ਨਵੀਂ ਦਿੱਲੀ, 8 ਫ਼ਰਵਰੀ :  ਰਾਜ ਸਭਾ ਵਿਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਭਾਸ਼ਨ ਦੌਰਾਨ ਕਾਂਗਰਸ ਸੰਸਦ ਮੈਂਬਰ ਰੇਣੂਕਾ ਚੌਧਰੀ ਦੇ ਹਾਸੇ 'ਤੇ ਵਿਵਾਦ ਪੈਦਾ ਹੋ ਗਿਆ ਹੈ। ਅੱਜ ਸੰਸਦ ਵਿਚ ਕਾਂਗਰਸ ਦੇ ਮੈਂਬਰਾਂ ਨੇ ਪ੍ਰਧਾਨ ਮੰਤਰੀ ਨੂੰ ਕਿਹਾ ਕਿ ਉਹ ਇਸ ਲਈ ਮਾਫ਼ੀ ਮੰਗਣ ਕਿਉਂਕਿ ਉਨ੍ਹਾਂ ਨੇ ਮਹਿਲਾ ਵਿਰੋਧੀ ਟਿਪਣੀ ਕੀਤੀ ਹੈ। ਮੈਂਬਰਾਂ ਨੇ ਨਾਹਰੇਬਾਜ਼ੀ ਵੀ ਕੀਤੀ ਜਿਸ ਕਾਰਨ ਰਾਜ ਸਭਾ ਦੀ ਕਾਰਵਾਈ ਇਕ ਵਾਰ ਰੋਕਣੀ ਵੀ ਪਈ।ਇਸੇ ਦੌਰਾਨ ਤ੍ਰਿਣਮੂਲ ਕਾਂਗਰਸ ਦੇ ਸੰਸਦ ਮੈਂਬਰ ਡੇਰੇਕ ਓ ਬ੍ਰਾਇਨ ਨੇ ਪ੍ਰਧਾਨ ਮੰਤਰੀ ਦੀ ਤੁਲਨਾ ਰਾਖ਼ਸ਼ ਮਹਿਸਾਸੁਰ ਨਾਲ ਕਰ ਦਿਤੀ। ਉਨ੍ਹਾਂ ਕਿਹਾ, 'ਮਹਿਸਾਸੁਰ ਨੂੰ ਵੀ ਲਗਦਾ ਸੀ ਕਿ ਉਸ ਨੂੰ ਕੋਈ ਹਰਾ ਨਹੀਂ ਸਕਦਾ ਪਰ ਬਾਅਦ ਵਿਚ ਚੰਗਿਆਈ ਦੀਆਂ ਸਾਰੀਆਂ ਤਾਕਤਾਂ ਇਕਜੁੱਟ ਹੋ ਗਈਆਂ ਤੇ ਔਰਤ ਦਾ ਰੂਪ ਧਾਰ ਕੇ ਮਹਿਸਾਸੁਰ ਦਾ ਅੰਤ ਕਰ ਦਿਤਾ ਗਿਆ।' ਰੇਣੂਕਾ ਚੌਧਰੀ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ, 'ਮੋਦੀ ਇਕ ਪਾਸੇ ਔਰਤਾਂ ਦੇ ਸਨਮਾਨ ਦੀ ਗੱਲ ਕਰਦੇ ਹਨ ਤੇ ਦੂਜੇ ਪਾਸੇ ਔਰਤਾਂ ਬਾਰੇ ਟਿਪਣੀਆਂ ਕਰਦੇ ਹਨ। ਮੈਂ ਦੋ ਬੇਟੀਆਂ ਦੀ ਮਾਂ ਹਾਂ, ਕਿਸੇ ਦੀ ਬੇਟੀ ਹਾਂ, ਕਿਸੇ ਦੀ ਪਤਨੀ ਹਾਂ। ਮੈਂ ਹੁਣ ਸਦਨ ਵਿਚ ਵਿਸ਼ੇਸ਼ ਅਧਿਕਾਰ ਦੀ ਉਲੰਘਣਾ ਦਾ ਮਤਾ ਲੈ ਕੇ ਆਵਾਂਗੀ।' ਉਨ੍ਹਾਂ ਹੱਸਣ ਦਾ ਕਾਰਨ ਦਸਦਿਆਂ ਕਿਹਾ ਕਿ ਮੋਦੀ 'ਆਧਾਰ' ਬਾਰੇ ਕਾਂਗਰਸ ਵਿਰੁਧ ਦੋਸ਼ ਲਾ ਰਹੇ ਸਨ ਜਦਕਿ ਆਧਾਰ ਵਿਰੁਧ ਮੋਦੀ ਵੀ ਕਈ ਵਾਰ ਬੋਲ ਚੁਕੇ ਹਨ।' ਕਲ ਜਦ ਰਾਜ ਸਭਾ ਵਿਚ ਮੋਦੀ ਭਾਸ਼ਨ ਦੇ ਰਹੇ ਸਨ ਤਾਂ ਰੇਣੂਕਾ ਚੌਧਰੀ ਜ਼ੋਰ ਨਾਲ ਹੱਸ ਪਈ। ਸਭਾਪਤੀ ਵੈਂਕਇਆ ਨਾਇਡੂ ਨੇ ਕਿਹਾ, 'ਤੁਹਾਨੂੰ ਕੀ ਹੋ ਗਿਆ ਹੈ। ਜੇ ਕੋਈ ਸਮੱਸਿਆ ਹੈ ਤਾਂ ਡਾਕਟਰ ਕੋਲ ਜਾਉ।' ਵੈਂਕਇਆ ਨਾਇਡੂ ਬੋਲ ਹੀ ਰਹੇ ਸਨ ਕਿ ਮੁਸਕਰਾਉਂਦੇ ਹੋਏ ਮੋਦੀ ਬੋਲੇ, 'ਰੇਣੂਕਾ ਜੀ ਨੂੰ ਕੁੱਝ ਨਾ ਕਹੋ। ਰਾਮਾਇਣ ਸੀਰੀਅਲ ਤੋਂ ਬਾਅਦ ਅਜਿਹਾ ਹਾਸਾ ਸੁਣਨ ਦਾ ਅੱਜ ਮੌਕਾ ਮਿਲਿਆ ਹੈ।' 

ਭਾਜਪਾ ਆਈਟੀ ਸੈਲ ਦੇ ਮੁਖੀ ਅਮਿਤ ਮਾਲਵੀਯ ਨੇ ਅੱਜ ਪ੍ਰਧਾਨ ਮੰਤਰੀ ਦੇ ਭਾਸ਼ਨ ਦਾ ਹਿੱਸਾ ਟਵੀਟ ਕਰ ਕੇ ਲੋਕਾਂ ਨੂੰ ਪੁਛਿਆ ਕਿ ਤੁਹਾਨੂੰ ਕਿਹੜੇ ਕਿਰਦਾਰ ਦੀ ਯਾਦ ਆਈ? ਬਾਅਦ ਵਿਚ ਉਨ੍ਹਾਂ ਰਾਮਾਇਣ ਵਿਚ ਸ਼ਰੂਪਨਖਾ ਦੀ ਨੱਕ ਵੱਢੇ ਜਾਣ ਦਾ ਦ੍ਰਿਸ਼ ਵੀ ਟਵਿਟਰ 'ਤੇ ਸਾਂਝਾ ਕੀਤਾ। ਰੇਣੂਕਾ ਨੇ ਕਿਹਾ, 'ਪ੍ਰਧਾਨ ਮੰਤਰੀ ਨੇ ਮੇਰੇ ਬਾਰੇ ਨਿਜੀ ਟਿਪਣੀ ਕੀਤੀ ਹੈ। ਇਹ ਔਰਤਾਂ ਦੀ ਸਮਾਜਕ ਹਾਲਤ ਦੀ ਨਿੰਦਾ ਹੈ।' ਕਾਂਗਰਸ ਨੇ ਕਿਹਾ ਕਿ ਇਥੋਂ ਪਤਾ ਚਲਦਾ ਹੈ ਕਿ ਪ੍ਰਧਾਨ ਮੰਤਰੀ ਔਰਤਾਂ ਬਾਰੇ ਕਿਹੋ ਜਿਹੀ ਰਾਏ ਰਖਦੇ ਹਨ। ਕਾਂਗਰਸ ਮੈਂਬਰਾਂ ਨੇ ਕਿਹਾ ਕਿ ਰੇਣੂਕਾ ਦੇ ਹਾਸੇ ਨੂੰ ਸ਼ਰੂਪਨਖਾ ਨਾਲ ਤੁਲਨਾਇਆ ਗਿਆ ਹੈ। ਕੇਂਦਰੀ ਮੰਤਰੀ ਸਮ੍ਰਿਤੀ ਇਰਾਨੀ ਨੇ ਕਿਹਾ, 'ਕੀ ਰੇਣੂਕਾ ਦੀਆਂ ਟਿਪਣੀਆਂ ਪ੍ਰਵਾਨਯੋਗ ਹਨ ਅਤੇ ਜਦ ਉਨ੍ਹਾਂ ਬਾਰੇ ਪ੍ਰਧਾਨ ਮੰਤਰੀ ਨੇ ਵਿਅੰਗਮਈ ਢੰਗ ਨਾਲ ਜਵਾਬ ਦਿਤਾ ਤਾਂ ਉਹ ਅਪਣੇ ਜੈਂਡਰ ਨੂੰ ਅਪਣੀ ਢਾਲ ਬਣਾ ਰਹੀ ਹੈ।' ਕੇਂਦਰੀ ਮੰਤਰੀ ਕਿਰਨ ਰਿਜਿਜੂ ਨੇ ਰਾਮਾਇਣ ਦਾ ਦ੍ਰਿਸ਼ ਫ਼ੇਸਬੁਕ 'ਤੇ ਸਾਂਝਾ ਕੀਤਾ। 'ਆਪ' ਦੇ ਸੰਜੇ ਸਿੰਘ ਨੇ ਕਿਹਾ ਕਿ ਸ਼ਰਮ ਦੀ ਗੱਲ ਹੈ ਕਿ ਸੰਸਦ ਵਿਚ ਸਾਡੇ ਪ੍ਰਧਾਨ ਸੇਵਕ ਔਰਤ ਬਾਰੇ ਅਜਿਹੀ ਟਿਪਣੀ ਕਰਦੇ ਹਨ। (ਏਜੰਸੀ)