ਪ੍ਰਧਾਨ ਮੰਤਰੀ ਮੋਦੀ ਸਿਰ ਤੋਂ ਪੈਰਾਂ ਤੱਕ ਭ੍ਰਿਸ਼ਟਾਚਾਰ 'ਚ ਡੁੱਬੇ ਹਨ, ਪ੍ਰਧਾਨ ਮੰਤਰੀ ਲਈ ਭ੍ਰਿਸ਼ਟਾਚਾਰ ਮੁੱਦਾ ਹੀ ਨਹੀਂ ਹੈ : ਅਰਵਿੰਦ ਕੇਜਰੀਵਾਲ

-ਦੋਸ਼ ਲਗਾਉਂਦੇ ਹਨ ਕਿ ਗੋਆ ਚੋਣਾਂ 'ਚ ਪੈਸੇ ਦੀ ਵਰਤੋਂ ਕੀਤੀ ਗਈ, ਇਨ੍ਹਾਂ ਨੇ ਵੈਂਡਰਸ ਨੂੰ ਗ੍ਰਿਫ਼ਤਾਰ  ਕੀਤਾ, ਉਥੇ ਕੁਝ ਨਹੀਂ ਮਿਲਿਆ, ਸਾਰੇ ਭੁਗਤਾਨ ਚੈੱਕਾਂ ਰਾਹੀਂ ਕੀਤੇ ਗਏ, ਜਦੋਂ ਉਹ ਚੋਣ ਕਮਿਸ਼ਨ ਕੋਲ ਗਏ ਤਾਂ ਵੀ ਕੁਝ ਨਹੀਂ ਮਿਲਿਆ - ਅਰਵਿੰਦ ਕੇਜਰੀਵਾਲ- ਈਡੀ ਝੂਠ ਬੋਲ ਰਿਹਾ ਹੈ ਕਿ ਮਨੀਸ਼ ਸਿਸੋਦੀਆ ਨੇ 14 ਮੋਬਾਈਲ ਫ਼ੋਨ ਤੋੜੇ, ਜਿਨ੍ਹਾਂ 'ਚੋਂ 5 ਸੀਬੀਆਈ-ਈਡੀ ਕੋਲ ਹਨ ਤੇ ਬਾਕੀ ਵਰਤੇ ਜਾ ਰਹੇ ਹਨ - ਅਰਵਿੰਦ ਕੇਜਰੀਵਾਲ

-ਅਸੀਂ ਝੂਠੇ ਸਬੂਤ ਬਣਾਉਣ ਅਤੇ ਅਦਾਲਤ 'ਚ ਝੂਠੇ ਸਬੂਤ ਪੇਸ਼ ਕਰਨ 'ਤੇ ਸੀ.ਬੀ.ਆਈ. ਅਤੇ ਈ.ਡੀ. ਦੇ ਅਧਿਕਾਰੀਆਂ ਖ਼ਿਲਾਫ਼ ਕੇਸ ਦਰਜ ਕਰਾਂਗੇ - ਅਰਵਿੰਦ ਕੇਜਰੀਵਾਲ

-ਮੋਦੀ ਜੀ ਦਾ ਖਾਸਮਖਾਸ ਸੱਤਿਆਪਾਲ ਮਲਿਕ ਕਹਿ ਰਹੇ ਹਨ ਕਿ ਮੋਦੀ ਜੀ ਨੂੰ ਭ੍ਰਿਸ਼ਟਾਚਾਰ ਤੋਂ ਕੋਈ ਪਰੇਸ਼ਾਨੀ ਨਹੀਂ, ਉਨ੍ਹਾਂ ਦੇ ਕਈ ਸੀਐਮ ਭ੍ਰਿਸ਼ਟਾਚਾਰ ਦਾ ਪੈਸਾ ਉੱਪਰ ਤੱਕ ਭੇਜਦੇ ਹਨ, ਜੋ ਉਨ੍ਹਾਂ ਦੇ ਦੋਸਤ ਦੀ ਕੰਪਨੀ 'ਚ ਨਿਵੇਸ਼ ਕੀਤਾ ਜਾਂਦਾ ਹੈ - ਅਰਵਿੰਦ ਕੇਜਰੀਵਾਲ

-ਮੈਂ ਵੀ ਕਹਿ ਰਿਹਾ ਹਾਂ ਕਿ ਮੈਂ 17 ਸਤੰਬਰ ਦੀ ਸ਼ਾਮ 7 ਵਜੇ ਨਰਿੰਦਰ ਮੋਦੀ ਨੂੰ ਇੱਕ ਹਜ਼ਾਰ ਕਰੋੜ ਰੁਪਏ ਦਿੱਤੇ, ਕੀ ਇਸ ਆਧਾਰ 'ਤੇ ਉਨ੍ਹਾਂ ਨੂੰ ਗ੍ਰਿਫਤਾਰ ਕਰ ਲੈਣਗੇ, ਸਬੂਤ ਤਾਂ ਹੋਣਾ ਚਾਹੀਦਾ ਹੈ? - ਅਰਵਿੰਦ ਕੇਜਰੀਵਾਲ

-ਜਾਂਚ ਏਜੰਸੀਆਂ ਲੋਕਾਂ ਨੂੰ ਧਮਕੀਆਂ ਦੇ ਰਹੀਆਂ ਹਨ ਤਸ਼ੱਦਦ, ਕੁੱਟਮਾਰ ਕਰ ਰਹੀਆਂ ਹਨ, ਬੇਟੀ ਕਾਲਜ ਕਿਵੇਂ ਜਾਵੇਗੀ, ਕਹਿ ਕੇ ਕੇਜਰੀਵਾਲ-ਮਨੀਸ਼ ਸਿਸੋਦੀਆ ਦਾ ਨਾਮ ਲੈਣ ਲਈ ਕਹਿ ਰਹੇ ਹਨ - ਅਰਵਿੰਦ ਕੇਜਰੀਵਾਲ

- ਭਾਰਤ ਦੇ 75 ਸਾਲਾਂ ਦੇ ਇਤਿਹਾਸ ਵਿੱਚ ਕਿਸੇ ਵੀ ਪਾਰਟੀ ਨੂੰ ਇੰਨਾ ਨਿਸ਼ਾਨਾ ਨਹੀਂ ਬਣਾਇਆ ਗਿਆ ਜਿੰਨਾ ਆਮ ਆਦਮੀ ਪਾਰਟੀ ਨੂੰ ਨਿਸ਼ਾਨਾ ਬਣਾਇਆ ਜਾ ਰਿਹਾ ਹੈ - ਅਰਵਿੰਦ ਕੇਜਰੀਵਾਲ

'ਆਪ' ਨੇ ਦੇਸ਼ ਨੂੰ ਗਰੀਬੀ ਦੂਰ ਕਰਨ, ਬੱਚਿਆਂ ਨੂੰ ਸਿੱਖਿਆ ਅਤੇ ਰੁਜ਼ਗਾਰ ਦੇਣ ਦੀ ਉਮੀਦ ਦਿੱਤੀ ਹੈ, ਪ੍ਰਧਾਨ ਮੰਤਰੀ ਇਸ ਉਮੀਦ ਨੂੰ ਕੁਚਲਣਾ ਚਾਹੁੰਦੇ ਹਨ - ਅਰਵਿੰਦ ਕੇਜਰੀਵਾਲ

