ਸੜਕ ਹਾਦਸਿਆਂ ਨੂੰ ਲੈ ਕੇ ਆਵਾਜਾਈ ਮੰਤਰਾਲੇ ਦੀ ਰੀਪੋਰਟ
Road Accidents in India-2022 Report News: ਸੜਕੀ ਆਵਾਜਾਈ ਅਤੇ ਰਾਜਮਾਰਗ ਮੰਤਰਾਲੇ ਨੇ ਸੜਕ ਹਾਦਸਿਆਂ ਸਬੰਧੀ ਸਾਲ 2022 ਦੀ ਰੀਪੋਰਟ ਜਨਤਕ ਕੀਤੀ ਹੈ। ਇਸ ਰੀਪੋਰਟ ਮੁਤਾਬਕ ਪੰਜਾਬ ਦੇ ਜ਼ਿਲ੍ਹਾ ਲੁਧਿਆਣਾ ਨੇ ਹਾਦਸਿਆਂ ਵਿਚ ਮਾਮੂਲੀ ਗਿਰਾਵਟ ਦਰਜ ਕਰਦਿਆਂ ਦੇਸ਼ ਦੇ ਪ੍ਰਮੁੱਖ ਸ਼ਹਿਰਾਂ ਵਿਚ ਅਪਣੀ ਰੈਂਕਿੰਗ ਵਿਚ ਸੁਧਾਰ ਕੀਤਾ ਹੈ। 2022 ਵਿਚ 467 ਸੜਕ ਹਾਦਸਿਆਂ ਦੇ ਨਾਲ, ਸ਼ਹਿਰ ਦੇਸ਼ ਵਿਚ 10-ਲੱਖ ਤੋਂ ਵੱਧ ਆਬਾਦੀ ਵਾਲੇ ਸ਼ਹਿਰਾਂ ਵਿਚੋਂ 43ਵੇਂ ਸਥਾਨ 'ਤੇ ਸੀ।
ਇਸ ਦੇ ਮੁਕਾਬਲੇ, ਲੁਧਿਆਣਾ ਨੇ 2021 ਵਿਚ 478 ਦੁਰਘਟਨਾਵਾਂ ਦੀ ਰੀਪੋਰਟ ਕੀਤੀ, ਜ਼ਿਲ੍ਹੇ ਨੇ ਦੇਸ਼-ਵਿਆਪੀ ਦਰਜਾਬੰਦੀ ਵਿਚ 36ਵਾਂ ਸਥਾਨ ਪ੍ਰਾਪਤ ਕੀਤਾ ਸੀ। ਰੀਪੋਰਟ ਵਿਚ ਇਹ ਵੀ ਖੁਲਾਸਾ ਹੋਇਆ ਹੈ ਕਿ ਸ਼ਹਿਰ ਵਿਚ ਹਾਦਸਿਆਂ ਵਿਚ ਹੋਈਆਂ ਮੌਤਾਂ ਦੀ ਗਿਣਤੀ 2021 ਵਿਚ 380 ਤੋਂ 2022 ਵਿਚ 364 ਹੋ ਗਈ ਹੈ। ਇਸ ਮਾਮਲੇ ਵਿਚ ਲੁਧਿਆਣਾ 2021 ਵਿਚ 14ਵੇਂ ਸਥਾਨ ਤੋਂ 2022 ਵਿਚ 15ਵੇਂ ਸਥਾਨ 'ਤੇ ਆ ਗਿਆ ਹੈ।
ਅੰਕੜਿਆਂ ਤੋਂ ਪਤਾ ਚੱਲਦਾ ਹੈ ਕਿ 2021 ਵਿਚ ਲੁਧਿਆਣਾ ਵਿਚ 478 ਸੜਕ ਹਾਦਸਿਆਂ ਵਿਚ 380 ਮੌਤਾਂ ਹੋਈਆਂ ਸਨ, ਜੋ ਕਿ 2016 ਤੋਂ ਬਾਅਦ ਸਭ ਤੋਂ ਵੱਧ ਸਨ ਜਦੋਂ 384 ਮੌਤਾਂ ਹੋਈਆਂ ਸਨ। ਇਸ ਸੂਬੇ ਦੇ ਸ਼ਹਿਰਾਂ ਵਿਚੋਂ ਲੁਧਿਆਣਾ ਸੱਭ ਤੋਂ ਵੱਧ ਸੜਕ ਹਾਦਸਿਆਂ ਦੇ ਮਾਮਲੇ ਵਿਚ ਸੱਭ ਤੋਂ ਉੱਪਰ ਹੈ।
ਅੰਮ੍ਰਿਤਸਰ ਦੇ ਅੰਕੜੇ
ਪੰਜਾਬ ਦੇ ਜ਼ਿਲ੍ਹਾ ਅੰਮ੍ਰਿਤਸਰ ਵਿਚ 2021 ਵਿਚ ਕੁੱਲ 98 ਸੜਕ ਹਾਦਸੇ ਵਾਪਰੇ ਜਦਕਿ 2022 ਵਿਚ ਹਾਦਸਿਆਂ ਦੀ ਗਿਣਤੀ 117 ਹੋ ਗਈ। ਇਸ ਮਾਮਲੇ ਵਿਚ 10-ਲੱਖ ਤੋਂ ਵੱਧ ਆਬਾਦੀ ਵਾਲੇ ਸ਼ਹਿਰਾਂ ਵਿਚ ਅੰਮ੍ਰਿਤਸਰ 50ਵੇਂ ਸਥਾਨ ’ਤੇ ਰਿਹਾ। ਅੰਕੜਿਆਂ ਅਨੁਸਾਰ 2021 ਵਿਚ 65 ਮੌਤਾਂ ਹੋਈਆਂ ਜਦਕਿ 2022 ਵਿਚ ਮੌਤਾਂ ਦੀ ਗਿਣਤੀ 82 ਦਰਜ ਕੀਤੀ ਗਈ। ਇਸ ਮਾਮਲੇ ਵਿਚ ਜ਼ਿਲ੍ਹਾ 48ਵੇਂ ਨੰਬਰ ਉਤੇ ਰਿਹਾ।
