ਕੁੱਝ ਦਾ ਮੰਨਣਾ ਹੈ ਕਿ ਇੰਡੀਆ ਪੋਸਟ ਪੇਮੈਂਟਸ ਬੈਂਕ (IPPB) ਖਾਤਾ ਖੋਲ੍ਹਣ ਨਾਲ ਉਨ੍ਹਾਂ ਨੂੰ 8,500 ਰੁਪਏ ਪ੍ਰਤੀ ਮਹੀਨਾ ਤਕ ਦੀ ਗਾਰੰਟੀ ਮਿਲੇਗੀ
ਬੈਂਗਲੁਰੂ: ਕਰਨਾਟਕ ਦੀ ਰਾਜਧਾਨੀ ਬੈਂਗਲੁਰੂ ’ਚ ਆਮ ਤੌਰ ’ਤੇ ਖਾਲੀ ਪਏ ਜਨਰਲ ਪੋਸਟ ਆਫਿਸ (ਜੀ.ਪੀ.ਓ.) ’ਚ ਇੰਡੀਆ ਪੋਸਟ ਪੇਮੈਂਟਸ ਬੈਂਕ ਖਾਤੇ ਖੋਲ੍ਹਣ ਲਈ ਔਰਤਾਂ ਦੀ ਭਾਰੀ ਭੀੜ ਵੇਖਣ ਨੂੰ ਮਿਲ ਰਹੀ ਹੈ। ਡਾਕਘਰ ’ਚ ਖਾਤਾ ਖੁਲ੍ਹਵਾਉਣ ਲਈ ਆਉਣ ਵਾਲੀਆਂ ਔਰਤਾਂ ਨੂੰ ਉਮੀਦ ਹੈ ਕਿ ਜੇਕਰ ਲੋਕ ਸਭਾ ਚੋਣਾਂ ਜਿੱਤ ਕੇ ਕੇਂਦਰ ’ਚ ‘ਇੰਡੀਆ’ ਗੱਠਜੋੜ ਸੱਤਾ ’ਚ ਆਉਂਦਾ ਹੈ ਤਾਂ ਉਨ੍ਹਾਂ ਦੇ ਖਾਤਿਆਂ ’ਚ 8,500 ਰੁਪਏ ਪ੍ਰਤੀ ਮਹੀਨਾ ਜਮ੍ਹਾ ਹੋ ਜਾਣਗੇ।
ਦੇਸ਼ ’ਚ ਲੋਕ ਸਭਾ ਚੋਣਾਂ ਅਜੇ ਵੀ ਚੱਲ ਰਹੀਆਂ ਹਨ ਪਰ ਔਰਤਾਂ ਡਾਕਘਰਾਂ ’ਚ ਖਾਤੇ ਖੋਲ੍ਹਣ ਲਈ ਲੰਬੀਆਂ ਕਤਾਰਾਂ ’ਚ ਖੜੀਆਂ ਹਨ। ਇਨ੍ਹਾਂ ’ਚੋਂ ਜ਼ਿਆਦਾਤਰ ਔਰਤਾਂ ਘੱਟ ਗਿਣਤੀ ਭਾਈਚਾਰੇ ਨਾਲ ਸਬੰਧਤ ਹਨ।
ਉਨ੍ਹਾਂ ਵਿਚੋਂ ਕੁੱਝ ਦਾ ਮੰਨਣਾ ਹੈ ਕਿ ਇੰਡੀਆ ਪੋਸਟ ਪੇਮੈਂਟਸ ਬੈਂਕ (ਆਈ.ਪੀ.ਪੀ.ਬੀ.) ਖਾਤਾ ਖੋਲ੍ਹਣ ਨਾਲ ਉਨ੍ਹਾਂ ਨੂੰ 8,500 ਰੁਪਏ ਪ੍ਰਤੀ ਮਹੀਨਾ ਤਕ ਦੀ ਗਾਰੰਟੀ ਮਿਲੇਗੀ। ਡਾਕਘਰ ’ਚ ਖਾਤਾ ਖੋਲ੍ਹਣ ਆਈ ਇਕ ਔਰਤ ਨੇ ਕਿਹਾ ਕਿ ਉਹ ਸਵੇਰੇ ਤੜਕੇ ਕਤਾਰ ’ਚ ਲੱਗ ਗਈ ਸੀ।