ਨਵੀਂ ਦਿੱਲੀ : 'ਆਪ' ਦੇ ਕੌਮੀ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਸ਼ੁੱਕਰਵਾਰ ਨੂੰ ਸੀਬੀਆਈ ਤੋਂ ਸੰਮਨ ਮਿਲਣ ਤੋਂ ਬਾਅਦ ਸ਼ਨੀਵਾਰ ਨੂੰ ਪ੍ਰੈੱਸ ਕਾਨਫਰੰਸ ਰਾਹੀਂ ਦੇਸ਼ ਦੇ ਸਾਹਮਣੇ ਆਪਣੀ ਗੱਲ ਰੱਖੀ। ਉਨ੍ਹਾਂ ਕਿਹਾ ਕਿ ਜੇਕਰ ਕੇਜਰੀਵਾਲ ਭ੍ਰਿਸ਼ਟ ਹੈ ਤਾਂ ਇਸ ਦੁਨੀਆਂ ਵਿੱਚ ਕੋਈ ਵੀ ਇਮਾਨਦਾਰ ਨਹੀਂ ਹੈ। ਸੀਬੀਆਈ ਨੇ ਮੈਨੂੰ ਕੱਲ੍ਹ ਬੁਲਾਇਆ ਹੈ, ਮੈਂ ਜਾਵਾਂਗਾ। ਸੀਬੀਆਈ-ਈਡੀ ਇੱਕ ਸਾਲ ਤੋਂ ਸ਼ਰਾਬ ਘੁਟਾਲੇ ਦੀ ਜਾਂਚ ਕਰ ਰਹੀ ਹੈ, ਹੁਣ ਤੱਕ ਪੈਸਾ ਅਤੇ ਸਬੂਤ ਮਿਲਣੇ ਚਾਹੀਦੇ ਸਨ, ਪਰ ਕੁਝ ਨਹੀਂ ਮਿਲਿਆ। ਦੋਸ਼ ਹੈ ਕਿ 100 ਕਰੋੜ ਰੁਪਏ ਦੀ ਰਿਸ਼ਵਤ ਲਈ ਗਈ, ਜਿਸ ਦੀ ਵਰਤੋਂ ਗੋਆ ਚੋਣਾਂ 'ਚ ਕੀਤੀ ਗਈ। 

ਜਾਂਚ ਏਜੰਸੀਆਂ ਨੇ ਗੋਆ ਜਾ ਕੇ ਆਪਣੀ ਸਾਰੀ ਜਾਂਚ ਕੀਤੀ ਅਤੇ ਉਥੇ ਕੁਝ ਨਹੀਂ ਮਿਲਿਆ, ਫਿਰ 100 ਕਰੋੜ ਰੁਪਏ ਕਿੱਥੇ ਹਨ? ਸੱਚ ਤਾਂ ਇਹ ਹੈ ਕਿ ਸ਼ਰਾਬ ਘੁਟਾਲਾ ਕੁਝ ਵੀ ਨਹੀਂ ਹੈ। ਪੈਸੇ ਉਦੋਂ ਹੀ ਮਿਲਣਗੇ ਜਦੋਂ ਰਿਸ਼ਵਤ ਲੈ ਕੇ ਦਿੱਤੀ ਗਈ ਹੋਵੇ। ਮੁੱਖ ਮੰਤਰੀ ਨੇ ਕਿਹਾ ਕਿ ਲੋਕਾਂ 'ਤੇ ਕੇਜਰੀਵਾਲ ਅਤੇ ਮਨੀਸ਼ ਸਿਸੋਦੀਆ ਦਾ ਨਾਂ ਲੈਣ ਲਈ ਦਬਾਅ ਬਣਾਇਆ ਜਾ ਰਿਹਾ ਹੈ ਅਤੇ ਉਨ੍ਹਾਂ ਨੂੰ ਤਸ਼ੱਦਦ, ਧਮਕੀਆਂ ਅਤੇ ਥਰਡ ਡਿਗਰੀ ਦਿੱਤਾ ਜਾ ਰਿਹਾ ਹੈ। ਅਸੀਂ ਸੀਬੀਆਈ ਅਤੇ ਈਡੀ ਦੇ ਅਧਿਕਾਰੀਆਂ ਵਿਰੁੱਧ ਝੂਠੇ ਸਬੂਤ ਬਣਾਉਣ ਅਤੇ ਅਦਾਲਤ ਵਿੱਚ ਝੂਠੇ ਸਬੂਤ ਪੇਸ਼ ਕਰਨ ਲਈ ਕੇਸ ਦਰਜ ਕਰਾਂਗੇ।

ਈਡੀ-ਸੀਬੀਆਈ ਇੱਕ ਸਾਲ ਤੋਂ ਸ਼ਰਾਬ ਘੁਟਾਲੇ ਦੀ ਜਾਂਚ ਕਰ ਰਹੀ ਹੈ, ਹੁਣ ਤੱਕ ਤਾਂ ਸਾਰਾ ਪੈਸਾ ਅਤੇ ਸਬੂਤ ਲੱਭ ਜਾਣੇ ਚਾਹੀਦੇ ਸਨ - ਅਰਵਿੰਦ ਕੇਜਰੀਵਾਲ

ਆਮ ਆਦਮੀ ਪਾਰਟੀ ਦੇ ਕੌਮੀ ਕਨਵੀਨਰ ਅਤੇ ਦਿੱਲੀ ਦੇ ਸੀਐਮ ਅਰਵਿੰਦ ਕੇਜਰੀਵਾਲ ਨੇ ਸ਼ਨੀਵਾਰ ਨੂੰ ਇੱਕ ਪ੍ਰੈਸ ਕਾਨਫਰੰਸ ਵਿੱਚ ਕਿਹਾ ਕਿ ਪਿਛਲੇ ਇੱਕ ਸਾਲ ਤੋਂ ਭਾਰਤੀ ਜਨਤਾ ਪਾਰਟੀ ਰੌਲਾ ਪਾ ਰਹੀ ਹੈ ਅਤੇ ਕਹਿ ਰਹੀ ਹੈ ਕਿ ਦਿੱਲੀ ਵਿੱਚ ਸ਼ਰਾਬ ਦਾ ਘੁਟਾਲਾ ਹੋ ਰਿਹਾ ਹੈ। ਦੇਸ਼ ਦੀਆਂ ਵੱਡੀਆਂ ਜਾਂਚ ਏਜੰਸੀਆਂ ਆਪਣਾ ਸਾਰਾ ਕੰਮ ਛੱਡ ਕੇ ਇਸਦੀ ਜਾਂਚ ਵਿੱਚ ਲੱਗੀਆਂ ਹੋਈਆਂ ਹਨ। ਮੈਂ ਸਮਝਦਾ ਹਾਂ ਕਿ ਜਾਂਚ ਏਜੰਸੀਆਂ ਨੂੰ ਹੁਣ ਤੱਕ ਸਾਰਾ ਪੈਸਾ ਅਤੇ ਸਬੂਤ ਮਿਲ ਚੁੱਕੇ ਹੋਣਗੇ। ਈਡੀ-ਸੀਬੀਆਈ ਨੇ ਆਪਣੀ ਸਾਰੀ ਜਾਂਚ ਪੂਰੀ ਕਰਨ ਤੋਂ ਬਾਅਦ ਸਾਬਕਾ ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ 'ਤੇ 14 ਫ਼ੋਨ ਤੋੜ ਕੇ ਸਬੂਤ ਨਸ਼ਟ ਕਰਨ ਦਾ ਦੋਸ਼ ਲਗਾਇਆ ਹੈ। 

