ਲਾਲੂ ਨੇ ਚਾਰਾ ਖਾਧਾ, ਉਹ ਬਿਹਾਰ ਦੇ ਲੋਕਾਂ ਦੀ ਭਲਾਈ ਬਾਰੇ ਨਹੀਂ ਸੋਚ ਸਕਦੇ : ਅਮਿਤ ਸ਼ਾਹ
ਕਿਹਾ, ਲਾਲੂ-ਰਾਬੜੀ ਸਰਕਾਰ ਨੂੰ ਬਿਹਾਰ ’ਚ ‘ਜੰਗਲ ਰਾਜ’ ਨੂੰ ਉਤਸ਼ਾਹਿਤ ਕਰਨ ਲਈ ਯਾਦ ਕੀਤਾ ਜਾਵੇਗਾ
ਗੋਪਾਲਗੰਜ (ਬਿਹਾਰ) : ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਅੱਜ ਇਸ ਸਾਲ ਦੇ ਅਖੀਰ ’ਚ ਹੋਣ ਵਾਲੀਆਂ ਬਿਹਾਰ ਵਿਧਾਨ ਸਭਾ ਚੋਣਾਂ ਦਾ ਬਿਗਲ ਵਜਾਇਆ ਅਤੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਦੀ ਅਗਵਾਈ ਵਾਲੇ ਐਨ.ਡੀ.ਏ. ਨੂੰ ਵੋਟ ਦੇ ਕੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਹੱਥ ਮਜ਼ਬੂਤ ਕਰਨ।
ਰਾਸ਼ਟਰੀ ਜਨਤਾ ਦਲ (ਆਰ.ਜੇ.ਡੀ.) ਦੇ ਗੜ੍ਹ ਗੋਪਾਲਗੰਜ ’ਚ ਇਕ ਰੈਲੀ ਨੂੰ ਸੰਬੋਧਨ ਕਰਦਿਆਂ ਸ਼ਾਹ ਨੇ ਵਿਰੋਧੀ ਪਾਰਟੀ ਦੇ ਪ੍ਰਧਾਨ ਲਾਲੂ ਪ੍ਰਸਾਦ ਯਾਦਵ ਅਤੇ ਉਨ੍ਹਾਂ ਦੀ ਪਤਨੀ ਰਾਬੜੀ ਦੇਵੀ ’ਤੇ ਜੰਗਲ ਰਾਜ ਚਲਾਉਣ ਦਾ ਦੋਸ਼ ਲਗਾਉਂਦੇ ਹੋਏ ਦੋਸ਼ ਲਾਇਆ ਕਿ ਸੱਤਾ ’ਚ ਰਹਿੰਦੇ ਹੋਏ ਕਤਲ, ਅਗਵਾ ਅਤੇ ਡਕੈਤੀ ਸੂਬੇ ’ਚ ਇਕ ਉਦਯੋਗ ਬਣ ਗਏ ਸਨ।
ਪਿਛਲੇ ਸਾਲ ਦੀਆਂ ਲੋਕ ਸਭਾ ਚੋਣਾਂ ਤੋਂ ਬਾਅਦ ਭਾਜਪਾ ਦੇ ਪ੍ਰਮੁੱਖ ਰਣਨੀਤੀਕਾਰ ਮੰਨੇ ਜਾਣ ਵਾਲੇ ਸ਼ਾਹ ਨੇ ਬਿਹਾਰ ’ਚ ਇਹ ਪਹਿਲੀ ਰੈਲੀ ਨੂੰ ਸੰਬੋਧਨ ਕੀਤਾ ਸੀ। ਉਨ੍ਹਾਂ ਕਿਹਾ ਕਿ ਵੱਡੇ ਕਾਰੋਬਾਰੀ ਅਪਣੀ ਸੁਰੱਖਿਆ ਨੂੰ ਲੈ ਕੇ ਚਿੰਤਤ ਹੋ ਕੇ ਸੂਬੇ ਤੋਂ ਭੱਜ ਗਏ ਹਨ। ਲਾਲੂ ਨੇ ਚਾਰਾ ਘਪਲੇ ’ਚ ਸ਼ਾਮਲ ਹੋਣ ਕਾਰਨ ਬਿਹਾਰ ਨੂੰ ਦੁਨੀਆਂ ਭਰ ’ਚ ਬਦਨਾਮ ਕਰ ਦਿਤਾ।
