ਕਿਸਾਨਾਂ ਨੇ ਭਾਜਪਾ ਆਗੂ ਹਰਜੀਤ ਗਰੇਵਾਲ ਦਾ ਡੇਢ ਏਕੜ ਝੋਨਾ ਵਾਹਿਆ

ਬਰਨਾਲਾ/ਧਨੌਲਾ, 2 ਜੁਲਾਈ (ਹਰਜਿੰਦਰ ਸਿੰਘ ਪੱਪੂ/ਅਮਨਦੀਪ ਬਾਂਸਲ) : ਜਦੋਂ ਦੇ ਕਿਸਾਨ ਕੇਂਦਰ ਦੀ ਮੋਦੀ ਹਕੂਮਤ ਵਲੋਂ ਪਾਸ ਕੀਤੇ ਗਏ ਤਿੰਨ ਕਾਲੇ ਕਾਨੂੰਨਾਂ ਵਿਰੁਧ ਪਹਿਲਾਂ ਪੰਜਾਬ ਤੇ ਸੱਤ ਮਹੀਨਿਆਂ ਤੋਂ ਦਿੱਲੀ ਦੀਆਂ ਬਰੂਹਾਂ 'ਤੇ ਬੈਠ ਕੇ ਧਰਨੇ ਮੁਜਾਹਰੇ ਕਰ ਰਹੇ ਹਨ, ਵਿਰੁਧ ਸ਼ੁਰੂ ਤੋਂ ਹੀ ਅੱਗ ਕੱਢ ਰਹੇ ਭਾਜਪਾ ਆਗੂ ਹਰਜੀਤ ਸਿੰਘ ਗਰੇਵਾਲ ਦੇ ਜੱਦੀ ਪਿੰਡ ਧਨੌਲਾ ਵਿਖੇ ਉਨ੍ਹਾਂ ਦੀ ਜ਼ਮੀਨ 'ਚ ਲਗਾਏ ਗਏ ਝੋਨੇ ਨੂੰ  ਕਿਸਾਨਾਂ ਵਲੋਂ ਵਾਹ ਦਿਤਾ ਗਿਆ | ਧਨੌਲਾ ਵਿਖੇ ਇੱਕਤਰ ਹੋਏ ਸੈਂਕੜੇ ਕਿਸਾਨਾਂ ਨਾਲ ਜਦੋਂ ਗੱਲਬਾਤ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਪੰਜਾਬ ਦੀ ਧਰਤੀ ਦੇ ਪਿੰਡ ਧਨੌਲਾ ਵਿਖੇ ਜਨਮ ਲੈਣ ਵਾਲੇ ਹਰਜੀਤ ਗਰੇਵਾਲ ਕਦੇ ਇਕ ਵੀ ਸ਼ਬਦ ਅਪਣੇ ਕਿਸਾਨ ਭਰਾਵਾਂ ਲਈ ਮੂੰਹ 'ਚੋਂ ਨਹੀਂ ਕੱਢਿਆ | ਹਮੇਸ਼ਾ ਅੰਦੋਲਨ 'ਚ ਸ਼ਾਮਲ ਕਿਸਾਨਾਂ ਨੂੰ  ਖ਼ਾਲਿਸਤਾਨੀ, ਪਾਕਿਸਤਾਨੀ, ਅਤਿਵਾਦੀ ਤੇ ਨਕਸਲਵਾੜੀ ਆਦਿ ਕਿਹਾ ਗਿਆ | ਕਿਸਾਨਾਂ ਨੇ ਕਿਹਾ ਕਿ ਪੰਜਾਬ ਦੀ ਧਰਤੀ 'ਤੇ ਪੈਦਾ ਹੋਣ ਵਾਲਾ ਕੋਈ ਆਗੂ ਅਪਣਿਆਂ ਵਿਰੁਧ ਮਾੜੇ ਤੋਂ ਮਾੜੇ ਸ਼ਬਦਾਂ ਦਾ ਇਸਤੇਮਾਲ ਕਰਦਾ ਹੋਇਆ | ਕਾਲੇ ਤਿੰਨ ਕਾਨੂੰਨ ਪਾਸ ਕਰਨ ਵਾਲੇ ਕੇਂਦਰ ਦੀ ਮੋਦੀ ਸਰਕਾਰ ਨੂੰ  ਸਹੀ ਤੇ ਅਪਣੇ ਕਿਸਾਨਾਂ ਨੂੰ  ਗ਼ਲਤ ਪੇਸ਼ ਕਰੇ ਤਾਂ ਉਹ ਪੰਜਾਬ ਦਾ ਵਾਸੀ ਨਹੀਂ ਹੋ ਸਕਦਾ | ਕਿਸਾਨਾਂ ਨੇ ਕਿਹਾ ਕਿ ਅਜੇ ਤਾਂ ਡੇਢ ਏਕੜ 'ਚ ਝੋਨਾ ਹੀ ਵਾਹਿਆ ਗਿਆ ਹੈ | ਆਉਣ ਵਾਲੇ ਸਮੇਂ 'ਚ ਗਰੇਵਾਲ ਨੂੰ  ਜ਼ਿਲ੍ਹਾ 'ਚ ਵੜਨ ਨਹੀਂ ਦਿਤਾ ਜਾਵੇਗਾ |