ਸ੍ਰੀਨਗਰ, 6 ਫ਼ਰਵਰੀ : ਅਤਿਵਾਦੀ ਜਥੇਬੰਦੀ ਲਸ਼ਕਰ-ਏ-ਤੋਇਬਾ ਦੇ ਦਹਿਸ਼ਤਗਰਦ ਸਖ਼ਤ ਸੁਰੱਖਿਆ ਵਾਲੇ ਹਸਪਤਾਲ ਵਿਚ ਦਿਨ-ਦਿਹਾੜੇ ਹਮਲਾ ਕਰ ਕੇ ਪਾਕਿਸਤਾਨੀ ਕੈਦੀ ਨੂੰ ਛੁਡਾ ਲੈ ਗਏ। ਇਸ ਦੌਰਾਨ ਹੋਈ ਗੋਲੀਬਾਰੀ ਵਿਚ ਦੋ ਪੁਲਿਸ ਮੁਲਾਜ਼ਮ ਸ਼ਹੀਦ ਹੋ ਗਏ। ਪੁਲਿਸ ਅਧਿਕਾਰੀਆਂ ਨੇ ਦਸਿਆ ਕਿ ਹਮਲੇ ਮਗਰੋਂ ਅਤਿਵਾਦੀ ਸ੍ਰੀਨਗਰ ਦੇ ਭੀੜ ਵਾਲੇ ਇਲਾਕੇ ਦੀਆਂ ਗਲੀਆਂ ਵਿਚੋਂ ਫ਼ਰਾਰ ਹੋ ਗਏ। ਹਮਲੇ ਦੌਰਾਨ 2014 ਵਿਚ ਦਖਣੀ ਕਸ਼ਮੀਰ ਦੇ ਕੁਲਗਾਮ ਤੋਂ ਫੜਿਆ ਗਿਆ ਪਾਕਿਸਤਾਨੀ ਅਤਿਵਾਦੀ ਮੁਹੰਮਦ ਨਵੀਦ ਹਮਲਾਵਰਾਂ ਨਾਲ ਫ਼ਰਾਰ ਹੋ ਗਿਆ। ਉਹ ਲਸ਼ਕਰ ਨਾਲ ਜੁੜਿਆ ਹੋਇਆ ਸੀ। ਅਤਿਵਾਦੀਆਂ ਨੇ ਨਵੀਦ ਉਰਫ਼ ਅਬੂ ਹੰਜਾਲਾ ਨਾਲ ਮੌਜੂਦ ਪੁਲਿਸ ਪਾਰਟੀ 'ਤੇ ਗੋਲੀਆਂ ਚਲਾਈਆਂ। ਹਮਲੇ ਵਿਚ ਹੈੱਡ ਕਾਂਸਟੇਬਲ ਮੁਸ਼ਤਾਕ ਅਹਿਮਦ ਅਤੇ ਕਾਂਸਟੇਬਲ ਬਾਬਰ ਅਹਿਮਦ ਮਾਰੇ ਗਏ। ਡੀਜੀਪੀ ਐਸ ਪੀ ਵੈਦ ਨੇ ਕਿਹਾ, 'ਇਹ ਬੇਹੱਦ ਦੁਖਦ ਘਟਨਾ ਹੈ ਅਤੇ ਅਤਿਵਾਦੀ ਅਪਣੇ ਨਾਲ ਇਕ ਸਾਥੀ ਨੂੰ ਫ਼ਰਾਰ ਕਰਵਾਉਣ ਵਿਚ ਸਫ਼ਲ ਰਹੇ। ਅਸੀਂ ਇਸ ਵਾਰਦਾਤ ਵਿਚ ਸ਼ਾਮਲ ਵਿਅਕਤੀਆਂ ਨੂੰ ਫੜਨ ਲਈ ਰੈਡ ਅਲਰਟ ਐਲਾਨ ਦਿਤਾ ਹੈ।' ਕਿਹਾ ਜਾ ਰਿਹਾ ਹੈ ਕਿ ਇਕ ਪੁਲਿਸ ਮੁਲਾਜ਼ਮ ਦੀ ਕਾਰਬਾਇਨ ਰਾਈਫ਼ਲ ਗ਼ਾਇਬ ਹੈ। ਹਮਲੇ ਵਾਲੀ ਥਾਂ ਦਾ ਦੌਰਾ ਕਰਨ ਵਾਲੇ ਪੁਲਿਸ ਅਧਿਕਾਰੀ ਗ਼ੁਲਾਮ ਹਸਨ ਭੱਟ ਨੇ ਕਿਹਾ ਕਿ ਪੁਲਿਸ ਪਾਰਟੀ ਨਵੀਦ ਸਮੇਤ ਛੇ ਅਤਿਵਾਦੀਆਂ ਦੇ ਇਲਾਜ ਲਈ ਹਸਪਤਾਲ ਅੱਗੇ ਪੁੱਜੀ ਸੀ।

