ਨਵੀਂ ਦਿਲੀ, 19 ਫ਼ਰਵਰੀ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਆਮ ਤੌਰ 'ਦੇ ਵਿਦੇਸ਼ੀ ਦੌਰਿਆਂ 'ਤੇ ਰਹਿੰਦੇ ਹਨ। ਵਿਦੇਸ਼ ਯਾਤਰਾ ਦੌਰਾਨ ਕਈ ਵਾਰ ਉਨ੍ਹਾਂ ਦੇ ਜਹਾਜ਼ ਨੂੰ ਪਾਕਿਸਤਾਨ ਉਪਰੋਂ ਉਡਾਨ ਭਰਨੀ ਪੈਂਦੀ ਹੈ। ਪਾਕਿਸਤਾਨ ਸਰਕਾਰ ਨੇ ਪ੍ਰਧਾਨ ਮੰਤਰੀ ਮੋਦੀ ਦੇ ਜਹਾਜ਼ ਨੂੰ ਲਾਹੌਰ ਉਪਰੋਂ ਉਡਾਨ ਭਰਨ ਦੀ ਏਵਜ਼ 'ਚ ਭਾਰਤ ਨੂੰ ਬਿਲ ਫੜਾ ਦਿਤਾ ਹੈ। ਪਾਕਿਸਤਾਨ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵਲੋਂ ਇਸਤੇਮਾਲ ਕੀਤੇ ਗਏ ਭਾਰਤੀ ਹਵਾਈ ਫ਼ੌਜ ਦੇ ਜਹਾਜ਼ ਦੇ 'ਰੂਟ ਨੈਵੀਗੇਸ਼ਨ ਫੀਸ' ਤਹਿਤ ਢਾਈ ਲੱਖ ਰੁਪਏ ਮੰਗੇ ਹਨ।ਇਹ ਪ੍ਰਗਟਾਵਾ ਇਕ ਆਰ.ਟੀ.ਆਈ. 'ਚ ਹੋਇਆ ਹੈ। ਲੋਕੇਸ਼ ਬਤਰਾ ਨੇ ਆਰ.ਟੀ.ਆਈ. 'ਚ ਜਾਣਕਾਰੀ ਮੰਗੀ ਸੀ। ਇਸ ਦੇ ਜਵਾਬ 'ਚ ਕਿਹਾ ਗਿਆ ਹੈ ਕਿ ਜੂਨ 2016 ਤਕ ਭਾਰਤੀ ਫ਼ੌਜ ਦੇ ਜਹਾਜ਼ ਦਾ ਇਸਤੇਮਾਲ ਪ੍ਰਧਾਨ ਮੰਤਰੀ ਦੀਆਂ 11 ਫ਼ੇਰੀਆਂ ਲਈ ਕੀਤਾ ਗਿਆ। ਇਹ ਬਿਲ ਪ੍ਰਧਾਨ ਮੰਤਰੀ ਮੋਦੀ ਦੇ ਲਾਹੌਰ, ਰੂਸ, ਅਫ਼ਗ਼ਾਨਿਸਤਾਨ, ਇਰਾਨ ਤੇ ਕਤਰ ਦੀਆਂ ਵਿਦੇਸ਼ੀ ਫ਼ੇਰੀਆਂ ਦਾ ਹੈ।
ਬਤਰਾ ਨੇ ਪਿਛਲੇ ਸਾਲ ਅਗਸਤ ਤੋਂ ਲੈ ਕੇ 30 ਜਨਵਰੀ 2018 ਤਕ ਆਰ.ਟੀ.ਆਈ. ਤੋਂ ਮਿਲੀ ਜਾਣਕਾਰੀ ਮੀਡੀਆ ਨਾਲ ਸਾਂਝੀ ਕੀਤੀ। ਜਦੋਂ ਪਾਕਿਸਤਾਨ 'ਚ ਮੋਦੀ ਨਵਾਜ਼ ਸ਼ਰੀਫ਼ ਨੂੰ ਮਿਲਣ ਗਏ ਸੀ, ਉਸ ਦੌਰਾਨ ਜਹਾਜ਼ ਦੀ ਫੀਸ ਵੀ ਇਸ 'ਚ ਸ਼ਾਮਲ ਹੈ। ਇਸ ਤੋਂ ਇਲਾਵਾ ਮੋਦੀ ਰੂਸ ਅਤੇ ਅਫ਼ਗ਼ਾਨਿਸਤਾਨ ਵੀ ਇਸੇ ਰਸਤੇ ਗਏ ਸਨ।ਅੰਕੜਿਆਂ ਮੁਤਾਬਕ 2014 ਤੋਂ 2016 ਤਕ ਮੋਦੀ ਦੀਆਂ ਵਿਦੇਸ਼ੀਆਂ ਫ਼ੇਰੀਆਂ ਲਈ ਭਾਰਤੀ ਫ਼ੌਜ ਦੇ ਜਹਾਜ਼ ਦਾ ਇਸਤੇਮਾਲ ਕੀਤਾ ਗਿਆ, ਜਿਸ 'ਤੇ ਲਗਭਗ ਦੋ ਕਰੋੜ ਰੁਪਏ ਖ਼ਰਚ ਹੋਏ ਹਨ।ਪਾਕਿਸਤਾਨ ਨੇ ਭਾਰਤ ਨੂੰ ਜਿਹੜਾ ਬਿਲ ਭੇਜਿਆ ਹੈ, ਉਹ 25 ਦਸੰਬਰ 2015 ਦਾ ਹੈ। ਜਦੋਂ ਰੂਸ ਅਤੇ ਅਫ਼ਗ਼ਾਨਿਸਤਾਨ ਤੋਂ ਵਾਪਸ ਆਉਂਦਿਆਂ ਨਵਾਜ਼ ਸ਼ਰੀਫ਼ ਦੇ ਜਨਮਦਿਨ 'ਤੇ ਪ੍ਰਧਾਨ ਮੰਤਰੀ ਮੋਦੀ ਲਾਹੌਰ ਰੁਕੇ ਸਨ। ਇਸ ਯਾਦਰਾ ਤੌਰਾਨ ਉਨ੍ਹਾਂ ਦੇ ਰੂਟ ਨੇਵੀਗੇਸ਼ਨ ਦਾ ਪਾਕਿਸਤਾਨ ਨੇ 1.49 ਲੱਖ ਰੁਪਏ ਦੇ ਬਿਲ ਭੇਜਿਆ। ਇਸ ਤੋਂ ਇਲਾਵਾ 2016 'ਚ 22-23 ਮਈ ਨੂੰ ਈਰਾਨ ਅਤੇ 4-6 ਜੂਨ ਨੂੰ ਕਤਰ ਦੀ ਯਾਤਰਾ ਦੇ ਰੂਟ ਦਾ ਨੈਵੀਗੇਸ਼ਨ ਚਾਰਜ 77,215 ਰੁਪਏ ਭੇਜਿਆ। ਇਨ੍ਹਾਂ ਦੋਵੇਂ ਦੌਰਿਆਂ ਸਮੇਂ ਮੋਦੀ ਦਾ ਜਹਾਜ਼ ਪਾਕਿਸਤਾਨ ਦੇ ਉਪਰੋਂ ਗੁਜਰਿਆ ਸੀ। (ਪੀਟੀਆਈ)
