ਨਵੀਂ ਦਿੱਲੀ, 4 ਜਨਵਰੀ: ਦਿੱਲੀ ਦੀ ਇਕ ਅਦਾਲਤ ਨੇ ਅੱਜ ਫੇਰਾ ਉਲੰਘਣਾ ਮਾਮਲੇ 'ਚ ਸੰਮਨ ਦੀ ਵਾਰ ਵਾਰ ਅਣਦੇਖੀ ਕਰਨ ਤੇ ਮੁਸ਼ਕਿਲਾਂ 'ਚ ਘਿਰੇ ਕਾਰੋਬਾਰੀ ਵਿਜੈ ਮਾਲਿਆ ਨੂੰ ਭਗੌੜਾ ਅਪਰਾਧੀ ਐਲਾਨ ਦਿਤਾ ਹੈ। ਮੁੱਖ ਮੈਟਰੋਪਾਲੀਟਨ ਮੈਜਿਸਟ੍ਰੇਟ ਦੀਪਕ ਸਹਿਰਾਵਤ ਨੇ ਇਹ ਹੁਕਮ ਜਾਰੀ ਕੀਤਾ। ਵਾਰ ਵਾਰ ਸੰਮਨ ਦੇ ਬਾਵਜੂਦ ਮਾਲਿਆ ਦੇ ਪੇਸ਼ ਹੋਣ 'ਚ ਅਸਫ਼ਲ ਰਹਿਣ ਤੇ ਅਦਾਲਤ ਨੇ ਇਹ ਹੁਕਮ ਦਿਤਾ। ਅਦਾਲਤ ਨੇ ਕਿਹਾ, ''ਵਿਜੈ ਮਾਲਿਆ ਇਸ ਅਦਾਲਤ ਦੇ ਸਾਹਮਣੇ 30 ਦਿਨਾਂ ਅੰਦਰ ਪੇਸ਼ ਨਹੀਂ ਹੋਏ ਅਤੇ ਉਨ੍ਹਾਂ ਵਲੋਂ ਕੋਈ ਬਿਨੈ ਵੀ ਨਹੀਂ ਦਿਤਾ ਗਿਆ। ਅਜਿਹੇ 'ਚ ਉਨ੍ਹਾਂ ਨੂੰ ਭਗੌੜਾ ਐਲਾਨ ਕੀਤਾ ਜਾਂਦਾ ਹੈ।''
ਅਦਾਲਤ ਨੇ ਪਿਛਲੇ ਸਾਲ 12 ਅਪ੍ਰੈਲ ਨੂੰ ਸ਼ਰਾਬ ਕਾਰੋਬਾਰੀ ਵਿਰੁਧ ਗ਼ੈਰਜ਼ਮਾਨਤੀ ਵਾਰੰਟ ਜਾਰੀ ਕੀਤਾ ਸੀ ਜਿਸ 'ਤੇ ਅਮਲ ਲਈ ਕੋਈ ਮਿਤੀ ਤੈਅ ਨਹੀਂ ਕੀਤੀ ਸੀ। ਮਾਲਿਆ ਵਿਰੁਧ 4 ਨਵੰਬਰ, 2016 ਨੂੰ ਗ਼ੈਰਜ਼ਮਾਨਤੀ ਵਾਰੰਟ ਜਾਰੀ ਕਰਦਿਆਂ ਅਦਾਲਤ ਨੇ ਕਿਹਾ ਸੀ ਕਿ ਉਸ ਦੀ ਪਰਤਣ ਦੀ ਕੋਈ ਇੱਛਾ ਨਹੀਂ ਹੈ ਅਤੇ ਦੇਸ਼ ਦੇ ਕਾਨੂੰਨ ਪ੍ਰਤੀ ਬਿਲਕੁਲ ਵੀ ਸਤਿਕਾਰ ਨਹੀਂ ਹੈ। ਅਦਾਲਤ ਨੇ ਕਿਹਾ ਕਿ ਮਾਲਿਆ ਵਿਰੁਧ ਸਖ਼ਤ ਪ੍ਰਕਿਰਿਆ ਅਪਣਾਈ ਜਾਣੀ ਚਾਹੀਦੀ ਹੈ ਕਿਉਂਕਿ ਉਸ ਵਿਰੁਧ ਕਈ ਮਾਮਲੇ ਚਲ ਰਹੇ ਹਨ ਅਤੇ ਉਹ ਉਨ੍ਹਾਂ ਮਾਮਲਿਆਂ 'ਚ ਪੇਸ਼ੀ ਤੋਂ ਬੱਚ ਰਿਹਾ ਹੈ। (ਪੀਟੀਆਈ)