ਭਾਈ ਮਨਧੀਰ ਸਿੰਘ ਨੇ ਦੱਸੇ ਕਿਸਾਨੀ ਮੋਰਚੇ ਦੇ ਹਾਲਾਤ
ਨਵੀਂ ਦਿੱਲੀ (ਹਰਦੀਪ ਸਿੰਘ ਭੋਗਲ): ਕਿਸਾਨ ਟਰੈਕਟਰ ਪਰੇਡ ਮੌਕੇ ਹੋਈ ਹਿੰਸਾਂ ਤੋਂ ਬਾਅਦ ਦਿੱਲੀ ਬਾਰਡਰਾਂ ‘ਤੇ ਇੰਟਰਨੈੱਟ ਸੇਵਾਵਾਂ ਠੱਪ ਹਨ। ਇਸ ਦੇ ਚਲਦਿਆਂ ਕਿਸਾਨੀ ਮੋਰਚੇ ਸਬੰਧੀ ਕਈ ਤਰ੍ਹਾਂ ਦੀਆਂ ਅਫ਼ਵਾਹਾਂ ਫੈਲਾਈਆਂ ਜਾ ਰਹੀਆਂ ਹਨ। ਤਾਜ਼ਾ ਹਲਾਤ ਸਬੰਧੀ ਕੁੰਡਲੀ ਬਾਰਡਰ ‘ਤੇ ਕਿਸਾਨਾਂ ਦਾ ਸਮਰਥਨ ਕਰ ਰਹੇ ਭਾਈ ਮਨਧੀਰ ਸਿੰਘ ਨੇ ਰੋਜ਼ਾਨਾ ਸਪੋਕਸਮੈਨ ਨਾਲ ਵਿਸ਼ੇਸ਼ ਗੱਲਬਾਤ ਕੀਤੀ।
Farmer
ਭਾਈ ਮਨਧੀਰ ਸਿੰਘ ਨੇ ਕਿਹਾ ਜਿੰਨੇ ਵੀ ਕਿਸਾਨ ਸੰਘਰਸ਼ ਵਿਚ ਡਟੇ ਹੋਏ ਹਨ, ਉਹ ਖੇਤੀਬਾੜੀ ਲਈ ਨਵੇਂ ਮਾਡਲ ਦੀ ਮੰਗ ਕਰ ਰਹੇ ਹਨ, ਜੋ ਕਿਸਾਨ ਅਤੇ ਕੁਦਕਤ ਪੱਖੀ ਹੋਵੇ। ਇਸ ਦੇ ਨਾਲ ਹੀ ਮਾਡਲ ਪੰਜਾਬ ਕੇਂਦਰਿਤ ਹੋਵੇ। ਉਹਨਾਂ ਦੱਸਿਆ ਕਿ ਪੁਰਾਣਾ ਖੇਤੀਬਾੜੀ ਮਾਡਲ ਫੇਲ ਹੋ ਚੁੱਕਿਆ ਹੈ, ਉਸ ਮਾਡਲ ਨੇ ਪੰਜਾਬ ਦੀ ਮਿੱਟੀ, ਪਾਣੀ ਅਤੇ ਆਰਥਕ ਪੱਖੋਂ ਕਾਫੀ ਨੁਕਸਾਨ ਕੀਤਾ ਹੈ। ਇਸ ਦੀ ਪੂਰਤੀ ਲਈ ਸਰਕਾਰ ਨੇ ਨਵਾਂ ਮਾਡਲ ਲਿਆਉਣ ਦੀ ਬਜਾਏ ਕਾਰਪੋਰੇਟ ਪੱਖੀ ਨਵਾਂ ਮਾਡਲ ਲਿਆ ਦਿੱਤਾ ਹੈ। ਉਹਨਾਂ ਕਿਹਾ ਨਵੇਂ ਖੇਤੀ ਕਾਨੂੰਨਾਂ ਨੂੰ ਰੱਦ ਕਰਨਾ, ਕੁਦਰਤ ਪੱਖੀ ਮਾਡਲ ਵੱਲ ਪਹਿਲਾਂ ਕਦਮ ਹੋਵੇਗਾ।
Bhai Mandhir Singh
ਭਾਈ ਮਨਧੀਰ ਸਿੰਘ ਦਾ ਕਹਿਣਾ ਹੈ ਕਿ ਹਰੇਕ ਸੰਘਰਸ਼ ਵਿਚ ਉਤਰਾ ਚੜਾਅ ਆਉਂਦੇ ਰਹਿੰਦੇ ਹਨ ਤੇ ਇਸ ਸੰਘਰਸ਼ ਵਿਚ ਵੀ ਕਈ ਉਤਰਾ ਚੜਾਅ ਆਏ ਪਰ ਬੀਤੇ ਦੋ ਦਿਨੀਂ ਜੋ ਘਟਨਾ ਵਾਪਰੀ ਪੂਰਾ ਧਿਆਨ ਉਸ ਘਟਨਾ ‘ਤੇ ਕੇਂਦਰਿਤ ਕੀਤਾ ਜਾ ਰਿਹਾ ਹੈ ਅਤੇ ਅਸਲ ਮੁੱਦੇ ਤੋਂ ਭਟਕਾਇਆ ਜਾ ਰਿਹਾ ਹੈ। ਇਹ ਮੰਦਭਾਗਾ ਹੈ।
