ਰੂਸ ਵਿਰੁਧ ਲਾਮਬੰਦ ਹੋਇਆ ਪੂਰਾ ਵਿਸ਼ਵ, ਯੂਕਰੇਨ 'ਚ ਹਮਲੇ ਤੇਜ਼ ਹੋਏ

ਰੂਸ ਨੇ ਯੂਕਰੇਨ ਦੀਆਂ ਪ੍ਰਮੁਖ ਬੰਦਰਗਾਹਾਂ ਨੂੰ  ਘੇਰਿਆ, ਰਿਹਾਇਸ਼ੀ ਇਮਾਰਤਾਂ 'ਤੇ ਕੀਤੇ ਹਵਾਈ ਹਮਲੇ

ਕੀਵ, 3 ਮਾਰਚ : ਰੂਸ ਵਿਰੁਧ ਲਾਮਬੰਦ ਹੁੰਦੇ ਹੋਏ ਬੁਧਵਾਰ ਨੂੰ  ਸੰਯੁਕਤ ਰਾਸ਼ਟਰ ਵਿਚ ਜ਼ਿਆਦਾਤਰ ਦੇਸ਼ਾਂ ਨੇ ਉਸ ਨੂੰ  ਯੂਕਰੇਨ 'ਚੋਂ ਬਾਹਰ ਕੱਢਣ ਦੀ ਮੰਗ ਕੀਤੀ | ਰੂਸੀ ਫ਼ੌਜ ਨੇ ਯੂਕਰੇਨ ਦੇ ਦੂਜੇ ਸੱਭ ਤੋਂ ਵੱਡੇ ਸ਼ਹਿਰ ਵਿਚ ਬੰਬਾਰੀ ਫਿਰ ਸ਼ੁਰੂ ਕਰ ਦਿਤੀ ਹੈ ਅਤੇ ਇਸ ਨਾਲ ਦੇਸ਼ ਦੀ ਰਾਜਧਾਨੀ 'ਤੇ ਖ਼ਤਰਾ ਹੋਰ ਵੱਧ ਗਿਆ ਹੈ | ਰੂਸ ਨੇ ਯੂਕਰੇਨ ਦੀਆਂ ਪ੍ਰਮੁਖ ਬੰਦਰਗਾਹਾਂ ਨੂੰ  ਵੀ ਘੇਰ ਲਿਆ ਹੈ |  ਰੂਸੀ ਹਵਾਈ ਫ਼ੌਜ ਨੇ ਯੂਕਰੇਨ ਦੀ ਰਾਜਧਾਨੀ ਕੀਵ ਨੇੜੇ ਇਕ ਰਿਹਾਇਸ਼ੀ ਇਮਾਰਤ 'ਤੇ ਐਸ.ਯੂ-25 ਜਹਾਜ਼ ਰਾਹੀਂ ਹਮਲੇ ਕੀਤੇ | ਰੂਸ ਦਾ ਦਾਅਵਾ ਹੈ ਕਿ ਪਿਛਲੇ ਹਫ਼ਤੇ ਸ਼ੁਰੂ ਹੋਈ ਫ਼ੌਜੀ ਕਾਰਵਾਈ ਵਿਚ ਹੁਣ ਤਕ ਕਰੀਬ 500 ਰੂਸੀ ਫ਼ੌਜੀ ਮਾਰੇ ਗਏ ਹਨ ਅਤੇ ਕਰੀਬ 1600 ਜ਼ਖ਼ਮੀ ਹਨ | ਉਥੇ ਹੀ ਯੂਕਰੇਨ ਨੇ ਅਪਣੀ ਫ਼ੌਜ ਦੇ ਮਾਰੇ ਗਏ ਜਾਂ ਜ਼ਖ਼ਮੀ ਹੋਏ ਫ਼ੌਜੀਆਂ ਦੀ ਜਾਣਕਾਰੀ ਸਾਂਝੀ ਨਹੀਂ ਕੀਤੀ | ਦੋਹਾਂ ਦੇਸ਼ਾਂ ਦੇ ਦਾਅਵਿਆਂ ਦੀ ਹੁਣ ਤਕ ਪੁਸ਼ਟੀ ਨਹੀਂ ਹੋ ਸਕੀ |
