ਮਾਂ ਆਂਡੇ ਦੇਣ ਤੋਂ ਬਾਅਦ ਦੂਰ ਪਾਣੀ ਪੀਣ ਲਈ ਚਲੀ ਗਈ
ਫ਼ਾਜ਼ਿਲਕਾ (ਸੰਧੂ): ਫ਼ਾਜ਼ਿਲਕਾ ਦੇ ਖੇਤਾਂ ’ਚ ਝੋਨੇ ਦੀ ਬੀਜਾਈ ਕਰਨ ਗਏ ਕਿਸਾਨ ਨੇ ਇਨਸਾਨੀਅਤ ਦੀ ਮਿਸਾਲ ਕਾਇਮ ਕੀਤੀ ਹੈ। ਕਿਸਾਨ ਨੇ ਖੇਤ ’ਚ ਪੰਛੀ ਦੇ ਪਏ ਆਂਡਿਆਂ ਲਈ ਛਾਂ ਦਾ ਪ੍ਰਬੰਧ ਕੀਤਾ। ਤੇਜ਼ ਧੁੱਪ ਨੂੰ ਵੇਖ ਕੇ ਕਿਸਾਨ ਨੇ ਬੀਜਾਂ ਵਾਲਾ ਥੈਲਾ ਪਾੜਿਆ ਅਤੇ ਖੇਤ ’ਚ ਪੰਛੀਆਂ ਦੇ ਆਂਡੇ ਉਪਰ ਪਾ ਕੇ ਛਾਂ ਦਾ ਪ੍ਰਬੰਧ ਕੀਤਾ। ਆਂਡਿਆਂ ਅਤੇ ਪੰਛੀਆਂ ਲਈ ਪਾਣੀ ਦਾ ਪ੍ਰਬੰਧ ਵੀ ਕੀਤਾ।
ਕਿਸਾਨ ਦਾ ਕਹਿਣਾ ਹੈ ਕਿ ਅਪਣੇ ਆਂਡਿਆਂ ਨੂੰ ਖੇਤ ’ਚ ਛੱਡ ਕੇ ਮਾਂ ਪੰਛੀ ਪਾਣੀ ਪੀਣ ਚਲੀ ਜਾਂਦੀ ਹੈ ਜਿਸ ਲਈ ਉਸ ਨੇ ਪਾਣੀ ਵੀ ਰਖਿਆ ਹੋਇਆ ਹੈ ਜਿਸ ਤੋਂ ਬਾਅਦ ਇਹ ਪੰਛੀ ਖੇਤ ’ਚ ਵਾਪਸ ਆਇਆ ਅਤੇ ਇਸ ਛਾਂ ’ਚ ਅਪਣੇ ਆਂਡਿਆਂ ਦੀ ਰਾਖੀ ਕਰਦਾ ਵੇਖਿਆ ਗਿਆ। ਜਾਣਕਾਰੀ ਦਿੰਦੇ ਹੋਏ ਪਿੰਡ ਮੌਜ਼ਮ ਦੇ ਕਿਸਾਨ ਸੰਦੀਪ ਕੰਬੋਜ ਨੇ ਦਸਿਆ ਕਿ ਉਸ ਦੀ ਕਰੀਬ 7 ਏਕੜ ਜ਼ਮੀਨ ਹੈ
ਜਿਥੇ ਉਹ ਅੱਜ ਭਿਆਨਕ ਗਰਮੀ ’ਚ ਅਪਣੇ ਖੇਤ ’ਚ ਕੰਮ ਕਰ ਰਿਹਾ ਸੀ ਤਾਂ ਉਸ ਨੇ ਵੇਖਿਆ ਕਿ ਪੰਛੀਆਂ ਦੇ ਆਂਡੇ ਖੇਤ ਵਿਚ 46 ਡਿਗਰੀ ਤਾਪਮਾਨ ’ਚ ਧੁੱਪ ਵਿਚ ਪਏ ਹਨ। ਇਨ੍ਹਾਂ ਆਂਡਿਆਂ ਨੂੰ ਛਾਂ ਦੇਣ ਲਈ ਉਸ ਨੇ ਖੇਤ ’ਚ ਬੀਜੇ ਜਾ ਰਹੇ ਬੀਜਾਂ ਦੇ ਥੈਲੇ ਨੂੰ ਪਾੜਿਆ ਅਤੇ ਚਾਰ ਚੂਚਿਆਂ ਲਈ ਛਾਂ ਦਾ ਪ੍ਰਬੰਧ ਕਰ ਕੇ ਪੰਛੀਆਂ ਦੇ ਆਂਡਿਆਂ ਦੀ ਰਾਖੀ ਕੀਤੀ। ਸੰਦੀਪ ਕੰਬੋਜ ਦਾ ਕਹਿਣਾ ਹੈ ਕਿ ਨੇੜੇ-ਤੇੜੇ ਪਾਣੀ ਨਾ ਹੋਣ ਕਾਰਨ ਆਂਡੇ ਦੇਣ ਤੋਂ ਬਾਅਦ ਮਾਂ ਪੰਛੀ ਪਾਣੀ ਪੀਣ ਲਈ ਦੂਰ ਚਲੀ ਗਈ ਜਿਸ ਕਾਰਨ ਉਸ ਨੇ ਇਥੇ ਆਂਡਿਆਂ ਨੂੰ ਛਾਂ ਨਹੀਂ ਦਿਤੀ ਹੈ।