ਉਹਨਾਂ ਕਿਹਾ ਕਿ ਸਰਕਾਰ, ਮੀਡੀਆ, ਕਿਸਾਨ ਜਥੇਬੰਦੀਆਂ, ਕਿਸਾਨਾਂ ਅਤੇ ਆਮ ਲੋਕਾਂ ਨੂੰ ਇਸ ਗੱਲ ਨੂੰ ਮੁੱਖ ਰੱਖਣਾ ਚਾਹੀਦਾ ਹੈ ਕਿ ਇਹ ਸੰਘਰਸ਼ ਕਿਸ ਮੰਗ ਲਈ ਕੀਤਾ ਜਾ ਰਿਹਾ ਹੈ। ਅਪਣੀਆਂ ਮੰਗਾਂ ਮਨਵਾਉਣ ਲਈ ਸਾਨੂੰ ਗਲਤ ਘਟਨਾਵਾਂ ਨੂੰ ਨਜ਼ਰਅੰਦਾਜ਼ ਕਰਨਾ ਚਾਹੀਦਾ ਹੈ ਤਾਂ ਜੋ ਅਸੀਂ ਅਸਲ ਲੀਹਾਂ ਤੋਂ ਗੁੰਮਰਾਹ ਨਾ ਹੋ ਸਕੀਏ। ਭਾਈ ਮਨਧੀਰ ਸਿੰਘ ਨੇ ਕਿਹਾ ਕਿ ਇਸ ਸੰਘਰਸ਼ ਵਿਚ ਚਾਰ ਮੁੱਖ ਧਿਰਾਂ ਹਨ। ਪਹਿਲੀ ਧਿਰ ਆਮ ਕਿਸਾਨ, ਦੂਜੀ ਧਿਰ ਕੇਂਦਰ ਸਰਕਾਰ, ਤੀਜੀ ਧਿਰ ਹੈ ਸੰਯੁਕਤ ਮੋਰਚਾ ਅਤੇ ਚੌਥੀ ਧਿਰ ਹੈ ਸੰਯੁਕਤ ਮੋਰਚੇ ਤੋਂ ਬਾਹਰ ਜਥੇਬੰਦੀਆਂ ਜਾਂ ਹੋਰ ਸਹਿਯੋਗੀ।
Farmer leader
ਉਹਨਾਂ ਕਿਹਾ ਸੰਘਰਸ਼ ਦੌਰਾਨ ਸਭ ਤੋਂ ਮੁੱਖ ਗੱਲ ਇਹ ਹੈ ਕਿ ਮੋਰਚੇ ਦੀ ਰੀੜ ਦੀ ਹੱਡੀ ਭਾਵ ਆਮ ਲੋਕਾਂ ਤੇ ਆਮ ਕਿਸਾਨਾਂ ਦੀਆਂ ਭਾਵਨਾਵਾਂ ਨੂੰ ਨਾ ਸਰਕਾਰ ਸਮਝ ਸਕੀ ਹੈ ਤੇ ਨਾ ਕਿਸਾਨ ਜਥੇਬੰਦੀਆਂ ਸਮਝ ਸਕੀਆਂ ਹਨ। ਇਸ ਦੇ ਬਾਵਜੂਦ ਇਹਨਾਂ ਲੋਕਾਂ ਨੇ ਸਬਰ ਬਣਾ ਕੇ ਰੱਖਿਆ ਹੈ, ਜੋ ਅਪਣੇ ਆਪ ਵਿਚ ਬਹੁਤ ਵੱਡੀ ਮਿਸਾਲ ਹੈ। ਕਿਸਾਨ ਟਰੈਕਟਰ ਪਰੇਡ ਬਾਰੇ ਗੱਲ਼ ਕਰਦਿਆਂ ਭਾਈ ਮਨਧੀਰ ਸਿੰਘ ਨੇ ਕਿਹਾ ਕਿ ਕਿਸਾਨ ਜਥੇਬੰਦੀਆਂ ਵੱਲੋਂ ਤੈਅ ਕੀਤੇ ਗਏ ਰੂਟ ਅਨੁਸਾਰ ਕਿਸਾਨ ਸ਼ਾਂਤਮਈ ਢੰਗ ਨਾਲ ਪਰੇਡ ਵਿਚ ਸ਼ਾਮਲ ਹੋਏ।
Tractor prade