ਪ੍ਰਤੱਖਦਰਸ਼ੀਆਂ ਮੁਤਾਬਕ ਜਿਉਂ ਹੀ ਹਸਪਤਾਲ ਦੀ ਓਪੀਡੀ ਦੇ ਬਾਹਰ ਨਵੀਦ ਸਮੇਤ ਛੇ ਕੈਦੀ ਅਤੇ ਪੁਲਿਸ ਮੁਲਾਜ਼ਮ ਗੱਡੀ ਵਿਚੋਂ ਉਤਰੇ ਤਾਂ ਅਤਿਵਾਦੀਆਂ ਨੇ ਗੋਲੀਬਾਰੀ ਸ਼ੁਰੂ ਕਰ ਦਿਤੀ। ਅਤਿਵਾਦੀ ਹਸਪਤਾਲ ਦੀ ਪਾਰਕਿੰਗ ਵਾਲੀ ਥਾਂ 'ਤੇ ਘਾਤ ਲਾ ਕੇ ਬੈਠੇ ਹੋਏ ਸਨ। ਦੋ ਅਤਿਵਾਦੀਆਂ ਨੇ ਪੁਲਿਸ 'ਤੇ ਹਮਲਾ ਕਰ ਦਿਤਾ ਅਤੇ ਕਾਰ ਰਾਹੀਂ ਸ੍ਰੀਨਗਰ ਦੇ ਭੀੜ ਵਾਲੇ ਇਲਾਕੇ ਵਿਚੋਂ ਫ਼ਰਾਰ ਹੋ ਗਏ। ਸ੍ਰੀ ਮਹਾਰਾਜ ਹਰੀ ਸਿੰਘ ਦੇ ਨਾਮ 'ਤੇ ਬਣਿਆ ਇਹ ਹਸਪਤਾਲ ਜੇਹਲਮ ਦੀ ਸਹਾਇਕ ਨਦੀ ਦੇ ਕੰਢੇ 'ਤੇ ਪੈਂਦਾ ਹੈ। ਇਸ ਦੇ ਇਕ ਪਾਸੇ ਕਰਨ ਨਗਰ ਹੈ ਤੇ ਦੂਜੇ ਪਾਸੇ ਨਵਾਬ ਬਾਜ਼ਾਰ ਹੈ। ਕਈ ਹਮਲਿਆਂ ਵਿਚ ਸ਼ਾਮਲ ਰਿਹਾ ਹੈ ਨਵੀਦ: ਮੰਨਿਆ ਜਾਂਦਾ ਹੈ ਕਿ ਮੁਲਤਾਨ ਜ਼ਿਲ੍ਹੇ ਦੇ ਬੋਰੇਵੇਲਾ ਦਾ ਵਾਸੀ ਨਵੀਦ ਕਈ ਅਤਿਵਾਦੀ ਹਮਲਿਆਂ ਵਿਚ ਸ਼ਾਮਲ ਰਿਹਾ ਹੈ। ਇਨ੍ਹਾਂ ਵਿਚ ਸ਼ਹਿਰ ਦੇ ਹੈਦਰਪੋਰਾ ਇਲਾਕੇ ਵਿਚ ਫ਼ੌਜ 'ਤੇ ਹੋਇਆ ਹਮਲਾ, ਸ੍ਰੀਨਗਰ ਦੇ ਬਾਹਰ ਰਾਸ਼ਟਰੀ ਰਾਜਮਾਰਗ 'ਤੇ ਸਿਲਵਰ ਸਟਾਰ ਹੋਟਲ ਅਤੇ ਦਖਣੀ ਕਸ਼ਮੀਰ ਵਿਚ ਪੁਲਿਸ ਤੇ ਸੀਆਰਪੀਐਫ਼ ਦੇ ਤਿੰਨ ਕੈਂਪਾਂ 'ਤੇ ਹੋਏ ਹਮਲੇ ਸ਼ਾਮਲ ਹਨ। ਉਸ ਨੂੰ 26 ਅਗੱਸਤ 2014 ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ।  (ਏਜੰਸੀ)