ਇੰਦੌਰ, 29 ਅਗੱਸਤ: ਸੌਦਾ ਸਾਧ ਨੂੰ ਬਲਾਤਕਾਰ ਦੇ ਦੋ ਮਾਮਲਿਆਂ ਵਿਚ 20 ਸਾਲ ਜੇਲ ਦੀ ਸਜ਼ਾ ਸੁਣਾਏ ਜਾਣ ਮਗਰੋਂ ਯੋਗ ਮਾਹਰ ਤੇ ਉਦਯੋਗਪਤੀ ਰਾਮਦੇਵ ਨੇ ਕਿਹਾ ਹੈ ਕਿ ਦੇਸ਼ 'ਚ 'ਧਰਮ ਸੱਤਾ' ਦੇ ਨਾਲ-ਨਾਲ 'ਰਾਜ ਸੱਤਾ' ਨੂੰ ਵੀ ਸ਼ੁੱਧ ਕਰਨ ਦੀ ਬਹੁਤ ਵੱਡੀ ਜ਼ਰੂਰਤ ਹੈ।
ਨਿਜੀ ਪ੍ਰੋਗਰਾਮ 'ਚ ਰਾਮਦੇਵ ਨੇ ਪੱਤਰਕਾਰਾਂ ਨੂੰ ਕਿਹਾ, 'ਪਿਛਲੇ ਕੁੱਝ ਸਾਲਾਂ ਦੌਰਾਨ ਦੇਸ਼ 'ਚ ਧਰਮ ਸੱਤਾ ਅਤੇ ਰਾਜ ਸੱਤਾ 'ਤੇ ਜਿਸ ਤਰ੍ਹਾਂ ਕਲੰਕ ਲੱਗੇ ਹਨ, ਉਨ੍ਹਾਂ ਨੂੰ ਵੇਖਦਿਆਂ ਦੋਹਾਂ ਦੇ ਸ਼ੁੱਧੀਕਰਨ ਦੀ ਬਹੁਤ ਵੱਡੀ ਲੋੜ ਹੈ ਖ਼ਾਸਕਰ ਧਰਮ ਸੱਤਾ ਦੇ ਸਾਰੇ ਲੋਕਾਂ ਨੂੰ ਉਸ ਮਰਿਯਾਦਾ ਦਾ ਪਾਲਣ ਕਰਨਾ ਚਾਹੀਦਾ ਹੈ ਜੋ ਸਾਡੇ ਰਿਸ਼ੀਆਂ-ਮੁਨੀਆਂ ਨੇ ਸਦੀਆਂ ਪਹਿਲਾਂ ਤੈਅ ਕਰ ਦਿਤੀ ਸੀ।'
ਗੁਰਮੀਤ ਰਾਮ ਰਹੀਮ ਨੂੰ ਜਿਸਮਾਨੀ ਸ਼ੋਸ਼ਣ ਮਾਮਲੇ 'ਚ ਦੋਸ਼ੀ ਕਰਾਰ ਦੇ ਕੇ ਜੇਲ ਭੇਜੇ ਜਾਣ ਤੋਂ ਬਾਅਦ ਧਾਰਮਕ-ਅਧਿਆਤਮਕ ਗੁਰੂਆਂ ਦੀ ਜਮਾਤ 'ਤੇ ਉਠਾਏ ਜਾ ਰਹੇ ਤਿੱਖੇ ਸਵਾਲਾਂ ਦੇ ਜ਼ਿਕਰ ਬਾਰੇ ਰਾਮਦੇਵ ਨੇ ਸੰਤ ਸਮਾਜ ਦਾ ਬਚਾਅ ਕੀਤਾ। ਉਨ੍ਹਾਂ ਕਿਹਾ, 'ਸੰਤਾਂ ਦੇ ਕਿਸੇ ਖ਼ਾਸ ਸਮੂਹ ਨੂੰ ਨਿਸ਼ਾਨਾ ਨਹੀਂ ਬਣਾਇਆ ਜਾਣਾ ਚਾਹੀਦਾ। ਦੇਸ਼ 'ਚ ਅੱਜ ਵੀ ਅਜਿਹੇ ਲੱਖਾਂ ਸੰਤ ਹਨ ਜੋ ਸੱਚਾ-ਸੁੱਚਾ ਅਤੇ ਪਵਿੱਤਰ ਜੀਵਨ ਜੀਅ ਰਹੇ ਹਨ ਅਤੇ ਆਮ ਲੋਕਾਂ ਦੀ ਸੇਵਾ ਸਾਧਨਾ ਕਰ ਰਹੇ ਹਨ।' ਉਨ੍ਹਾਂ ਡੇਰਾ ਪ੍ਰਮੁੱਖ ਵਲ ਸਿੱਧਾ ਇਸ਼ਾਰਾ ਕਰਦਿਆਂ ਕਿਹਾ ਕਿ ਜੇ ਸਾਧੂ ਜਾਂ ਫ਼ਕੀਰ ਦੇ ਭੇਸ ਵਿਚ ਰਹਿਣ ਵਾਲਾ ਕੋਈ ਇਕ ਵਿਅਕਤੀ ਗ਼ਲਤੀ ਕਰਦਾ ਹੈ ਤਾਂ ਇਸ ਕਾਰਨ ਪੂਰੇ ਸੰਤ ਭਾਈਚਾਰੇ ਨੂੰ ਅਪਰਾਧੀ ਮੰਨ ਲੈਣਾ ਗ਼ਲਤ ਹੈ।
ਬੀਤੇ ਸਾਲਾਂ ਦੌਰਾਨ ਜਿਸਮਾਨੀ ਸ਼ੋਸ਼ਣ ਮਾਮਲਿਆਂ ਵਿਚ ਵੱਖ-ਵੱਖ ਧਾਰਮਕ ਗੁਰੂਆਂ ਦੇ ਨਾਮ ਸਾਹਮਣੇ ਆਉਣ ਸਬੰਧੀ ਸਵਾਲ ਪੁੱਛੇ ਜਾਣ 'ਤੇ ਰਾਮਦੇਵ ਨੇ ਕਿਹਾ ਕਿ ਇਹ ਸੱਚ ਹੈ ਕਿ ਹਰ ਦੋ-ਤਿੰਨ ਸਾਲ ਵਿਚ ਜਿਸ ਤਰ੍ਹਾਂ ਦੀਆਂ ਘਟਨਾਵਾਂ ਸਾਹਮਣੇ ਆ ਰਹੀਆਂ ਹਨ, ਉਸ ਨਾਲ ਉਨ੍ਹਾਂ ਨੂੰ ਬਹੁਤ ਸ਼ਰਮਿੰਦਗੀ ਝਲਣੀ ਪੈ ਰਹੀ ਹੈ।