ਇਸ ਨਾਜ਼ੁਕ ਦੌਰ ਵਿਚ ਢੀਡਸਾ ਤੇ ਕੈਪਟਨ ਬਣ ਸਕਦੇ ਹਨ ਭਾਈ-ਭਾਈ
ਸੰਗਰੂਰ (ਬਲਵਿੰਦਰ ਸਿੰਘ ਭੁੱਲਰ) : ਪੰਜਾਬ ਦੇ ਲੋਕਾਂ ਵਿਚ ਚਰਚਾ ਹੈ ਕਿ ਕੈਪਟਨ ਅਮਰਿੰਦਰ ਸਿੰਘ ਕਾਂਗਰਸ ਪਾਰਟੀ ਛੱਡਣ ਤੋਂ ਬਾਅਦ ਕਿਸੇ ਸਮੇਂ ਵੀ ਭਾਜਪਾ ਵਿਚ ਸ਼ਾਮਲ ਹੋ ਸਕਦਾ ਹੈ ਪਰ ਦਿੱਲੀ ਤੋਂ ਵਾਪਸੀ ਵੇਲੇ ਚੰਡੀਗੜ੍ਹ ਏਅਰਪੋਰਟ ’ਤੇ ਕੈਪਟਨ ਅਮਰਿੰਦਰ ਸਿੰਘ ਨੇ ਪੱਤਰਕਾਰਾਂ ਦੇ ਸਵਾਲਾਂ ਦਾ ਜਵਾਬ ਦਿੰਦਿਆਂ ਇਹ ਸਪੱਸ਼ਟ ਕਰ ਦਿਤਾ ਸੀ ਕਿ ਮੈਂ ਕਾਂਗਰਸ ਪਾਰਟੀ ਛੱਡ ਦਿਤੀ ਹੈ ਪਰ ਭਾਜਪਾ ਵਿਚ ਸ਼ਾਮਲ ਨਹੀਂ ਹੋਵਾਂਗਾ।
Captain Amarinder Singh
ਇਸ ਸਪੱਸ਼ਟੀਕਰਨ ਦਾ ਕੋਈ ਵੀ ਅਰਥ ਕਢਿਆ ਜਾ ਸਕਦਾ ਹੈ। ਕਈਆਂ ਦਾ ਕਹਿਣਾ ਹੈ ਕਿ ਕੈਪਟਨ ਅਮਰਿੰਦਰ ਸਿੰਘ ਅਪਣੀ ਨਵੀਂ ਸਿਆਸੀ ਪਾਰਟੀ ਬਣਾ ਸਕਦਾ ਹੈ ਅਤੇ ਭਾਜਪਾ ਨਾਲ ਕੀਤੇ ਗੁਪਤ ਸਮਝੋਤੇ ਮੁਤਾਬਕ ਖ਼ੁਦ ਮੁੱਖ ਮੰਤਰੀ ਦਾ ਚਿਹਰਾ ਬਣ ਕੇ ਪਾਰਟੀ ਅੰਦਰ ਸੂਬੇ ਦੇ ਸਮੁੱਚੀ ਭਾਜਪਾ ਲੀਡਰਸ਼ਿਪ ਨੂੰ ਅਪਣੀ ਪਾਰਟੀ ਵਿਚ ਸ਼ਾਮਲ ਕਰ ਕੇ ਸੂਬੇ ਦੀਆਂ ਸਾਰੀਆਂ 117 ਸੀਟਾਂ ’ਤੇ ਚੋਣ ਲੜ ਸਕਦਾ ਹੈ। ਇਸ ਤਰ੍ਹਾਂ ਕਰਨ ਨਾਲ ਸੱਪ ਵੀ ਮਰ ਜਾਏਗਾ ਤੇ ਲਾਠੀ ਵੀ ਨਹੀਂ ਟੁੱਟੇਗੀ। ਇਹ ਵੀ ਸੱਚ ਹੈ ਕਿ ਕੈਪਟਨ ਹੁਣ 80 ਸਾਲ ਦਾ ਹੋ ਗਿਆ ਹੈ ਅਤੇ ਕਿਸੇ ਵੀ ਨਵੀਂ ਸਿਆਸੀ ਪਾਰਟੀ ਨੂੰ ਇੰਨੀ ਵੱਡੀ ਉਮਰ ਦਾ ਆਗੂ ਕਦੇ ਵਾਰਾ ਨਹੀਂ ਖਾਂਦਾ, ਕਿਉਂਕਿ ਉਸ ਦੀਆ ਸਰੀਰਕ ਗਤੀਵਿਧੀਆਂ ਇਕ ਤਰ੍ਹਾਂ ਨਾਲ ਠਹਿਰਾਉ ਦੀ ਸਥਿਤੀ ਮੰਗਦੀਆਂ ਹਨ
Navjot Sidhu