ਸੀਐਮ ਅਰਵਿੰਦ ਕੇਜਰੀਵਾਲ ਨੇ ਈਡੀ ਦੀ ਚਾਰਜਸ਼ੀਟ ਦੇਸ਼ ਦੇ ਸਾਹਮਣੇ ਰੱਖਦਿਆਂ ਕਿਹਾ ਕਿ ਚਾਰਜਸ਼ੀਟ ਵਿੱਚ ਸਾਰੇ 14 ਮੋਬਾਈਲ ਫੋਨਾਂ ਦੇ ਆਈਐਮਈਆਈ ਨੰਬਰ ਲਿਖੇ ਹੋਏ ਹਨ। ਈਡੀ ਦਾ ਕਹਿਣਾ ਹੈ ਕਿ ਇਹ ਸਾਰੇ 14 ਫ਼ੋਨ ਮਨੀਸ਼ ਸਿਸੋਦੀਆ ਦੇ ਸਨ ਅਤੇ ਉਨ੍ਹਾਂ ਨੇ ਇਨ੍ਹਾਂ 14 ਫ਼ੋਨਾਂ ਨੂੰ ਨਸ਼ਟ ਕਰ ਦਿੱਤਾ ਸੀ। ਇਹ ਗੱਲ ਈਡੀ ਦੇ ਦਸਤਾਵੇਜ਼ ਵਿੱਚ ਹੈ। ਇਸ ਦਸਤਾਵੇਜ਼ ਤੋਂ ਬਾਅਦ ਈਡੀ ਦੇ ਕੁਝ ਸੀਜ਼ਰ ਮੈਮੋ ਵੀ ਨੱਥੀ ਕੀਤੇ ਗਏ ਹਨ। ਇਸ ਸੀਜ਼ਰ ਮੈਮੋ 'ਚ ਈਡੀ ਖੁਦ ਕਹਿ ਰਿਹਾ ਹੈ ਕਿ ਇਨ੍ਹਾਂ 14 ਫੋਨਾਂ 'ਚੋਂ 4 ਫੋਨ ਉਸ ਕੋਲ ਹਨ। ਇਸ ਦੇ ਨਾਲ ਹੀ ਸੀ.ਬੀ.ਆਈ. ਜਿਸ 'ਚ ਕਿਹਾ ਗਿਆ ਹੈ ਕਿ ਇਨ੍ਹਾਂ 14 ਫੋਨਾਂ 'ਚੋਂ ਇਕ ਫੋਨ ਮ ਸੀ.ਬੀ.ਆਈ. ਕੋਲ ਹੈ। ਜਾਂਚ ਏਜੰਸੀਆਂ ਕਹਿ ਰਹੀਆਂ ਹਨ ਕਿ ਮਨੀਸ਼ ਸਿਸੋਦੀਆ ਨੇ 14 ਮੋਬਾਈਲ ਤੋੜੇ, ਪਰ ਇਨ੍ਹਾਂ ਵਿੱਚੋਂ 5 ਮੋਬਾਈਲ ਈਡੀ-ਸੀਬੀਆਈ ਦੇ ਕਬਜ਼ੇ ਵਿੱਚ ਹਨ।

ਈਡੀ-ਸੀਬੀਆਈ ਨੂੰ ਵੀ ਪਤਾ ਹੈ ਕਿ ਸਾਰੇ 14 ਫ਼ੋਨ ਜ਼ਿੰਦਾ ਅਤੇ ਵਰਤੋਂ ਵਿੱਚ ਹਨ - ਅਰਵਿੰਦ ਕੇਜਰੀਵਾਲ

ਸੀਐਮ ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਅਸੀਂ ਬਹੁਤ ਛੋਟੇ ਲੋਕ ਹਾਂ। ਸਾਡੇ ਕੋਲ ਇੰਨੇ ਸਰੋਤ ਨਹੀਂ ਹਨ। ਇਸ ਸੀਮਤ ਸਾਧਨਾਂ ਰਾਹੀਂ ਅਸੀਂ ਪਿਛਲੇ ਡੇਢ ਮਹੀਨੇ ਵਿੱਚ ਜਾਂਚ ਵੀ ਕੀਤੀ ਹੈ। ਸਾਡੀ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ 14 ਮੋਬਾਈਲ ਫ਼ੋਨਾਂ ਵਿੱਚੋਂ 5 ਸੀਬੀਆਈ-ਈਡੀ ਕੋਲ ਹਨ ਅਤੇ ਬਾਕੀ 9 ਮੋਬਾਈਲਾਂ ਵਿੱਚੋਂ ਜ਼ਿਆਦਾਤਰ ਜ਼ਿੰਦਾ ਹਨ। ਕੋਈ ਨਾ ਕੋਈ ਇਨ੍ਹਾਂ ਮੋਬਾਈਲਾਂ ਦੀ ਵਰਤੋਂ ਕਰ ਰਿਹਾ ਹੈ। ਇਹ ਸਾਰੇ ਮੋਬਾਈਲ ਮਨੀਸ਼ ਸਿਸੋਦੀਆ ਦੇ ਨਹੀਂ ਹਨ। ਇਹ ਬਿਲਕੁੱਲ ਸੱਚ ਹੈ ਕਿ ਇਹ ਸਾਰੇ ਫ਼ੋਨ ਵਰਤੋਂ ਵਿੱਚ ਹਨ, ਇਸ ਬਾਰੇ ਈਡੀ ਅਤੇ ਸੀਬੀਆਈ ਨੂੰ ਪਤਾ ਹੈ। ਈਡੀ-ਸੀਬੀਆਈ ਨੇ ਹਲਫ਼ਨਾਮੇ 'ਤੇ ਝੂਠ ਬੋਲ ਕੇ ਅਦਾਲਤ ਨੂੰ ਗੁੰਮਰਾਹ ਕੀਤਾ ਅਤੇ ਅਦਾਲਤ ਦੇ ਸਾਹਮਣੇ ਝੂਠੇ ਸਬੂਤ ਪੇਸ਼ ਕੀਤੇ। ਕਿਉਂਕਿ ਇੱਥੇ ਕੋਈ ਸ਼ਰਾਬ ਘੁਟਾਲਾ ਨਹੀਂ ਹੈ। ਸੀਬੀਆਈ-ਈਡੀ ਨੂੰ ਹੁਣ ਤੱਕ ਕੁਝ ਨਹੀਂ ਮਿਲਿਆ। ਇਸੇ ਲਈ ਜਾਂਚ ਏਜੰਸੀਆਂ ਨੇ ਝੂਠ ਬੋਲ ਕੇ ਮਨੀਸ਼ ਸਿਸੋਦੀਆ ਨੂੰ ਫਸਾਉਣ ਦੀ ਕੋਸ਼ਿਸ਼ ਕੀਤੀ।

ਈਡੀ ਚੰਦਨ ਰੈਡੀ ਤੋਂ ਅਜਿਹਾ ਕੀ ਕਹਾਉਣਾ ਚਾਹੁੰਦੀ ਹੈ ਕਿ ਉਸ ਦੀ ਇੰਨੀ ਕੁੱਟਮਾਰ ਕੀਤੀ ਗਈ ਕਿ ਉਸ ਦੇ ਕੰਨ ਦੇ ਪਰਦੇ ਵੀ ਫਟ ਗਏ? - ਅਰਵਿੰਦ ਕੇਜਰੀਵਾਲ

ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਇਹ ਜਾਂਚ ਏਜੰਸੀਆਂ ਹਰ ਰੋਜ਼ ਕਿਸੇ ਨਾ ਕਿਸੇ ਨੂੰ ਫੜਦੀਆਂ ਹਨ ਅਤੇ ਤਸ਼ੱਦਦ, ਧਮਕੀਆਂ, ਮਾਨਸਿਕ-ਸਰੀਰਕ ਪਰੇਸ਼ਾਨੀ ਦੇ ਕੇ ਅਤੇ ਥਰਡ ਡਿਗਰੀ ਦੇ ਕੇ ਕੇਜਰੀਵਾਲ, ਮਨੀਸ਼ ਸਿਸੋਦੀਆ ਦਾ ਨਾਮ ਲੈਣ ਲਈ ਦਬਾਅ ਬਣਾਇਆ ਜਾ ਰਿਹਾ ਹੈ। ਕੋਈ ਚੰਦਨ ਰੈਡੀ ਹਨ। ਮੈਂ ਉਹਨਾਂ ਨੂੰ ਨਹੀਂ ਜਾਣਦਾ। ਚੰਦਨ ਰੈਡੀ ਦੀ ਮੈਡੀਕਲ ਰਿਪੋਰਟ ਨੂੰ ਜਨਤਕ ਕਰਦੇ ਹੋਏ ਮੁੱਖ ਮੰਤਰੀ ਨੇ ਕਿਹਾ ਕਿ ਮੈਡੀਕਲ ਰਿਪੋਰਟ ਵਿੱਚ ਲਿਖਿਆ ਹੈ ਕਿ ਮਰੀਜ਼ ਚੰਦਨ ਰੈਡੀ ਨੇ ਕਿਹਾ ਕਿ 16 ਅਤੇ 17 ਸਤੰਬਰ 2022 ਨੂੰ ਈਡੀ ਨੇ ਉਸ ਦੇ ਦੋਵੇਂ ਕੰਨਾਂ 'ਤੇ ਕੁੱਟਮਾਰ ਕੀਤੀ ਸੀ। ਇਸ ਕਾਰਨ ਉਸ ਦੇ ਕੰਨ ਦੇ ਪਰਦੇ ਫਟ ਗਏ ਅਤੇ ਉਹ ਸੁਣਨ ਤੋਂ ਅਸਮਰੱਥ ਹੈ। ਮੁੱਖ ਮੰਤਰੀ ਨੇ ਸਵਾਲ ਉਠਾਇਆ ਕਿ ਈਡੀ ਚੰਦਨ ਰੈਡੀ ਤੋਂ ਕੀ ਕਹਾਉਣਾ ਚਾਹੁੰਦੀ ਸੀ ਅਤੇ ਉਸ 'ਤੇ ਇਹ ਕਹਿਣ ਲਈ ਕੀ ਦਬਾਅ ਪਾਇਆ ਜਾ ਰਿਹਾ ਸੀ ਕਿ ਈਡੀ ਨੇ ਉਸ ਨੂੰ ਇੰਨਾ ਕੁੱਟਿਆ ਕਿ ਉਸ ਦੇ ਕੰਨਾਂ ਦੇ ਪਰਦੇ ਫਟ ਗਏ। ਕਿਸ ਕਾਗਜ਼ 'ਤੇ ਚੰਦਨ ਰੈਡੀ ਨੂੰ ਦਸਤਖਤ ਕਰਨ ਲਈ ਕਿਹਾ ਜਾ ਰਿਹਾ ਹੈ ਅਤੇ ਜਦੋਂ ਉਹ ਝੂਠ ਬੋਲਣ ਤੋਂ ਇਨਕਾਰ ਕਰਦਾ ਹੈ ਤਾਂ ਈਡੀ ਨੇ ਉਸ ਦੀ ਕੁੱਟਮਾਰ ਕੀਤੀ।

ਜਿੱਥੇ ਕੋਈ ਘਪਲਾ ਨਹੀਂ ਹੋਇਆ, ਉੱਥੇ ਲੋਕਾਂ ਨੂੰ ਡਰਾ ਧਮਕਾ ਕੇ ਬਿਆਨ ਲਿਖਣ ਲਈ ਕਿਹਾ ਜਾ ਰਿਹਾ ਹੈ, ਮੋਦੀ ਜੀ, ਇਹ ਕੀ ਚੱਲ ਰਿਹਾ ਹੈ?- ਅਰਵਿੰਦ ਕੇਜਰੀਵਾਲ

