ਕਾਂਗਰਸ ਦੇ ਮੀਤ ਪ੍ਰਧਾਨ ਰਾਹੁਲ ਗਾਂਧੀ ਨੇ ਕਿਹਾ ਕਿ ਨੋਟਬੰਦੀ ਅਤੇ ਜੀਐਸਟੀ ਕਾਰਨ ਭਾਰਤ ਵਿਚ ਵਪਾਰ ਕਰਨਾ ਕਾਫ਼ੀ ਮੁਸ਼ਕਲ ਹੋ ਗਿਆ ਹੈ।
ਜੰਬੂਸਰ (ਗੁਜਰਾਤ), 1 ਨਵੰਬਰ: ਕਾਂਗਰਸ ਦੇ ਮੀਤ ਪ੍ਰਧਾਨ ਰਾਹੁਲ ਗਾਂਧੀ ਨੇ ਕਿਹਾ ਕਿ ਨੋਟਬੰਦੀ ਅਤੇ ਜੀਐਸਟੀ ਕਾਰਨ ਭਾਰਤ ਵਿਚ ਵਪਾਰ ਕਰਨਾ ਕਾਫ਼ੀ ਮੁਸ਼ਕਲ ਹੋ ਗਿਆ ਹੈ। ਰਾਹੁਲ ਗਾਂਧੀ ਦਾ ਇਹ ਬਿਆਨ ਵਿਸ਼ਵ ਬੈਂਕ ਦੀ ਉਸ ਰੀਪੋਰਟ ਦੇ ਉਲਟ ਹੈ ਜਿਸ ਵਿਚ ਵਿਸ਼ਵ ਬੈਂਕ ਨੇ ਕਿਹਾ ਹੈ ਕਿ ਆਸਾਨੀ ਨਾਲ ਵਪਾਰ ਕਰਨ ਵਾਲੇ ਦੇਸ਼ਾਂ ਵਿਚ ਸੂਚੀ ਵਿਚ ਭਾਰਤ 30 ਅੰਕ ਉਪਰ ਆ ਗਿਆ ਹੈ। ਰੀਪੋਰਟ ਕਲ ਹੀ ਜਾਰੀ ਹੋਈ ਹੈ।ਵਿੱਤ ਮੰਤਰੀ ਅਰੁਣ ਜੇਤਲੀ ਨੂੰ ਨਿਸ਼ਾਨਾ ਬਣਾਉਂਦਿਆਂ ਰਾਹੁਲ ਨੇ ਕਿਹਾ ਕਿ ਆਉਣ ਵਾਲੇ ਸਮੇਂ ਵਿਚ ਸਾਰਾ ਦੇਸ਼ ਰੌਲਾ ਪਾ ਕੇ ਕਹੇਗਾ ਕਿ ਭਾਰਤ ਵਿਚ ਵਪਾਰ ਕਰਨਾ ਆਸਾਨ ਨਹੀਂ। ਜੰਬੂਸਰ ਦੇ ਪਿੰਡ ਭਰੂਚ ਤੋਂ ਅਪਣੀ ਚੋਣ ਮੁਹਿੰਮ ਸ਼ੁਰੂ ਕਰਦਿਆਂ ਰਾਹੁਲ ਨੇ ਜਨਤਕ ਰੈਲੀ ਦੌਰਾਨ ਕਿਹਾ ਕਿ ਕਲ ਅਰੁਣ ਜੇਤਲੀ ਨੇ ਕਿਹਾ ਸੀ ਕਿ ਕਈ ਵਿਦੇਸ਼ੀ ਸੰਸਥਾਵਾਂ ਨੇ ਕਿਹਾ ਹੈ ਕਿ ਭਾਰਤ ਵਿਚ ਵਪਾਰ ਕਰਨ ਦੀ ਸਥਿਤੀ ਵਿਚ ਕਾਫ਼ੀ ਸੁਧਾਰ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਜੇਤਲੀ ਅਪਣੇ ਦਫ਼ਤਰ ਵਿਚ ਬੈਠ ਕੇ ਵਿਦੇਸ਼ੀਆਂ ਦੇ ਕਹਿਣ ਦਾ ਭਰੋਸਾ ਕਰਦੇ ਹਨ। ਰਾਹੁਲ ਨੇ ਕਿਹਾ ਕਿ ਜੇਤਲੀ 5-10 ਮਿੰਟ ਛੋਟੇ ਵਪਾਰੀਆਂ ਨੂੰ ਮਿਲ ਕੇ ਇਹ ਪੁੱਛਣ ਕਿ ਕੀ ਭਾਰਤ ਵਿਚ ਵਪਾਰ ਕਰਨਾ ਅਸਲ ਵਿਚ ਹੀ ਆਸਾਨ ਹੋਇਆ ਹੈ?
