ਮੁੱਖ ਮੁਲਜ਼ਮ ਸੰਜੇ ਰਾਏ ਦਾ ਕਰੀਬੀ ਦਸਿਆ ਜਾਂਦਾ ਹੈ ਅਨੂਪ ਦੱਤਾ
Kolkata rape-murder case : ਕੇਂਦਰੀ ਜਾਂਚ ਬਿਊਰੋ (ਸੀ.ਬੀ.ਆਈ.) ਨੇ ਕੋਲਕਾਤਾ ਦੀ ਇਕ ਅਦਾਲਤ ਤੋਂ ਸ਼ਹਿਰ ਦੇ ਸਹਾਇਕ ਸਬ-ਇੰਸਪੈਕਟਰ ਅਨੂਪ ਦੱਤਾ ਦਾ ਪੋਲੀਗ੍ਰਾਫ ਟੈਸਟ ਕਰਵਾਉਣ ਦੀ ਇਜਾਜ਼ਤ ਮੰਗੀ ਹੈ। ਦੱਤਾ ਨੂੰ ਆਰ.ਜੀ. ਕਰ ਮੈਡੀਕਲ ਕਾਲਜ ’ਚ ਇਕ ਸਿਖਾਂਦਰੂ ਡਾਕਟਰ ਨਾਲ ਜਬਰ ਜਨਾਹ ਅਤੇ ਕਤਲ ਦੇ ਮਾਮਲੇ ’ਚ ਗ੍ਰਿਫਤਾਰ ਕੀਤੇ ਗਏ ਮੁਲਜ਼ਮ ਸੰਜੇ ਰਾਏ ਦਾ ਕਰੀਬੀ ਦਸਿਆ ਜਾਂਦਾ ਹੈ। ਅਧਿਕਾਰੀਆਂ ਨੇ ਮੰਗਲਵਾਰ ਨੂੰ ਇਹ ਜਾਣਕਾਰੀ ਦਿਤੀ।
ਅਧਿਕਾਰੀਆਂ ਨੇ ਦਸਿਆ ਕਿ ਸੀ.ਬੀ.ਆਈ. ਇਸ ਗੱਲ ਦੀ ਜਾਂਚ ਕਰ ਰਹੀ ਹੈ ਕਿ ਕੀ ਦੱਤਾ ਨੇ ਰਾਏ ਨੂੰ ਅਪਰਾਧ ਲੁਕਾਉਣ ’ਚ ਮਦਦ ਕੀਤੀ ਸੀ।
ਸੂਤਰਾਂ ਨੇ ਦਸਿਆ ਕਿ ਦੱਤਾ ਨੇ ਰਾਏ ਨੂੰ ਕਈ ਲਾਭ ਪਹੁੰਚਾਉਣ ’ਚ ਕਥਿਤ ਤੌਰ ’ਤੇ ਅਹਿਮ ਭੂਮਿਕਾ ਨਿਭਾਈ ਸੀ। ਅਧਿਕਾਰੀਆਂ ਨੇ ਦਸਿਆ ਕਿ ਸੀ.ਬੀ.ਆਈ. ਇਹ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ ਕਿ ਕੀ ਰਾਏ ਨੇ ਦੱਤਾ ਨੂੰ ਅਪਰਾਧ ਬਾਰੇ ਦਸਿਆ ਸੀ ਅਤੇ ਕੀ ਉਸ ਨੂੰ ਕੋਈ ਮਦਦ ਮਿਲੀ ਸੀ।
ਅਧਿਕਾਰੀਆਂ ਨੇ ਦਸਿਆ ਕਿ ਅਦਾਲਤ ਇਸ ਮੁੱਦੇ ’ਤੇ ਦੱਤਾ ਦੀ ਸਹਿਮਤੀ ਲੈਣ ਤੋਂ ਬਾਅਦ ਪੌਲੀਗ੍ਰਾਫ ਟੈਸਟ ਦੀ ਅਰਜ਼ੀ ’ਤੇ ਫੈਸਲਾ ਕਰੇਗੀ। ਅਧਿਕਾਰੀਆਂ ਨੇ ਦਸਿਆ ਕਿ ਸੀ.ਬੀ.ਆਈ. ਨੇ ਮੰਗਲਵਾਰ ਨੂੰ ਮੈਡੀਕਲ ਕਾਲਜ ਦੇ ਸਾਬਕਾ ਪ੍ਰਿੰਸੀਪਲ ਸੰਦੀਪ ਘੋਸ਼ ਦਾ ਪੋਲੀਗ੍ਰਾਫ ਟੈਸਟ ਪੂਰਾ ਕਰ ਲਿਆ।
ਸਨਿਚਰਵਾਰ ਨੂੰ ਉਸ ਦਾ ‘ਲੇਅਰਡ ਵਾਇਸ ਐਨਾਲਾਸਿਸ ਟੈਸਟ’ ਹੋਇਆ ਸੀ ਅਤੇ ਬਾਅਦ ’ਚ ਸੋਮਵਾਰ ਨੂੰ ਪੌਲੀਗ੍ਰਾਫ ਟੈਸਟ ਹੋਇਆ ਸੀ। ਟੈਸਟ ਸੋਮਵਾਰ ਨੂੰ ਪੂਰਾ ਨਹੀਂ ਹੋ ਸਕਿਆ, ਇਸ ਲਈ ਮੰਗਲਵਾਰ ਨੂੰ ਇਸ ਨੂੰ ਦੁਬਾਰਾ ਸ਼ੁਰੂ ਕੀਤਾ ਗਿਆ।
‘ਲੇਅਰਡ ਵੌਇਸ ਐਨਾਲਿਸਿਸ ਟੈਸਟ’ ਝੂਠ ਬੋਲਣ ਵਾਲੇ ਦੀ ਪ੍ਰਤੀਕਿਰਿਆ ਦਾ ਪਤਾ ਲਗਾਉਂਦਾ ਹੈ, ਪਰ ਇਹ ਝੂਠ ਦਾ ਪਤਾ ਨਹੀਂ ਲਗਾਉਂਦਾ। ਇਸ ਤਕਨੀਕ ਰਾਹੀਂ, ਬੌਧਿਕ ਪ੍ਰਕਿਰਿਆਵਾਂ ਅਤੇ ਭਾਵਨਾਤਮਕ ਸੰਕੇਤਾਂ ਨੂੰ ਵੱਖ-ਵੱਖ ਆਵਾਜ਼ਾਂ ’ਚ ਪਛਾਣਿਆ ਜਾਂਦਾ ਹੈ।