ਸੀਐਮ ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਕੋਈ ਅਰੁਣ ਪਿਲੱਈ ਹੈ। ਉਨ੍ਹਾਂ ਨੂੰ ਧਮਕੀਆਂ ਦਿੱਤੀਆਂ ਗਈਆਂ ਅਤੇ ਤਸੀਹੇ ਦਿੱਤੇ ਗਏ ਅਤੇ ਕੁਝ ਲਿਖਣ ਲਈ ਮਜਬੂਰ ਕੀਤਾ ਗਿਆ। ਦੋ-ਚਾਰ ਦਿਨਾਂ ਬਾਅਦ ਅਰੁਣ ਪਿਲੱਈ ਨੇ ਅਦਾਲਤ ਵਿੱਚ ਬਿਆਨ ਦਿੱਤਾ ਕਿ ਮੇਰਾ ਬਿਆਨ ਤਸ਼ੱਦਦ ਕਰਕੇ ਲਿਆ ਗਿਆ ਹੈ। ਇਸੇ ਤਰ੍ਹਾਂ ਸਮੀਰ ਮਹਿੰਦਰੂ ਤੋਂ ਤਸ਼ੱਦਦ ਕਰਕੇ ਕਬੂਲਨਾਮਾ ਹਾਸਲ ਕੀਤਾ ਗਿਆ। ਸਮੀਰ ਮਹਿੰਦਰੂ ਨੇ ਵੀ ਆਪਣਾ ਬਿਆਨ ਵਾਪਸ ਲੈ ਲਿਆ ਹੈ। ਤਸ਼ੱਦਦ ਕਰਕੇ ਮਨਸਵਾਨੀ ਪ੍ਰਭੁਨੇ ਅਤੇ ਭੂਸ਼ਣ ਬੇਲਾਗਵੀ ਤੋਂ ਬਿਆਨ ਲਏ ਗਏ, ਉਨ੍ਹਾਂ ਨੇ ਵੀ ਆਪਣੇ ਬਿਆਨ ਵਾਪਸ ਲੈ ਲਏ। ਇਸ ਤੋਂ ਇਲਾਵਾ ਪਤਾ ਨਹੀਂ ਕਿੰਨੇ ਲੋਕ ਹਨ, ਜਿਨ੍ਹਾਂ ਦੇ ਬਿਆਨ ਤਸ਼ੱਦਦ ਤੋਂ ਬਾਅਦ ਲਏ ਗਏ ਸਨ। ਉਹ ਉਨ੍ਹਾਂ ਲੋਕਾਂ ਨੂੰ ਕੁੱਟਦੇ ਅਤੇ ਤਸੀਹੇ ਦੇ ਰਹੇ ਹਨ। ਇੱਕ ਵਿਅਕਤੀ ਅਜਿਹਾ ਵੀ ਹੈ ਜਿਸ ਨੂੰ ਈਡੀ ਨੇ ਇੱਕ ਕਮਰੇ ਵਿੱਚ ਬਿਠਾਇਆ ਅਤੇ ਉਸਦੀ ਪਤਨੀ ਅਤੇ ਉਸਦੇ ਪਿਤਾ ਨੂੰ ਦੂਜੇ ਕਮਰੇ ਵਿੱਚ ਬਿਠਾਇਆ। ਅਧਿਕਾਰੀ ਉਸ ਨੂੰ ਕਾਗਜ਼ 'ਤੇ ਦਸਤਖਤ ਕਰਨ ਲਈ ਕਹਿੰਦੇ ਹਨ, ਨਹੀਂ ਤਾਂ ਉਹ ਉਸਦੀ ਪਤਨੀ ਅਤੇ ਪਿਤਾ ਨੂੰ ਵੀ ਜੇਲ੍ਹ ਭੇਜ ਦੇਣਗੇ। ਮੁੱਖ ਮੰਤਰੀ ਨੇ ਪ੍ਰਧਾਨ ਮੰਤਰੀ ਨੂੰ ਪੁੱਛਿਆ ਕਿ ਕੀ ਚੱਲ ਰਿਹਾ ਹੈ? ਜਿੱਥੇ ਕੋਈ ਘਪਲਾ ਨਹੀਂ ਹੋਇਆ, ਉੱਥੇ ਲੋਕਾਂ ਨੂੰ ਧਮਕੀਆਂ ਅਤੇ ਕੁੱਟਮਾਰ ਕਰਕੇ ਬਿਆਨ ਲਿਖਣ ਲਈ ਮਜਬੂਰ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਇੱਕ ਆਦਮੀ ਦੀਆਂ ਦੋ ਜਵਾਨ ਧੀਆਂ ਹਨ। ਉਸ ਵਿਅਕਤੀ ਨੂੰ ਕਿਹਾ ਗਿਆ ਕਿ ਦੇਖਦੇ ਹਾਂ ਕਿ ਤੁਹਾਡੀ ਧੀ ਕੱਲ੍ਹ ਨੂੰ ਕਾਲਜ ਕਿਵੇਂ ਪਹੁੰਚਦੀ ਹੈ? ਇਕ ਵਿਅਕਤੀ ਦੇ ਵਕੀਲ ਨੇ ਅਦਾਲਤ 'ਚ ਖੜ੍ਹੇ ਹੋ ਕੇ ਕਿਹਾ ਕਿ ਸਾਡੇ ਮੁਵੱਕਿਲ 'ਤੇ ਦਿੱਲੀ ਦੇ ਸਿਆਸਤਦਾਨਾਂ ਦੇ ਨਾਂ ਲੈਣ ਲਈ ਦਬਾਅ ਪਾਇਆ ਜਾ ਰਿਹਾ ਹੈ। ਜਾਂਚ ਏਜੰਸੀਆਂ ਵੱਲੋਂ ਇਹੀ ਜਾਂਚ ਕੀਤੀ ਜਾ ਰਹੀ ਹੈ।

ਈਡੀ-ਸੀਬੀਆਈ ਨੂੰ ਅਜੇ ਤੱਕ ਕੁਝ ਨਹੀਂ ਮਿਲਿਆ, ਪੈਸਾ ਤਾਂ ਉਦੋਂ ਹੀ ਮਿਲੇਗਾ ਜਦੋਂ ਰਿਸ਼ਵਤ ਦਿੱਤੀ ਜਾਂ ਲਈ ਹੋਵੇ - ਅਰਵਿੰਦ ਕੇਜਰੀਵਾਲ

ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਇੱਕ ਸਾਲ ਦੀ ਜਾਂਚ ਤੋਂ ਬਾਅਦ, ਉਹ ਦੋਸ਼ ਲਗਾਉਂਦੇ ਹਨ ਕਿ 100 ਕਰੋੜ ਰੁਪਏ ਦੀ ਰਿਸ਼ਵਤ ਲਈ ਗਈ ਅਤੇ ਦਿੱਤੀ ਗਈ, ਤਾਂ ਉਹ 100 ਕਰੋੜ ਰੁਪਏ ਕਿੱਥੇ ਹਨ? ਹੁਣ ਤੱਕ 400 ਤੋਂ ਵੱਧ ਛਾਪੇਮਾਰੀ ਹੋ ਚੁੱਕੀ ਹੈ ਪਰ ਇੱਕ ਪੈਸਾ ਵੀ ਨਹੀਂ ਮਿਲਿਆ। ਇਹ ਪੈਸਾ ਕਿੱਥੇ ਹੈ? ਜਾਂਚ ਏਜੰਸੀਆਂ ਨੇ ਮਨੀਸ਼ ਸਿਸੋਦੀਆ ਦੇ ਘਰ ਦੇ ਗੱਦੇ ਪਾੜ ਦਿੱਤੇ, ਉਨ੍ਹਾਂ ਦੇ ਪਿੰਡ ਦਾ ਦੌਰਾ ਕੀਤਾ, ਬੈਂਕ ਲਾਕਰਾਂ ਦੀ ਤਲਾਸ਼ੀ ਲਈ, ਪਰ 100 ਕਰੋੜ ਰੁਪਏ 'ਚੋਂ ਕੁਝ ਨਹੀਂ ਮਿਲਿਆ। ਫਿਰ ਦੋਸ਼ ਲਾਇਆ ਕਿ ਗੋਆ ਵਿਧਾਨ ਸਭਾ ਚੋਣਾਂ ਵਿੱਚ 100 ਕਰੋੜ ਰੁਪਏ ਖਰਚ ਕੀਤੇ ਗਏ। ਇਨ੍ਹਾਂ ਲੋਕਾਂ ਨੇ ਗੋਆ 'ਚ ਸਾਡਾ ਕੰਮ ਕਰਨ ਵਾਲੇ ਸਾਰੇ ਵੈਂਡਰਸ 'ਤੇ ਛਾਪੇਮਾਰੀ ਕੀਤੀ ਹੈ ਅਤੇ ਉਨ੍ਹਾਂ ਦੇ ਬਿਆਨ ਵੀ ਲਏ ਹਨ ਪਰ ਉਥੋਂ ਵੀ ਕੁਝ ਨਹੀਂ ਮਿਲਿਆ। ਅਸੀਂ ਸਾਰਿਆਂ ਨੂੰ ਚੈੱਕਾਂ ਰਾਹੀਂ ਭੁਗਤਾਨ ਕੀਤਾ ਹੈ। ਇਸ ਤੋਂ ਇਲਾਵਾ ਚੋਣਾਂ ਦਾ ਸਾਰਾ ਹਿਸਾਬ-ਕਿਤਾਬ ਵੀ ਚੋਣ ਕਮਿਸ਼ਨ ਨੂੰ ਦਿੱਤਾ ਗਿਆ ਹੈ, ਉੱਥੇ ਵੀ ਉਨ੍ਹਾਂ ਨੂੰ ਕੁਝ ਨਹੀਂ ਮਿਲਿਆ। ਗੋਆ ਚੋਣਾਂ 'ਚ ਵੀ ਜਾਂਚ ਏਜੰਸੀਆਂ ਨੂੰ ਕੁਝ ਨਹੀਂ ਮਿਲਿਆ। ਜੇਕਰ ਰਿਸ਼ਵਤ ਲਈ ਸੀ ਤਾਂ ਪੈਸਾ ਕਿੱਥੇ ਗਿਆ? ਜਾਂਚ ਏਜੰਸੀਆਂ ਨੂੰ ਪੈਸੇ ਉਦੋਂ ਹੀ ਮਿਲਣਗੇ ਜਦੋਂ ਰਿਸ਼ਵਤ ਲਈ ਗਈ ਅਤੇ ਦਿੱਤੀ ਗਈ ਹੈ।

