ਕੋਟਕਪੂਰਾ, 1 ਅਗੱਸਤ (ਗੁਰਿੰਦਰ ਸਿੰਘ): ਸਥਾਨਕ ਸਿੱਖਾਂਵਾਲਾ ਰੋਡ 'ਤੇ ਸਥਿਤ ਇਕ ਮਕਾਨ 'ਚ ਰਹਿ ਰਹੀ ਔਰਤ ਦੇ ਘਰ ਚਾਰ ਨੌਜਵਾਨਾਂ ਵਲੋਂ ਦੇਰ ਰਾਤ ਆ ਕੇ ਘਰ ਦਾ ਦਰਵਾਜਾ ਖੜਕਾਉਣ 'ਤੇ ਔਰਤ ਵਲੋਂ ਦਰਵਾਜਾ ਨਾ ਖੋਲ੍ਹਣ 'ਤੇ ਹਵਾਈ ਫ਼ਾਇਰ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਪੁਲਿਸ ਨੇ ਇਸ ਮਾਮਲੇ 'ਚ ਅਣਪਛਾਤੇ ਮੁਲਜ਼ਮਾਂ ਵਿਰੁਧ ਮਾਮਲਾ ਦਰਜ ਕਰ ਕੇ ਜਾਂਚ ਆਰੰਭ ਦਿਤੀ ਹੈ।

ਪੀੜਤਾ ਹੁਸਨਪ੍ਰੀਤ ਸੋਨੀ ਉਰਫ਼ ਜੰਨਤ ਮੁਤਾਬਕ ਲੰਘੀ ਰਾਤ ਅਚਾਨਕ ਉਸ ਦੇ ਘਰ ਦਾ ਦਰਵਾਜ਼ਾ ਕਿਸੇ ਨੇ ਖੜਕਾਇਆ, ਅੱਗੋਂ ਪੁੱਛਣ 'ਤੇ ਉਸ ਨੇ ਦਸਿਆ ਗਿਆ ਕਿ ਉਹ ਉਨ੍ਹਾਂ ਦੇ ਘਰ ਦੀ ਬਿਜਲੀ ਚੈੱਕ ਕਰਨ ਆਏ ਹਨ। ਪੀੜਤਾ ਨੇ ਡਰਦਿਆਂ ਦਰਵਾਜ਼ਾ ਨਾ ਖੋਲ੍ਹਿਆ ਤਾਂ ਉਹ ਗਾਲੀ-ਗਲੋਚ ਅਤੇ ਧਮਕੀਆਂ ਦੇਣ ਲੱਗੇ। ਮੁਲਜ਼ਮਾਂ ਵਲੋਂ ਲਗਾਤਾਰ ਤਿੰਨ ਹਵਾਈ ਫ਼ਾਇਰ ਕੀਤੇ ਗਏ, ਜਿਸ ਤੋਂ ਆਲੇ-ਦੁਆਲੇ ਦੇ ਬਾਸ਼ਿੰਦੇ ਜਾਗ ਗਏ ਤੇ ਮੁਲਜ਼ਮ ਫ਼ਰਾਰ ਹੋ ਗਏ।