ਭੁਜ (ਗੁਜਰਾਤ), 27 ਨਵੰਬਰ: ਗੁਜਰਾਤ 'ਚ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਦੀ ਚੋਣ ਮੁਹਿੰਮ ਨੂੰ ਤੇਜ਼ ਕਰਦਿਆਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਅੱਜ ਕਾਂਗਰਸ ਮੀਤ ਪ੍ਰਧਾਨ ਰਾਹੁਲ ਗਾਂਧੀ ਨੂੰ ਸਵਾਲ ਕੀਤਾ ਕਿ ਕਿਉਂ ਉਨ੍ਹਾਂ ਦੀ ਪਾਰਟੀ ਨੇ ਪਾਕਿਸਤਾਨ 'ਚ ਇਕ ਅਤਿਵਾਦੀ ਦੀ ਰਿਹਾਈ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਕਿਹਾ ਕਿ ਉਹ ਚਾਹ ਤਾਂ ਵੇਚਣ ਲਈ ਤਿਆਰ ਹਨ ਪਰ ਅਪਣਾ ਦੇਸ਼ ਕਦੇ ਨਹੀਂ ਵੇਚਣਗੇ। ਇਸ ਦੇ ਨਾਲ ਹੀ ਉਨ੍ਹਾਂ ਇਹ ਵੀ ਸਵਾਲ ਕੀਤਾ ਕਿ ਡੋਕਲਾਮ ਰੇੜਕੇ ਦੌਰਾਨ ਉਹ ਚੀਨੀ ਰਾਜਦੂਤ ਨੂੰ ਜੱਫ਼ੀਆਂ ਕਿਉਂ ਪਾਈਆਂ ਸਨ?ਪ੍ਰਧਾਨ ਮੰਤਰੀ ਨੇ ਕੱਛ ਜ਼ਿਲ੍ਹੇ ਦੇ ਭੁਜ 'ਚ ਅੱਜ ਇਕ ਰੈਲੀ ਨਾਲ ਅਪਣੀ ਚੋਣ ਮੁਹਿੰਮ ਦੀ ਸ਼ੁਰੂਆਤ ਕੀਤੀ ਅਤੇ ਕਾਂਗਰਸ ਪਾਰਟੀ ਉਤੇ ਤਿੱਖਾ ਹਮਲਾ ਕੀਤਾ। ਉਨ੍ਹਾਂ ਕਿਹਾ, ''ਤੁਸੀ ਚੀਨੀ ਰਾਜਦੂਤ ਨਾਲ ਗਲੇ ਮਿਲ ਕੇ ਖ਼ੁਸ਼ ਹੋ। ਤੁਸੀ ਹਾਫ਼ਿਜ਼ ਸਈਦ ਦੀ ਰਿਹਾਈ ਉਤੇ ਤਾੜੀਆਂ ਵਜਾ ਰਹੇ ਹੋ। ਤੁਸੀ ਭਾਰਤੀ ਫ਼ੌਜ ਦੀ ਸਰਜੀਕਲ ਸਟਰਾਈਕ ਦਾ ਮਾਣ ਨਹੀਂ ਕਰ ਸਕਦੇ ਪਰ ਤੁਸੀ ਇਸ ਬਾਰੇ ਗੱਲ ਹੀ ਕਿਉਂ ਕੀਤੀ? ਤੁਸੀ ਚੁੱਪ ਰਹਿ ਸਕਦੇ ਸੀ।''

ਜ਼ਿਕਰਯੋਗ ਹੈ ਕਿ ਰਾਹੁਲ ਗਾਂਧੀ ਨੇ ਪਿੱਛੇ ਜਿਹੇ ਹੀ ਟਵੀਟ ਕਰ ਕੇ ਕਿਹਾ ਸੀ ਕਿ 'ਨਰਿੰਦਰ ਭਾਈ ਗੱਲ ਨਹੀਂ ਬਣੀ। ਅਤਿਵਾਦੀ ਹਮਲੇ ਦਾ ਸਾਜ਼ਸ਼ਕਰਤਾ ਛੁੱਟ ਗਿਆ ਹੈ।' ਮੁੰਬਈ ਹਮਲੇ ਦੇ ਸਾਜ਼ਸ਼ਕਰਤਾ ਸਈਦ ਨੂੰ ਪਾਕਿਸਤਾਨ ਦੀ ਇਕ ਅਦਾਲਤ ਵਲੋਂ ਛੱਡੇ ਜਾਣ ਮਗਰੋਂ ਰਾਹੁਲ ਨੇ ਇਹ ਟਵੀਟ ਕੀਤਾ ਸੀ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਉਨ੍ਹਾਂ ਦੇ ਜੱਦੀ ਸੂਬੇ 'ਚ ਵਿਕਾਸ ਉਤੇ ਵਿਸ਼ਵਾਸ ਅਤੇ ਵੰਸ਼ਵਾਦ ਦੀ ਸਿਆਸਤ ਵਿਚਕਾਰ ਮੁਕਾਬਲਾ ਹੈ। ਪ੍ਰਧਾਨ ਮੰਤਰੀ 9 ਦਸੰਬਰ ਨੂੰ ਹੋਣ ਵਾਲੀਆਂ ਪਹਿਲੇ ਗੇੜ ਦੀਆਂ ਚੋਣਾਂ ਤੋਂ ਪਹਿਲਾਂ ਭੁਜ 'ਚ ਇਕ ਚੋਣ ਰੈਲੀ ਨੂੰ ਸੰਬੋਧਨ ਕਰ ਰਹੇ ਸਨ। ਉਨ੍ਹਾਂ ਰਾਹੁਲ ਸਮੇਤ ਕਾਂਗਰਸ ਦੇ ਵੱਖੋ-ਵੱਖ ਆਗੂਆਂ ਦੇ ਦੋਸ਼ਾਂ ਦਾ ਵੀ ਜ਼ਿਕਰ ਕੀਤਾ। ਉਨ੍ਹਾਂ ਕਿਹਾ ਕਿ ਗੁਜਰਾਤ ਦੇ ਇਸ ਪੁੱਤਰ ਦੇ ਜਨਤਕ ਜੀਵਲ ਉਤੇ ਕੋਈ ਦਾਗ਼ ਨਹੀਂ ਹੈ। ਉਨ੍ਹਾਂ ਕਿਹਾ, ''ਤੁਸੀ ਗੁਜਰਾਤ ਆਉਂਦੇ ਹੋ ਅਤੇ ਗੁਜਰਾਤ ਦੇ ਪੁੱਤਰ ਬਾਰੇ ਬੇਬੁਨਿਆਦ ਦੋਸ਼ ਲਾਉਂਦੇ ਹੋ। ਸੂਬੇ ਦੇ ਲੋਕ ਤੁਹਾਨੂੰ ਮਾਫ਼ ਨਹੀਂ ਕਰਨਗੇ।'' ਗੁਜਰਾਤ 'ਚ ਦੋ ਗੇੜਾਂ 'ਚ 9 ਅਤੇ 14 ਦਸੰਬਰ ਨੂੰ ਵੋਟਾਂ ਪੈਣ ਵਾਲੀਆਂ ਹਨ ਅਤੇ ਵੋਟਾਂ ਦੀ ਗਿਣਤੀ 18 ਦਸੰਬਰ ਨੂੰ ਹੋਵੇਗੀ। ਸੂਬੇ 'ਚ ਵਿਧਾਨ ਸਭਾ ਦੀਆਂ ਕੁਲ 182 ਸੀਟਾਂ ਹਨ।  (ਪੀਟੀਆਈ)