ਉਹ ਇਲਜ਼ਾਮ ਲਗਾ ਰਹੇ ਹਨ ਕਿ ਗੋਆ ਚੋਣਾਂ ਲਈ 100 ਕਰੋੜ ਰੁਪਏ ਦਿੱਤੇ ਗਏ, ਤਾਂ ਸਬੂਤ ਕਿੱਥੇ ਹੈ? - ਅਰਵਿੰਦ ਕੇਜਰੀਵਾਲ

ਸੀਐਮ ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਹੈ ਕਿ ਮੈਂ ਅੱਜ ਇਸ ਪ੍ਰੈਸ ਕਾਨਫਰੰਸ ਵਿੱਚ ਕਹਿ ਰਿਹਾ ਹਾਂ ਕਿ ਮੈਂ 17 ਸਤੰਬਰ ਦੀ ਰਾਤ ਨੂੰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਇੱਕ ਹਜ਼ਾਰ ਕਰੋੜ ਰੁਪਏ ਦਿੱਤੇ ਸਨ, ਤਾਂ ਕੀ ਉਨ੍ਹਾਂ ਨੂੰ ਇਸ ਅਧਾਰ 'ਤੇ ਗ੍ਰਿਫਤਾਰ ਕੀਤਾ ਜਾਵੇਗਾ। ਮੇਰੇ ਕੋਲ ਦੋਸ਼ ਲਾਉਣ ਲਈ ਕੁਝ ਸਬੂਤ ਹੋਣ, ਤਾਂ ਹੀ ਮੈਂ ਕਹਾਂਗਾ ਕਿ ਮੈਂ ਪ੍ਰਧਾਨ ਮੰਤਰੀ ਨੂੰ ਇਕ ਹਜ਼ਾਰ ਕਰੋੜ ਰੁਪਏ ਦਿੱਤੇ। ਦੇਸ਼ 'ਚ ਇਸ ਤਰ੍ਹਾਂ ਖੜ੍ਹੇ ਹੋ ਕੇ ਕੋਈ ਵੀ ਕੁਝ ਵੀ ਕਹੇ ਤਾਂ ਕੀ ਗ੍ਰਿਫਤਾਰ ਕਰ ਲਿਆ ਜਾਵੇਗਾ। ਉਹ ਵਾਰ-ਵਾਰ ਇਲਜ਼ਾਮ ਲਗਾ ਰਹੇ ਹਨ ਕਿ ਗੋਆ ਚੋਣਾਂ ਲਈ 100 ਕਰੋੜ ਰੁਪਏ ਦਿੱਤੇ ਗਏ ਸਨ, ਇਸ ਦਾ ਸਬੂਤ ਕਿੱਥੇ ਹੈ? ਉਨ੍ਹਾਂ ਕੋਲ ਕੋਈ ਸਬੂਤ ਨਹੀਂ ਹੈ।

ਦਿੱਲੀ ਦੀ ਸ਼ਰਾਬ ਨੀਤੀ ਬਹੁਤ ਪਾਰਦਰਸ਼ੀ ਸੀ, ਜੇਕਰ ਇਸ ਨੂੰ ਲਾਗੂ ਕੀਤਾ ਜਾਂਦਾ ਤਾਂ ਭ੍ਰਿਸ਼ਟਾਚਾਰ ਖਤਮ ਹੋ ਜਾਣਾ ਸੀ, ਪੰਜਾਬ 'ਚ ਵੀ ਇਹੀ ਨੀਤੀ ਲਾਗੂ ਹੈ, ਮਾਲੀਆ 50 ਫੀਸਦੀ ਵਧਿਆ - ਅਰਵਿੰਦ ਕੇਜਰੀਵਾਲ

ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਸ਼ਰਾਬ ਨੀਤੀ ਬਹੁਤ ਹੀ ਪਾਰਦਰਸ਼ੀ ਨੀਤੀ ਸੀ। ਇਸ ਨੀਤੀ ਨੂੰ ਸਹੀ ਢੰਗ ਨਾਲ ਲਾਗੂ ਕਰਨ ਤੋਂ ਬਾਅਦ ਸਮੁੱਚੇ ਸ਼ਰਾਬ ਖੇਤਰ ਵਿੱਚੋਂ ਭ੍ਰਿਸ਼ਟਾਚਾਰ ਦਾ ਖਾਤਮਾ ਹੋ ਜਾਣਾ ਸੀ। ਇਹ ਗੱਲ ਇਸ ਤੱਥ ਤੋਂ ਸਾਬਤ ਹੁੰਦੀ ਹੈ ਕਿ ਜਦੋਂ ਇਹ ਨੀਤੀ ਪੰਜਾਬ ਵਿੱਚ ਲਾਗੂ ਹੋਈ ਤਾਂ ਇਸ ਨੇ ਇੱਕ ਸਾਲ ਦੇ ਅੰਦਰ ਹੀ ਮਾਲੀਏ ਵਿੱਚ 50 ਫੀਸਦੀ ਦਾ ਵਾਧਾ ਕੀਤਾ। ਉਨ੍ਹਾਂ ਇਸ ਨੀਤੀ ਨੂੰ ਦਿੱਲੀ ਦੇ ਅੰਦਰ ਲਾਗੂ ਨਹੀਂ ਹੋਣ ਦਿੱਤਾ। ਮੈਂ ਮੋਦੀ ਜੀ ਨੂੰ ਦੱਸਣਾ ਚਾਹੁੰਦਾ ਹਾਂ ਕਿ ਜੇ ਕੇਜਰੀਵਾਲ ਭ੍ਰਿਸ਼ਟ ਹੈ ਤਾਂ ਇਸ ਦੁਨੀਆਂ ਵਿੱਚ ਕੋਈ ਵੀ ਇਮਾਨਦਾਰ ਨਹੀਂ ਹੈ। ਇੱਥੇ ਮੁੱਦਾ ਸ਼ਰਾਬ ਘੁਟਾਲਾ, ਭ੍ਰਿਸ਼ਟਾਚਾਰ ਅਤੇ ਇਸ ਦੀ ਜਾਂਚ ਦਾ ਨਹੀਂ ਹੈ। ਸਿਰ ਤੋਂ ਪੈਰਾਂ ਤੱਕ ਆਪ ਭ੍ਰਿਸ਼ਟਾਚਾਰ ਵਿੱਚ ਡੁੱਬੇ ਪ੍ਰਧਾਨ ਮੰਤਰੀ ਲਈ ਭ੍ਰਿਸ਼ਟਾਚਾਰ ਮੁੱਦਾ ਕਿਵੇਂ ਹੋ ਸਕਦਾ ਹੈ? ਮਾਰਚ ਦੇ ਆਖ਼ਰੀ ਹਫ਼ਤੇ ਮੈਂ ਵਿਧਾਨ ਸਭਾ ਦੇ ਅੰਦਰ ਉਨ੍ਹਾਂ ਦੇ ਕਈ ਭ੍ਰਿਸ਼ਟਾਚਾਰ ਕੰਮਾਂ ਦੀ ਸੂਚੀ ਦਿੱਤੀ ਸੀ। ਜਿਸ ਦਿਨ ਮੈਂ ਵਿਧਾਨ ਸਭਾ ਵਿੱਚ ਭਾਸ਼ਣ ਦਿੱਤਾ, ਸ਼ਾਮ ਨੂੰ ਸੰਜੇ ਸਿੰਘ ਦਾ ਸੁਨੇਹਾ ਆਇਆ ਕਿ ਅਰਵਿੰਦ ਜੀ ਅਗਲਾ ਨੰਬਰ ਤੁਹਾਡਾ ਹੈ।