ਪਰ ਕੈਪਟਨ ਨਾਲੋਂ ਭਾਜਪਾ ਲਈ ਨਵਜੋਤ ਸਿੱਧੂ ਜ਼ਿਆਦਾ ਕਾਰਗਰ ਹੋ ਸਕਦਾ ਸੀ ਕਿਉਂਕਿ ਉਸ ਕੋਲ ਸਰੀਰਕ ਬਲ ਤੋਂ ਇਲਾਵਾ ਅਪਣਾ ਵਿਸ਼ਾਲ ਨਿੱਜੀ ਕੇਡਰ ਵੀ ਸੀ ਜਿਸ ਨਾਲ ਉਹ ਭਾਜਪਾ ਲਈ ਬਹੁਤ ਲਾਹੇਵੰਦ ਸਾਬਤ ਹੋ ਸਕਦਾ ਸੀ। ਬਾਕੀ ਇਹ ਸੱਚ ਹੈ ਕਿ ਕੈਪਟਨ ਭਾਜਪਾ ’ਚ ਜਾ ਸਕਦਾ ਹੈ, ਭਾਜਪਾ ਨਾਲ ਸਮਝੌਤਾ ਕਰ ਸਕਦਾ ਹੈ, ਅਪਣੀ ਨਵੀਂ ਪਾਰਟੀ ਬਣਾ ਸਕਦਾ ਹੈ ਅਤੇ ਲੋਕਾਂ ਵਿਚ ਇਹ ਵੀ ਚਰਚਾ ਹੈ ਕਿ ਕੈਪਟਨ ਅਮਰਿੰਦਰ ਸਿੰਘ ਅਤੇ ਸੁਖਦੇਵ ਸਿੰਘ ਢੀਂਡਸਾ ਵੀ ਇਸ ਨਾਜ਼ੁਕ ਦੌਰ ਵਿਚ ਭਾਈ ਭਾਈ ਬਣ ਕੇ ਆਪਸ ਵਿਚ ਹੱਥ ਮਿਲਾ ਸਕਦੇ ਹਨ ਕਿਉਂਕਿ ਇਨ੍ਹਾਂ ਦੋਵਾਂ ਆਗੂਆਂ ਦੀ ਸਿਆਸੀ ਹੋਣੀ ਵੀ ਇੱਕੋ ਜਿਹੀ ਹੈ।
Sukhdev Singh Dhindsa
ਲੋਕਾਂ ਨੂੰ ਇਹ ਵੀ ਪਤਾ ਹੈ ਕਿ ਬਾਦਲਾਂ ਵਿਰੁਧ ਸੁਖਦੇਵ ਸਿੰਘ ਢੀਂਡਸਾ ਦੇ ਸਟੈਂਡ ਨੂੰ ਵਧੇਰੇ ਮਜ਼ਬੂਤੀ ਅਤੇ ਤਾਕਤ ਬਖ਼ਸ਼ਣ ਦੇ ਮਕਸਦ ਤਹਿਤ ਮੋਦੀ ਸਰਕਾਰ ਵਲੋਂ ਰਾਜ ਸਭਾ ਮੈਂਬਰ ਸੁਖਦੇਵ ਸਿੰਘ ਢੀਂਡਸਾ ਨੂੰ ਪਦਮ ਭੂਸ਼ਣ ਸਨਮਾਨ ਨਾਲ ਨਿਵਾਜ਼ਿਆ ਗਿਆ ਸੀ ਜਿਸ ਦੇ ਚਲਦਿਆਂ ਇਹ ਦੋਵੇਂ ਆਗੂ ਸੂਬੇ ਅੰਦਰ ਭਾਜਪਾ ਦੀ ਮਦਦ ਨਾਲ ਨਵੀਂ ਪਾਰਟੀ ਅਤੇ ਨਵੀਂ ਸਰਕਾਰ ਦੇ ਗਠਨ ਬਾਰੇ ਨਵੇਂ ਸਿਰੇ ਤੋਂ ਸੋਚ ਸਕਦੇ ਹਨ। ਇਸ ਤੋਂ ਇਲਾਵਾ ਪੰਜਾਬ ਦਾ ਕੋਈ ਤੀਸਰਾ ਮਕਬੂਲ ਸਿਆਸੀ ਚਿਹਰਾ ਵੀ ਲਾਲਚਵਸ ਭਾਜਪਾ ਦੇ ਮੱਕੜਜਾਲ ਵਿਚ ਫਸ ਕੇ ਮੁੱਖ ਮੰਤਰੀ ਬਣਨ ਦਾ ਭਰਮ ਪਾਲ ਸਕਦਾ ਹੈ ਪਰ ਇਸ ਸਭ ਕੁਝ ਦੇ ਬਾਵਜੂਦ ਪੰਜਾਬ ਦਾ ਕਿਹੜਾ ਸਿਆਸੀ ਆਗੂ ਦਿੱਲੀ ਵਿਖੇ ਚੱਲ ਰਹੇ ਇਕ ਸਾਲ ਪੁਰਾਣੇ ਰੋਸ ਧਰਨੇ ਦੌਰਾਨ ਰੱਬ ਨੂੰ ਪਿਆਰੇ ਹੋਏ ਅਤੇ ਬੇ-ਮੌਤ ਮਰੇ ਕਿਸਾਨਾਂ ਦੀਆ 600 ਤੋਂ ਵੀ ਵੱਧ ਲਾਸ਼ਾਂ ਉਪਰੋਂ ਲੰਘ ਕੇ ਭਾਜਪਾ ਨਾਲ ਖੜਨ ਦਾ ਸਮਝੌਤਾ ਅਤੇ ਹੌਸਲਾ ਇਕੱਠਾ ਕਰ ਕਰ ਕੇ ਲਿਆਵੇਗਾ?
