ਫ਼ਰੀਦਾਬਾਦ ਜ਼ਿਲ੍ਹੇ ’ਚ ਸਥਿਤ ਨੀਮਕਾ ਜੇਲ੍ਹ ’ਚ ਬੰਦ ਹੈ ਬਿੱਟੂ ਬਜਰੰਗੀ
ਗੁਰੂਗ੍ਰਾਮ/ਨੂਹ: ਇਸ ਮਹੀਨੇ ਦੀ ਸ਼ੁਰੂਆਤ ’ਚ ਨੂਹ ’ਚ ਹੋਈਆਂ ਫ਼?ਰਕੂ ਝੜਪਾਂ ਦੇ ਸਿਲਸਿਲੇ ’ਚ ਗ੍ਰਿਫ਼ਤਾਰ ਕੀਤੇ ਕਥਿਤ ਗਊਰਕਸ਼ਕ ਬਿੱਟੂ ਬਜਰੰਗੀ ਨੂੰ ਬੁਧਵਾਰ ਨੂੰ ਇਕ ਅਦਾਲਤ ਨੇ ਜ਼ਮਾਨਤ ਦੇ ਦਿਤੀ। ਪੁਲਿਸ ਨੇ ਇਹ ਜਾਣਕਾਰੀ ਦਿਤੀ।
ਬਜਰੰਗੀ ਨੂੰ 17 ਅਗੱਸਤ ਨੂੰ ਨੂਹ ਦੀ ਅਦਾਲਤ ’ਚ ਪੇਸ਼ ਕੀਤਾ ਗਿਆ ਜਿਸ ਤੋਂ ਬਾਅਦ ਉਸ ਨੂੰ 14 ਦਿਨਾਂ ਦੀ ਨਿਆਂਇਕ ਹਿਰਾਸਤ ’ਚ ਭੇਜਿਆ ਗਿਆ ਸੀ। ਉਹ ਫ਼ਰੀਦਾਬਾਦ ਜ਼ਿਲ੍ਹੇ ’ਚ ਸਥਿਤ ਨੀਮਕਾ ਜੇਲ੍ਹ ’ਚ ਬੰਦ ਹੈ।
ਨੂਹ ਪੁਲਿਸ ਨੇ ਕਿਹਾ ਕਿ ਬੁਧਵਾਰ ਨੂੰ ਬਜਰੰਗੀ ਦੀ ਜ਼ਮਾਨਤ ਅਰਜ਼ੀ ’ਤੇ ਸੁਣਵਾਈ ਮਗਰੋਂ ਜੁਡੀਸ਼ੀਅਲ ਮੈਜਿਸਟ?ਰੇਟ (ਫ਼ਰਸਟ ਕਲਾਸ) ਸੰਦੀਪ ਕੁਮਾਰ ਦੀ ਅਦਾਲਤ ਨੇ ਉਸ ਨੂੰ ਜ਼ਮਾਨਤ ਦੇ ਦਿਤੀ।
ਬਿੱਟੂ ਬਜਰੰਗੀ ਉਰਫ਼ ਰਾਜ ਕੁਮਾਰ ਨੂੰ ਸਹਾਇਕ ਪੁਲਿਸ ਸੂਪਰਡੈਂਟ ਊਸ਼ਾ ਕੁੰਡੂ ਦੀ ਸ਼ਿਕਾਇਤ ’ਤੇ ਨੂਹ ਸਦਰ ਥਾਣੇ ’ਚ ਐਫ਼.ਆਈ.ਆਰ. ਦਰਜ ਹੋਣ ਮਗਰੋਂ ਫ਼ਰੀਦਾਬਾਦ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ ਸੀ।
ਐਫ.ਆਈ.ਆਰ. ਅਨੁਸਾਰ, ਸੋਸ਼ਲ ਮੀਡੀਆ ਪੋਸਟਾਂ ਰਾਹੀਂ ਪਛਾਣੇ ਗਏ ਬਜਰੰਗੀ ਨੇ ਅਪਣੇ ਕੁਝ ਅਣਪਛਾਤੇ ਸਮਰਥਕਾਂ ਨਾਲ ਕਥਿਤ ਤੌਰ ’ਤੇ ਏ.ਐਸ.ਪੀ. ਕੁੰਡੂ ਦੀ ਅਗਵਾਈ ਵਾਲੀ ਪੁਲਿਸ ਟੀਮ ਨਾਲ ਦੁਰਵਿਵਹਾਰ ਕੀਤਾ ਅਤੇ ਧਮਕੀ ਦਿਤੀ ਸੀ। ਕੁੰਡੂ ਨੇ ਉਸ ਨੂੰ ਤਲਵਾਰ ਅਤੇ ‘ਤ੍ਰਿਸ਼ੂਲ’ ਲੈ ਕੇ ਨਲਹਨ ਮੰਦਰ ਜਾਣ ਤੋਂ ਰੋਕਿਆ ਸੀ।
