ਬੁੱਧਵਾਰ ਸਵੇਰੇ ਕਰੀਬ ਸਾਢੇ 10 ਵਜੇ ਇੱਕ ਗਰਭਵਤੀ ਔਰਤ ਸੜਕ ਕੰਡੇ ਦਰਦ ਨਾਲ ਤੜਪ ਰਹੀ ਸੀ...
ਬਠਿੰਡਾ: ਬੁੱਧਵਾਰ ਸਵੇਰੇ ਕਰੀਬ ਸਾਢੇ 10 ਵਜੇ ਇੱਕ ਗਰਭਵਤੀ ਔਰਤ ਸੜਕ ਕਿਨਾਰੇ ਦਰਦ ਨਾਲ ਤੜਪ ਰਹੀ ਸੀ। ਇਨਸਾਨੀਅਤ ਇਸ ਕਦਰ ਮਰ ਗਈ ਕਿ ਲੋਕ ਔਰਤ ਦੀ ਮੱਦਦ ਕਰਨ ਦੀ ਬਜਾਏ ਵੀਡੀਓ ਹੀ ਬਣਾਉਂਦੇ ਰਹੇ ਪਰ ਕਿਸੇ ਨੂੰ ਉਸ ‘ਤੇ ਤਰਸ ਨਾ ਆਇਆ। ਸ਼ਰਮਸਾਰ ਕਰਨ ਵਾਲੀ ਗੱਲ ਇਹ ਵੀ ਰਹੀ ਕਿ ਤਮਾਸਾ ਦੇਖ ਰਹੀ ਭੀੜ ਵਿੱਚ ਔਰਤਾਂ ਵੀ ਸ਼ਾਮਲ ਸੀ। ਅਖੀਰ ਕਿਸੇ ਨੇ ਸਹਾਇਤਾ ਕੰਟਰੋਲ ਰੂਮ ਨੂੰ ਘਟਨਾ ਦੀ ਸੂਚਨਾ ਦਿੱਤੀ। ਜਦੋਂ ਤੱਕ ਸਹਾਇਤਾ ਟੀਮ ਦੇ ਮੈਂਬਰ ਘਟਨਾ ਸਥਾਨ ‘ਤੇ ਪੁੱਜੇ, ਤੱਦ ਤੱਕ ਔਰਤ ਨੇ ਉਥੇ ਹੀ ਬੱਚੇ ਨੂੰ ਜਨਮ ਦੇ ਦਿੱਤਾ।
Baby
ਇਸ ਤੋਂ ਸ਼ਰਮਨਾਕ ਗੱਲ ਹੋਰ ਕੀ ਹੋਵੇਗੀ ਕਿ ਸਹਾਇਤਾ ਟੀਮ ਨੂੰ ਸਹਿਯੋਗ ਕਰਨ ਲਈ ਕੋਲ ਖੜੀ ਕੋਈ ਔਰਤ ਵੀ ਬਲਾਉਣ ਦੇ ਬਾਵਜੂਦ ਮੱਦਦ ਲਈ ਅਤੇ ਹਸਪਤਾਲ ਲੈ ਕੇ ਜਾਣ ਲਈ ਵੀ ਤਿਆਰ ਨਹੀਂ ਹੋਈ। ਕਿਸੇ ਤਰ੍ਹਾਂ ਸਹਾਇਤਾ ਟੀਮ ਦੇ ਮੈਂਬਰ ਔਰਤ ਅਤੇ ਨਵਜੰਮੇ ਬੱਚੇ ਨੂੰ ਗੰਭੀਰ ਹਾਲਤ ਵਿੱਚ ਹਸਪਤਾਲ ਲੈ ਕੇ ਪੁੱਜੇ। ਇਨਸਾਨੀਅਤ ਨੂੰ ਸ਼ਰਮਸਾਰ ਕਰਨ ਦੀ ਘਟਨਾ ਬਠਿੰਡੇ ਦੇ ਵਿਸ਼ਾਲ ਨਗਰ ਫੇਜ ਇਕ ਦੀ ਗਲੀ ਨੰਬਰ 1 ਵਿੱਚ ਦੇਖਣ ਨੂੰ ਮਿਲੀ। ਔਰਤ ਰੋਸ਼ਨੀ ਨੇ ਦੱਸਿਆ ਕਿ ਉਸਨੇ ਇੱਕ ਸਾਲ ਪਹਿਲਾਂ ਪਰਵਾਰ ਦੀ ਮਰਜ਼ੀ ਦੇ ਵਿਰੁੱਧ ਬਿਹਾਰ ਨਿਵਾਸੀ ਵਿਕਾਸ ਨਾਲ ਘਰ ਤੋਂ ਭੱਜ ਕੇ ਪ੍ਰੇਮ ਸਬੰਧ ‘ਚ ਵਿਆਹ ਕਰਵਾਇਆ ਸੀ।
baby
ਉਦੋਂ ਤੋਂ ਹੀ ਉਹ ਦੋਨੋਂ ਬਠਿੰਡਾ ਰੇਲਵੇ ਸਟੇਸ਼ਨ ‘ਤੇ ਰਹਿ ਰਹੇ ਹਨ। ਬੁੱਧਵਾਰ ਸਵੇਰੇ ਉਹ ਆਪਣੇ ਪਤੀ ਦੇ ਨਾਲ ਪੈਦਲ ਹੀ ਵਿਸ਼ਾਲ ਨਗਰ ਤੋਂ ਗੁਜ਼ਰ ਰਹੀ ਸੀ। ਅਚਾਨਕ ਹੀ ਔਰਤ ਦੇ ਪੇਟ ‘ਚ ਦਰਦ ਸ਼ੁਰੂ ਹੋ ਗਿਆ। ਉਹ ਸੜਕ ‘ਤੇ ਹੀ ਡਿੱਗ ਪਈ ਅਤੇ ਦਰਦ ਨਾਲ ਕੁਰਲਾਉਣ ਲੱਗੀ, ਪਰ ਇਸ ਹਾਲਤ ਵਿੱਚ ਉਸਦਾ ਪਤੀ ਉਸ ਨੂੰ ਕਿਸੇ ਹਸਪਤਾਲ ਲੈ ਜਾਣ ਦੀ ਬਜਾਏ, ਉਥੇ ਹੀ ਤੜਪਦੀ ਨੂੰ ਛੱਡ ਕੇ ਕਿਤੇ ਫੁੱਰਰ ਹੋ ਗਿਆ। ਸਹਾਇਤਾ ਟੀਮ ਦੇ ਬੁਲਾਰਾ ਗੌਤਮ ਗੋਇਲ ਨੇ ਦੱਸਿਆ ਕਿ ਔਰਤ ਅਤੇ ਨਵਜੰਮੀ ਬੱਚੀ ਦਾ ਪੂਰਾ ਧਿਆਨ ਰੱਖਿਆ ਜਾ ਰਿਹਾ ਹੈ।
Baby
ਨਵਜੰਮੇ ਬੱਚੇ ਦੀ ਹਾਲਤ ਹਲੇ ਗੰਭੀਰ ਬਣੀ ਹੋਈ ਹੈ, ਜਦ ਕਿ ਉਸਦੀ ਮਾਂ ਦੀ ਹਾਲਤ ਹੁਣ ਠੀਕ ਹੈ। ਦੋਨਾਂ ਦੇ ਇਲਾਜ ਵਿੱਚ ਕੋਈ ਕਮੀ ਨਹੀਂ ਰਹਿਣ ਦਿੱਤੀ ਜਾਵੇਗੀ।