ਮੋਦੀ ਜੀ ਦੇ ਖਾਸ ਸਤਿਆਪਾਲ ਮਲਿਕ ਕਹਿ ਰਹੇ ਹਨ ਕਿ ਮੋਦੀ ਜੀ ਨੂੰ ਭ੍ਰਿਸ਼ਟਾਚਾਰ ਦੀ ਕੋਈ ਪਰਵਾਹ ਨਹੀਂ - ਅਰਵਿੰਦ ਕੇਜਰੀਵਾਲ

ਸੱਤਿਆਪਾਲ ਮਲਿਕ ਦੇ ਇੰਟਰਵਿਊ ਦਾ ਹਵਾਲਾ ਦਿੰਦੇ ਹੋਏ ਸੀਐਮ ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਸੱਤਿਆਪਾਲ ਮਲਿਕ ਨੇ ਕਿਹਾ ਕਿ ਮੋਦੀ ਜੀ ਨੂੰ ਭ੍ਰਿਸ਼ਟਾਚਾਰ ਨੂੰ ਲੈ ਕੇ ਕੋਈ ਸੰਕੋਚ ਨਹੀਂ ਹੈ। ਇਹ ਮੈਂ ਨਹੀਂ ਕਹਿ ਰਿਹਾ, ਇਹ ਉਨ੍ਹਾਂ ਦੇ ਆਪਣੇ ਗਵਰਨਰ ਕਹਿ ਰਹੇ ਹਨ। ਸੱਤਿਆਪਾਲ ਮਲਿਕ ਨੂੰ ਮੋਦੀ ਜੀ ਦੇ ਖਾਸ ਲੋਕਾਂ 'ਚ ਗਿਣਿਆ ਜਾਂਦਾ ਸੀ। ਮੋਦੀ ਜੀ ਨੇ ਪਹਿਲਾਂ ਉਨ੍ਹਾਂ ਨੂੰ ਜੰਮੂ-ਕਸ਼ਮੀਰ ਦਾ ਰਾਜਪਾਲ ਬਣਾਇਆ, ਫਿਰ ਗੋਆ, ਮੇਘਾਲਿਆ ਦਾ ਰਾਜਪਾਲ ਬਣਾਇਆ। ਸੱਤਿਆਪਾਲ ਜੀ ਨੇ ਕਿਹਾ ਹੈ ਕਿ ਮੇਰੀ ਮੋਦੀ ਜੀ ਨਾਲ ਹੋਈ ਗੱਲਬਾਤ ਤੋਂ ਮੈਨੂੰ ਪਤਾ ਲੱਗਾ ਹੈ ਕਿ ਮੋਦੀ ਜੀ ਨੂੰ ਭ੍ਰਿਸ਼ਟਾਚਾਰ ਦੀ ਕੋਈ ਪਰਵਾਹ ਨਹੀਂ ਹੈ। ਇਸੇ ਇੰਟਰਵਿਊ ਵਿੱਚ ਸੱਤਿਆਪਾਲ ਮਲਿਕ ਨੇ ਇਹ ਵੀ ਕਿਹਾ ਹੈ ਕਿ ਕੁਝ ਮੁੱਖ ਮੰਤਰੀ ਅਜਿਹੇ ਹਨ ਜੋ ਭ੍ਰਿਸ਼ਟਾਚਾਰ ਕਰਕੇ ਬਹੁਤ ਪੈਸਾ ਇਕੱਠਾ ਕਰਦੇ ਹਨ, ਪਰ ਮੁੱਖ ਮੰਤਰੀ ਉਹ ਸਾਰਾ ਪੈਸਾ ਆਪਣੇ ਕੋਲ ਨਹੀਂ ਰੱਖਦੇ। ਉਹ ਪੈਸੇ ਉੱਪਰ ਭੇਜਦੇ ਹਨ ਅਤੇ ਉਥੋਂ ਉਹ ਪੈਸਾ ਆਪਣੇ ਦੋਸਤਾਂ ਦੀਆਂ ਕੰਪਨੀਆਂ ਵਿੱਚ ਨਿਵੇਸ਼ ਕਰਦੇ ਹਨ। ਮੈਂ ਵਿਧਾਨ ਸਭਾ ਵਿੱਚ ਵੀ ਕੁਝ ਅਜਿਹਾ ਹੀ ਕਿਹਾ ਸੀ। ਉਨ੍ਹਾਂ ਨੇ ਮੇਰੀ ਗੱਲ ਨਹੀਂ ਸੁਣੀ ਪਰ ਹੁਣ ਸਤਿਆਪਾਲ ਮਲਿਕ, ਜੋ ਉਨ੍ਹਾਂ ਦੇ ਗਵਰਨਰ ਸਨ, ਇਹ ਕਹਿ ਰਹੇ ਹਨ। ਇਸ ਲਈ ਭ੍ਰਿਸ਼ਟਾਚਾਰ ਅਜਿਹੇ ਵਿਅਕਤੀ ਲਈ ਮੁੱਦਾ ਨਹੀਂ ਹੋ ਸਕਦਾ, ਜੋ ਇੰਨਾ ਭ੍ਰਿਸ਼ਟਾਚਾਰ ਕਰ ਰਿਹਾ ਹੈ।

ਜਦੋਂ ਮੋਦੀ ਜੀ ਨੂੰ ਗੁਜਰਾਤ ਦੇ ਸਰਕਾਰੀ ਸਕੂਲ ਵਿੱਚ ਫੋਟੋ ਖਿਚਵਾਉਣ ਲਈ ਜਾਣਾ ਪਿਆ ਤਾਂ ਉਨ੍ਹਾਂ ਨੂੰ ਆਰਜ਼ੀ ਕਲਾਸਰੂਮ ਬਣਾਉਣਾ ਪਿਆ - ਅਰਵਿੰਦ ਕੇਜਰੀਵਾਲ