ਕੁੰਡੂ ਨੇ ਦਸਿਆ ਕਿ ਜਦੋਂ ਭੀੜ ਨੂੰ ਰੁਕਣ ਲਈ ਕਿਹਾ ਗਿਆ ਤਾਂ ਉਨ੍ਹਾਂ ਨੇ ਪੁਲਿਸ ਵਿਰੁਧ ਨਾਅਰੇਬਾਜ਼ੀ ਸ਼ੁਰੂ ਕਰ ਦਿਤੀ, ਉਨ੍ਹਾਂ ਨਾਲ ਹੱਥੋਪਾਈ ਕੀਤੀ ਅਤੇ ਪੁਲਿਸ ਦੀਆਂ ਗੱਡੀਆਂ ’ਚ ਰੱਖੇ ਹਥਿਆਰ ਵੀ ਖੋਹ ਲਏ।
ਪੁਲਿਸ ਨੇ ਦਸਿਆ ਕਿ ਗਊਰਕਸ਼ਕ ਬਜਰੰਗ ਫੋਰਸ ਦੇ ਪ੍ਰਧਾਨ ਬਜਰੰਗੀ ਨੂੰ ਪਹਿਲਾਂ ਤਵਾਡੂ ਤੋਂ ਅਪਰਾਧ ਜਾਂਚ ਏਜੰਸੀ ਦੀ ਟੀਮ ਨੇ ਪੁੱਛ-ਪੜਤਾਲ ਲਈ ਹਿਰਾਸਤ ’ਚ ਲਿਆ ਸੀ।
31 ਜੁਲਾਈ ਨੂੰ ਨੂਹ ’ਚ ਫਿਰਕੂ ਝੜਪਾਂ ਤੋਂ ਇਕ ਦਿਨ ਬਾਅਦ, 1 ਅਗੱਸਤ ਨੂੰ ਬਜਰੰਗੀ ਨੂੰ ਫਰੀਦਾਬਾਦ ਪੁਲਿਸ ਨੇ ਕਥਿਤ ਤੌਰ ’ਤੇ ਭੜਕਾਊ ਭਾਸ਼ਣ ਦੇਣ ਅਤੇ ਜਨਤਕ ਤੌਰ ’ਤੇ ਹਥਿਆਰਾਂ ਦੀ ਲਹਿਰਾਉਣ ਦੇ ਦੋਸ਼ ’ਚ ਗ੍ਰਿਫਤਾਰ ਕੀਤਾ ਸੀ।
ਪੁਲਿਸ ਨੇ ਦਸਿਆ ਕਿ ਨੂਹ ’ਚ ਹੋਈ ਹਿੰਸਾ ਦੇ ਸਬੰਧ ’ਚ ਹੁਣ ਤਕ 60 ਐਫ.ਆਈ.ਆਰ. ਦਰਜ ਕੀਤੀਆਂ ਗਈਆਂ ਹਨ ਅਤੇ 305 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ ਸੋਸ਼ਲ ਮੀਡੀਆ ’ਤੇ ਅਫਵਾਹਾਂ ਫੈਲਾਉਣ ਦੇ ਦੋਸ਼ ’ਚ 11 ਲੋਕਾਂ ਵਿਰੁਧ ਮਾਮਲਾ ਦਰਜ ਕੀਤਾ ਗਿਆ ਹੈ ਅਤੇ ਉਨ੍ਹਾਂ ’ਚੋਂ ਇਕ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ।
ਵਿਸ਼ਵ ਹਿੰਦੂ ਪ੍ਰੀਸ਼ਦ (ਵੀ.ਐਚ.ਪੀ.) ਨੇ ਇਕ ਬਿਆਨ ਜਾਰੀ ਕਰ ਕੇ ਸਪੱਸ਼ਟ ਕੀਤਾ ਕਿ ਬਜਰੰਗੀ ਦਾ ਅਪਣੇ ਯੂਥ ਵਿੰਗ ਬਜਰੰਗ ਦਲ ਜਾਂ ਵੀ.ਐਚ.ਪੀ. ਨਾਲ ਸਬੰਧਤ ਹੋਰ ਸੰਗਠਨਾਂ ਨਾਲ ‘ਕਦੇ ਵੀ ਕੋਈ ਸਬੰਧ’ ਨਹੀਂ ਸੀ।
