ਭਾਰਤ ਹੁਣ ਕੋਰੋਨਾ ਵਾਇਰਸ ਨਾਲ ਸੱਭ ਤੋਂ ਜ਼ਿਆਦਾ ਪ੍ਰਭਾਵਤ 10 ਦੇਸ਼ਾਂ 'ਚ ਸ਼ਾਮਲ ਹੋ ਗਿਆ ਹੈ ਅਤੇ ਮਾਹਰਾਂ ਦਾ ਕਹਿਣਾ ਹੈ
ਨਵੀਂ ਦਿੱਲੀ, 26 ਮਈ: ਭਾਰਤ ਹੁਣ ਕੋਰੋਨਾ ਵਾਇਰਸ ਨਾਲ ਸੱਭ ਤੋਂ ਜ਼ਿਆਦਾ ਪ੍ਰਭਾਵਤ 10 ਦੇਸ਼ਾਂ 'ਚ ਸ਼ਾਮਲ ਹੋ ਗਿਆ ਹੈ ਅਤੇ ਮਾਹਰਾਂ ਦਾ ਕਹਿਣਾ ਹੈ ਕਿ ਜਾਂਚ ਸਮਰਥਾ 'ਚ ਵਾਧੇ ਦੇ ਨਾਲ ਹੀ ਯਾਤਰਾ ਪਾਬੰਦੀਆਂ 'ਚ ਢੀਲ ਦੇਣ ਅਤੇ ਪ੍ਰਵਾਸੀਆਂ ਦੀ ਯਾਤਰਾ ਵਰਗੀਆਂ ਚੀਜ਼ਾਂ ਜ਼ਿਆਦਾ ਸਾਹਮਣੇ ਆਉਣ ਦੇ ਕਾਰਨਾਂ 'ਚ ਸ਼ਾਮਲ ਹਨ।
ਦਿੱਲੀ ਦੇ ਏਮਜ਼ ਹਸਪਤਾਲ ਦੇ ਡਾਇਰੈਕਟਰ ਰਣਦੀਪ ਗੁਲੇਰੀਆ ਅਨੁਸਾਰ ਮਾਮਲਿਆਂ 'ਚ ਮੌਜੂਦਾ ਵਾਧਾ ਜ਼ਿਆਦਾਤਰ 'ਹਾਟਸਪਾਟ' ਖੇਤਰਾਂ 'ਚ ਸਾਹਮਣੇ ਆ ਰਹੀ ਹੈ, ਪਰ ਆਗਾਮੀ ਦਿਨਾਂ 'ਚ ਜ਼ਿਆਦਾ ਲੋਕਾਂ ਦੇ ਯਾਤਰਾ ਕਰਨ ਨਾਲ ਕੋਰੋਨਾ ਵਾਇਰਸ ਦੇ ਮਾਮਲਿਆਂ 'ਚ ਹੋਰ ਵਾਧੇ ਦੀ ਸੰਭਾਵਨਾ ਹੈ। ਗੁਲੇਰੀਆ ਨੇ ਕਿਹਾ, ''ਜੋ ਲੋਕ ਲੱਛਣਮੁਕਤ ਹਨ ਜਾਂ ਲੋਕ ਲੱਛਣਾਂ ਦੀ ਸ਼ੁਰੂਆਤੀ ਸਥਿਤੀ 'ਚ ਹਨ ਉਹ ਸਕ੍ਰੀਨਿੰਗ ਤੰਤਰ 'ਚੋਂ ਲੰਘ ਕੇ ਉਨ੍ਹਾਂ ਥਾਵਾਂ ਤਕ ਪਹੁੰਚ ਸਕਦੇ ਹਨ ਜਿੱਥੇ ਘੱਟ ਮਾਮਲੇ ਹਨ। ਉਨ੍ਹਾਂ ਕਿਹਾ ਕਿ ਕੋਰੋਨਾ ਵਾਇਰਸ ਦੇ ਪ੍ਰਸਾਰ ਨੂੰ ਰੋਕਣ ਲਈ ਜ਼ਰੂਰਤ ਇਸ ਗੱਲ ਦੀ ਹੈ ਕਿ ਉਨ੍ਹਾਂ ਇਲਾਕਿਆਂ 'ਤੇ ਨੇੜਿਉਂ ਨਜ਼ਰ ਰੱਖੀ ਜਾਵੇ ਜਿੱਥੇ ਪ੍ਰਵਾਸੀ ਪਰਤੇ ਹਨ।
File photo
ਪ੍ਰਵਾਸੀਆਂ ਦੇ ਅਪਣੇ ਪਿੰਡਾਂ 'ਚ ਪਰਤਣ ਅਤੇ ਰੇਲ ਤੇ ਹਵਾਈ ਯਾਤਰਾ ਦੀ ਅੰਸ਼ਕ ਸ਼ੁਰੂਆਤ 'ਤੇ ਟਿਪਣੀ ਕਰਦਿਆਂ ਇੰਡੀਅਨ ਪਬਲਿਕ ਹੈਲਥ ਐਸੋਸੀਏਸ਼ਨ ਅਤੇ ਇੰਡੀਅਨ ਐਸੋਸੀਏਸ਼ਨ ਆਫ਼ ਪ੍ਰੀਵੈਂਟਿਵ ਐਂਡ ਸੋਸ਼ਲ ਮੈਡੀਸਨ ਦੇ ਸਾਬਕਾ ਪ੍ਰਧਾਨ ਡਾ. ਚੰਦਰਕਾਂਤ ਐਸ. ਪਾਂਵਤ ਨੇ ਕਿਹਾ ਕਿ ਕੋਰੋਨਾ ਵਾਇਰਸ ਦੇ ਪ੍ਰਸਾਰ ਦੇ ਰਾਹ ਖੁੱਲ੍ਹ ਗਏ ਹਨ। ਉਨ੍ਹਾਂ ਕਿਹਾ ਕਿ ਭਾਵੇਂ ਤਾਲਾਬੰਦੀ ਸਦਾ ਲਈ ਨਹੀਂ ਰਹਿ ਸਕਦੀ, ਪਰ ਸ਼ੁਰੂਆਤ ਬਹੁਤ ਹੀ ਧਿਆਨ ਨਾਲ ਹੋਣੀ ਚਾਹੀਦੀ ਸੀ। ਉਨ੍ਹਾਂ ਕਿਹਾ ਕਿ ਆਉਣ ਵਾਲੇ ਦਿਨਾਂ 'ਚ ਕੋਰੋਨਾ ਵਾਇਰਸ ਦੇ ਮਾਮਲਿਆਂ 'ਚ ਵੱਡਾ ਵਾਧਾ ਹੋਵੇਗਾ। (ਪੀਟੀਆਈ)
