image
ਰਾਘਵ ਚੱਢਾ ਸਮੇਤ ਤਿੰਨ 'ਆਪ' ਆਗੂਆਂ ਨੇ ਪੰਜਾਬ ਤੋਂ ਰਾਜ ਸਭਾ ਮੈਂਬਰ ਵਜੋਂ ਚੁਕੀ ਸਹੁੰ
ਨਵੀਂ ਦਿੱਲੀ, 2 ਮਈ : ਆਮ ਆਦਮੀ ਪਾਰਟੀ (ਆਪ) ਦੇ ਤਿੰਨ ਨੇਤਾਵਾਂ- ਰਾਘਵ ਚੱਢਾ, ਅਸ਼ੋਕ ਮਿੱਤਲ ਅਤੇ ਸੰਜੀਵ ਅਰੋੜਾ ਨੇ ਸੋਮਵਾਰ ਨੂੰ ਪੰਜਾਬ ਤੋਂ 'ਆਪ' ਦੇ ਰਾਜ ਸਭਾ ਮੈਂਬਰਾਂ ਵਜੋਂ ਸਹੁੰ ਚੁਕੀ | ਉਪ ਰਾਸ਼ਟਰਪਤੀ ਅਤੇ ਰਾਜ ਸਭਾ ਦੇ ਸਪੀਕਰ ਐਮ. ਵੈਂਕਈਆ ਨਾਇਡੂ ਨੇ 'ਆਪ' ਦੇ ਨਵੇਂ ਚੁਣੇ ਮੈਂਬਰਾਂ ਨੂੰ ਸੰਸਦ ਭਵਨ ਸਥਿਤ ਆਪਣੇ ਕਮਰੇ 'ਚ ਸਹੁੰ ਚੁਕਾਈ | ਤਿੰਨੋਂ ਨੇਤਾਵਾਂ ਨੂੰ ਮਾਰਚ 'ਚ ਪੰਜਾਬ ਤੋਂ ਬਿਨਾਂ ਵਿਰੋਧ ਚੁਣਿਆ ਗਿਆ ਸੀ, ਕਿਉਂਕਿ ਸੂਬੇ ਤੋਂ ਕਿਸੇ ਹੋਰ ਸਿਆਸੀਦਾਨ ਨੇ ਰਾਜ ਸਭਾ ਚੋਣਾਂ ਲਈ ਅਪਣਾ ਉਮੀਦਵਾਰ ਨਹੀਂ ਉਤਾਰਿਆ ਸੀ |
ਚੱਢਾ ਜਿਥੇ 'ਆਪ' ਦੇ ਸੀਨੀਅਰ ਨੇਤਾ ਹਨ, ਉਥੇ ਹੀ ਮਿੱਤਲ ਫਗਵਾੜਾ ਸਥਿਤ ਲਵਲੀ ਪ੍ਰੋਫੈਸ਼ਨਲ ਯੂਨੀਵਰਸਿਟੀ (ਐਲ.ਪੀ.ਯੂ) ਦੇ ਸੰਸਥਾਪਕ ਹਨ, ਜੋ ਸੂਬੇ ਦੀ ਪਹਿਲੀ ਨਿਜੀ ਯੂਨੀਵਰਸਿਟੀ ਹੈ | ਮੰਨਿਆ ਜਾਂਦਾ ਹੈ ਕਿ ਚੱਢਾ ਨੇ ਹਾਲ ਹੀ 'ਚ ਸੰਪੰਨ ਹੋਈਆਂ ਪੰਜਾਬ ਵਿਧਾਨ ਸਭਾ ਚੋਣਾਂ 'ਚ 'ਆਪ' ਦੀ ਸ਼ਾਨਦਾਰ ਜਿੱਤ 'ਚ ਅਹਿਮ ਭੂਮਿਕਾ ਨਿਭਾਈ ਸੀ | (ਪੀ.ਟੀ.ਆਈ)