ਗਾਂਧੀ ਨੇ ਕਿਹਾ ਕਿ ਸਾਰਾ ਦੇਸ਼ ਰੌਲਾ ਪਾ ਕੇ ਕਹੇਗਾ ਕਿ ਦੇਸ਼ ਵਿਚ ਆਸਾਨੀ ਨਾਲ ਵਪਾਰ ਕਰਨ ਵਾਲੀ ਗੱਲ ਹੀ ਨਹੀਂ ਰਹੀ, ਸਰਕਾਰ ਨੇ ਇਸ ਨੂੰ ਖ਼ਤਮ ਕਰ ਦਿਤਾ ਹੈ, ਸਰਕਾਰ ਦੀ ਨੋਟਬੰਦੀ ਅਤੇ ਜੀਐਸਟੀ ਨੇ ਆਸਾਨੀ ਨਾਲ ਵਪਾਰ ਕਰਨਾ ਖ਼ਤਮ ਕਰ ਦਿਤਾ ਹੈ। ਵਿਸ਼ਵ ਬੈਂਕ ਦੀ ਰੀਪੋਰਟ ਅਨੁਸਾਰ ਆਸਾਨੀ ਨਾਲ ਵਪਾਰ ਕਰਨ ਦੀ ਸੂਚੀ ਵਿਚ ਭਾਰਤ ਇਸ ਸਾਲ 130ਵੇਂ ਨੰਬਰ ਤੋਂ 100ਵੇਂ ਨੰਬਰ 'ਤੇ ਆ ਗਿਆ ਹੈ। ਵਿਸ਼ਵ ਬੈਂਕ ਦੀ ਇਹ ਰੀਪੋਰਟ ਆਉਣ ਤੋਂ ਤੁਰਤ ਬਾਅਦ ਪ੍ਰੈੱਸ ਕਾਨਫ਼ਰੰਸ ਕਰ ਕੇ ਜੇਤਲੀ ਨੇ ਕਿਹਾ ਕਿ ਢਾਂਚਾਗਤ ਸੁਧਾਰਾਂ ਦੇ ਮਾਮਲੇ ਵਿਚ ਭਾਰਤ ਵੱਡੇ ਦੇਸ਼ਾਂ ਵਿਚ ਸ਼ਾਮਲ ਹੋ ਗਿਆ ਹੈ। ਉਨ੍ਹਾਂ ਕਿਹਾ ਕਿ 2014 ਵਿਚ ਭਾਰਤ ਇਸ ਸੂਚੀ ਵਿਚ 142ਵੇਂ ਸਥਾਨ 'ਤੇ ਸੀ ਅਤੇ ਬਾਅਦ ਵਿਚ ਸੁਧਾਰ ਕਰਦਿਆਂ ਭਾਰਤ ਇਸ ਸੂਚੀ ਵਿਚ 130ਵੇਂ ਸਥਾਨ 'ਤੇ ਆ ਗਿਆ ਸੀ ਅਤੇ ਤਾਜ਼ਾ ਰੀਪੋਰਟ ਵਿਚ ਭਾਰਤ 100ਵੇਂ ਸਥਾਨ 'ਤੇ ਆ ਗਿਆ ਹੈ। (ਪੀ.ਟੀ.ਆਈ.)