ਕੇਂਦਰੀ ਮੰਤਰੀ ਨੇ ਕਿਹਾ, ‘‘ਜਦੋਂ ਭਾਜਪਾ ਨੇ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਦੀ ਅਗਵਾਈ ਵਾਲੀ ਜਨਤਾ ਦਲ (ਯੂ) ਨਾਲ ਗਠਜੋੜ ਕਰ ਕੇ ਸੂਬੇ ’ਚ ਸਰਕਾਰ ਬਣਾਈ ਤਾਂ ਚੀਜ਼ਾਂ ’ਚ ਸੁਧਾਰ ਹੋਣਾ ਸ਼ੁਰੂ ਹੋਇਆ।’’ ਉਨ੍ਹਾਂ ਕਿਹਾ ਕਿ ਜੇਕਰ ਐਨ.ਡੀ.ਏ. ਇਸ ਸਾਲ ਦੇ ਅਖੀਰ ’ਚ ਸੱਤਾ ’ਚ ਆਉਂਦੀ ਹੈ ਤਾਂ ਬਿਹਾਰ ’ਚ ਦਹਾਕਿਆਂ ਪੁਰਾਣੀ ਸਾਲਾਨਾ ਹੜ੍ਹਾਂ ਦੀ ਸਮੱਸਿਆ ਬੀਤੇ ਸਮੇਂ ਦੀ ਗੱਲ ਹੋ ਜਾਵੇਗੀ।
ਭਾਜਪਾ ਦੇ ਸਾਬਕਾ ਪ੍ਰਧਾਨ ਨੇ ਕਿਹਾ ਕਿ ਬਿਹਾਰ ਦੇ ਲੋਕਾਂ ਕੋਲ ‘ਜੰਗਲ ਰਾਜ’ ਦੀ ਨੁਮਾਇੰਦਗੀ ਕਰਨ ਵਾਲੀ ਲਾਲੂ-ਰਾਬੜੀ ਜੋੜੀ ਅਤੇ ਮੋਦੀ ਅਤੇ ਨਿਤੀਸ਼ ਦੇ ਸ਼ਾਸਨ ਕਾਲ ’ਚ ਵਿਕਾਸ ’ਚੋਂ ਕਿਸੇ ਇਕ ਨੂੰ ਚੁਣਨਾ ਹੈ। ਉਨ੍ਹਾਂ ਕਿਹਾ, ‘‘ਮੈਨੂੰ ਉਮੀਦ ਹੈ ਕਿ ਤੁਸੀਂ ਸਾਰੇ ਇਸ ਸਾਲ ਦੇ ਅਖੀਰ ’ਚ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ’ਚ ਕਮਲ ਦਾ ਬਟਨ ਦਬਾਓਗੇ ਅਤੇ ਭਾਜਪਾ ਦੀ ਅਗਵਾਈ ਵਾਲੇ ਐਨ.ਡੀ.ਏ. ਨੂੰ ਵੋਟ ਦਿਓਗੇ। ਬਿਹਾਰ ਦੇ ਲੋਕਾਂ ਨੇ ਹਮੇਸ਼ਾ ਮੋਦੀ ਪ੍ਰਤੀ ਅਪਣਾ ਪਿਆਰ ਵਿਖਾਇਆ ਹੈ। ਮੈਨੂੰ ਯਕੀਨ ਹੈ ਕਿ ਤੁਸੀਂ ਉਸ ਦੇ ਹੱਥ ਹੋਰ ਮਜ਼ਬੂਤ ਕਰੋਗੇ।’’
