ਨਵੀਂ ਦਿੱਲੀ, 19 ਫ਼ਰਵਰੀ (ਅਮਨਦੀਪ ਸਿੰਘ): 'ਇਕ ਰੈਂਕ ਇਕ ਪੈਨਸ਼ਨ' ਦੀ ਮੰਗ ਨੂੰ ਲੈ ਕੇ ਪਿਛਲੇ ਲੰਮੇਂ ਅਰਸੇ ਤੋਂ ਸੰਘਰਸ਼ ਕਰ ਰਹੇ ਸਾਬਕਾ ਫ਼ੌਜੀਆਂ ਨੇ ਅੱਜ ਉਮੀਦ ਪ੍ਰਗਟਾਈ ਕਿ ਸੁਪਰੀਮ ਕੋਰਟ ਤੋਂ ਸਾਬਕਾ ਫ਼ੌਜੀਆਂ ਨੂੰ ਜ਼ਰੂਰ ਇਨਸਾਫ਼ ਮਿਲੇਗਾ।ਅੱਜ ਇਥੋਂ ਦੇ ਜੰਤਰ ਮੰਤਰ 'ਤੇ ਇਕੱਠੇ ਹੋਏ ਸਾਬਕਾ ਫ਼ੌਜੀਆਂ ਨੇ ਸਿਆਸਤਦਾਨਾਂ ਨੂੰ ਨਸੀਹਤ ਦਿਤੀ ਕਿ ਉਹ ਭਾਰਤੀ ਫ਼ੌਜ ਨੂੰ ਲੈ ਕੇ ਫ਼ਿਰਕੂ ਟਿਪਣੀਆਂ ਦੇਣਾ ਬੰਦ ਕਰਨ, ਕਿਉਂਕਿ ਸਮੁੱਚੇ ਫ਼ੌਜੀ ਅਪਣੀਆਂ ਜਾਨਾਂ 'ਤੇ ਖੇਡ ਕੇ, ਦੇਸ਼ ਦੀਆਂ ਸਰਹੱਦਾਂ ਦੀ ਰਾਖੀ ਬਾਖ਼ੂਬੀ ਕਰ ਰਹੇ ਹਨ। ਸੇਵਾਮੁਕਤ ਫ਼ੌਜੀਆਂ ਦੀ ਜਥੇਬੰਦੀ ਇੰਡੀਅਨ ਐਕਸ ਸਰਵਿਸਮੈਨ ਮੂਵਮੈਂਟ (ਆਈਈਐਸਐਮ) ਦੇ ਚੇਅਰਮੈਨ ਸੇਵਾਮੁਕਤ ਮੇਜਰ ਜਨਰਲ
ਸਤਬੀਰ ਸਿੰਘ ਨੇ ਅਦਾਲਤੀ ਕੇਸ ਬਾਰੇ ਵਿਚਾਰ ਸਾਂਝੇ ਕੀਤੇ ਤੇ ਫ਼ੌਜੀਆਂ ਦੇ ਹਿੱਤ ਵਿਚ ਜੰਗ ਜਾਰੀ ਰੱਖਣ ਦਾ ਐਲਾਨ ਕੀਤਾ।

ਚੰਡੀਗੜ੍ਹ ਤੋਂ ਉਚੇਚੇ ਤੌਰ 'ਤੇ ਪੁੱਜੇ ਆਲ ਇੰਡੀਆ ਡਿਫ਼ੈਂਸ ਬ੍ਰਦਰਜ਼ਹੁਡ ਜਥੇਬੰਦੀ (ਪੰਜਾਬ) ਦੇ ਪ੍ਰਧਾਨ ਸੇਵਾਮੁਕਤ ਬ੍ਰਿਗੇਡੀਅਰ ਕੁਲਦੀਪ ਸਿੰਘ ਕਾਹਲੋਂ ਨੇ ਉਮੀਦ ਪ੍ਰਗਟਾਈ ਕਿ ਸੇਵਾਮੁਕਤ ਫ਼ੌਜੀਆਂ ਦੀ ਜਥੇਬੰਦੀ ਆਈਈਐਸਐਮ ਵਲੋਂ ਸੁਪਰੀਮ ਕੋਰਟ ਵਿਚ ਦਾਖ਼ਲ ਕੀਤੀ। ਪਟੀਸ਼ਨ ਨਾਲ ਫ਼ੌਜੀਆਂ ਦੀ ਪੁਰਾਣੀ ਮੰਗ 'ਇਕ ਰੈਂਕ ਇਕ ਪੈਨਸ਼ਨ' ਦੇ ਮਸਲੇ 'ਤੇ ਇਨਸਾਫ਼ ਮਿਲੇਗਾ। ਉਨ੍ਹਾਂ ਕਿਹਾ ਕਿ ਅਫ਼ਸੋਸ ਦੀ ਗੱਲ ਹੈ ਕਿ ਪਾਰਲੀਮੈਂਟ ਵਿਚ ਫ਼ੈਸਲਾ ਹੋਣ ਦੇ ਬਾਵਜੂਦ ਸਰਕਾਰ ਵਲੋਂ ਫ਼ੌਜੀਆਂ ਦੀ ਮੰਗਾਂ ਨੂੰ ਅਣਗੌਲਿਆਂ ਕੀਤਾ ਗਿਆ ਹੈ।ਉਨਾਂ੍ਹ ਕਿਹਾ ਕਿ ਅਤਿਵਾਦੀਆਂ ਵਲੋਂ ਜੰਮੂ ਦੇ ਸੰਜੂਵਾਨ ਇਲਾਕੇ 'ਚ ਕੀਤੇ ਹਮਲੇ ਵਿਚ ਸ਼ਹੀਦ ਹੋਏ ਫ਼ੌਜੀਆਂ ਦੇ ਪਰਵਾਰਾਂ ਨਾਲ ਦੁੱਖ ਵੰਡਾਉਣ ਦੀ ਬਜਾਏ ਸਿਆਸਤਦਾਨਾਂ ਵਲੋਂ ਧਰਮ ਦੇ ਨਾਂਅ 'ਤੇ ਕੋਝੀ ਸਿਆਸਤ ਕਰਨਾ ਘਿਨੌਣੀ ਕਾਰਵਾਈ ਹੈ, ਕਿਉਂਕਿ ਫ਼ੌਜੀ ਇਕ ਖ਼ਾਸ ਧਰਮ ਲਈ ਨਹੀਂ, ਬਲਕਿ ਅਪਣੇ ਮੁਲਕ ਦੀ ਰਾਖੀ ਵਾਸਤੇ ਸਰਹੱਦਾਂ 'ਤੇ ਜੂਝਦਾ ਹੋਇਆ ਸ਼ਹਾਦਤ ਦਾ ਜਾਮ ਪੀਂਦਾ ਹੈ। ਇਸ ਮੌਕੇ ਸੇਵਾਮੁਕਤ ਵਿੰਗ ਕਮਾਂਡਰ ਵਿਨੋਦ, ਸੂਬੇਦਾਰ ਮੇਜਰ  ਨਿਰੰਜਨ ਸਿੰਘ ਵਰ, ਬੀਬੀ ਸੁਦੇਸ਼ ਤੇ ਹੋਰ ਸ਼ਾਮਲ ਹੋਏ।