ਸੀਐਮ ਅਰਵਿੰਦ ਕੇਜਰੀਵਾਲ ਨੇ ਪ੍ਰਧਾਨ ਮੰਤਰੀ ਨੂੰ ਆਮ ਆਦਮੀ ਪਾਰਟੀ ਦੇ ਪਿੱਛੇ ਹੋਣ ਦਾ ਕਾਰਨ ਦੱਸਿਆ ਅਤੇ ਕਿਹਾ ਕਿ ਭਾਰਤ ਦੇ 75 ਸਾਲਾਂ ਦੇ ਇਤਿਹਾਸ ਵਿੱਚ ਕਿਸੇ ਇੱਕ ਪਾਰਟੀ ਨੂੰ ਇੰਨਾ ਬੁਰੀ ਤਰ੍ਹਾਂ ਨਾਲ ਨਿਸ਼ਾਨਾ ਨਹੀਂ ਬਣਾਇਆ ਗਿਆ, ਜਿਸ ਤਰ੍ਹਾਂ ਇਹ ਲੋਕ ਆਮ ਆਦਮੀ ਪਾਰਟੀ ਨੂੰ ਨਿਸ਼ਾਨਾ ਬਣਾ ਰਹੇ ਹਨ। ਪਾਰਟੀ ਦੇ ਦੋ ਅਤੇ ਤਿੰਨ ਨੰਬਰ ਦੇ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ। ਉਨ੍ਹਾਂ ਨੂੰ ਗ੍ਰਿਫਤਾਰ ਕਰਨ ਪਿੱਛੇ ਉਨ੍ਹਾਂ ਦਾ ਮਕਸਦ ਮੇਰੇ ਤੱਕ ਪਹੁੰਚਣਾ ਹੈ। ਇਸ ਲਈ ਹੁਣ ਉਹ ਮੇਰਾ ਪਿੱਛਾ ਕਰ ਰਹੇ ਹਨ ਅਤੇ ਮੇਰੇ ਤੱਕ ਪਹੁੰਚਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਆਮ ਆਦਮੀ ਪਾਰਟੀ ਨੂੰ ਇੰਨਾ ਨਿਸ਼ਾਨਾ ਬਣਾਉਣ ਦਾ ਕਾਰਨ ਇਹ ਹੈ ਕਿ 75 ਸਾਲਾਂ ਬਾਅਦ ਆਮ ਆਦਮੀ ਪਾਰਟੀ ਨੇ ਇਸ ਦੇਸ਼ ਨੂੰ ਅਜਿਹੀ ਉਮੀਦ ਦਿੱਤੀ ਹੈ, ਜੋ ਕੋਈ ਹੋਰ ਪਾਰਟੀ ਨਹੀਂ ਦੇ ਸਕੀ। ਗੁਜਰਾਤ ਵਿੱਚ ਭਾਜਪਾ 30 ਸਾਲਾਂ ਤੋਂ ਸੱਤਾ ਵਿੱਚ ਹੈ। ਇਸ ਵਿੱਚ ਪ੍ਰਧਾਨ ਮੰਤਰੀ ਮੋਦੀ ਖੁਦ 12 ਸਾਲ ਤੱਕ ਉੱਥੇ ਮੁੱਖ ਮੰਤਰੀ ਰਹੇ। ਪਿਛਲੇ 30 ਸਾਲਾਂ ਵਿੱਚ ਇਹ ਲੋਕ ਸਰਕਾਰੀ ਸਕੂਲਾਂ ਨੂੰ ਠੀਕ ਨਹੀਂ ਕਰਵਾ ਸਕੇ।

ਜਦੋਂ ਮੋਦੀ ਜੀ ਨੂੰ ਆਪਣੀ ਫੋਟੋ ਕਲਿੱਕ ਕਰਵਾਉਣ ਲਈ ਸਰਕਾਰੀ ਸਕੂਲ ਜਾਣਾ ਪਿਆ ਤਾਂ ਉਨ੍ਹਾਂ ਨੂੰ ਟੈਂਟ ਦੇ ਅੰਦਰ ਆਰਜ਼ੀ ਕਲਾਸ ਰੂਮ ਬਣਾਉਣਾ ਪਿਆ। ਇਹ ਲੋਕ ਸਰਕਾਰੀ ਸਕੂਲ ਨੂੰ ਵੀ ਫੋਟੋ ਖਿਚਵਾਉਣ ਦੇ ਲਾਇਕ ਨਹੀਂ ਬਣਾ ਸਕੇ। ਦੂਜੇ ਪਾਸੇ ਸਿਰਫ਼ ਪੰਜ ਸਾਲਾਂ ਵਿੱਚ ਹੀ ਅਸੀਂ ਦਿੱਲੀ ਦੇ ਸਾਰੇ ਸਰਕਾਰੀ ਸਕੂਲਾਂ ਦੀ ਕਾਇਆ ਕਲਪ ਕਰ ਦਿੱਤੀ ਹੈ। ਅਸੀਂ ਸਾਰੇ ਸਰਕਾਰੀ ਸਕੂਲ ਪੱਕੇ ਕਰਵਾ ਦਿੱਤੇ। ਆਮ ਆਦਮੀ ਪਾਰਟੀ ਨੇ ਇਸ ਦੇਸ਼ ਦੇ ਲੋਕਾਂ ਨੂੰ ਇੱਕ ਉਮੀਦ ਦਿੱਤੀ ਹੈ ਕਿ ਸਿਰਫ "ਆਪ" ਹੀ ਉਹਨਾਂ ਦੀ ਗਰੀਬੀ ਦੂਰ ਕਰ ਸਕਦੀ ਹੈ, ਉਹਨਾਂ ਦੇ ਬੱਚਿਆਂ ਨੂੰ ਪੜ੍ਹਾ-ਲਿਖਾ ਸਕਦੀ ਹੈ ਅਤੇ ਉਹਨਾਂ ਨੂੰ ਰੁਜ਼ਗਾਰ ਦੇ ਸਕਦੀ ਹੈ। ਪ੍ਰਧਾਨ ਮੰਤਰੀ ਲੋਕਾਂ ਦੀ ਇਸ ਉਮੀਦ ਨੂੰ ਕੁਚਲਣਾ ਚਾਹੁੰਦੇ ਹਨ। ਪ੍ਰਧਾਨ ਮੰਤਰੀ ਨਹੀਂ ਚਾਹੁੰਦੇ ਕਿ ਲੋਕਾਂ ਦੀ ਇਹ ਉਮੀਦ ਅੱਗੇ ਵਧੇ ਕਿਉਂਕਿ ਹੁਣ ਤੱਕ ਇਹ ਸਾਰੀਆਂ ਪਾਰਟੀਆਂ ਮਿਲ ਕੇ ਲੁੱਟ ਰਹੀਆਂ ਸਨ। ਜੇਕਰ ਉਨ੍ਹਾਂ ਨੂੰ ਸਕੂਲ ਅਤੇ ਹਸਪਤਾਲ ਬਣਾਉਣੇ ਪਏ ਤਾਂ ਉਨ੍ਹਾਂ ਕੋਲ ਲੁੱਟਣ ਲਈ ਕੋਈ ਪੈਸਾ ਨਹੀਂ ਬਚੇਗਾ। ਕੱਲ੍ਹ ਸੀਬੀਆਈ ਨੇ ਮੈਨੂੰ ਬੁਲਾਇਆ ਹੈ, ਮੈਂ ਜਾਵਾਂਗਾ। ਮੈਂ ਪ੍ਰਧਾਨ ਮੰਤਰੀ ਨੂੰ ਦੱਸਣਾ ਚਾਹਾਂਗਾ ਕਿ ਜੇ ਕੇਜਰੀਵਾਲ ਚੋਰ ਅਤੇ ਭ੍ਰਿਸ਼ਟ ਵਿਅਕਤੀ ਹੈ ਤਾਂ ਇਸ ਦੁਨੀਆਂ ਵਿੱਚ ਕੋਈ ਇਮਾਨਦਾਰ ਨਹੀਂ ਹੈ।