ਸ਼ਾਹ ਨੇ ਕਥਿਤ ਭਾਈ-ਭਤੀਜਾਵਾਦ ਲਈ ਆਰ.ਜੇ.ਡੀ. ਸੁਪਰੀਮੋ ਦੀ ਆਲੋਚਨਾ ਕਰਦਿਆਂ ਉਨ੍ਹਾਂ ’ਤੇ ਅਪਣੀ ਪਤਨੀ ਨੂੰ ਮੁੱਖ ਮੰਤਰੀ ਬਣਾਉਣ, ਅਪਣੀ ਧੀ ਨੂੰ ਸੰਸਦ ਲਈ ਚੁਣਨ ਅਤੇ ਹੁਣ ਉਨ੍ਹਾਂ ਦੇ ਦੋਵੇਂ ਬੇਟੇ ਮੁੱਖ ਮੰਤਰੀ ਬਣਨਾ ਚਾਹੁੰਦੇ ਹਨ।
ਸ਼ਾਹ ਨੇ ਪ੍ਰਸਾਦ ਦੇ ਛੋਟੇ ਬੇਟੇ ਤੇ ਉੱਤਰਾਧਿਕਾਰੀ ਤੇਜਸਵੀ ਯਾਦਵ ਦਾ ਕੋਈ ਸਪੱਸ਼ਟ ਜ਼ਿਕਰ ਨਹੀਂ ਕੀਤਾ, ਜੋ ਭਾਜਪਾ ਦੀ ਤੇਜਸਵੀ ਨੂੰ ਬਹੁਤਾ ਤਵੱਜੋ ਨਾ ਦੇਣ ਦੀ ਰਣਨੀਤੀ ਦੇ ਅਨੁਸਾਰ ਹੈ। ਇਹ ਰਣਨੀਤੀ ਸੱਭ ਤੋਂ ਪਹਿਲਾਂ ਕੁੱਝ ਮਹੀਨੇ ਪਹਿਲਾਂ ਸੂਬੇ ਦੇ ਭਾਜਪਾ ਨੇਤਾਵਾਂ ਦੇ ਇਕ ਲੀਕ ਵੀਡੀਉ ਤੋਂ ਸਪੱਸ਼ਟ ਹੋਈ ਸੀ, ਜਿਸ ਵਿਚ ਉਹ ਸਿਰਫ ਲਾਲੂ ’ਤੇ ਹਮਲਾ ਕਰਨ ਦੀ ਜ਼ਰੂਰਤ ’ਤੇ ਚਰਚਾ ਕਰਦੇ ਨਜ਼ਰ ਆ ਰਹੇ ਸਨ, ਜੋ ਲੋਕ ਸਭਾ ਚੋਣਾਂ ਤਕ ਅਪਣਾਏ ਗਏ ਰੁਖ ਦੇ ਉਲਟ ਸੀ, ਜਿਸ ਵਿਚ ਪ੍ਰਧਾਨ ਮੰਤਰੀ ਨੇ ਵਾਰ-ਵਾਰ ‘ਜੰਗਲ ਰਾਜ ਦੇ ਯੁਵਰਾਜ’ (ਜੰਗਲ ਰਾਜ ਦੇ ਰਾਜਕੁਮਾਰ) ਦਾ ਮਜ਼ਾਕ ਉਡਾਇਆ ਸੀ।
ਹੁਣ ਭਾਜਪਾ ਨਾਲੋਂ ਕਦੇ ਨਾਤਾ ਨਹੀਂ ਤੋੜਾਂਗਾ : ਨਿਤੀਸ਼ ਨੇ ਸ਼ਾਹ ਨੂੰ ਦਿਵਾਇਆ ਯਕੀਨ
ਪਟਨਾ : ਬਿਹਾਰ ਦੇ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਨੇ ਐਤਵਾਰ ਨੂੰ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੂੰ ਭਰੋਸਾ ਦਿਤਾ ਕਿ ਉਹ ਹੁਣ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਦਾ ਸਾਥ ਕਦੇ ਨਹੀਂ ਛੱਡਣਗੇ। ਵਿਧਾਨ ਸਭਾ ਚੋਣਾਂ ’ਚ ਕੁੱਝ ਹੀ ਮਹੀਨੇ ਬਾਕੀ ਹਨ ਅਤੇ ਪਟਨਾ ’ਚ ਇਕ ਸਮਾਰੋਹ ’ਚ ਜਨਤਾ ਦਲ (ਯੂ) ਪ੍ਰਧਾਨ ਨੇ ਕਿਹਾ ਕਿ ਸ਼ਾਹ ਅਤੇ ਉਨ੍ਹਾਂ ਨੇ ਕੇਂਦਰ ਅਤੇ ਰਾਜ ਦੇ ਕਈ ਪ੍ਰਾਜੈਕਟਾਂ ਦਾ ਉਦਘਾਟਨ ਕੀਤਾ। ਗੋਪਾਲਗੰਜ ’ਚ ਰੈਲੀ ਤੋਂ ਪਹਿਲਾਂ ਪਟਨਾ ’ਚ ਇਕ ਸਮਾਰੋਹ ਹੋਇਆ, ਜਦੋਂ ਸ਼ਾਹ ਨੇ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਨਾਲ 8,000 ਕਰੋੜ ਰੁਪਏ ਤੋਂ ਵੱਧ ਦੇ ਕੇਂਦਰੀ ਅਤੇ ਰਾਜ ਪ੍ਰੋਜੈਕਟਾਂ ਦੀ ਸ਼ੁਰੂਆਤ ਕੀਤੀ। ਭਾਜਪਾ ਦੇ ਸਾਬਕਾ ਪ੍ਰਧਾਨ ਸ਼ਾਹ ਨੇ ਸਨਿਚਰਵਾਰ ਦੇਰ ਰਾਤ ਵਰਕਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਸੀ ਕਿ ਬਿਹਾਰ ’ਚ ਸਾਡੀ ਜਿੱਤ ਦੂਰ-ਦੂਰ ਤਕ ਗੂੰਜੇਗੀ।
ਸਮਾਰੋਹ ’ਚ ਔਰਤ ਦੇ ਮੋਢਿਆਂ ’ਤੇ ਬਾਂਹ ਰੱਖਣ ਲਈ ਆਰ.ਜੇ.ਡੀ. ਨੇ ਨਿਤੀਸ਼ ਦੀ ਆਲੋਚਨਾ ਕੀਤੀ
ਪਟਨਾ : ਬਿਹਾਰ ਦੇ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਨੂੰ ਐਤਵਾਰ ਨੂੰ ਇਕ ਜਨਤਕ ਸਮਾਰੋਹ ’ਚ ਇਕ ਔਰਤ ਦੇ ਮੋਢਿਆਂ ’ਤੇ ਬਾਂਹ ਰੱਖਣ ’ਤੇ ਰਾਸ਼ਟਰੀ ਜਨਤਾ ਦਲ (ਆਰ.ਜੇ.ਡੀ.) ਨੇ ਆਲੋਚਨਾ ਕੀਤੀ। ਵਿਰੋਧੀ ਪਾਰਟੀ ਨੇ ਸ਼ਹਿਰ ਦੇ ਵਿਸ਼ਾਲ ਬਾਪੂ ਸਭਾਗਰ ਆਡੀਟੋਰੀਅਮ ’ਚ ਪ੍ਰੋਗਰਾਮ ਦੀ ਇਕ ਵੀਡੀਉ ਕਲਿੱਪ ਸਾਂਝੀ ਕੀਤੀ ਜਿੱਥੇ ਦੋਹਾਂ ਨੇਤਾਵਾਂ ਨੇ 800 ਕਰੋੜ ਰੁਪਏ ਤੋਂ ਵੱਧ ਦੇ ਕੇਂਦਰੀ ਅਤੇ ਸੂਬਾ ਪ੍ਰਾਜੈਕਟਾਂ ਦੀ ਸ਼ੁਰੂਆਤ ਕੀਤੀ।