ਇਸ ਦੌਰਾਨ ਕਿਸੇ ਕਿਸਮ ਦੀ ਹਿੰਸਾ ਨਹੀਂ ਕੀਤੀ ਗਈ। ਸਿਰਫ ਉਹਨਾਂ ਪੁਲਿਸ ਕਰਮਚਾਰੀਆਂ ਨਾਲ ਟਕਰਾਅ ਹੋਇਆ, ਜਿਨ੍ਹਾਂ ਨੇ ਕਿਸਾਨਾਂ ਦਾ ਰਸਤਾ ਰੋਕਿਆ। ਕਈ ਨੌਜਵਾਨਾਂ ਨੇ ਪੁਲਿਸ ਕਰਮਚਾਰੀਆਂ ਅਤੇ ਮਹਿਲਾ ਕਰਮੀਆ ਦੀ ਸਹਾਇਤਾ ਵੀ ਕੀਤੀ। ਉਹਨਾਂ ਕਿਹਾ ਪਰੇਡ ਦੌਰਾਨ ਸਾਰੇ ਕਿਸਾਨ ਅਪਣੀ ਭਾਵਨਾ ਨਾਲ ਸ਼ਾਮਲ ਹੋਏ ਅਤੇ ਅਪਣੀ ਭਾਵਨਾ ਨਾਲ ਵਾਪਸ ਆਏ।
ਉਹਨਾਂ ਨੂੰ ਪੁਲਿਸ ਨੇ ਵੀ ਨਹੀਂ ਰੋਕਿਆ। ਇਸ ਪੂਰੇ ਘਟਨਾਕ੍ਰਮ ਵਿਚ ਇਹ ਸਭ ਤੋਂ ਸਕਾਰਾਤਮਕ ਗੱਲ ਹੋਈ ਪਰ ਇਸ ‘ਤੇ ਕੋਈ ਚਰਚਾ ਨਹੀਂ ਕਰ ਰਿਹਾ। ਲਾਲ ਕਿਲ੍ਹੇ ‘ਤੇ ਵਾਪਰੀ ਘਟਨਾ ਬਾਰੇ ਭਾਈ ਮਨਧੀਰ ਸਿੰਘ ਨੇ ਕਿਹਾ ਕਿ ਇਹ ਸਰਕਾਰ ਦੀ ਅਸਫਲਤਾ ਹੈ ਕਿ ਉਹਨਾਂ ਨੇ ਅਜਿਹੇ ਹਾਲਾਤ ਬਣਨ ਦਿੱਤੇ। ਸਰਕਾਰ ਚਾਰ ਮਹੀਨਿਆਂ ਤੋਂ ਕਿਸਾਨਾਂ ਦਾ ਸਬਰ ਪਰਖ ਰਹੀ ਹੈ ਤੇ ਲੋਕਾਂ ਨੇ ਅਪਣੀ ਭਾਵਨਾ ਅਨੁਸਾਰ ਉੱਥੇ ਜਾਣਾ ਸੀ, ਇਹ ਸਰਕਾਰ ਨੂੰ ਵੀ ਪਤਾ ਸੀ।
Farmers protest
ਕਿਸਾਨ ਆਗੂਆਂ ਬਾਰੇ ਗੱਲ ਕਰਦਿਆਂ ਭਾਈ ਮਨਧੀਰ ਸਿੰਘ ਨੇ ਕਿਹਾ ਕਿ ਕੁਝ ਆਗੂ ਸਿਆਸੀ ਲਾਲਸਾ ਨਾਲ ਸੰਘਰਸ਼ ਵਿਚ ਡਟੇ ਹੋਏ ਹਨ। ਉਹਨਾਂ ਕਿਹਾ ਕਿਸਾਨ ਆਗੂ ਇੰਨੀ ਵੱਡੀ ਲਹਿਰ ਨੂੰ ਸਹੀ ਚਲਾਉਣ ਦੇ ਸਮਰੱਥ ਨਹੀਂ ਹਨ । ਭਾਈ ਮਨਧੀਰ ਸਿੰਘ ਨੇ ਕਿਹਾ ਕਿ 26 ਨਵੰਬਰ ਅਤੇ 26 ਜਨਵਰੀ ਦੋਵੇਂ ਮੌਕਿਆਂ ‘ਤੇ ਕਿਸਾਨ ਆਗੂ ਲੋਕਾਂ ਦੀਆਂ ਭਾਵਨਾਵਾਂ ਨੂੰ ਸਮਝਣ ਵਿਚ ਅਸਫਲ ਰਹੇ। ਉਹਨਾਂ ਕਿਹਾ ਲੋਕ ਪੂਰੇ ਜੋਸ਼ ਵਿਚ ਹਨ ਤੇ ਉਹ ਜਥੇਬੰਦੀਆਂ ਵੱਲੋਂ ਦਿੱਤੇ ਹਰ ਪ੍ਰੋਗਰਾਮ ਨੂੰ ਸਫਲ ਕਰ ਦਿੰਦੇ ਹਨ।
