ਪੰਜਾਬ 'ਚ ਲਾਗੂ ਹੋਵੇਗਾ ਨਵਾਂ ਫ਼ਾਇਰ ਸੇਫ਼ਟੀ ਕਾਨੂੰਨ, ਇਮਾਰਤਾਂ ਦੀ ਐਨਓਸੀ 'ਤੇ ਸਾਈਜ਼ ਦੇ ਹਿਸਾਬ ਨਾਲ ਲਗੇਗਾ ਫ਼ਾਇਰ ਟੈਕਸ

ਚੰਡੀਗੜ੍ਹ, 1 ਅਕਤੂਬਰ (ਭੁੱਲਰ): ਪੰਜਾਬ ਵਿਚ ਨਵਾਂ ਫ਼ਾਇਰ ਸੇਫ਼ਟੀ ਐਕਟ ਲਾਗੂ ਹੋਣ ਜਾ ਰਿਹਾ ਹੈ | ਇਸ ਤਹਿਤ ਪੰਜਾਬ ਵਿਚ ਫ਼ਾਇਰ ਟੈਕਸ ਲਾਗੂ ਕੀਤਾ ਜਾਵੇਗਾ ਅਤੇ ਫ਼ਾਇਰ ਪ੍ਰੀਵੈਨਸ਼ਨ ਐਂਡ ਲਾਈਫ਼ ਸੇਫ਼ਟੀ ਫ਼ੰਡ ਸੰਚਾਲਿਤ ਕੀਤਾ ਜਾਵੇਗਾ | ਨਵੇਂ ਐਕਟ ਦਾ ਨਾਂ ਪੰਜਾਬ ਫ਼ਾਇਰ ਐਂਡ ਐਮਰਜੈਂਸੀ ਸਰਵਿਸ ਐਕਟ 2022 ਹੋਵੇਗਾ | ਇਸ ਦਾ ਖਰੜਾ ਜਨਤਕ ਕਰਨ ਦੇ ਹੁਕਮ ਵੀ ਜਾਰੀ ਕੀਤੇ ਗਏ ਹਨ | ਹੁਣ ਇਸ ਨੂੰ  ਫ਼ਾਇਰ ਪ੍ਰੀਵੈਨਸ਼ਨ ਐਕਟ 2022 ਵਜੋਂ ਲਾਗੂ ਕੀਤਾ ਜਾਵੇਗਾ | ਇਹ 2016 ਐਕਟ ਦੀ ਥਾਂ ਲਵੇਗਾ, ਜਿਸ ਨੂੰ  5 ਸਾਲਾਂ ਦੀ ਮਿਆਦ ਦੇ ਬਾਅਦ 2012 ਵਿਚ ਪਹਿਲਾਂ ਸੋਧਿਆ ਗਿਆ ਸੀ | ਲਗਾਤਾਰ ਵਧ ਰਹੀ ਉਚਾਈ, ਡਿਜ਼ਾਈਨ, ਇਮਾਰਤਾਂ ਦੇ ਆਕਾਰ ਨੂੰ  ਧਿਆਨ ਵਿਚ ਰੱਖਦੇ ਹੋਏ ਕਾਨੂੰਨ ਵਿਚ ਵੀ ਬਦਲਾਅ ਕੀਤੇ ਜਾ ਰਹੇ ਹਨ |
ਨਵੇਂ ਬਦਲਾਅ ਤਹਿਤ ਹੁਣ ਇਮਾਰਤਾਂ ਦੇ ਮਾਲਕਾਂ ਨੂੰ  ਫ਼ਾਇਰ ਸੇਫ਼ਟੀ ਪ੍ਰਬੰਧਾਂ ਦੀ ਐਨਓਸੀ ਲੈਂਦੇ ਹੋਏ ਫ਼ਾਇਰ ਸੇਫ਼ਟੀ ਟੈਕਸ ਅਦਾ ਕਰਨਾ ਹੋਵੇਗਾ | ਨਵੇਂ ਕਾਨੂੰਨ ਵਿਚ ਸਪੱਸ਼ਟ ਕੀਤਾ ਗਿਆ ਹੈ ਕਿ ਹੁਣ ਇਮਾਰਤਾਂ ਦੇ ਮਾਲਕਾਂ ਨੂੰ  ਇਕ ਵੱਖਰਾ ਮੈਨੇਜਰ ਨਿਯੁਕਤ ਕਰਨਾ ਹੋਵੇਗਾ, ਜੋ ਫ਼ਾਇਰ ਸੁਰੱਖਿਆ ਦੇ ਪ੍ਰਬੰਧਾਂ ਦੀ ਦੇਖਭਾਲ ਕਰੇਗਾ | ਹਰ ਸਥਾਨਕ ਸੰਸਥਾ ਅਪਣੇ ਖੇਤਰ ਦੇ ਫ਼ਾਇਰ ਬਿ੍ਗੇਡ ਸਟੇਸ਼ਨ ਦੇ ਕੰਮ ਦੀ ਦੇਖਭਾਲ ਕਰੇਗੀ | ਫਾਇਰ ਸੇਫ਼ਟੀ ਅਫ਼ਸਰਾਂ ਨੂੰ  ਇਹ ਅਧਿਕਾਰ ਵੀ ਦਿਤਾ ਗਿਆ ਹੈ ਕਿ ਜੇਕਰ ਕਿਸੇ ਵੀ ਸੜਕ 'ਤੇ ਕਬਜ਼ਿਆਂ ਕਾਰਨ ਉਸ ਦੀ ਗੱਡੀ ਫਸ ਜਾਂਦੀ ਹੈ ਤਾਂ ਉਹ ਕਾਰਵਾਈ ਕਰ ਸਕਦੇ ਹਨ | ਇਸ ਤੋਂ ਇਲਾਵਾ ਪੰਜਾਬ ਵਿਚ ਡਾਇਰੈਕਟਰ ਆਫ਼ ਫ਼ਾਇਰ ਐਂਡ ਐਮਰਜੈਂਸੀ ਸਰਵਿਸਿਜ਼ ਦੀ ਨਿਯੁਕਤੀ ਹੋਵੇਗੀ | ਜੋ ਕਿ ਭਾਰਤ ਸਰਕਾਰ ਨੇ ਰਾਸ਼ਟਰੀ ਪੱਧਰ ਦੀਆਂ ਫ਼ਾਇਰ ਸੇਫ਼ਟੀ ਸੇਵਾਵਾਂ ਦੇ ਖੇਤਰ ਵਿਚ ਪੰਜਾਬ ਵਲੋਂ ਲਿੰਕ ਦਾ ਕੰਮ ਕਰੇਗਾ |