ਸ਼ਾਹ ਨੇ ਕੇਂਦਰੀ ਸਹਿਕਾਰਤਾ ਮੰਤਰਾਲੇ ਅਧੀਨ ਆਉਣ ਵਾਲੀਆਂ ਯੋਜਨਾਵਾਂ ਦੇ ਲਾਭਪਾਤਰੀਆਂ ਨੂੰ ‘ਡੰਮੀ ਚੈੱਕ‘ ਵੀ ਦਿਤੇ। ਅਜਿਹੀ ਹੀ ਇਕ ਪ੍ਰਾਪਤਕਰਤਾ, ਇਕ ਅੱਧਖੜ ਉਮਰ ਦੀ ਪੇਂਡੂ ਔਰਤ, ਸਪੱਸ਼ਟ ਤੌਰ ’ਤੇ ਇਹ ਸਮਝਣ ’ਚ ਅਸਫਲ ਰਹੀ ਕਿ ਸ਼ਾਹ ਉਸ ਨੂੰ ਫੋਟੋ ਖਿੱਚਣ ਦੀ ਬੇਨਤੀ ਕਰ ਰਹੇ ਸਨ।
ਇਸ ਮੌਕੇ 74 ਸਾਲ ਦੇ ਮੁੱਖ ਮੰਤਰੀ ਨੇ ਉਨ੍ਹਾਂ ਦੀ ਬਾਂਹ ਫੜੀ ਅਤੇ ਉਨ੍ਹਾਂ ਨੂੰ ਪੱਤਰਕਾਰਾਂ ਅਤੇ ਫੋਟੋਗ੍ਰਾਫਰਾਂ ਵਲ ਜ਼ਬਰਦਸਤੀ ਮੋੜ ਦਿਤਾ। ਆਰ.ਜੇ.ਡੀ. ਨੇ ਅਪਣੇ ‘ਐਕਸ’ ਹੈਂਡਲ ’ਤੇ ਹਿੰਦੀ ’ਚ ਲਿਖਿਆ, ‘‘ਦੇਖੋ ਕਿ ਕਿਵੇਂ ਮੁੱਖ ਮੰਤਰੀ ਨਿਤੀਸ਼ ਕੁਮਾਰ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦੇ ਨਾਲ ਇਤਰਾਜ਼ਯੋਗ ਤਰੀਕੇ ਨਾਲ ਇਕ ਔਰਤ ਨੂੰ ਅਪਣੇ ਵਲ ਖਿੱਚ ਰਹੇ ਹਨ।’’
ਵਿਰੋਧੀ ਪਾਰਟੀ ਨੇ ਦੋਸ਼ ਲਾਇਆ ਕਿ ਬਿਹਾਰ ਨੂੰ ‘ਬਿਮਾਰ’ ਮੁੱਖ ਮੰਤਰੀ ਸ਼ਰਮਿੰਦਾ ਕਰ ਰਹੇ ਹਨ, ਅਤੇ ਭਾਜਪਾ ਬੇਵੱਸ ਹੈ। ਜਨਤਾ ਦਲ (ਯੂ) ਸੁਪਰੀਮੋ ਦੀ ਸ਼ੈਲੀ ਦੀ ਨਕਲ ਕਰਦੇ ਹੋਏ ਆਰ.ਜੇ.ਡੀ. ਨੇ ਕਿਹਾ, ‘‘ਕੀ 2005 ਤੋਂ ਪਹਿਲਾਂ ਕਿਸੇ ਮੁੱਖ ਮੰਤਰੀ ਨੇ ਅਜਿਹਾ ਕੰਮ ਕੀਤਾ ਸੀ? ਇਹ ਮੇਰੇ ਸੱਤਾ ’ਚ ਆਉਣ ਤੋਂ ਬਾਅਦ ਹੀ ਹੋਇਆ।’’