ਚੰਡੀਗੜ੍ਹ ਦੇ ਅੰਕੜੇ
ਚੰਡੀਗੜ੍ਹ ਵਿਚ ਸਾਲ 2021 ਵਿਚ 208 ਹਾਦਸੇ ਹੋਏ, ਜਦਕਿ ਸਾਲ 2022 ਵਿਚ ਹਾਦਸਿਆਂ ਦੀ ਗਿਣਤੀ 237 ਸੀ। ਅੰਕੜੇ ਦੱਸਦੇ ਹਨ ਕਿ 2021 ਦੇ ਮੁਕਾਬਲੇ 2022 ਵਿਚ ਹਾਦਸਿਆਂ ਵਿਚ ਮਰਨ ਵਾਲਿਆਂ ਦੀ ਗਿਣਤੀ ਘਟੀ ਹੈ। ਸਾਲ 2021 ਵਿਚ 96 ਲੋਕਾਂ ਦੀ ਮੌਤ ਹੋਈ ਸੀ, ਜਦਕਿ 2022 ਵਿਚ ਇਹ ਗਿਣਤੀ 83 ਸੀ। ਸਾਲ 2021 'ਚ ਚੰਡੀਗੜ੍ਹ 'ਚ ਹਾਦਸਿਆਂ 'ਚ 172 ਲੋਕ ਜ਼ਖਮੀ ਹੋਏ ਸਨ, ਜਦਕਿ 2022 'ਚ 203 ਲੋਕ ਜ਼ਖਮੀ ਹੋਏ ਸਨ। ਦੇਸ਼ ਵਿਚ 10-ਲੱਖ ਤੋਂ ਵੱਧ ਆਬਾਦੀ ਵਾਲੇ ਸ਼ਹਿਰਾਂ ਵਿਚੋਂ ਚੰਡੀਗੜ੍ਹ ਸੜਕ ਹਾਦਸਿਆਂ ਦੇ ਮਾਮਲੇ ਵਿਚ 2021 ਅਤੇ 22 ਵਿਚ 47ਵੇਂ ਸਥਾਨ ਉਤੇ ਸੀ।
ਦਿੱਲੀ ਵਿਚ ਸੱਭ ਤੋਂ ਵੱਧ ਮੌਤਾਂ
ਕੇਂਦਰੀ ਸੜਕ ਟਰਾਂਸਪੋਰਟ ਅਤੇ ਹਾਈਵੇਜ਼ ਮੰਤਰਾਲੇ ਦੁਆਰਾ ਜਾਰੀ ਕੀਤੀ ਗਈ ਰੀਪੋਰਟ ਅਨੁਸਾਰ, ਪਿਛਲੇ ਸਾਲ 10 ਲੱਖ ਤੋਂ ਵੱਧ ਆਬਾਦੀ ਵਾਲੇ ਸ਼ਹਿਰਾਂ ਵਿਚ ਦਿੱਲੀ ਵਿਚ ਸੜਕ ਦੁਰਘਟਨਾਵਾਂ ਵਿਚ ਸੱਭ ਤੋਂ ਵੱਧ ਮੌਤਾਂ ਹੋਈਆਂ। ਰੀਪੋਰਟ ਵਿਚ ਕਿਹਾ ਗਿਆ ਹੈ ਕਿ ਦਿੱਲੀ ਵਿਚ 2022 ਵਿਚ 5,652 ਹਾਦਸੇ ਦਰਜ ਕੀਤੇ ਗਏ, ਜੋ ਕਿ 2021 ਵਿਚ 4,720 ਤੋਂ ਵੱਧ ਹਨ। ਪਿਛਲੇ ਸਾਲ ਸੜਕ ਹਾਦਸਿਆਂ ਵਿਚ 1,461 ਲੋਕ ਮਾਰੇ ਗਏ ਸਨ ਜਦਕਿ 5,201 ਲੋਕ ਜ਼ਖ਼ਮੀ ਹੋਏ ਸਨ।
ਸ੍ਰੀਨਗਰ ਵਿਚ ਹੋਈਆਂ ਸੱਭ ਤੋਂ ਘੱਟ ਮੌਤਾਂ
ਅੰਕੜਿਆਂ ਅਨੁਸਾਰ 2021 ਅਤੇ 2022 ਵਿਚ ਸ੍ਰੀਨਗਰ ਵਿਚ ਸੜਕ ਹਾਦਸਿਆਂ ਕਾਰਨ ਸੱਭ ਤੋਂ ਘੱਟ ਮੌਤਾਂ ਦਰਜ ਕੀਤੀਆਂ ਗਈਆਂ। ਸ਼ਹਿਰ ਵਿਚ 2021 ’ਚ 40 ਅਤੇ 2022 ਵਿਚ 53 ਮੌਤਾਂ ਹੋਈਆਂ।
(For more news apart from Road Accidents in India-2022 Report News, stay tuned to Rozana Spokesman)
