵਲੋਂ ਕਿਸਾਨਾਂ ਨਾਲ ਗੱਲਬਾਤ ਕਰਨ ਲਈ ਬਣਾਈ ਕਮੇਟੀ ਦੇ ਆਗੂ ਸੁਰਜੀਤ ਕੁਮਾਰ ਜਿਆਣੀ ਬਠਿੰਡਾ ਪੁੱਜੇ ਹੋਏ ਸਨ। ਇਸ ਦੌਰਾਨ ਉਨ੍ਹਾਂ ਪਾਰਟੀ ਆਗੂਆਂ ਨਾਲ ਵੀ ਗੱਲਬਾਤ ਕਰਨੀ ਸੀ ਤੇ ਬਾਅਦ ਵਿਚ ਇਕ ਵਜੇ ਸਥਾਨਕ ਸਰਕਟ ਹਾਊਸ ’ਚ ਪੱਤਰਕਾਰਾਂ ਨੂੰ ਵੀ ਗੱਲਬਾਤ ਦਾ ਸੱਦਾ ਦਿਤਾ ਹੋਇਆ ਸੀ।
ਪ੍ਰੰਤੂ ਕਿਸਾਨਾਂ ਨੂੰ ਇਸ ਦੀ ਭਿਣਕ ਪਹਿਲਾਂ ਹੀ ਲੱਗ ਗਈ ਜਿਸ ਦੇ ਚਲਦੇ ਵੱਡੀ ਗਿਣਤੀ ਵਿਚ ਕਿਸਾਨ ਸਰਕਟ ਹਾਊਸ ਨਜ਼ਦੀਕ ਪੁੱਜ ਗਏ। ਇਸ ਦੌਰਾਨ ਇਥੇ ਮੁਲਾਜ਼ਮਾਂ ਵਲੋਂ ਸੂਬਾ ਪਧਰੀ ਧਰਨਾ ਚਲ ਰਿਹਾ ਸੀ ਤੇ ਸੰਭਾਵਨਾ ਸੀ ਕਿ ਮੁਲਾਜ਼ਮ ਵੀ ਕਿਸਾਨਾਂ ਦੀ ਹਮਾਇਤ ਵਿਚ ਆ ਸਕਦੇ ਹਨ ਜਿਸ ਦੇ ਚਲਦੇ ਨਮੋਸ਼ੀ ਤੋਂ ਬਚਣ ਲਈ ਭਾਜਪਾ ਆਗੂਆਂ ਨੇ ਪੈਂਤੜਾ ਬਦਲਦਿਆਂ ਐਨ ਮੌਕੇ ’ਤੇ ਪ੍ਰੋਗਰਾਮ ਮਾਨਸਾ ਰੋਡ ਉਪਰ ਸਥਿਤ ਇਕ ਹੋਟਲ ਦਾ ਰੱਖ ਦਿਤਾ। ਪਰ ਕਿਸਾਨ ਭਾਜਪਾ ਆਗੂਆਂ ਤੋਂ ਵੀ ਤੇਜ਼ ਨਿਕਲੇ ਤੇ ਉਨ੍ਹਾਂ ਸੈਂਕੜਿਆਂ ਦੀ ਗਿਣਤੀ ਵਿਚ ਇਕੱਠੇ ਹੋ ਕੇ ਉਕਤ ਹੋਟਲ ਨੂੰ ਘੇਰ ਲਿਆ ਤੇ ਮੋਦੀ ਤੇ ਭਾਜਪਾ ਵਿਰੁਧ ਤਿੱਖੀ ਨਾਹਰੇਬਾਜ਼ੀ ਸ਼ੁਰੂ ਕਰ ਦਿਤੀ ਜਿਸ ਕਾਰਨ ਸਥਿਤੀ ਤਣਾਅ ਪੂਰਨ ਬਣ ਗਈ। ਕਿਸਾਨਾਂ ਦੇ ਗੁੱਸੇ ਨੂੰ ਦੇਖਦਿਆਂ ਸ਼੍ਰੀ ਜਿਆਣੀ ਹੋਟਲ ਦੇ ਅੰਦਰ ਹੀ ਰਹੇ।
ਮੌਕੇ ਦੀ ਨਜ਼ਾਕਤ ਦੇਖਦਿਆਂ ਪੁਲਿਸ ਵਿਭਾਗ ਦੇ ਉਚ ਅਧਿਕਾਰੀਆਂ ਤੋਂ ਇਲਾਵਾ ਸਿਵਲ ਪ੍ਰਸ਼ਾਸਨ ਦੇ ਆਹਲਾ ਅਫ਼ਸਰ ਵੀ ਮੌਕੇ ’ਤੇ ਪੁੱਜੇ ਹੋਏ ਸਨ ਜਿਸ ਤੋਂ ਬਾਅਦ ਪ੍ਰਸ਼ਾਸਨ ਨੇ ਭਾਜਪਾ ਆਗੂ ਨੂੰ ਇਕ ਹੋਰ ਗੇਟ ਰਾਹੀਂ ਸਾਬਕਾ ਮੰਤਰੀ ਨੂੰ ਬਾਹਰ ਭੇਜ ਦਿੱਤਾ।