 ਯੂਕਰੇਨ ਅਤੇ ਰੂਸ ਦੇ ਰਾਜਦੂਤ ਦੂਜੀ ਵਾਰ ਬੇਲਾਰੂਸ ਵਿਚ ਮੁਲਾਕਾਤ ਕਰਨਗੇ, ਤਾਕਿ ਜੰਗ ਰੋਕਣ ਲਈ ਕੋਈ ਢੁਕਵਾਂ ਹੱਲ ਲਭਿਆ ਜਾ ਸਕੇ | ਹਾਲਾਂਕਿ ਦੋਹਾਂ ਵਿਚਾਲੇ ਸਹਿਮਤੀ ਬਣਨ ਦੀ ਸੰਭਾਵਨਾ ਘੱਟ ਹੀ ਨਜ਼ਰ ਆ ਰਹੀ ਹੈ, ਕਿਉਂਕਿ ਰੂਸ ਦਾ ਵਫ਼ਦ ਕਈ ਘੰਟਿਆਂ ਤੋਂ ਬੇਲਾਰੂਸ ਸਰਹੱਦ 'ਤੇ ਯੂਕਰੇਨੀ ਵਫ਼ਦਾ ਦਾ ਇੰਤਜ਼ਾਰ ਕਰ ਰਿਹਾ ਸੀ ਪਰ ਉਹ ਨਹੀਂ ਆਇਆ | ਰੂਸੀ ਬੁਲਾਰੇ ਦਮਿਤਰੀ ਪੇਸਕੋਵ ਨੇ ਕਿਹਾ,''ਯੂਕਰੇਨ ਨਾਲ ਗੱਲਬਾਤ ਲਈ ਸਾਡਾ ਵਫ਼ਦ ਬੁਧਵਾਰ ਦੁਪਹਿਰ ਤੋਂ ਬੇਲਾਰੂਸ ਵਿਚ ਮੌਜੂਦ ਹੈ, ਪਰ ਯੂਕਰੇਨ ਦਾ ਦਲ ਹੁਣ ਤਕ ਇਥੇ ਨਹੀਂ ਪਹੁੰਚਿਆ | ਅਸੀਂ ਉਨ੍ਹਾਂ ਦਾ ਇੰਤਜ਼ਾਰ ਕਰ ਰਹੇ ਹਾਂ | ਉਮੀਦ ਹੈ ਕਿ ਉਹ ਜਲਦੀ ਇਥੇ ਪਹੁੰਚਣਗੇ |'' ਹਾਲਾਂਕਿ ਤੈਅ ਇਹ ਹੋਇਆ ਸੀ ਕਿ ਗੱਲਬਾਤ ਬੇਲਾਰੂਸ ਵਿਚ ਨਹੀਂ, ਪੋਲੈਂਡ ਵਿਚ ਹੋਵੇਗੀ, ਪਰ ਰੂਸ ਦਾ ਵਫ਼ਦ ਬੇਲਾਰੂਸ ਵਿਚ ਮੌਜੂਦ ਹੈ |
  ਦੂਜੇ ਪਾਸੇ ਸੰਯੁਕਤ ਰਾਸ਼ਟਰ ਨਿਗਰਾਨੀ ਏਜੰਸੀ ਦੇ ਪ੍ਰਮੁਖ ਨੇ ਸੁਚੇਤ ਕਰਦਿਆਂ ਕਿਹਾ ਕਿ ਜੰਗ ਯੂਕਰੇਨ ਦੇ 15 ਪਰਮਾਣੂ ਰਿਐਕਟਰਾਂ ਲਈ ਖ਼ਤਰਾ ਬਣ ਗਈ ਹੈ | ਅੰਤਰਰਾਸ਼ਟਰੀ ਪਰਮਾਣੂ ਊਰਜਾ ਏਜੰਸੀ ਦੇ ਰਾਫ਼ੇਲ ਗਰਾਸੀ ਨੇ ਕਿਹਾ ਕਿ ਜੰਗ ਅਜਿਹੀ ਥਾਂ ਹੋ ਰਹੀ ਹੈ, ਜਿਥੇ ਵੱਡੀਆਂ ਪਰਮਾਣੂ ਊਰਜਾ ਸੁਵਧਾਵਾਂ ਸਥਾਪਤ ਹਨ | ਉਨ੍ਹਾਂ ਕਿਹਾ ਕਿ ਇਹ ਬੇਹਦ ਚਿੰਤਾ ਦੀ ਗੱਲ ਹੈ | ਰੂਸ ਨੇ ਪਹਿਲਾਂ ਤੋਂ ਹੀ ਬੰਦ ਪਏ ਚੇਨਾਰਬਿਲ ਪਰਮਾਥੂ ਪਲਾਂਟ 'ਤੇ ਕਬਜ਼ਾ ਕਰ ਲਿਆ ਹੈ | ਰੂਸੀ ਫ਼ੌਜ ਵਲੋਂ ਯੂਕਰੇਨ ਦੀਆਂ ਪ੍ਰਮੁਖ ਬੰਦਰਗਾਹਾਂ ਦੀ ਘੇਰਾਬੰਦੀ ਦੇ ਨਾਲ ਹੀ ਕੀਵ 'ਤੇ ਬੰਬਾਰੀ ਤੇਜ਼ ਕਰ ਦਿਤੀ ਹੈ, ਜਦੋਂਕਿ ਕੀਵ ਦੇ ਬਾਹਰ ਵਿਸ਼ਾਲ ਬੰਖ਼ਤਬੰਦ ਗੱਡੀਆਂ ਦੇਖੀਆਂ ਜਾ ਰਹੀਆਂ ਹਨ |
  ਇਸ ਵਿਚਾਲੇ ਅਮਰੀਕਾ ਨੇ ਰੂਸ ਦੇ ਨਾਲ-ਨਾਲ ਬੇਲਾਰੂਸ 'ਤੇ ਵੀ ਸਖ਼ਤ ਪਾਬੰਦੀਆਂ ਲਗਾਉਣ ਦਾ ਐਲਾਨ ਕੀਤਾ ਹੈ | ਵ੍ਹਾਈਟ ਹਾਊਸ ਨੇ ਕਿਹਾ ਕਿ ਰੂਸ ਅਤੇ ਬੇਲਾਰੂਸ ਦੇ ਰਖਿਆ ਸੈਕਟਰ ਵਿ ਹੋਣ ਵਾਲੇ ਨਿਰਯਾਤ 'ਤੇ ਪਾਬੰਦੀ ਲਗਾਈ ਗਈ ਹੈ | ਸੰਯੁਕਤ ਰਾਸ਼ਟਰ ਮਹਾਂਸਪਾ (ਯੂਐਨਜੀਏ) ਵਿਚ ਬੁਧਵਾਰ ਰਾਤ ਯੂਕਰੇਨ 'ਚੋਂ ਰੂਸੀ ਫ਼ੌਜ ਦੀ ਵਾਪਸੀ ਲਈ ਵੋਟਿੰਗ ਹੋਈ | ਇਸ ਦੇ ਪੱਖ ਵਿਚ 141, ਜਦੋਂ ਕਿ ਵਿਰੋਧ ਵਿਚ 5 ਵੋਟਾਂ ਪਈਆਂ | ਭਾਰਤ ਸਮੇਤ 35 ਦੇਸ਼ਾਂ ਨੇ ਵੋਟਿੰਗ ਵਿਚ ਹਿੱਸਾ ਨਹੀਂ ਲਿਆ | ਰੂਸ ਦੇ ਪੱਖ ਵਿਚ ਵੋਟ ਪਾਉਣ ਵਾਲੇ ਦੇਸ਼ਾਂ ਵਿਚ, ਰੂਸ, ਬੇਲਾਰੂਸ, ਉੱਤਰ ਕੋਰੀਆ, ਇਰੀਟ੍ਰੀਆ ਅਤੇ ਸੀਰੀਆ ਸ਼ਾਮਲ ਹਨ | (ਏਜੰਸੀ)