ਪਿਛਲੇ ਦਿਨੀਂ ਪਾਕਿਸਤਾਨ ਵਿਖੇ ਹੋਈਆਂ ਆਮ ਚੋਣਾਂ ਵਿੱਚ ਰਾਏਕੋਟ ਦੇ ਨਵਾਬ ਰਾਏ ਪਰਿਵਾਰ ਦੇ ਮੈਂਬਰ ਰਾਏ ਮੁਹੰਮਦ ਮੁਰਤਜਾ ਦੇ ਪਾਕਿਸਤਾਨ ਨੈਸ਼ਨਲ ਅਸੰਬਲੀ..............
ਰਾਏਕੋਟ : ਪਿਛਲੇ ਦਿਨੀਂ ਪਾਕਿਸਤਾਨ ਵਿਖੇ ਹੋਈਆਂ ਆਮ ਚੋਣਾਂ ਵਿੱਚ ਰਾਏਕੋਟ ਦੇ ਨਵਾਬ ਰਾਏ ਪਰਿਵਾਰ ਦੇ ਮੈਂਬਰ ਰਾਏ ਮੁਹੰਮਦ ਮੁਰਤਜਾ ਦੇ ਪਾਕਿਸਤਾਨ ਨੈਸ਼ਨਲ ਅਸੰਬਲੀ ਅਤੇ ਪੰਜਾਬ ਵਿਧਾਨਸਭਾ ਲਈ ਚੁਣੇ ਜਾਣ ਤੇ ਉਨ੍ਹਾਂ ਦੇ ਪੁਰਖਿਆਂ ਦੇ ਸ਼ਹਿਰ ਰਾਏਕੋਟ ਦੇ ਨਿਵਾਸੀਆਂ 'ਚ ਖੁਸ਼ੀ ਦਾ ਮਾਹੌਲ ਪਾਇਆ ਜਾ ਰਿਹਾ ਹੈ। ਜਿਕਰਯੋਗ ਹੈ ਕਿ ਰਾਏ ਮੁਹੰਮਦ ਇਕਬਾਲ ਦਾ ਪੋਤਾ ਰਾਏ ਮੁਹੰਮਦ ਮੁਰਤਜਾ ਪਾਕਿਸਤਾਨ ਤਹਿਰੀਕ-ਏ-ਇੰਸਾਫ ਪਾਰਟੀ ਦੇ ਉਮੀਦਵਾਰ ਵਜ਼ੋਂ ਚੋਣ ਲੜਦੇ ਹੋਏ ਪੰਜਾਬ ਸੂਬੇ ਦੀ ਚਿਚਾਵਤਨੀ (ਜ਼ਿਲ੍ਹਾ ਸਾਹੀਵਾਲ) ਪਾਰਲੀਮੈਂਟ ਸੀਟ ਤੋਂ 26000 ਵੋਟਾਂ ਦੇ ਫਰਕ ਨਾਲ ਜਿੱਤ ਹਾਸਲ ਕੀਤੀ
ਅਤੇ 1800 ਵੋਟਾਂ ਦੇ ਫਰਕ ਨਾਲ ਵਿਧਾਨਸਭਾ ਸੀਟ ਤੋਂ ਚੋਣ ਜਿੱਤੇ ਹਨ। ਜਿਕਰਯੋਗ ਹੈ ਕਿ ਰਾਏਕੋਟ ਦਾ ਇਹ ਰਾਏ ਪਰਿਵਾਰ ਵੰਡ ਤੋਂ ਪਹਿਲਾਂ ਭਾਰਤ ਵਿੱਚ ਅਤੇ ਵੰਡ ਤੋਂ ਬਾਅਦ ਵਿੱਚ ਪਾਕਿਸਤਾਨ ਦੀ ਰਾਜਨੀਤੀ ਵਿੱਚ ਪੂਰੀ ਤਰਾਂ ਸਰਗਰਮ ਹੈ। ਇਸ ਤੋਂ ਪਹਿਲਾਂ ਉਨ੍ਹਾਂ ਦੇ ਪਿਤਾ ਰਾਏ ਅਲੀ ਨਵਾਜ ਪੰਜਾਬ ਵਿਧਾਨਸਭਾ (ਪਾਕਿਸਤਾਨ) ਵਿੱਚ ਵੀ ਮੰਤਰੀ ਰਹੇ ਅਤੇ ਉਨ੍ਹਾਂ ਦੇ ਚਾਚਾ ਰਾਏ ਅਹਿਮਦ ਨਵਾਜ, ਰਾਏ ਅਜ਼ੀਜ ਉੱਲ੍ਹਾ ਅਤੇ ਹੁਸੈਨ ਨਵਾਜ ਵੀ ਇਸ ਹਲਕੇ ਤੋਂ ਪਾਕਿਸਤਾਨ ਨੈਸ਼ਨਲ ਅਸੰਬਲੀ ਦੇ ਮੈਂਬਰ ਚੁਣੇ ਜਾ ਚੁੱਕੇ ਹਨ। ਅੱਜ ਇਸ ਸਬੰਧੀ ਜਦ ਰਾਏ ਪਰਿਵਾਰ ਦੇ ਵੰਸ਼ਜ ਰਾਏ ਅਜ਼ੀਜ ਉੱਲ੍ਹਾ ਨਾਲ ਇਸ ਸਬੰਧੀ ਗੱਲ ਕੀਤੀ ਗਈ
ਤਾਂ ਉਨ੍ਹਾਂ ਇਸ ਗੱਲ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਉਨ੍ਹਾਂ ਦੇ ਭਤੀਜੇ ਰਾਏ ਮੁਹੰਮਦ ਮੁਰਤਜਾ ਨੇ ਮੁਹੰਮਦ ਇਮਰਾਨ ਖਾਨ ਦੀ ਪਾਰਟੀ (ਪੀ.ਟੀ.ਆਈ) ਵਲੋਂ ਚੋਣ ਲੜਦੇ ਹੋਏ ਇਹ ਚੋਣ ਜਿੱਤੀ ਹੈ। ਜਿਕਰਯੋਗ ਹੈ ਕਿ ਰਾਏ ਪਰਿਵਾਰ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਵਲੋਂ ਬਖਸ਼ਿਸ਼ ਹੋਏ ਪਵਿੱਤਰ ਗੰਗਾਸਾਗਰ ਦੀ ਸੇਵਾ ਲਈ ਜਾਣਿਆ ਜਾਂਦਾ ਹੈ।ਰਾਏ ਪਰਿਵਾਰ ਦੇ ਮੈਂਬਰ ਦੀ ਪਾਕਿਸਤਾਨ 'ਚ ਹੋਈ ਜਿੱਤ ਤੇ ਰਾਏਕੋਟ ਵਾਸੀਆਂ 'ਚ ਖੁਸ਼ੀ ਦਾ ਮਾਹੌਲ ਪਾਇਆ ਜਾ ਰਿਹਾ ਹੈ,
ਉਨ੍ਹਾਂ ਦੀ ਜਿੱਤ ਦੀ ਖੁਸ਼ੀ 'ਚ ਕਾਂਗਰਸ ਦੇ ਸੂਬਾ ਸਕੱਤਰ ਅਤੇ ਰਾਏ ਪਰਿਵਾਰ ਦੇ ਕਰੀਬੀ ਰਾਮ ਕੁਮਾਰ ਛਾਪਾ ਅਤੇ ਹੋਰਨਾਂ ਵਲੋਂ ਲੱਡੂ ਵੰਡ ਕੇ ਖੁਸ਼ੀ ਮਨਾਈ ਗਈ। ਇਸ ਮੌਕੇ ਉਨ੍ਹੰ ਨਾਲ ਮੁਹੰਮਦ ਇਮਰਾਨ ਖਾਨ, ਬਲਜਿੰਦਰ ਸਿੰਘ ਰਿੰਪਾ, ਜਗਤਾਰ ਸਿੰਘ ਤਾਰੀ, ਜਤਿਨ ਅੱਗਰਵਾਲ, ਬਰਨੀਸ਼ ਜਿੰਦਲ, ਸੰਨੀ ਪਰੂਥੀ, ਹਰਪ੍ਰੀਤ ਸਿੰਘ ਸਮੇਤ ਹੋਰ ਕਈ ਹਾਜ਼ਰ ਸਨ।