ਇਕ ਹੋਰ ਔਰਤ ਨੇ ਕਿਹਾ ਕਿ ਉਸ ਦੇ ਇਲਾਕੇ ’ਚ ਹਰ ਕੋਈ ਕਹਿ ਰਿਹਾ ਹੈ ਕਿ ਖਾਤਾ ਖੁੱਲ੍ਹਣ ਦੇ ਦਿਨ ਤੋਂ ਹੀ ਪੈਸੇ ਆਉਣੇ ਸ਼ੁਰੂ ਹੋ ਜਾਣਗੇ, ਇਸ ਲਈ ਉਹ ਵੀ ਖਾਤਾ ਖੋਲ੍ਹਣ ਆਈ ਹੈ। ਪੀ.ਟੀ.ਆਈ. ਨਾਲ ਗੱਲ ਕਰਨ ਵਾਲੀਆਂ ਜ਼ਿਆਦਾਤਰ ਔਰਤਾਂ ਸ਼ਿਵਾਜੀਨਗਰ, ਚਮਰਾਜਪੇਟ ਅਤੇ ਨੇੜਲੇ ਇਲਾਕਿਆਂ ਦੀਆਂ ਸਨ।
ਜੀ.ਪੀ.ਓ.-ਬੈਂਗਲੁਰੂ ਦੇ ਮੁੱਖ ਪੋਸਟ ਮਾਸਟਰ ਐਚ.ਐਮ. ਮੰਜੇਸ਼ ਨੇ ਪੱਤਰਕਾਰਾਂ ਨੂੰ ਦਸਿਆ ਕਿ ਲੋਕ ਇਹ ਵਿਸ਼ਵਾਸ ਕਰ ਕੇ ਖਾਤੇ ਖੋਲ੍ਹਣ ਲਈ ਡਾਕਘਰਾਂ ’ਚ ਆ ਰਹੇ ਹਨ ਕਿ ਡਾਕ ਵਿਭਾਗ ਉਨ੍ਹਾਂ ਦੇ ਖਾਤਿਆਂ ’ਚ 2,000 ਜਾਂ 8,500 ਰੁਪਏ ਜਮ੍ਹਾਂ ਕਰਵਾਏਗਾ।
ਮੰਜੇਸ਼ ਨੇ ਕਿਹਾ, ‘‘ਅਸਲ ’ਚ ਇਹ ਇਕ ਅਫਵਾਹ ਹੈ। ਕਿਸੇ ਨੇ ਇਹ ਅਫਵਾਹ ਫੈਲਾਈ ਹੈ। ਡਾਕ ਵਿਭਾਗ ਉਨ੍ਹਾਂ ਨੂੰ ਕੋਈ ਪੈਸਾ ਨਹੀਂ ਦੇਵੇਗਾ। ਹਾਲਾਂਕਿ, ਇਸ ਖਾਤੇ ਦੀ ਵਰਤੋਂ ਕਿਸੇ ਵੀ ਤਰ੍ਹਾਂ ਦੇ ਆਨਲਾਈਨ ਲੈਣ-ਦੇਣ ਜਾਂ ਸਿੱਧੇ ਲਾਭ (ਟ੍ਰਾਂਸਫਰ) ਸਕੀਮ ਲਈ ਕੀਤੀ ਜਾ ਸਕਦੀ ਹੈ।’’
ਉਨ੍ਹਾਂ ਕਿਹਾ ਕਿ ਡਾਕ ਵਿਭਾਗ ਨੇ ਇਸ ਬਾਰੇ ਖਪਤਕਾਰਾਂ ਨੂੰ ਪਹਿਲਾਂ ਹੀ ਸੂਚਿਤ ਕਰ ਦਿਤਾ ਹੈ। ਉਨ੍ਹਾਂ ਕਿਹਾ, ‘‘ਅਸੀਂ ਕੁੱਝ ਪੋਸਟਰ ਵੀ ਵਿਖਾਏ ਹਨ। ਇਸ ਦੇ ਬਾਵਜੂਦ, ਗਾਹਕ ਬੇਨਤੀ ਕਰ ਰਹੇ ਹਨ ਕਿ ਅਸੀਂ ਉਨ੍ਹਾਂ ਲਈ ਆਈ.ਪੀ.ਪੀ.ਬੀ. ਖਾਤੇ ਖੋਲ੍ਹੀਏ।’’
ਉਨ੍ਹਾਂ ਕਿਹਾ ਕਿ ਭੀੜ ਇੰਨੀ ਵੱਡੀ ਸੀ ਕਿ ਜੀ.ਪੀ.ਓ. ਇਮਾਰਤ ਦੇ ਬਾਹਰ ਖੁੱਲ੍ਹੇ ਅਸਮਾਨ ਹੇਠ ਹੋਰ ਕਾਊਂਟਰ ਖੋਲ੍ਹੇ ਗਏ ਸਨ। ਡਾਕ ਵਿਭਾਗ ਦੇ ਸੂਤਰਾਂ ਮੁਤਾਬਕ ਇਹ ਭੀੜ ਪਿਛਲੇ ਤਿੰਨ ਦਿਨਾਂ ਤੋਂ ਵੇਖਣ ਨੂੰ ਮਿਲ ਰਹੀ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਕੁੱਝ ਕਾਂਗਰਸੀ ਵਿਧਾਇਕਾਂ ਨੇ ਇਹ ਅਫਵਾਹ ਫੈਲਾਈ ਹੈ, ਜਿਸ ’ਤੇ ਵਿਸ਼ਵਾਸ ਕਰਦੇ ਹੋਏ ਕਿ ਕਿਹੜੀਆਂ ਮਹਿਲਾ ਜੀਪੀਓ ਆ ਰਹੀਆਂ ਹਨ।
ਇਨ੍ਹਾਂ ਵਿਧਾਇਕਾਂ ਨੇ ਕਿਹਾ ਕਿ ਔਰਤਾਂ ਨੂੰ 4 ਜੂਨ ਤੋਂ ਬਾਅਦ ਪੈਸਾ ਮਿਲਣਾ ਸ਼ੁਰੂ ਹੋ ਜਾਵੇਗਾ, ‘‘ਜਦੋਂ ‘ਇੰਡੀਆ’ ਗੱਠਜੋੜ ਸੱਤਾ ’ਚ ਆਵੇਗਾ।’’ ਕਾਂਗਰਸ ਨੇ ਮਹਾਲਕਸ਼ਮੀ ਯੋਜਨਾ ਸ਼ੁਰੂ ਕਰਨ ਦਾ ਵਾਅਦਾ ਕੀਤਾ ਹੈ, ਜਿਸ ਦੇ ਤਹਿਤ ਕੇਂਦਰ ’ਚ ਸੱਤਾ ’ਚ ਆਉਣ ’ਤੇ ਗਰੀਬੀ ਰੇਖਾ ਤੋਂ ਹੇਠਾਂ (ਬੀ.ਪੀ.ਐਲ.) ਸ਼੍ਰੇਣੀ ਨਾਲ ਸਬੰਧਤ ਪਰਵਾਰਾਂ ਦੀਆਂ ਮਹਿਲਾ ਮੁਖੀਆਂ ਦੇ ਖਾਤਿਆਂ ’ਚ ਸਿੱਧੇ 8,500 ਰੁਪਏ ਜਮ੍ਹਾਂ ਕਰਵਾਏ ਜਾਣਗੇ।
