ਸਿੰਗਲ ਲਾਈਨ ਦੀ ਰੇਲ ਪਟੜੀ ਦੇ ਬਿਲਕੁਲ ਕੋਲ 3.75 ਮੀਟਰ ਚੌੜੀ ਸਰਵਿਸ ਰੋਡ ਬਣਾਈ ਗਈ ਹੈ।
ਰਿਆਸੀ- ਭਾਰਤੀ ਰੇਲਵੇ ਨੇ ਜੰਮੂ-ਕਸ਼ਮੀਰ ਦੇ ਰਿਆਸੀ ਖੇਤਰ ’ਚ ਕੱਟੜਾ-ਬਾਰਾਮੂਲਾ ਨੂੰ ਜੋੜਣ ਵਾਲੇ ਰੇਲ ਮਾਰਗ ’ਤੇ ਦੇਸ਼ ਦੇ ਪਹਿਲੇ ਕੇਬਲ ਬ੍ਰਿਜ ਦਾ ਨਿਰਮਾਣ ਪੂਰਾ ਕੀਤਾ ਹੈ, ਜਿਸ ’ਤੇ ਟ੍ਰੇਨ 100 ਕਿਲੋਮੀਟਰ ਦੀ ਰਫ਼ਤਾਰ ਨਾਲ ਦੌੜੇਗੀ। ਊਧਮਪੁਰ-ਕੱਟੜਾ ਤੋਂ ਬਾਰਾਮੂਲਾ ਦੇ ਰਸਤੇ ਸ਼੍ਰੀਨਗਰ ਨੂੰ ਜੋੜਣ ਵਾਲੇ ਰੇਲ ਮਾਰਗ ’ਤੇ ਕੇਬਲ ’ਤੇ ਆਧਾਰਿਤ ਅੰਜੀ ਪੁਲ ਦੀ ਉੱਚਾਈ 391 ਮੀਟਰ ਹੈ। ਪੁਲ ਵਿਚਕਾਰ ਇਕ ਟਾਵਰ ਦਾ ਨਿਰਮਾਣ ਕੀਤਾ ਗਿਆ ਹੈ, ਜਿਸ ਦੇ ਵਿਚਕਾਰ ਦੇ ਦੋਵਾਂ ਪਾਸੇ 24-24 ਕੇਬਲਾਂ ਲੱਗੀਆਂ ਹੋਈਆਂ ਹਨ ਅਤੇ ਦੋਵਾਂ ਪਾਸੇ ਲੱਗੀਆਂ 48 ਕੇਬਲਾਂ ਜ਼ਰੀਏ ਇਹ ਪੁਲ ਪਿੱਲਰ ਨਾਲ ਬੱਝਿਆ ਹੈ।
ਮੁੱਖ ਇੰਜੀਨੀਅਰ ਸੰਦੀਪ ਗੁਪਤਾ ਅਨੁਸਾਰ ਕੇਬਲ ਆਧਾਰਿਤ ਇਹ ਪੁਲ 473 ਮੀਟਰ ਲੰਮਾ ਹੈ। ਇਸ ਦੇ ਵਿਚਕਾਰ ਬਣਿਆ 193 ਮੀਟਰ ਉੱਚਾ ਟਾਵਰ ਇਸ ’ਤੇ ਲੱਗੀ ਕੇਬਲ ਦਾ ਆਧਾਰ ਹੈ। ਇਹ ਪਿੱਲਰ ਦਰਿਆ ਦੇ ਤਲ ਤੋਂ 331 ਮੀਟਰ ਦੀ ਉਚਾਈ ’ਤੇ ਸਥਿਤ ਹੈ। ਸਿੰਗਲ ਲਾਈਨ ਦੀ ਰੇਲ ਪਟੜੀ ਦੇ ਬਿਲਕੁਲ ਕੋਲ 3.75 ਮੀਟਰ ਚੌੜੀ ਸਰਵਿਸ ਰੋਡ ਬਣਾਈ ਗਈ ਹੈ।
ਸੰਦੀਪ ਗੁਪਤਾ ਨੇ ਦੱਸਿਆ ਕਿ ਕੇਬਲ ਨਾਲ ਬੱਝੇ ਇਸ ਪੁਲ ਦੇ ਨਿਰਮਾਣ ਦਾ ਡਿਜ਼ਾਈਨ ਇਸ ਤਰ੍ਹਾਂ ਤਿਆਰ ਕੀਤਾ ਗਿਆ ਹੈ ਕਿ ਇਹ ਟ੍ਰੇਨ ਦੇ ਚੱਲਣ ਨਾਲ ਝੂਲੇਗਾ ਨਹੀਂ ਅਤੇ ਪੁਲ ਦੇ ਉੱਤੇ ਰੇਲ ਤੇਜ਼ ਰਫ਼ਤਾਰ ਨਾਲ ਦੌੜ ਸਕੇਗੀ। ਇਸ ਤੋਂ ਇਲਾਵਾ ਪੁਲ ਭਾਰੀ ਤੂਫਾਨਾਂ ਨੂੰ ਝੱਲ ਸਕਦਾ ਹੈ ਅਤੇ ਤੇਜ਼ ਭੂਚਾਲ ਆਉਣ ਨਾਲ ਵੀ ਪ੍ਰਭਾਵਿਤ ਨਹੀਂ ਹੋਵੇਗਾ। ਉਨ੍ਹਾਂ ਦੱਸਿਆ ਕਿ ਪੁਲ ਦੇ ਨਿਰਮਾਣ ਦਾ ਕਾਰਜ ਅਪ੍ਰੈਲ, 2018 ’ਚ ਸ਼ੁਰੂ ਹੋਇਆ ਸੀ ਅਤੇ ਹੁਣ ਤੱਕ ਇਸ ’ਤੇ 90 ਫ਼ੀਸਦੀ ਕੰਮ ਪੂਰਾ ਹੋ ਚੁੱਕਾ ਹੈ। ਇਸ ਰੇਲ ਲਾਈਨ ’ਤੇ 137 ਪੁਲਾਂ ਅਤੇ 27 ਸੁਰੰਗਾਂ ਦਾ ਨਿਰਮਾਣ ਕੀਤਾ ਜਾ ਰਿਹਾ ਹੈ।
