ਪੁਰਸ਼ ਹਾਕੀ ਟੀਮ ਦੀ ਵੱਡੀ ਜਿੱਤ, 41 ਸਾਲ ਬਾਅਦ ਸੈਮੀ-ਫ਼ਾਈਨਲ 'ਚ ਪਹੁੰਚੀ

ਕੁਆਟਰ ਫ਼ਾਈਨਲ ਵਿਚ ਬਿ੍ਟੇਨ ਨੂੰ  3-1 ਨਾਲ ਹਰਾਇਆ

ਟੋਕੀਉ, 1 ਅਗੱਸਤ : ਐਤਵਾਰ ਨੂੰ  ਖੇਡੇ ਗਏ ਟੋਕੀਉ ਉਲੰਪਿਕ 'ਚ ਪੁਰਸ਼ ਹਾਕੀ ਮੈਚ ਦੇ ਕੁਆਰਟਰ ਫ਼ਾਈਨਲ ਮੁਕਾਬਲੇ 'ਚ ਭਾਰਤ ਨੇ ਬਿ੍ਟੇਨ ਨੂੰ  3-1 ਨਾਲ ਹਰਾ ਦਿਤਾ | ਟੋਕੀਉ ਵਿਚ ਖੇਡੇ ਗਏ ਹਾਕੀ ਦੇ ਕੁਆਰਟਰ ਫ਼ਾਈਨਲ ਮੈਚ ਦੌਰਾਨ ਗ਼ਲਤ ਅੰਪਾਈਰਿੰਗ ਦੀ ਮਾਰ ਝਲਦਿਆਂ ਭਾਰਤੀ ਟੀਮ ਵਲੋਂ ਸ਼ਾਨਦਾਰ ਖੇਡ ਦਾ ਪ੍ਰਦਰਸ਼ਨ ਕੀਤਾ ਗਿਆ | 1980 ਤੋਂ ਬਾਅਦ ਮਨਪ੍ਰੀਤ ਸਿੰਘ ਦੀ ਅਗਵਾਈ ਵਾਲੀ ਭਾਰਤੀ ਪੁਰਸ਼ ਹਾਕੀ ਟੀਮ ਨੇ ਪਹਿਲੀ ਵਾਰ 41 ਸਾਲ ਬਾਅਦ ਉਲੰਪਿਕ ਦੇ ਸੈਮੀਫ਼ਾਈਨਲ ਵਿਚ ਪ੍ਰਵੇਸ਼ ਕਰ ਕੇ ਇਤਿਹਾਸ ਰਚਿਆ ਹੈ | 1972 ਦੇ ਉਲੰਪਿਕ ਵਿਚ ਸੈਮੀਫ਼ਾਈਨਲ ਫ਼ਾਰਮੈਟ ਵਿਚ ਹਾਕੀ ਖੇਡੀ ਗਈ ਸੀ | ਇਸ ਤੋਂ ਬਾਅਦ 1976 ਵਿਚ ਟੀਮ ਇੰਡੀਆ ਨਾਕਆਟ ਵਿਚ ਨਹੀਂ ਪਹੁੰਚ ਸਕੀ | 
1980 ਵਿਚ ਭਾਰਤ ਨੇ ਸੋਨ ਤਮਗ਼ਾ ਜਿੱਤਿਆ, ਪਰ ਉਸ ਉਲੰਪਿਕ ਵਿਚ ਕੋਈ ਸੈਮੀਫ਼ਾਈਨਲ ਫ਼ਾਰਮੈਟ ਨਹੀਂ ਸੀ | ਗਰੁੱਪ ਪੜਾਅ ਤੋਂ ਬਾਅਦ, ਸੱਭ ਤੋਂ ਵੱਧ ਅੰਕਾਂ ਵਾਲੀਆਂ 2 ਟੀਮਾਂ ਸਿੱਧੇ ਫ਼ਾਈਨਲ ਵਿਚ ਖੇਡੀਆਂ ਸਨ |  
 ਟੀਮ ਇੰਡੀਆ ਹੁਣ 3 ਅਗੱਸਤ ਨੂੰ  ਸੈਮੀਫ਼ਾਈਨਲ ਵਿਚ ਬੈਲਜੀਅਮ ਨਾਲ ਭਿੜੇਗੀ | ਦੂਜਾ ਸੈਮੀਫ਼ਾਈਨਲ ਆਸਟ੍ਰੇਲੀਆ ਅਤੇ ਜਰਮਨੀ ਵਿਚਾਲੇ ਉਸੇ ਦਿਨ ਖੇਡਿਆ ਜਾਵੇਗਾ | ਜਦੋਂ ਕਿ 5 ਅਗੱਸਤ ਨੂੰ  ਟਾਪ-2 ਟੀਮਾਂ ਫ਼ਾਈਨਲ ਵਿਚ ਭਿੜਨਗੀਆਂ |
ਇਸ ਮੈਚ ਦੀ ਜਿੱਤ ਦੇ ਹੀਰੋ ਭਾਰਤੀ ਗੋਲਕੀਪਰ ਪੀ. ਆਰ. ਸ਼੍ਰੀਜੇਸ਼ ਰਹੇ, ਜਿਨ੍ਹਾਂ ਨੇ ਚਾਰ ਬਿਹਤਰੀਨ ਬਚਾਅ ਕੀਤੇ | ਭਾਰਤ ਵਲੋਂ ਦਿਲਪ੍ਰੀਤ ਸਿੰਘ ਨੇ 7ਵੇਂ ਮਿੰਟ 'ਚ ਫੀਲਡ ਗੋਲ ਕੀਤਾ | ਦੂਜਾ ਗੋਲ ਗੁਰਜੰਟ ਸਿੰਘ ਨੇ 16ਵੇਂ ਓਵਰ 'ਚ ਕੀਤਾ | ਹਾਲਾਂਕਿ ਤੀਜੇ ਕੁਆਰਟਰ 'ਚ ਬਿ੍ਟੇਨ ਨੇ ਵਾਪਸੀ ਕੀਤੀ ਤੇ 45ਵੇਂ ਮਿੰਟ 'ਚ ਸੈਮ ਵਾਰਡ ਨੇ ਗੋਲ ਕੀਤਾ ਤੇ ਸਕੋਰ 2-1 ਕਰ ਦਿਤਾ | ਹਾਰਦਿਕ ਸਿੰਘ ਨੇ 57ਵੇਂ ਮਿੰਟ 'ਚ ਗੋਲ ਦਾਗ ਕੇ ਲੀਡ ਨੂੰ  3-1 ਕਰ ਦਿਤਾ |     (ਏਜੰਸੀ)